Okutandika 15
15
Okworekwa kwa Abramu n'okuraganisibwa oruzaaro
1 #
Heb 11:6. Bwanyima y'ebyo ekigambo kya MUKAMA kyaija ahari Abramu omu kworekwa, MUKAMA naamugira ati: Abramu, otatiina. Niinye ngabo yaawe; kandi oryaheebwa ebihembo bingi munonga. 2Abramu yaagira ati: Ai Mukama RUHANGA, oryampa ki, obu naaguma ndi encwekye, haza omuhunguzi w'ebyangye ari Eliezeeri owa Damasiko. 3Kandi Abramu yaagaruka yaagira ati: Reeba torampaire ruzaaro; kandi owaazaariirwe omu ka yangye niwe ariba omuhunguzi w'ebyangye. 4#Kut 17:16. Reeba, ekigambo kya MUKAMA kyamwizira, MUKAMA naamugira ati: Ogwo tiwe arihungura ebyawe, kureka omwana, ou oryezaarira, niwe aribihungura. 5#Heb 11:12. Yaamushohoza aheeru, yaamugira ati: Rarama oreebe ahaiguru, obare enyonyoozi, oreebe ku oraabe noobaasa kuzibara. Yaamugira ati: Na baijukuru baawe nikwo bariingana batyo. 6#Gal 3:6. Abramu yaikiriza MUKAMA, MUKAMA yaakimubarira kuba okuhikiirira.
7Kandi yaagaruka, yaamugira ati: Niinye MUKAMA owaakwihire omuri Uri ey'aba Kaludaaya, kukuha ensi egi ngu ogihungure. 8#Bar 6:36-40; Luk 1:18. Abramu yaamubuuza ati: Ai Mukama RUHANGA, nimmanyira hi ku ndigihungura? 9Yaamugarukamu ati: Ndeetera enyana ehikize emyaka eshatu, n'ebuguma y'embuzi ehikize emyaka eshatu, n'empaya y'entaama nayo ey'emyaka eshatu, n'akaiba n'enkombe nto. 10Yaabimutwarira byona, yaabishaturamu habiri, yaabirambika naabireebanisa; kwonka enyoni zo tiyaazishaturamu. 11Amahungu ku gaabaire gaija kugwa aha mitumbi, Abramu agabinga. 12Eizooba ku ryabaire nirirengarenga, Abramu yaakwatwa oturo twingi; kandi reeba, omwirima mwingi ogurikutiinisa gwamushweka. 13#Kur 12:40. MUKAMA yaagambira Abramu ati: Omanyire kimwe ku oruzaaro rwawe rurishuhuukira omu nsi etari yaarwo, bakakorera ab'ensi egyo, nibaitwa kubi emyaka magana ana. 14Kwonka eihanga eryo, eri barikorera, ndyaritaho orubanja; kandi bwanyima baryarugayo baine eitungo ringi. 15Kwonka iwe oryashanga baashwenkuru n'obusingye, oryaziikwa gye ohikize emyaka ya bukuru. 16#1 Tes 2:16. Omu bwijukuruza bwa kana baryagaruka aha, ahabw'okuba ebibi by'Abaamori tibikakanyire kurengyesereza. 17Bwanyima eizooba ku ryaherize kurenga, haabaho omwirima, reeba ekikoomi ekirikucumbuuka, n'orumuri orurikwaka byaraba ahagati y'ebyo bishate. 18#Kut 17:8; 2 Bus 9:26. Aha izooba eryo MUKAMA yaaragaana na Abramu endagaano, naagira ati: Oruzaaro rwawe ndyaruha egi nsi, okuruga aha kagyera ka Misri okuhika aha mugyera omuhango Furaati. 19Ensi y'Abakeeni, ey'Abakenizi, ey'Abakadumooni, 20ey'Abahiiti, ey'Abaperizi, ey'Abareefa, 21ey'Abaamori, ey'Abanyakanaani, ey'Abagirugashi, n'ey'Abayebusi.
Tans Gekies:
Okutandika 15: RR64
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
The Bible in Runyankore-Rukiga © United Bible Societies, 1964
