Panagnaꞌan 49
49
Nessaꞌ-nessaꞌ si Yakub si meꞌ anaknen
1Ubus miyaꞌan masan si Yakub pī si meꞌ anaknen, paꞌinne, “Subey kaꞌam magtipun tuꞌu duk kaꞌam kaꞌakahanku bang ine matekka si kaꞌamin si pasōngan.” 2Pag tekka ne siye paꞌin si Yakub#49:2 Si Yakub inin inēnan du isab iye Israꞌel., “Magtipun kaꞌam duk pakale kaꞌam, meꞌ anakkun. Pakale kaꞌam si aku samabin.”
3“Kaꞌu, Ruben, anakku sakahin. Panganak kaꞌuhin basag pe ku; kaꞌu tandaꞌ pagkalellakun. Kaꞌu malangkewin, kaꞌu mabangsahanin. 4Napsunun kuweꞌ selleg gaꞌi tapara, sudda gaꞌi kew bangsahan. Paꞌiyaꞌnu ku, panaꞌiknu kiridakun.”
5“Kaꞌu, Simeon, duk kaꞌu, Lebi, saliꞌ addatbin, maglimbang kaꞌam. Iye panganggunahanbi bessibin pamonoꞌ. 6Gaꞌi ku patuhut si pagisunbin. Gaꞌi ku pabatuk si kaꞌam peggeꞌ bang kaꞌam inastel mapatey kaꞌam. Duk peddangbi mintel sapiꞌ lella aꞌa sinduwehin paglolaꞌanbi. 7Peggeꞌ makalanduꞌ laꞌat ateybin duk bingis kaꞌam manamal pinagmulkaꞌan kaꞌam. Kinanat-kanat tubuꞌbin dem lahat Israꞌel.”
8“Na, kaꞌu, Yahud, pinudji kew weꞌ meꞌ pungtinaꞌinun peggeꞌ ngandaꞌag kew bang niyaꞌ kuntaranu. Duk meꞌ pungtinaꞌinun pasujud du si kaꞌu. 9Bahani si Yahud, kuweꞌ limaꞌung. Kuweꞌ iye limaꞌung tahalaꞌ amban bakas pinapateynen, bu palukuꞌ duk ngiles; gaꞌ niyaꞌ makatawakkal nasew iye. 10Meꞌ tubuꞌnen magbayaꞌ du salama-lama. Duk meꞌ kabangsa-bangsahanin pasujud si iye bu boꞌohande iye alataꞌ. 11Hāp sumbu bahan ubas tinanemnen. Poꞌonnen tapangingketan hayep. Manjari teꞌed buwaꞌ ubasnen, hawal ekkanen makajari pagdekdakan boheꞌnen.#49:11 Hātinen, ekka manamal kinakanden duk ininumden. 12Itteman#49:12a makajari isab: matanen peyat sabab ekka boheꞌ ubas taꞌinumnen. matanen kuweꞌ boheꞌ ubas duk meꞌ impennen poteꞌ pe amban gatas#49:12b makajari isab: impennen poteꞌ sabab ekka gatas ininumnen..”
13“Kaꞌu, Sebulon, patennaꞌannun tapit si higad tahik. Laꞌi kew tapit si padungguꞌan meꞌ kappal duk tamanan lahatnun si lahat Sidon.”
14“Kaꞌu, Issakar, kuweꞌ kew asnu basag palukuꞌ duk meꞌ duwaꞌannen. 15Kitenu weꞌ pahalihannu miyaꞌan hāp paglahatan duk makasinna-sinna lahatin. Hangkan ngatu ne kew magduwaꞌ duk manjari banyagaꞌ meꞌ aꞌa.”
16“Kaꞌu, Dan, ngahukum du kew meꞌ bangsanu kuweꞌ meꞌ bangsa Israꞌel sinduwehin ngahukum meꞌ bangsade. 17Kaꞌu, Dan, kuweꞌ kew sawe bisa si lān. Bang niyaꞌ palabey magkuraꞌ tigtukne tiked kuraꞌin duk laboꞌ aꞌahin. (Sā miyaꞌan tadaꞌag bantanun weꞌ nu.)”
