मत्ती 12
12
विश्रामबारयागु खँ
मर्क २:२३-२८; लूक ६:१-५
1येशू विश्रामबार#१२:१ यहूदीतय् विश्रामबार खुन्हु खुन्हु छ्वबया लँ जुयाः झाया च्वंबलय् वय्कःया चेलातय्सं नये पित्याःगुलिं छ्वमा स्वहाय्काः नयेत स्वल।#व्य २३:२५ 2इमिसं अथे याःगु खनाः फरिसीतय्सं वय्कःयात धाल – “स्व, छिमि चेलातय्सं विश्रामबार खुन्हु छु याये मज्यू धाःगु खः व हे यानाच्वन।”
3अले वय्कलं लिसः बियादिल – “दाऊदं थः व थःनाप वःपिनि नये पित्याःबलय् छु यात धयागु खँ छिमिसं ब्वनागु मदु ला? 4गुकथं वं परमेश्वरया छेँय् दुहां वनाः अन छायातःगु मरि नल? अले थःनाप वःपिन्त नं नकल। परमेश्वरयात छायातःगु मरि ला पुजाहारीतय्सं सिबय् मेपिन्सं नये हे मज्यू।#लेवी २४:९ #१ शमू २१:१-६ 5विश्रामबार पतिकं पुजाहारीतय्सं विश्रामबारयागु नियम मानय् मयाः। अय्नं इपिं दोषी ठहरय् मजू धकाः व्यवस्थाय् च्वयातःगु खँ छिमिसं ब्वनागु मदु ला?#गन्ती २८:९-१० 6अय्नं जिं छिमित धाये – देगः स्वयाः तःधंम्ह छम्ह थन दु। 7‘बलि बी हःगु जितः मयः, जितः ला दया माया जक यः’ धकाः धर्मशास्त्रय् च्वयातःगु खँ बांलाक थुइके फुगु जूसा छिमिसं छुं मयाःपिन्त दोषी धकाः पाः याइ मखुगु।#मत्ती ९:१३; होशे ६:६ 8मनूया काय् विश्रामबारया नं प्रभु खः।”
ल्हाः गंम्ह मनू
मर्क ३:१-६; लूक ६:६-११
9अले येशू अनं धर्मशास्त्र स्यनीगु छेँय् झाल। 10अन ल्हाः गंम्ह छम्ह मनू दु। वय्कःयात दोष बीत अन च्वंपिन्सं थथे धकाः न्यन – “विश्रामबार खुन्हु सुयातं लाय्काबीगु ज्या याये ज्यू ला?”
11वय्कलं लिसः बियादिल – “छिमि सुयां फैचा विश्रामबार खुन्हु गालय् कुतुंवन धाःसा छिमिसं वयात थकायेत मस्वइ ला?#लूक १४:५ 12फैचा स्वयाः ला मनू गुलि यक्व मू वं। उकिं विश्रामबार खुन्हु नं भिंगु ज्या याये ज्यू।”
13अले वय्कलं ल्हाः गंम्ह मनूयात धयादिल – “ल्हाः तप्यंकि।” वं ल्हाः तप्यंकल। अले गंगु ल्हाः लनाः मेगु ल्हाः थें च्वन। 14फरिसीतय्सं अनं वनाः वय्कःयात स्यायेगु ग्वसाः ग्वल।
परमेश्वरं ल्ययादीम्ह च्यः
मर्क ३:७-१२; लूक ६:१७-१९
15थ्व खँ सियाः येशू अनं झाल। यक्व हे मनूत वय्कःया ल्यूल्यू वन। वय्कलं म्हंमफुपिं दक्वसित लाय्कादिल। 16अले वय्कलं थ्व खँय् सुयातं छुं धाये मते धकाः ख्याच्वः बियादिल। 17वय्कलं थथे यानादीगु यशैया अगमवक्तां धयाथकूगु थ्व खँ पूवंकेत खः – 18परमेश्वरं धयादिल –
“स्व, थ्व जिं ल्ययाम्ह
जि यःम्ह च्यः खः।
थ्व खनाः जि तसकं लय्ताः।
थ्वयागु नुगलय् जिगु आत्मा तयाबी,
अले थ्वं हे जात जातियापिन्त
न्याययागु खँ न्यंकी।
19थ्व गुबलें सुंनाप ल्वाना जुइ मखु,
तसकं हाला जुइ मखु।
सुनानं थ्वयात लँय् लँय्
हाला जूगु खनी मखु।
20त्वधुलेत्यंगु तिंकथि छपु नं
थ्वं त्वथुली मखु।
सीत्यंगु मतयात तकं
थ्वं स्याइ मखु।
न्याययागु विजय मजुतले
थ्वं छुं हे याइ मखु।
21अले जात जातियापिन्सं
थ्वयागु हे नामय् आशा यानाच्वनी।”#यशै ४२:१-४
येशू व बालजिबुल
मर्क ३:२२-३०; लूक ११:१४-२३
22मनूतय्सं येशूयाथाय् छम्ह कांम्ह लाताम्ह व भूत दुब्यूम्ह मनूयात हल। वय्कलं वयात लाय्कादिल। अले वं मिखां खन, नवाये नं फत। 23स्वयाच्वंपिन्सं छक्क जुयाः धाल – “दाऊदया काय् थ्व हे मखु ला?”
