Panagnaꞌan 50
50
1Manjari kinekkepan weꞌ si Yusup samanen duk inūkan weꞌ ne duk nāring ne iye. 2Ubus dinaꞌak weꞌ si Yusup meꞌ daraꞌakanne meꞌ doktolin hinatul baran samanen duk pinapīhan tambal (sā hinang meꞌ aꞌa Misirin si aꞌa bangsahan duk gaꞌi buhuk). Hangkan tinambalan ne weꞌ meꞌ doktol miyaꞌan si Yakub. 3Tiggelan pagtambalin sampay ubus ne ampatpūꞌ bahangi. Pitumpūꞌ bahangi tiggelan pagdukka meꞌ aꞌa Misirin.
4Pag palabey ne pitumpūꞌ bahangihin, missā si Yusup si meꞌ daraꞌakan pangandelan sultanin, paꞌinne, “Bang ku kimmatanbi, akahanun bi koꞌ sultanin bissāku inin, paꞌinun bi, 5‘Bakas ku pinasapa weꞌ samakun,’ paꞌinne, ‘Sōng matey ne ku. Niyaꞌ ne kubulku bakas hinangku laꞌi si lahat Kanaꞌan. Kubulun ku laꞌi. Na, hangkan maꞌid ne ku bang makajari ku hap pī ngubul samakun. Ubus balik saꞌ ku.’ ” 6Pag kale sultanin pinaꞌinnen, paꞌinne, “Aweꞌ, pī ne kew si Kanaꞌan ngubul samanun peggeꞌ bakas napa kew si iye.”
7Hangkan hep pī si Yusup si Kanaꞌan ngubul samanen. Tinuhutan iye weꞌ meꞌ daraꞌakan pangandelan sultanin duk meꞌ bahiꞌ si Misirin, duk ekka meꞌ nakuraꞌ si Misirin. 8Nuhut isab meꞌ tindeg Yusupin duk meꞌ pungtinaꞌinen duk meꞌ tindeg samanen. Luwal mataꞌamban laꞌi si lahat Gosenin meꞌ anakden duk meꞌ bili-biliden duk meꞌ sapiꞌden. 9Niyaꞌ isab meꞌ aꞌa diyataꞌ sasakatan duk meꞌ sinduwehin nguraꞌ, ekka manamal siye magtuhutin pī si lahat Kanaꞌan.
10Pagtekkade si Goren-ha-Atad#50:10 Hātinen: pagdiꞌikan buwaꞌ tinanem amban tanaꞌden laꞌi si Atad., si dambiyaꞌ boheꞌ Jordan, sinābuꞌ weꞌ de duk magmatey siye manamal sabab kamatey Yakubin dem pitum bahangi. 11Pag kite meꞌ aꞌa bangsa Kanaꞌan mapatennaꞌ si lahat miyaꞌan weꞌ magmatey siye laꞌi si Atad, paꞌinde, “Dukka manamal meꞌ aꞌa Misirin.” Hangkan inēnan weꞌ de lahat miyaꞌan Abel-misrayim#50:11 Hāti Abel-misrayim, pagdukkahan meꞌ aꞌa Misir.. Lahat miyaꞌan si silangan boheꞌ Jordan.
12Iye ne miyaꞌan, hininang weꞌ meꞌ anak Yakubin bakas pangandaꞌakanne siyehin. 13Binoꞌo iye weꞌ de pī si lahat Kanaꞌan duk kinubul iye dem lingab batu laꞌi si lahat Makpela, tudju silangan amban lahat Mamre. Bulak miyaꞌan bakas binelli weꞌ Ibrahimley amban si Epron aꞌa bangsa Hitti hinang pagkubulande. 14Pag ubus ne kinubul samanen balik ne si Yusup pī si Misir magtuhut duk meꞌ pungtinaꞌinen duk kēmon siye bakas manuhut iye mangubul samanen.
Pinahāp weꞌ si Yusup atey meꞌ pungtinaꞌinen
15Manjari miyaꞌan, peggeꞌ matey ne si Yakub tinalew meꞌ pungtinaꞌi Yusupin. Paꞌinde, “Hatu inastel pe dem atey Yusupin duk kaw kite bi balesne sabab bakas tahinangte bi si iyehin.” 16Manjari masan siye pī pu si Yusup, paꞌinde, “Gaꞌ pe matey samaten bi nessaꞌ iye si kami 17dinaꞌak kami inampun si kaꞌu sabab bakas tahinang kami malaꞌat si kaꞌuhin. Na, hangkan hep māku ampun ne kami si kaꞌu sabab duse kami si kaꞌuhin. Esseb-essebun weꞌ magtuhan kami si Tuhan pagtuhanan samaten bi.” Nangis si Yusup pagtakalene bissāden. 18Ubus pī ne meꞌ pungtinaꞌinen si iye bu pasujud siye si iye. Paꞌinde, “Tiyaꞌ ne kami meꞌ banyagaꞌnun.” 19Saguwaꞌ paꞌin si Yusup si siye, “Daꞌa kaꞌam tinalew. Gaꞌi du kaꞌam balesku. Dumaꞌin aku mangahukumin saguwaꞌ Tuhanin. 20Bisan laꞌat tahinangbi si akuhin mabayaꞌ Tuhanin weꞌ kaꞌujurankun hāp supaya ekka aꞌa ellum kuweꞌ kuweꞌitu inin. 21Hangkan daꞌa kaꞌam tinalew. Gastuhante kaꞌam duk meꞌ anakbin.” Sā miyaꞌan bissānen pamahāpne dem ateyden.
Kamatey si Yusupin
22Manjari patennaꞌ siye si lahat Misir, kēmon siye duk si Yusup. Umul Yusupin umabut da hatus duk sampūꞌ tahun. 23Ellum pe si Yusup ampuhan iye sampay meꞌ ampu siku. Ampune siku miyaꞌan meꞌ ampu Eprayim duk niyaꞌ pe ampu siku si Yusup meꞌ anak si Makir. Si Makir miyaꞌan anak Manasse.
24Na, paꞌin si Yusup si meꞌ pungtinaꞌinen, “Sōng matey ne ku. Saguwaꞌ pitu du Tuhanin si kaꞌam nabangan kaꞌam duk boꞌone du kaꞌam duk meꞌ tubuꞌbin pī si lahat Kanaꞌan, iye lahat bakas pananggup Tuhan si meꞌ kametettoꞌahante bi ley Ibrahim, si Ishak duk Yakubley.” 25Ubus pinasapa weꞌ si Yusup meꞌ tubuꞌ si Yakubin, paꞌinne, “Bang tabangan Tuhanin kaꞌam tahalaꞌ amban lahat inin, boꞌohun bi bangkeykun pī si Kanaꞌan.” 26Ubus matey ne si Yusup. Da hatus duk sampūꞌ tahun umulnen. Tinambal iye weꞌ de duk iye gaꞌi buhuk duk pinapī weꞌ de dem ataꞌul laꞌi si Misir.
Tans Gekies:
Panagnaꞌan 50: yakV
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2019, Wycliffe Bible Translators, Inc. All rights reserved.
