Jesu koty rewarà kõ 9
9
Jesu ojimoikatu Sauru pè remẽwarà
(Jesu koty rewarà kõ 22.6-16; 26.12-18)
1Ãmẽ Sauru nopi'ãi Janerõvijã Jesu koty rewarà kõ apisia rè mijã. Ajawyi oo Janejare'e pè oporegeta mãe kõ rõvijã wasu pè javo.
2– Tamasiku taa kyty aatà Jesu koty rewarà kõ tapokwa eru, e'i. Nepota sipõ kareta nekusiwa taraa? e'i. A'e taraa ime'ẽ Janejare'e ayvu rè jimo'ea retã pewarà rõvijã kõ pè. Neayvukasia rupi tè Jesu koty rewarà kõ tapokwa eru ike Jerusarẽ taa pè, e'i. Pirujẽ apokwa kõtà eru ãmẽ. Kwaima'e kõ. Wãivĩgwerà kõ ve, e'i tite.
“Hoõ” e'i ãmẽ jõvijã wasu. Ajawyi okusiwa kareta ime'ẽ ijupe toeraa.
3Ajaire oo Sauru Tamasiku taa kyty iko, wemĩgwai kõ reve. Pee rupi tè oo kupa. Ãmẽ ovãerĩ iko kupa remẽ, apy'awarà mõ kwaray vo sõ tite mã'ẽ owyjy ovake ijãrimã. Weakwaso kõ tesõ. 4Ameve Sauru o'a yvyu. Ãmẽ Jesu sikaepo oporegeta ijupe, yva pe wyi. Kee e'i ijupe:
– Sauru, epy'amopirai sõ erereko rejupa! e'i.
5Ãmẽ Sauru wayvuapi:
– Ava põ ene, Jõvijã? e'i.
Ãmẽ Jesu e'i ijupe:
– Ije, Jesu! Ene itõkõ epy'amopirai tè erereko rejupa! e'i.
6E'i jẽ Jesu ijupe:
– Epõ'ã jẽsi tereo Tamasiku taa kyty, e'i. [A'e pè jane mõ poromotekokuwa mã'ẽ mõ tui upa, e'i.] A'e nemotekokuwatà nevãema a'e pè remẽ, manyvo tereiko, e'i ijupe.
7Oo upi mãe kõ manyvo ne'i ãmẽ, ojimonyijay kupa rewarà mõ. Ijayvukwerà kõrijõ tè wenu kupa. Ajamã'ẽ nomã'ẽi ee kupa, ava mõ oporegeta remẽ. 8Ãmẽ Sauru opõ'ã yvy pe wyi remẽ, omã'ẽ ipe. Ajamã'ẽ naeapyoi ky'y. Ajawyi emĩgwai kõ tè opopyy eraa Tamasiku taa kyty. 9Ãmẽ a'e pè tui remẽ, moapy 'arà rõmõ tesõ nomã'ẽi 'eteay. Nojimi'ui rupi teve. Noy'ui teve. [Omotekokuwaarà rã wãrõ jẽ upa.]
10Ãmẽ jakatu oiko kwaima'e mõ a'e taa pè, Anania eu erà pè mã'ẽ. Jesu koty rewarà tè a'e. A'e pè Janerõvijã ywete ojimoikatu oporegeta.
– Anania! e'i ijupe.
– Moma'e põ, Jõvijã? e'i.
11Ãmẽ Janerõvijã ywete e'i ijupe:
– Ejimokatu. Ekwa pee oterẽ gatu mã'ẽ rupi. A'e pè eeka Juta eu ijupe mã'ẽ retã. A'e tetã pè eremĩgwai rã neesatà ãmẽ, Sauru eu erà pè mã'ẽ. Taasu taa wãnerà tè a'e, e'i. Oporegeta ije upa. 12A'e oporegeta jẽ ije remẽ, omã'ẽ maevo sõ tite ne'ãg rè upa. Oike maevo sõ tite ne'ãg tetã wyry pè uu ikoty. Ãmõ, nepo maevo sõ tite neinõ ijapyte 'aryvo tomã'ẽ mijẽ ky'y. A'evo maevo sõ tite nejimoikatu ijupe remẽ. [Ajawyi age'e nerãrõ upa. Ekwa awi teremoeapyooka mijẽ tomã'ẽ, e'i.]
