Jesu koty rewarà kõ 10
10
Koneri rewarà
1Ãmẽ oiko kwaima'e mõ ãmõ taa pè, Sesareja eu taa pè mã'ẽ pè. Koneri eu a'e kwaima'e pè. Juteu rõwã a'e ajamã'ẽ. Romã pewarà sota atyry rõvijã rõmõ tè a'e. 100 rõmõ tesõ emĩgwai kõ sota kõ. Itaria yvy wãnerà kõ tè sota kõ. 2Janejare'e werovija katu imomojy mã'ẽ tè Koneri ajamã'ẽ. Pirujẽ etã wyry pewarà kõ a'evo ve. Kõ'ẽ jawe jawe oporegeta Janejare'e pè mã'ẽ tè Koneri. Okarakuri rè nokãte'ãi mã'ẽ teve a'e. Iporijau mãe kõ pè omosãi okarakuri ipi mã'ẽ teve.
3Ãmõ 'ary pè, kwaray ijãpẽ remẽ, Janejare'e remĩgwai yvapewarà ojimoikatu ijupe. A'e yveve omã'ẽ Janejare'e remĩgwai yvapewarà rè. Ipyri'ĩje'ẽ uu javo ijupe.
– Koneri! e'i ijupe.
4Ãmẽ Koneri ojimonyi tesõ ee omãjã.
– Jõvijã, moma'e põ? e'i.
Ãmẽ Janejare'e remĩgwai e'i ijupe:
– Janejare'e wenu neporegeta ijupe remẽ ipi, e'i. Omã'ẽ teve nere, nimoma'ei mãe kõ neporijauesa ipi remẽ. Oryvay nere a'evo neiko remẽ ipi, e'i. [Ajawyi wayvu mojenuarà mõ omuutà nekoty tanemotekokuwa wekoa rè ky'y, e'i.] 5Ajawyi kee tereiko. Age'e emono neremĩgwai kõ mõ too Jopi taa kyty, Simão Peturu eu mã'ẽ pijarà mõ. 6Simão eu ve ijupe mã'ẽ retã mè tui. A'e moma'e pirerà rè oposiko ipi mã'ẽ. Pãranã wasu reme pè ojeetãnõ upa, e'i. A'e pè too ipijarà mõ ãmẽ kupa, e'i Janejare'e remĩgwai Koneri pè.
“Hoõ” e'i ãmẽ Koneri. 7Ameve Janejare'e remĩgwai yvapewarà ojimopi ky'y, oporegeta paire. Ãmẽ Koneri omuu mõrijõ wemĩgwai kõ, etã wyry pè oposiko mãe kõ. Sota mõ ve pe'ĩ, opãtavõarà mõ, omuu teve. Janejare'e omoe'e ipi mã'ẽ teve a'e sota ajamã'ẽ. 8A'e kõ pè pirujẽ omome'u a'evoa. Omome'u paire,
– Pekwa awi Jopi taa kyty Simão Peturu pijarà mõ, e'i ijupe kõ.
9Oo ãmẽ ijayvu rupi kupa. Pe'ĩ oke pee rupi oo kupa. A'e pe wyi nikuipei Jopi taa ky'y.
Janejare'e omojisaoka Peturu pè maekwerà
Ãmẽ jakatu sikaepo Peturu ojiupi jura pè oporegeta Janejare'e pè upa, okape 'aryvo. Jane 'aryvo katu kwaray remẽ a'evo ekoi. 10Ãmẽ ipõ Peturu ijamyay tesõ ky'y. Nojyive emi'õ rã ajamã'ẽ. Oporegeta jẽ Janejare'e pè upa ãmẽ. Ãmẽ si kee jaa Janejare'e omojisaoka ijupe, tomã'ẽ ee. 11Ma'e rè omã'ẽ upa. Yva ojeovajaro maevo sõ tite mã'ẽ rè omã'ẽ. A'e pe wyi kamisa pevu ojipopy siamyry ãpasĩ mã'ẽ owyjy maevo sõ tite uu ovake. 12Juteu kõ no'ui mã'ẽ iteetejẽ kamisa pupe tui, Janejare'e “Tape'u e'ã”, e'i ijupe maekwerà kõ. Aã kõ no'ui kupa ipi. Yvy rupi osyryry mãe kõ. Ãmõ, wyra kõ mõ. Ãmõ, Juteu kõ remijarà rõwã mãe kõ. A'e a'e kõ rè omã'ẽ maevo sõ tite, kamisa pupe. 13A'evoa rè omã'ẽ upa remẽ, moregeta ojenu ijupe, kee e'i mã'ẽ:
– Peturu, epõ'ã jẽsi! Ãwĩ kõ terejuka iwa! e'i ijupe mã'ẽ.
