Jesu koty rewarà kõ 11
11
Peturu Koneri rewarà omojenu remẽwarà
1Ajaire, “Juteu rõwã mãe kõ ‘aje’ e'i Janejare'e ayvu pè”, e'i mã'ẽ ojenu Jesu remimonokwerà kõ pè. Pirujẽ Jesu koty rewarà kõ pè ojenu, Juteu kõ pè. Juteja yvy rupiwarà kõ pè. [Peturu renone kyty ojenu amãtejẽ.] 2A'evoa rè ãmõgwerà oryvay. Ãmõgwerà ajamã'ẽ naory ywe'ei. A'e kõ kee e'i:
– Ajawyi tojimojuteu rã'ĩ kupa. Tojiemosĩpire'ooka kupa, e'i epe kupa.#11.2 “Juteu kõ kõrijõ tè Janejare'e wereko”, e'i tite kupa rewarà mõ aepo e'i kupa mijã.
Ajaire Peturu ojiupi oo Jerusarẽ taa kyty Jesu koty rewarà kõ resa ky'y. Ãmẽ, “Tojimojuteu kupa”, e'i mãe kõ ijayvu teitete. Kee e'i kupa:
3– Nojiemosĩpire'ookai mãe kõ rè sõ nejimory! e'i kupa. Nejimi'u teve sõ eeve kõ! e'i. Neke teve sõ etã kõ wyry pè! e'i Peturu pè kupa.#11.3 “Tãmõ Moisesi remikusiwarerà rupi rõwã si neiko!” jaa tè aepo e'i kupa mã'ẽ.
4Ajawyi Peturu pirujẽ a'evoa omome'u katu ijupe kõ, manyvo ekoi maekwerà kõ. Kee e'i ijupe kõ:
5– Ãmẽ Jopi taa pè aiko remẽ, Janejare'e moma'e rewarà omoikatu ije, aporegeta ijupe ajupa remẽ. Kamisa pevu rè amã'ẽ maevo sõ tite, e'i. Isiamyry kõ rè, ojiãpasĩ ojee mã'ẽ rè. Yva pupe wyi owyjy maevo sõ tite uu erovake opyta rã'ĩ, e'i. 6Ãmẽ kamisa pupewarà kõ rè amã'ẽ maevo sõ tite, janeremi'õ'y rõwã rè. Janejare'e “tape'u e'ã” e'i ijupe kõ maekwerà kõ rè amã'ẽ. Kejõ mã'ẽ rè. Janeremijarà rõwã rè amã'ẽ. Ãmõ, yvy rupi osyryry mãe kõ rè. Ãmõ, wyra nija'ui mãe kõ rè. A'e a'e kõ rè amã'ẽ maevo sõ tite kamisa pupe, e'i.
7– A'evo remẽ moregeta ojenu ije. Kee e'i: “Peturu, epõ'ã jẽsi! Ãwĩ kõ ejuka iwa”, e'i ije, e'i. 8Ãmẽ kee a'e ijupe: “Ãnĩ, Jõvijã! Eremi'õ'y rõwã ãwĩ kõ. Ajawyi na'u'ãi! Janejare'e, ‘Tape'u e'ã’, e'i ijupe mãe kõ tè ãwĩ. A'u sõ remẽ, Janejare'e pè eky'atà”, a'e tite ijupe. 9Ãmẽ ayvu ojenu mijẽ ije yva pupe wyi. “Ãnĩ! Aepo ere sõ Janejare'e ome'ẽ tere'u mã'ẽ pè!” e'i ije. 10Moapy rõmõ tesõ a'evoa rè amã'ẽ maevo sõ tite. A'evo paire kamisa oẽ oo yva pupe. Awyje ky'y.
11– Ameve moapy rõmõ kwaima'e kõ ovãe epyri a'e tetã wyry pè, Sesareja taa pe wyi uu mãe kõ. Juteu kõ rõwã a'e kõ. Ãmõ kõ tè. [Koneri remimuurerà kõ.] 12Ãmẽ Janejare'e 'Ãg kee e'i ije: “Ãwĩ kõ rupi ekwa. ‘Aatà põ upi kõ?’ tere e'ã rã'ĩ”, e'i ije. Ajawyi aa te'ĩte upi kõ, e'i. Ãmẽ aã erevewarà kõ mõ ve oo erupi, Jesu koty rewarà kõ mõ. Jopi taa wãnà kõ mõ. 6 rõmõ oo erupi mãe kõ. Koneri retã mè orovãema remẽ oroike, e'i.