13Ajamã'ẽ Anania kee e'i:
– Ipojy tè ãwĩ! e'i. Nekoty rewarà kõ Jerusarẽ taa wãnà kõ omomorijauvay maekwerà tè ãwĩ! e'i. A'evo 'evo ojenu erãkwẽ ipi! Ajawyi akyje jẽ aa ikoty, e'i. 14Emã'ẽ! Age'e ovãema ike, Tamasiku taa pè. Janejare'e pè oporegeta mãe kõ rõvijã kõ ayvu kasia rupi tẽ tesõ uu. Orepokwa rõmõ tè uu. Nekoty rewarà kõ tè ore rewarà mõ a'evotà orerereko kupa, e'i epe Anania Jesu pè.
15Ajamã'ẽ kee e'i jẽ Janerõvijã ywete ijupe:
– Ekwa jẽsi! Eremipyteporo tè ãwĩ, eayvu mojenuarà rõmõ. A'e Juteu rõwã mãe kõ pè amonotà eayvukwerà tomojenu, e'i. Ãmõ, waite e'yiwarà kõ jõvijã wasu kõ pè ve omojenutà, e'i. Ãmõ, Isaeu wãnà kõ pè ve, e'i. 16Ojimomorijauvaytà erewarà mõ ajamã'ẽ, eremĩgwai rõmõ ekoi remẽ, e'i. Ije ywete pirujẽ a'evoa rã amojikuwaokatà ijupe. Ajawyi, “Ekwa jẽsi!” a'e ene, e'i Janerõvijã ywete Anania pè.
17“Hoõ” e'i ãmẽ Anania ky'y. Oo esa ãmẽ, Juta retã gyty. Ovãe remẽ, oike Sauru resa. Opo oinõ ijapyte 'aryvo. Kee e'i opo oinõ remẽ:
– Sauru, eretãrã votà tè ene ky'y, e'i. Janerõvijã ywete ayvu rupi tè ajo neresa, Jesu ayvu rupi. Kõitokõ pee rupi nejo neiko remẽ, ojimoikatu neupe. A'e tè emuroka ike nekoty toromoeapyooka mijẽ, e'i. Janejare'e o'Ãg oinõtà teve nepy'a pupe, e'i ãmẽ Anania Sauru pè.
18Ameve pira pirerà vo sõ tite mã'ẽ otoro o'a ea pe wyi. Aekwery vo eapyo katu mijẽ iko ky'y. Opõ'ã ojimojãmorĩoka, [Jesu koty rewarà rõmõ ky'y. Ameve Janejare'e 'Ãg oike ipy'a pupe ky'y.] 19Aja paire ojimi'u ky'y. Ikasi katupa ãmẽ ky'y.
Ãmẽ ajaire ijaty sa'u oke Jesu koty rewarà kõ reve, Tamasiku taa pè ekoi remẽ.
Jõvijãgwerà kõ opota ipe Sauru ojuka remẽwarà
20Ameve Sauru oo Janejare'e ayvu rè jimo'ea retã kõ pè. A'e pè jane kõ omotekokuwa ypy.
– Aje ywete Janejare'e Ra'yry tè Jesu, e'i imogeta kõ upa.
21Ãmẽ pirujẽ ijayvu wenu mãe kõ ojimonyi tesõ ijayvu renu ãmẽ kupa.
– Haa! e'i enu kupa ãmẽ. Poromomorijauvay maekwerà rõwã põkõ ãwĩ? e'i kupa. Ãwĩ rõwã põkõ Jerusarẽ taa pè Jesu koty rewarà kõ wapisi maekwerà? A'e rõmõ rõwã põkõ uu mijẽ ike kyty! Jesu koty rewarà kõ weraa ime'ẽ Janejare'e pè oporegeta mãe kõ rõvijã po pè tomopã'ã kupa ipi mijã! e'i kupa. Manyvo e'i ywete ojimotee ky'y! e'i kupa.
22Ajamã'ẽ ãmẽ ywesõ Sauru oporegeta kasiay Jesu rekoa mojenua rè upa ky'y, ãwisõ wenu mãe kõ: “Aje ywete Janejare'e Remimuurerà tè Jesu, Janerõvijã ywete rõmõ”, te'i kupa.
Ãmẽ Juteu kõ, Tamasiku taa wãnà kõ, manyvo ne'i Sauru tekokuwaa rè omãjã ky'y. Nipui kupa upa, Sauru ijayvukasiay wete oporegeta Jesu rè remẽ. Kõ'ẽ jawe jawe a'evo ekoi.