24थ्व न्यनाः फरिसीतय्सं थथे धाल – “भूततय् जुजु बालजिबुलं शक्ति बियातःगुलिं थ्वं भूतयात पितिनाछ्वये फुगु खः।”#मत्ती ९:३४; १०:२५
25इमिगु मतिइ च्वंगु खँ थुइकाः वय्कलं इमित धयादिल – “गुगुं नं राज्य निकू दलाः थःथवय् ल्वाना जुल धाःसा थः हे नाश जुइ। अथे हे गुगुं नं शहर व छेँनं थःथवय् बायाः ल्वाना जुल धाःसा ताःतुइ मखु। 26अथे हे शैतानतय् दथुइ नं थःथवय् ल्वापु जुल धाःसा इमिगु राज्य गथे यानाः ताःतुइ फइ? 27बालजिबुलं शक्ति बियातःगुलिं जिं भूतयात पितिनाछ्वये फुगु खः धकाः छिमिसं धाल। थथे हे खः धयागु जूसा छिमि मनूतय्सं जक सुयागु शक्तिं भूत पितिनाछ्वइगु लय्? इमिसं छिमित हे दोषी ठहरय् याइ। 28अथे मखु, जितः परमेश्वरयागु आत्मां भूतयात पितिनाछ्वयेगु शक्ति ब्यूगु खः धयागु जूसा परमेश्वरयागु राज्य छिमिथाय् वये धुंकल धकाः सीकि। 29बल्लाःम्ह मनूयागु छेँय् खुइत न्हापां व मनूयात निं चीमाः। वयात चीधुंकाः तिनि वयागु छेँय् खुयाः यने फइ।”
30 “जिगु पँ मलीपिं फुक्क जिमि शत्रु खः। जितः मुंकेत ग्वाहालि मयाइम्हय्सिनं जिं मुना तयागु नं ह्वलाबी। #
मर्क ९:४०
31 “मनूतय्सं न्ह्यागु हे मखुगु खँ ल्हाःसां न्ह्यागु हे पाप याःसां इमित क्षमा बी, पवित्र आत्मायात मभिंकाः खँ ल्हाइपिन्त धाःसा क्षमा बी मखु। 32मनूया काय्यात मभिंकाः खँ ल्हाःम्हय्सित क्षमा यानाबी, पवित्र आत्मायात मभिंकाः खँ ल्हाःम्हय्सित धाःसा आः नं, लिपा नं, गुबलें हे क्षमा बी मखु।”#लूक १२:१०
सिमा व फल
लूक ६:४३-४५
33 “भिंगु सिमाय् जक भिंगु फल सइ। मभिंगु सिमाय् मभिंगु हे फल सइ। थुकथं सिमाय् सःगु फल स्वयाः सिमा भिं मभिं सीके फइ। #
मत्ती ७:२०
34अय् सर्पया मस्त, छिपिं थें ज्याःपिं मभिंपिं मनूतय्सं गथे यानाः भिंगु खँ ल्हाये फइ? छाय्धाःसा नुगलय् च्वंगु खँ हे म्हुतुं नवाइ।#मत्ती ३:७; २३:३३; १५:१८; लूक ३:७ 35भिंम्ह मनूया मतिइ भिंगु हे दइगुलिं वं भिंगु भिंगु हे याइ। अथे हे मभिंम्ह मनूया मतिइ मभिंगु हे दइगुलिं वं मभिंगु मभिंगु जक याइ।”
36 “जिं छिमित धाये – छिमिसं ल्हाना जूगु म्वाःमदुगु छता छता खँया ल्याःचाः परमेश्वरं न्याय यानादीबलय् कयादी। 37छिमिसं नवाना जूगु खं हे छिपिं न्यायया दिनय् दोषी वा निर्दोष ठहरय् जुइ।”
अजू चायापुगु चिं क्यनेगु इनाप
मर्क ८:११-१२; लूक ११:२९-३२