14– Ãnĩ, erõvijã! e'i ijupe Peturu. Eremi'õ'y rõwã ãwĩ kõ! e'i. Ãwĩ kõ pè Janejare'e, “Tape'u e'ã”, e'i ore ipi. A'u sõ remẽ, eky'atà Janejare'e pè ãmẽ. Nija'ui mãe kõ tè ãwĩ kõ! e'i.
15Ãmẽ ayvu ojenu mijẽ ijupe:
– Aepo ere sõ Janejare'e ome'ẽ tere'u mã'ẽ pè. Ikatuay mã'ẽ rõmõpa ome'ẽ. “Hoõ” ere jẽsi iwa ajawyi! e'i ijupe.
16Moapy rõmõ tesõ a'evoa rè omã'ẽ maevo sõ tite. Ameve kamisa pevu ojiãpasĩ isiamyry rè mã'ẽ oẽ oo ky'y, ipupewarà kõ revejẽ. Kõitokõ owyjy uu, a'evo ve oẽ oo yva pupe. Awyje.
[Ãwitõ Juteu kõ no'ui wemi'õ'y rõwã, a'e kõ wemimory e'ã kõ rè nojimoryi kupa, Juteu rõwã mãe kõ rè. Ojireko katu kõrijõ iwyi kõ kupa ipi. Ajawyi kee jaa tè sikaepo Peturu pè Janejare'e remimojisaoka: “Juteu rõwã mãe kõ ve eremĩgwai kõ rõmõ toiko. Ajawyi amonooka kõ nekoty remẽ, terejimory ee kõ nẽ”, jaa tè aepo e'i.]
17Ajamã'ẽ Peturu nokuwaive manyvo jaa tè sikaepo a'e. Ajawyi ojipy'amogeta ywete jẽ upa wemisakwerà rè.
– Manyvo jaa põ? e'i oupe.
Ãmẽ jakatu Koneri remimuurerà kõ weka sikaepo Simão retã iko. [Juteu rõwã mãe kõ a'e kõ.] Wesa kupa remẽ, oka rovapyka pè rã'ĩ opyta kupa. E'i kupa:
18– Ike põ Simão Peturu eu erà pè mã'ẽ tui? e'i kupa.
19Ãmẽ Simão Peturu ojipy'amogeta jẽ wemisakwerà rè upa. Ameve ipõ Janejare'e 'Ãg oporegeta ijupe:
– Ejapyaka rã'ĩ si! Ãwĩ jane kõ uu nereka iko, e'i. Moapy rõmõ kupa, e'i. 20Ejimokatu jẽsi ewyjy ekwa upi kõ. “Aatà sipõ upi kõ?” tere e'ã rã'ĩ. Ekwa te'ĩte! e'i. Eremimuu kõ tè nekoty, e'i Janejare'e 'Ãg ijupe, Peturu pè.
21Aepo e'i Janejare'e 'Ãg ijupe remeve, owyjy Peturu oo Koneri remimuurerà kõ mogeta. E'i ijupe kõ:
– Ije tè ereka pekupa! Manyvore põ pejo eresa? e'i.
22A'e kõ e'i ijupe:
– Orerõvijã tè oremuu nekoty, Koneri eu orerõvijã rerà pè. Sota atyry rõvijã tè a'e, e'i. A'e ivo katu mã'ẽ tè, e'i. Janejare'e werovija katu ipi mã'ẽ teve, e'i. Pirujẽ Juteu kõ remimoe'e teve. Janejare'e remĩgwai yvapewarà ojimoikatu ijupe etã wyry pè. “Neayvu emono Peturu eu erà pè mã'ẽ pè totuu nekoty, tanemotekokuwa”, e'i ene mã'ẽ, e'i Peturu pè kupa.
23Ãmẽ Peturu e'i:
– Peike ajawyi, e'i. Peke rã'ĩ epyri, e'i ijupe kõ.
Peturu oo Koneri resa remẽwarà
A'e pè oke rã'ĩ ãmẽ kupa. Kõ'ẽme Peturu ojimokatu ootà, Juteu rõwã mãe kõ rupi. Juteu kõ mõ ve oo Peturu rupi, Jesu koty rewarà kõ mõ. A'e Jopi taa wãnà kõ. 24Pe'ĩ oke oo kupa. Kõ'ẽme ovãe Sesareja taa pè kupa. Ãmẽ jakatu sikaepo Koneri wãrõ kõ upa, wetãrã kõ reve, ojimorypa kõ reve. [Ji'ite omuu kõ opyri Peturu vãea rãrõ.] 25Ãmẽ Peturu ovãe tetã wyry pè remẽ, Koneri uu amãtejẽ õvaisĩ. Ojimoenãpa'ã Peturu rovake imoe'ea rõmõ.
26Ajamã'ẽ Peturu omopõ'ãoka jẽ.