23-24Ajaire sa'u a'evoa ojenu Juteu rõvijãgwerà kõ pè ky'y. Naoryi aepo jaa renu ãmẽ kupa ky'y. Ajawyi a'evoa rè ojimoaty kupa.
– Manotà põkõ Sauru sireko ijuka! e'i kupa. [Keetà. Pee ypy pè siãrõtà ijuka! e'i kupa.]
A'evo ipe ãmẽ kupa. Pya rupi wãrõ ipe kupa. 'Aryvo rupi ve. Ajamã'ẽ a'evoa ojenupa amãtejẽ sikaepo Sauru pè. Ajawyi nokwai a'e rupi. 25Ajawyi kee e'i ojava tarà mõ. Oka kwarà rupi tè sikaepo oẽ oo. Yvate kyty wyi rykyry wasu pupe Jesu koty rewarà kõ omowyjy vija imono tojava oo. Pya tè a'evo ekoi. Emimo'earerà kõ tè a'evo werekooka Sauru.#2Kor. 11.32-33
Sauru Jerusarẽ taa pè ekoi remẽwarà
26A'evo paire Sauru ojivy oo Jerusarẽ taa kyty. A'e pè ovãema remẽ,
– Torojimoaty Jesu koty rewarà kõ reve, e'i epe.
Ajamã'ẽ ojirokyje tite iwyi kupa, erãkwẽ mã'ẽ tè Sauru rewarà mõ. Ajawyi imoteea ojenu ijupe kõ remẽ, “aje ipõ” ne'ive enu kupa.
27Ajamã'ẽ Panape weraa Sauru, Jesu remimonokwerà kõ gyty. Opãtavõ Sauru, ãwisõ Peturu kõ “aje” te'i ijupe ky'y. “Sauru ojirovija Jesu rè ky'y”, e'i imomewa ijupe kõ. Kee e'i ijupe kõ:
– Janerõvijã ywete ojimoikatu ijupe Tamasiku pijarà rupi oo iko remẽ. A'e ywete oporegeta ijupe, e'i. A'evo paire, oo oo Tamasiku taa rupi Jesu rekoa mojenu jenu tesõ jane kõ pè ky'y, e'i. Nojipiraui tesõ jõvijã kõ wyi, noerovija tari mãe kõ wyi, Jesu ayvu omojenu remẽ, e'i Panape imojenu ijupe kõ.
– Hoõ, aje ipõ, e'i ãmẽ kupa ky'y.
28A'e kõ reve Sauru opyta rã'ĩ ãmẽ ky'y. Jerusarẽ taa rupi oiko ikopa Jesu rekoa mojenua rè iko. Nojipiraui tesõ a'evoa rè iko. 29A'e pè teve Juteu kõ mõ wesa, Kereku kõ ayvu rupi oporegeta mãe kõ mõ. Omotekokuwa kõ tarepe Jesu rekoa rè ereko kõ. Wayvuvaja vaja ipe, “aje” te'i kupa. Noerovijari kupa ajamã'ẽ. Ojikõ'õ jẽ ãmẽ ee kupa. Ojuka kõrijõtà kupa mijã. 30Ajamã'ẽ a'evoa ojenupa Jesu koty rewarà kõ pè. Ajawyi weraa Sauru Sesareja taa kyty kupa. A'e pe wyi omojeapy mijẽ imono Taasu taa kyty kupa. [Aja paire ojivy uu wena kyty kupa ky'y.]
31Ãmẽ Jesu koty rewarà kõ ipy'a katu puku sa'u rã'ĩ ky'y. Juteja yvy rupi a'evo ekoi kupa. Karireja yvy rupi ve. Ãmõ, Samaria yvy rupi ve. Ãmẽ ywesõ ojimokasiay wete ojimotekokuwa Janejare'e ayvu rè kupa ky'y. Ojirovija katu Janerõvijã ywete rè imomojy wete kupa. Janejare'e 'Ãg remimokasiarà kõ rõmõ ekoi kupa. Ãmẽ ywesõ ijatyray kupa ky'y.