38अले गुम्हं गुम्हं शास्त्रीत व फरिसीतय्सं जानाः येशूयात धाल – “अय्सा गुरुजु, जिमित अजू चायापुगु चिं छकः यानाः क्यनादिसँ रे।”#मत्ती १६:१; मर्क ८:११
39वय्कलं धयादिल – “थौंकन्हय्यापिं मनूत गुलि जक मभिना वःगु, अले परमेश्वरयात विश्वास यायेगु त्वःता हःगु। थुमिसं अजू चायापुगु चिं स्वयेत धयाच्वन। अहं, छिमित अगमवक्ता योनां क्यना वंगु चिं सिबय् मेगु छुं हे चिं क्यनी मखु।#मत्ती १६:४; मर्क ८:१२ 40गथे योना न्यायागु प्वाथय् स्वन्हु स्वचा तक च्वन, अथे हे मनूया काय् नं पृथ्वीया दुने स्वन्हु स्वचा तक च्वनी।#योना ३:५
41 “निनवेय् च्वंपिन्सं नं न्याय याइबलय् आःयापिं मनूतय्त सजाँय बी हे माः धकाः नवाइ, छाय्धाःसा इमिसं ला योनां जक न्यंकूबलय् हे पश्चाताप यात। स्व, थन ला योना स्वयाः नं तःधंम्ह छम्ह दु। 42न्याय याइबलय् दच्छिनय् च्वंम्ह रानीं नं आःयापिं मनूतय्त सजाँय बीमाः धकाः नवाइ, छाय्धाःसा व तापाकंनिसें सोलोमनयागु ज्ञानयागु खँ न्यनेत वल। स्व, थन ला सोलोमन स्वयाः नं तःधंम्ह छम्ह दु।”#१ राज १०:१-१०; २ इति ९:१-१२
पूमवंक याःगु ज्या झन ग्यानापु
लूक ११:२४-२६
43 “मनूयागु म्हं पिहां वनाः भूतआत्मां बाय् च्वनेत मरुभूमिइ माः जुइ। अय्नं वं बाय् लुइके फइ मखु। 44अले वं धाइ ‘जि न्हापा च्वनाच्वनागु छेँ हे लिहां वने।’ अले वं लिहां वइबलय् न्हापायागु छेँ यचुकाः झःझः धाय्कातःगु व खालिगु लुइकी। 45अले वं वनाः थः स्वयाः मभिंपिं न्हय्म्ह भूततय्त सःता हइ। इपिं वयाः अन बाय् च्वनी। अले व मनू न्हापा स्वयाः गति मलाना वनी। आःयापिं मभिंपिं मनूतय्गु गति नं थथे हे जुइ।”
येशूया मां व किजापिं
मर्क ३:३१-३५; लूक ८:१९-२१
46येशूं थथे धयाच्वनादीबलय् हे वय्कःया मां व किजापिं वय्कः नाप खँ ल्हायेत पिने प्यू वयाच्वन। 47छम्हय्सिनं वनाः वय्कःयात धाल – “छिकपिनि मां व किजापिं छिनाप खँ ल्हायेत पिने प्यू वयाच्वंगु दु।”
48अले वय्कलं वयात धयादिल – “जिमि मां सु खः? जिमि किजापिं सु खः?” 49अले चेलातय्त पतिचां क्यनाः धयादिल – “मां धाःसां किजापिं धाःसां थुपिं हे खः। 50छाय्धाःसा सुनां स्वर्गय् च्वनादीम्ह जिमि बाःनं धाःथें याना जुइ व हे जिमि किजा, जिमि केहेँ व जिमि मां खः।”
Tans Gekies:
मत्ती 12: NEW
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2024 Nepal Bible Society, Newa Christian
Literature Center and Wycliffe Bible Translators, Inc.