– Temimoe'e rõwã ije! e'i. Jane tè ije. Nevo mã'ẽ teve ije, e'i. Epõ'ã awi! e'i ijupe.
27Ãmẽ Peturu oike tetã wyry pè Koneri reve. Oike oporegeta kupa. A'e pè mõa'ãrõwã jane kõ wãrõ upa.
28A'e kõ pè Peturu e'i:
– Pekuwa Juteu tè ije. Oreretãrã kõ rè kõrijõ tè orojimory ipi. Norojimoryi ãmõ kõ rè ipi. Ãmõ, noroikei teve etã wyry kõ pè ipi, e'i. “Aike sõ remẽ, eky'atà Janejare'e pè”, oro'e ipi. Orerãmõi amyry kõ ayvukwerà rupi a'evo oroiko ipi. Ije ve aepo a'e mã'ẽ teve mijã. Ajamã'ẽ Janejare'e emotee age'e ky'y, ãwisõ, “Janejare'e remimotarà rõwã ãwĩ”, ta'e e'ã jane kõ pè ky'y. Ãmõ, “Nivoi mã'ẽ tè ãwĩ”, ta'e e'ã teve, e'i. [Ãwitõ eremi'õgwerà nemoai kuwa'ãi Janejare'e pè, ãwĩvo ve] ãmõ kõ rè ajimory remẽ nemoai'ãi sikaepo Janejare'e pè, e'i. 29Ajawyi neremĩgwai kõ uu epijarà mõ remẽ, “hoõ” a'e te'ĩte. Ajo te'ĩte nekoty. Ere ajawyi ije. Moma'e rõmõ põ emuu ike kyty rejupa? e'i Peturu.
30E'i ãmẽ Koneri ijupe:
– Wãi kwee aporegeta ajupa Janejare'e pè eretã wyry pè, ijãpẽ kwaray remẽ. Ãmẽ kwaima'e vo maevo sõ tite ojimoikatu ije. Ijyru suky katu mã'ẽ a'e. 31A'e kee e'i ije: “Koneri, Janejare'e wenu neporegeta ijupe remẽ ipi”, e'i. “Omã'ẽ teve nere, nimoma'ei mãe kõ neporijauesa ipi remẽ. Oryvay nere ãmẽ”, e'i ije. [“Wayvu mojenuarà mõ omuutà nekoty tanemotekokuwa wekoa rè”, e'i ije.] 32“Ajawyi emono neremĩgwai kõ mõ too Jopi taa kyty Simão Peturu eu mã'ẽ pijarà mõ”, e'i. “Ãmõ Simão eu teve ijupe mã'ẽ retã mè tui. A'e moma'e pirerà rè oposiko imosikã mã'ẽ. Pãranã wasu reme pè etã tui. A'e pè too ipijarà mõ ãmẽ kupa”, e'i maevo sõ tite ije ojimoikatu remẽ. 33Ajawyi amonooka eremĩgwai kõ mõ too nepijarà mõ. Ajawyi eroryvay nevãea rè. Age'e orojimoatypa neayvu renu orokupa. Janejare'e ve janepytery pè ike ekoi. Ajawyi pirujẽ Janerõvijã ywete e'i teremojenu oreupe mã'ẽ, emojenu ore ãmẽ, e'i Koneri Peturu pè.
Peturu omotekokuwa Koneri remẽwarà
34Ãmẽ Peturu omotekokuwa kõ ky'y. Kee e'i imotekokuwa kõ:
– Age'e si akuwa aje ywete Janejare'e Juteu rõwã mãe kõ ve wauvay wete ipi. Ojevo jẽ sikaepo janerauvay, Juteu kõ vo jẽ, e'i.#T.M. 10.17 35“Ãmõ ãmõ kõ yvy wãnà kõ wyi tè terepota e'ã”, ne'i janeupe ky'y, e'i. Ãmẽ Janejare'e pirujẽ werovija katu imomojy mãe kõ opota ipi. Pirujẽ ivo ekoi mãe kõ opota, e'i. A'evoa akuwapa ky'y, e'i.
36– Jesu rerãkwẽa pekuwapa teve, e'i. “Janejare'e ojimory janere Jesu Kiristu rupi ky'y”, e'i mã'ẽ. A'e Janejare'e omojikuwaoka Isaeu kõ pè ky'y. “Pirujẽ jane kõ Rõvijã ywete rõmõ Jesu ekoi”, e'i mã'ẽ. 37Pirujẽ Jesu rewarà pekuwapa, ojenupa peupe rewarà mõ, e'i. Karireja yvy pe wyi ojiãparõ remẽwarà ojenupa. Juteja yvy rupi ekoi remẽwarà ve. Jesu ojimojãmorĩoka Juwão pè paire itõkõ, oposiko ypy jane kõ motekokuwaa rè.
