Panagnaꞌan 48
48
Pināku-pākuhan ledjikiꞌ weꞌ si Yakub Manasse duk Eprayim
1Gaꞌ du tiggel paꞌinde pu si Yusup, “Saki ne samanun.” Manjari binoꞌo weꞌ si Yusup duwe anakne lellahin, Manasse duk Eprayim pī pu si Yakub. 2Pag kale si Yakub weꞌ tekka ne anaknen si Yusup nindew iye, pabasagne dīnen duk ningkoloꞌ iye si pabākanne. 3Ubus paꞌinne pu si Yusup, “Pag laꞌi pe ku si Lus si lahat Kanaꞌan, pabagala Tuhan Mabalakatanin si aku duk iledjikiꞌan ku weꞌ ne. 4Paꞌinne si aku, ‘Paꞌekkaku du tubuꞌnun duk hinangku siye bangsa ekka. Ubus pangurungku du si meꞌ tubuꞌnun lahat Kanaꞌan inin duk siye ne magdapuꞌin salama-lama.’ ”
5Paꞌin si Yakub pe, “Na, meꞌ anaknu duwanganin andang ne inanakan tuꞌu si Misir gaꞌ pe ku tekka, kimmatanku siye anakku gantiꞌnu. Subey Eprayim duk Manasse si aku kuweꞌ meꞌ anakkun si Ruben duk Simeon. 6Bu meꞌ anaknu mapasunuꞌ si siyehin, si kaꞌu du. Ambat siye binahagiꞌan weꞌ Eprayim duk Manasse bulak pusakaꞌ si siyehin. 7Hangkan hinangku inin peggeꞌ taꞌessebku saꞌinun si Rakel. Duwe hadja anaknen matey ne iye. Dukka ku manamal kamateynen. Pag balik ku amban Paddan, sābu kami maglengngan dem lahat Kanaꞌan, matey si Rakel. Laꞌi ne kami miyaꞌan tapit si lahat Eprata bu kinubul ne weꞌ ku si Rakel laꞌi si bihing lān tudju Eprata.” (Eprata inin inēnan isab Betlehem.)
8Manjari pag kite si Yakub meꞌ anak Yusupin paꞌinne, “Sine teꞌ siye inin?” 9Paꞌin si Yusup, “Meꞌ anakku siye pangurung Tuhanin aku tuꞌu si Misir.” Paꞌin si Yakub, “Boꞌohun siye patapit pitu si aku duk siye pākuhanku ledjikiꞌ amban Tuhan.” 10Na, gaꞌi ne tantu ngite si Yakub, peggeꞌ labut ne matanen hawal bahiꞌnen. Manjari binoꞌo ne siye weꞌ si Yusup patapit si iye. Kinekkepan siye weꞌ si Yakub duk inūkan weꞌ ne. 11Ubus paꞌin si Yakub pu si Yusup, “Kannalku weꞌ gaꞌi ne kew kiteku balik. Ine kew tiyaꞌ du kew pinakite balik weꞌ Tuhanin duk sampay meꞌ anaknun.” 12Ubus inānan siye weꞌ si Yusup amban bihing tuꞌut si Yakub duk pasujud ne iye.
13Manjari binoꞌo siye weꞌ si Yusup kaduwangan pī balik patapit pu si Yakub. Inantanan weꞌ si Yusup Eprayim duk tanganne kanawanin duk pinapī weꞌ ne si bibangan si Yakub. Inantanan isab weꞌ ne Manasse duk tanganne bibangin duk pinapī weꞌ ne si kanawanan si Yakub. 14Saguwaꞌ binettad weꞌ si Yakub tanganne kanawanin diyataꞌ kōk Eprayim bisan iye salihin duk tanganne bibangin diyataꞌ kōk Manasse bisan iye sakahin. Pinaglambid weꞌ ne lengngennen.#48:14 Addat bangsa Israꞌelin, bang pinākuhan ledjikiꞌ meꞌ anak-ampuhin subey tangan kanawanin binettad si kōk sakahin. 15Ubus miyaꞌan pinākuhan siye ledjikiꞌ weꞌ si Yakub, paꞌinne,
“O Tuhanku, kaꞌu pagtuhanan papuꞌkun Ibrahimley duk samakun Ishakley karayaw urungannu kahāpan ampuku duwangan inin.
Kaꞌu du mangipat akuhin kemuweku dikiꞌ sampay kuweꞌitu, karayaw isab ipatnu meꞌ ampuku inin.
16Malaꞌikatnun manabang akuhin si kēmon kasigpitankun, karayaw isab tabangne meꞌ ampuku inin.
Karayaw ēnkun duk ēn samakun Ishakley duk papuꞌkun Ibrahimley taꞌesseb weꞌ meꞌ aꞌahin sabab meꞌ ampuku inin.
Karayaw isab ngaꞌekka tubuꞌden tuꞌu si dunya.”
17Pag kite si Yusup weꞌ laꞌi tangan samane kanawanin diyataꞌ kōk Eprayim salihin, gaꞌ iye kasulutan duk suse ne iye. Manjari inantanan weꞌ ne tangan samanen sōng ānanne amban kōk Eprayim pinapī si kōk Manasse. 18Ubus paꞌinne si samanen, “Dumaꞌin sā iyan, Ammaꞌ, peggeꞌ ininen sakahin. Bettadun tangannu kanawanin diyataꞌ kōkne.” 19Saguwaꞌ gaꞌi ngatu samanen, paꞌinne, “Na, kataꞌuhanku du, Totoꞌ. Kataꞌuhanku. Manasse iyan ngaꞌekka du isab meꞌ tubuꞌnen duk manjari bangsahan du isab siye. Saguwaꞌ salinen pasōng bangsahan amban iye duk meꞌ tubuꞌnen ngaꞌekka teꞌed duk manjari bangsa ekka.” 20Na, pinākuhan siye ledjikiꞌ weꞌ si Yakub ellew miyaꞌan, paꞌinne,
“Si pesōngan bang meꞌ bangsa Israꞌelin māku ledjikiꞌ taꞌatde iyan ēnbin, paꞌinde iyan,
‘Karayaw tahinang Tuhanin du kaꞌam kuweꞌ Eprayim duk Manassehin.’ ”
Sā miyaꞌan pamalangkew si Yakub Eprayimin amban Manasse.
21Ubus paꞌin si Yakub pu si Yusup, “Sōng matey ne ku, saguwaꞌ tabangan Tuhanin du kaꞌam duk pabalikne du kaꞌam pī si lahat kapapuꞌanten bi. 22Na, niyaꞌ pe pamusakaꞌku kaꞌu bulak hāp laꞌi si lahat Sekem. Taꞌeddoꞌ miyaꞌan weꞌ ku ubus kami magbonoꞌ duk meꞌ aꞌa Amorihin. Si kaꞌu ne miyaꞌan dumaꞌin si meꞌ pungtinaꞌinun.”
Tans Gekies:
Panagnaꞌan 48: yakV
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2019, Wycliffe Bible Translators, Inc. All rights reserved.