13– [Orovãe remẽ, Koneri orerãrõ upa.] Kee e'i oreupe: “Ike eretã wyry pè Janejare'e remĩgwai yvapewarà ojimoikatu oporegeta ije”, e'i. “A'e kee e'i ije: ‘Neremĩgwai kõ mõ emono Jopi taa kyty, Simão Peturu pijarà mõ’, e'i. 14‘A'e tè pemotekokuwatà, nepyriwarà kõ reve. Ijayvu perovija remẽ, Janejare'e penereko katutà, nepyriwarà kõ revejẽ’, e'i Janejare'e remĩgwai ije”, e'i Koneri ore. 15Ãmẽ amogeta kõ ajupa remeve, Janejare'e 'Ãg owyjy oike ipy'a kõ pupe. Ãwitõ janepy'a pupe oike remẽ, a'evo ve, e'i. 16A'evo remẽ Janerõvijã ywete ayvukwerà rè aja'a, kee e'i maekwerà rè: “Aje, Juwão poromojãmorĩ yy pupe tè. Ajamã'ẽ age'e sõsi aje Papa 'Ãg tẽ tesõ uutà oike pepy'a pupe pemokasiarà rõmõ ky'y”, e'i oreupe maekwerà rupi katu, e'i Peturu.#J.K.R. 1.5
17E'i jẽ Peturu:
– Ajawyi kee a'e. Juteu rõwã mãe kõ pè ve Janejare'e ome'ẽ o'Ãg, Janerõvijã Jesu Kiristu pè ojireko katuoka kupa remẽ. Janeupe ome'ẽ mã'ẽ vo ve ome'ẽ ijupe kõ. Ajawyi manyvo nareko'ãi, Janejare'e tepa opota kõ okoty rewarà kõ rõmõ rewarà mõ! e'i Peturu ijupe kõ.
18Ãmẽ Jesu koty rewarà kõ aepo wenu remẽ, manyvo ne'i kupa ky'y. Nojiayvuvajai kupa ky'y. Oterẽ jẽ omoe'e Janejare'e kupa ky'y.
– Janejare'e ikatuay wete! Okãte'ãmai tè janere, Juteu rõwã mãe kõ teipe remẽ, ãwisõ tojimosĩoka waiwererà reitypypyipaoka ijupe kupa! Aje ywete janevo oiko karuarutà Janejare'e pyri kupa! e'i kupa.
Jesu koty rewarà Ãtiokia taa wãnà kõ rewarà
19Kõi remẽ itõkõ Esitevão jukaa paire jimomorijau wasua ojiãparõ. Ajawyi Jesu koty rewarà kõ ojavapa oo ojimosãsãi kupa. A'e kõ mõ Juteu rõwã mãe kõ rena kõ gyty oo ojimoena kupa ky'y. Ãmõ kõ rena kõ gyty tè oo ojimoena kupa. Ãmõgwerà Penisia yvy kyty oo. Ãmõgwerà Sipiri ypõ'õgwerà mitirõwã mã'ẽ gyty oo. Ãmõgwerà, Ãtiokia taa kyty oo. Jesu ayvu rè oo oo poromotekokuwa jẽ iko kupa ipi. Ajamã'ẽ wetãrã kõ kõrijõ tè omotekokuwa kupa ipi, Juteu kõ kõrijõ tè.#J.K.R. 8.1-4 20Ajamã'ẽ ãmõgwerà, “Juteu rõwã mãe kõ ve simotekokuwatà Jõvijã Jesu rekoa rè”, e'i. Sipiri ypõ'õgwerà wãnà kõ aepo e'i. Ãmõ, Sireni taa wãnà kõ aepo e'i. Ãmẽ a'e kõ oo Ãtiokia taa kyty. A'e pè Jõvijã Jesu ayvu katu omojenu kupa. Juteu rõwã mãe kõ pè omojenu kupa. Wetãrã kõ pè teve. 21A'evo remẽ Janejare'e tè omokasi kõ ipi, ãwisõ emimono kõ ayvu toerovija katu. A'e kõ waiwererà oitypypyipaoka Janejare'e pè. Janerõvijã ywete rè ojirovija kupa ky'y. Mõa'ãrõwã a'evo ekoi mãe kõ. 22Ajawyi, “Mõa'ãrõwã Juteu rõwã mãe kõ omojõvijã Jesu ky'y”, e'i mã'ẽ ojenu Jesu koty rewarà atyry kõ pè Jerusarẽ taa pè. A'e kõ kee e'i:
– Haa! A'evo si! e'i enu kupa. Ajawyi Panape simonookatà imokasiarà kõ rõmõ! e'i kupa.