38– Kee pekuwa teve Jesu Nasare taa wãnà rewarà. Janejare'e o'Ãg tesõ oinõ itõkõ Jesu py'a pupe imokasioka. Wayvumokasioka teve. Ikasia rupi taa taa kõ rupi oo remẽ itõkõ, poromokatu poroereko ipi. Ãmõ, ãjãgai rõvijã kasia itõkõ omomoioka jane kõ wyi, pirujẽ. Janejare'e eeve ekoi ipi rewarà mõ a'evo ekoi.
39– Ore ywete a'evoa rè oromã'ẽ, Juteu kõ yvy pè ekoi remẽ, Jerusarẽ taa pè. Ore yveve orokuwa Jesu rewarà, eeve oroiko ipi rewarà mõ. Age'e rõwã oroiko eeve. Pirujẽ taa taa kõ rupi oo remẽ, ore ve oroo teve upi ipi. Ajaate Jesu opyy ijuka kupa ky'y. Yvyra jipokana rè opomoputuputuri ijuka kupa.
40E'i jẽ Peturu:
– A'evo tesõ ipe. Ajamã'ẽ Janejare'e tè omomoera. Moapy 'arà remẽ opoera mijẽ. Ajaire ojisaoka mijẽ oreupe, Janejare'e kasia rupi. 41Pirujẽ rõwã kõ Jesu ojisaoka joupe ajamã'ẽ. Janejare'e remipyteporokwerà kõ pè kõrijõ tè ojisaoka. Ajawyi tè a'evoa age'e oromojenu. Opoera paire yveve tesõ kõ ojimi'u orereve. Aja rewarà mõ ywesõ orokuwa aje ywete opoera mã'ẽ. 42A'evo remẽ Jesu kee e'i oreupe: “Janejare'e eayvumokasi pirujẽ jane kõ moe'yiarà rã mõ taiko. Ãwitõ omãnõ maekwerà kõ amoe'yità, ãwĩvo vetà uve jẽ mãe kõ amoe'yità”, e'i. “Pemojenu eayvu katu jane kõ pè erokwa, tokuwa kupa”, e'i kõ Jesu oreupe toromojenu, e'i.
43E'i jẽ Peturu:
– A'evoa rewarà pirujẽ Janejare'e ayvu mojenuarà kõ omojenu amãtejẽ karamoe remẽ. Kee e'i amãtejẽ kupa. Ava mõ ojiporijauesaoka Janejare'e Remimuurerà rè remẽ, Janejare'e “awyjepa” e'ità ijaiwererà kõ pè ky'y. Jesu pewarà mõ tè aepo e'i amãtejẽ kupa, e'i Peturu ijupe kõ.
Janejare'e 'Ãg oike Juteu rõwã mãe kõ py'a pupe remẽwarà
44-46Aepo e'i Peturu oporegeta remeve, Janejare'e 'Ãg owyjy oike ojapyaka mãe kõ py'a pupe. Ameve iteetejẽ ijayvu kõ rupi oporegeta Janejare'e moe'e e'e kupa ky'y. Ayvu rè nojimo'ei mã'ẽ rupi tesõ oporegeta Janejare'e moe'e kupa.
– Ene ywesõ nekasiay! Ene ywesõ nekatuay wete! e'i e'i Janejare'e pè kupa.
Ãmẽ Juteu kõ, Jesu koty rewarà kõ Peturu rupi uu mãe kõ, omã'ẽ ãwĩvoa rè. A'e kõ itõkõ omã'ẽ Janejare'e o'Ãg omowyjy Juteu rõwã mãe kõ pè remẽ. Wenu teve ijayvu nokuwai mã'ẽ rupi oporegeta kupa remẽ. Wenu teve Janejare'e omoe'e kupa remẽ. Ajawyi e'i kupa:
– Haa! Juteu rõwã mãe kõ pè tesõ Janejare'e o'Ãg ome'ẽ! e'i kupa.
Ãmẽ Peturu e'i Juteu kõ pè:
47– Ajawyi simojãmorĩ kõ kuwasi yy pupe, Jesu koty rewarà kõ rõmõ! Emã'ẽ! Janejare'e omuu o'Ãg ijupe kõ. Ãwitõ janeupe omuu, ãwĩvo ve, Juteu rõwã mãe kõ teipe remẽ, e'i Peturu ijupe kõ.
48Omojãmorĩoka kõ ãmẽ, Jesu Kiristu ayvu rupi. A'evo paire a'e kõ,
– Epyta sa'u rã'ĩ orepyri, e'i kupa.
A'evo Juteu rõwã mãe kõ oja'a ypy Jesu oõvijã ywete rõmõ remẽ.
Tans Gekies:
Jesu koty rewarà kõ 10: oymNT
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2013, Wycliffe Bible Translators, Inc. All rights reserved.