Peturu wãivĩ omomoera Jesu kasia rupi remẽwarà
32Ãmẽ Peturu oo oo taa taa rupi, Jesu koty rewarà kõ resa ipi. Ãmõ 'ary pè Rita taa wãnà kõ resa oo. 33A'e pè oiko kwaima'e mõ etãmã nomãrãkuwai mã'ẽ. A'e kwaima'e rerà pè Eneja eu. 8 kwaray rõmõ tesõ ipõ noatai iko. Okea rupi kõrijõ tè ekoi ipi. 34A'e rè Peturu omã'ẽ remẽ, kee e'i:
– Age'e si Jesu Kiristu tanemokatupa ky'y! e'i. Ewyjy awi nekea pe wyi epõ'ã. Nekea teremokatu eraa, e'i.
Ameve ikatupa opõ'ã ky'y.
35Ãmẽ pirujẽ Rita taa wãnà kõ a'evoa rè omã'ẽ. Awyje Janerõvijã ywete koty rewarà kõ rõmõ ekoipa kupa ky'y. Sarõ wãnà kõ a'evo ve ekoi.
36Ãmẽ oiko wãivĩ mõ ãmõ taa pè. Jopi eu a'e taa pè. Rita taa pyri'ĩje'ẽ a'e taa. A'e wãivĩ pè Tamita eu Juteu kõ ayvu pè. (Kereku kõ ayvu pè ãmẽ Tokasi eu.) Jesu koty rewarà tè Tamita. Mira katuay wete a'e wãivĩ ipi. Ojikuwa katu poroporijauesa mã'ẽ rõmõ iko. Iporijau mãe kõ rè oja'a katu ipi. [Tyru kõ oinõ ime'ẽ ijupe kõ ipi.]
37Ãmẽ Peturu Rita taa pè tui remẽ jakatu, a'e wãivĩ itekorã okãjã. Okãjã maire, ipyriwarà kõ weraa eãgwerà imojau jura pè inõ. A'e pè oinõ rã'ĩ kama 'aryvo kupa. 38Ãmẽ, “Peturu ike'ĩje'ẽ Rita taa pè ekoi”, e'i mã'ẽ ojenu ijupe kõ. Tamita jimorypakwerà kõ pè ojenu. Ajawyi kwaima'e kõ mõ omono Peturu pijarà mõ kupa. Mõrijõ rõmõ omono kupa. A'e kõ ovãe Peturu pyri remẽ, Tamita kãjãa omojenu ijupe kupa.
– “Totuu rã'ĩ”, e'i ene kupa! e'i kupa. Ejo kuise'ẽ orerupi! e'i ijupe kupa.
39Ãmẽ Peturu ojimokatu oo upi kõ, Jopi taa kyty. A'e pè ovãe kupa remẽ, weraa Peturu jura pè kupa, Tamita reãgwerà resa. A'evo ekoi remẽ, terekwarerà kõ wãrimã tesõ Peturu upa. Oja'o okãjã mã'ẽ rè kupa upa. Omojisa jisa tyru kõ Peturu rovake kupa. Tamita amyry remiasa asakwerà kõ, uve jẽ remẽ oinõ imosãi maekwerà kõ. 40Ãmẽ Peturu e'i ijupe kõ:
– Hoõ! Pejisyry rã'ĩ ike wyi! e'i.
Ojisyrypa kupa ire, Peturu ojimoenãpa'ã oporegeta Janejare'e pè. Ajaire ojirova eãgwerà kyty javo:
– Tamita, epõ'ã! e'i ijupe.
Ameve Tamita opoera ky'y. Peturu rè omã'ẽ remeve, ojãrapo'ã wapy. 41Ãmẽ Peturu opopyy imopõ'ã ky'y. Ajaire kee e'i ijimorypa kõ pè:
– Peike pejo ky'y!
Jesu koty rewarà kõ pè aepo e'i. Terekwarerà kõ pè aepo e'i teve. Oike kupa remẽ, Peturu kee e'i ijupe kõ:
– Aã opoerapa pejimorypa ky'y! e'i.
42Ameve a'evoa ojenu jenupa katu a'e taa rupi ky'y. Ãmẽ ywesõ Janerõvijã ywete rè oja'a kupa ky'y. Mõa'ãrõwã oja'a ee mãe kõ. 43Aja paire, Peturu opyta puku sa'u rã'ĩ a'e taa pè. Simão eu erà pè mã'ẽ pyri opyta rã'ĩ. A'e oposiko moma'e pirerà rè imosikã ipi mã'ẽ tè a'e.
Tans Gekies:
Jesu koty rewarà kõ 9: oymNT
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2013, Wycliffe Bible Translators, Inc. All rights reserved.