18“O Tuhan, ngase-ngase ku weꞌ timbulnu du ku.”
19“Kaꞌu, Gad, luwal kew tinangkewan weꞌ meꞌ mundu, saguwaꞌ palupug kew duk taꞌagewnu du balik.”
20“Kaꞌu, Aser, hāp manamal kinakannun kuweꞌ kinakan sultan.”
21“Kaꞌu, Naptali, kuweꞌ payew lakkes kew duk anaknun hāp kuweꞌ anak payewin.”
22“Kaꞌu, Yusup, kuweꞌ kew kayu labung buwaꞌnen, poꞌonnen si higad buwal, kalandungan weꞌ pangenen birang batuhin#49:22 makajari isab: kuweꞌ kew asnu talun si bihing buwal, kuweꞌ anak asnu talun diyataꞌ bīd.. 23Kabayaꞌan meꞌ bantanun bonoꞌde kew duk panaꞌ duk lupugande kew. 24Saguwaꞌ amban kabayaꞌan Tuhan basag teꞌed lengngennun duk haget pangantannu panaꞌin. Tinabangan kew teꞌed weꞌ Tuhan Mabalakatanin iye pagtuhanankun. Iye mangipat duk manabangan kitehin bi meꞌ bangsa Israꞌelin. Kuweꞌ iye tamingte bi. 25Tuhan Mabalakatanin iye pagtuhanankun iye manabangan kaꞌuhin duk iye mangurungan kaꞌu kahāpanin. Meꞌ kahāpan inin ulan amban diyataꞌ langit duk boheꞌ amban diyalem bulak, duk ngaꞌekka isab tubuꞌnun duk meꞌ hayepnun. 26Kahāpan pinākuhanku kaꞌu amban Tuhan inin pesōng hāpnen amban ledjikiꞌ taꞌeddoꞌnu amban meꞌ kapunuhan, meꞌ punu andang ne laꞌi kemuwe ewwalley. Karayaw kēmon ledjikiꞌ inin tepe si kaꞌu, Yusup, peggeꞌ kēmon kaꞌam magpungtinaꞌihin kaꞌu du pinaseddili weꞌ Tuhanin.”
27“Kaꞌu, Binyamin, kuweꞌ kew asu bahani duk luwal inusan. Subu-subu pe kakanne ne bantanen duk sampay sangem laꞌi pe iye mahagiꞌ taꞌagewnen.”
28Iye ne miyaꞌan panessaꞌ si Yakub si meꞌ anaknen. Kēmon anakne meꞌ sampūꞌ duk duwehin manjari meꞌ bangsa Israꞌel. Missā iye si siye duk binissānen magtuꞌun duk siye dangan-dangan.
Kamatey Yakubin duk pangubul iyehin
29Ubus miyaꞌan, nessaꞌ iye si siye, paꞌinne, “Aku inin, sōng matey ne ku. Kubulun bi ku pī si kubul kapapuꞌankun laꞌi diyalem lingab batu si bulak si Epron, aꞌa bangsa Hittihin. 30Lingab batu miyaꞌan laꞌi si lahat Makpela, tapit si lahat Mamre, laꞌi si lahat Kanaꞌan. Bulak miyaꞌan bakas binelli weꞌ Ibrahimley amban si Epronley hinang pagkubulande. 31Laꞌi ne kubul Ibrahimley duk andanen si Saraley. Laꞌi ne isab pangubulan si Ishakley duk andanen si Ribka. Duk laꞌi pangubulanku si Leꞌahin. 32Bulak miyaꞌan duk lingab batu miyaꞌan bakas binelli amban meꞌ Hitti.” 33Pag ubus sessaꞌan si Yakub meꞌ anaknen pabāk ne iye duk bekkat ne napasnen.
Tans Gekies:
Panagnaꞌan 49: yakV
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2019, Wycliffe Bible Translators, Inc. All rights reserved.