23-24Mira katuay wete Panape, Janejare'e 'Ãg omokasi mã'ẽ tè. Jesu rè eako'iay mã'ẽ teve. A'e tè omono ãmẽ kupa. Ãmẽ Panape ovãe a'e taa pè remẽ, Jesu koty rewarà kõ pyri ovãe. Oryvay ee kõ omãjã.
– Aje Janejare'e wereko katu kõ okatuaya rupi! e'i omãjã ee kõ.
Ajawyi omokasi kõ.
– Aje ywete Janerõvijã ywete rekoa rupi tapeiko jẽ peiko! e'i imokasi kõ.
A'evo remẽ ywesõ ojatyka sa'u jane kõ ojimotee e'età Janerõvijã koty rewarà kõ rõmõ.
25A'evo paire Panape ojisyry oo Taasu taa kyty Sauru pijarà mõ. 26A'e werojivy eru opãtavõarà rõmõ Ãtiokia taa pè. Pe'ĩ kwaray a'e taa rupi ekoi kupa, a'e wãnà kõ motekokuwaarà rõmõ Jesu rekoa rè. Ijatyray wete emimo'ekwerà kõ ãmẽ. A'e taa pè tè ypy Kiristu koty rewarà kõ eu ijupe kõ. 27Ãmẽ a'evo remẽ, Janejare'e ayvu mojenuarà kõ mõ uu Jerusarẽ taa pe wyi, Ãtiokia taa kyty. 28Ojimoaty kupa remẽ, Akapu eu erà pè mã'ẽ opõ'ã oporegeta, Janejare'e 'Ãg kasia rupi. Kee e'i amãtejẽ:
– Nipuku'ãi tyavorusutà. Taa jãvijõ jẽ a'evotà. Yvy popy kyty ve tesõ a'evotà. Amyay wasu okwatà, e'i amãtejẽ jane kõ tokuwa.
Ijayvukwerà rupi katutà a'evo kãramõ. Karautiu Sesa jõvijã wasu rõmõ ekoi remẽ tè a'evotà.#J.K.R. 21.10 29Ajawyi Jesu koty rewarà kõ aepo wenu remẽ, kee e'i ojiupe kupa:
– Epy wetetà ja'umã'ẽ tyavo remẽ, e'i kupa. Ajawyi Jesu koty rewarà kõ Juteja yvy wãnà kõ sipãtavõtà, e'i kupa.
A'evoa renone kyty omoaty amãtejẽ okarakuri ãmẽ kupa. Ikarakuri ywete mãe kõ ome'ẽ ywete sa'u. Nikarakuri ywe'ei mãe kõ ãmẽ pe'ĩpe'ĩ tè ome'ẽ. A'evo ekoi ojipãtavõ kupa. 30Karakuri wemimoatyrerà omonooka Panape kõ rupi kupa. Jesu koty rewarà kõ rõvijã kõ pè omonooka kupa, Juteja yvy kyty. Oo ãmẽ Panape kõ Sauru reve weraa. A'e weraa ijupe kõ.
Tans Gekies:
Jesu koty rewarà kõ 11: oymNT
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2013, Wycliffe Bible Translators, Inc. All rights reserved.
