Madiu 12
12
Sabati ana vehimeya fa'ina.
Maki 2:23-28
1 #
2Veh 23:25
Muliya sabati sa'eyana againe Yesu witi ana faheya ginunudadana. Ana tomuliya buye hinunudadana, ada badi mafu gilaudi fa'ina hivebutu witi nafona hikikikolukolu be hi'au'a. 2Tu badi tonagona tafatafalolodiyao adi egana Falisi hi'itadi againe Yesu higahena higayo, “U'ita, a tomuliyamomo sabati ana vehimeya keke hida'itave'avini.”
3-4 #
1Sam 21:1-6
Bana gigahedi gigayo, “Ada tokaiwabu Devida tuwai-mo'ena gimiyami-ma kahihina ma'i wahawahawana o ka'i keke? Tova sa'eyana bana'e tobohiyaneyao buye mafu gilaudi tu Yaubada yana manuweya giluku, a'a Yaubada matane hisena-ma givaina tu hawahawatana nonogana gi'ana kadu yana kalivamomo buye hi'ana. Mena a'ai-nadi badi fa'idiya hawahawatana tu abaveyao ana tofaisewagaga adifaiweya hina'ana. 5#Ail 28:9-10Kadu abaveyao ana tofaisewa yadi dewa sabati againe yada buki-vehimeya againe ma'i wahawahawana o ka'i keke? Badi manuwa-tafalolo againe hififaisewa sabati ana toveya. Sabati ana hawata faisewa fa'ina hiyaweyawelina nonogana adi vita keke. Meda anafaiweya aku tomuliyamomo adi vita keke. 6Wanogali! Manuwa-tafalolo ana kaiwabu lakahina tu tokaiwabu sa'eyana gilakayemu-ma manuwa-tafalolo ana kaiwabu gitubuhegena. 7#Hos 6:6; Md 9:13Yaubada yana gahe sa'eyana ana nuwanuwa keke wadahalamaneni, gigayo,
Keke nuwanuwaku kevakeva aku abaveyao fa'ina wanakabukabudi. Iya nuwanuwaku kaliva wanahinekalikaliyedi.
Ka'i mena gahe ana nuwanuwa ma'i wadahalamanena digo, yaku kaliva adi vita keke amanadi keke wadahawavekoyoyedi, au wadahinekalikaliyedi. 8Au Iya Tohobu'ela sabati ana to'itave'avina. Kaliva yadi dewa sabati againe Iya gavehivehimeyena.” Au hidemi Yesu gigahe.
Yesu kaliva nimana koyona sabati againe gikiveyamumuna.
Maki 3:1-6; Luke 6:6-11
9Tu Yesu faheya amine gi'ela gina yadi manuwa-abavehawala ana egana sinagogi againe giluku. 10Kaliva sa'eyana gimiyami nimana gifwalele-vagata. Kadu kaliva tufoidi himiyami, nuwanuwadi tamo gavadi koyona Yesu yana dewa againe hinanuhagani-yo hinahawavekoyoyena, fa'ina hitoliluveluvena higayo, “Yada buki-vehimeya kaliva ana siveyawa fa'ina gavaimi givehimeya? Ka'i adafaiweya sabati againe kaliva kanasiveyawana o ka'i keke?”
11Yesu gigahedi gigayo, “Tamo hakwadi agaimiya ya sifi kahuya sabati againe ginabe'u, ka'i unana unasilakahina o ka'i keke? Sabati againe nonogana unasilakahina. 12Sifi au gaitoma lakahina tu kaliva ma gaitoma lakahi-mo'ena. Hidema fa'ina hai kaliva sabati againe tobohiyana gina'ihagihagiyena, medema sabati ana vehimeya gi'itave'avina.”
13Hidedemi Yesu gigahedi tu nimakoyo againe gigahe gigayo, “Nima utune.” Nimana gitunena ada auhe'ama giyamumu nimana fafalina yamumuna amine. 14Tu badi Falisi hilowoga be hina buye hivevai be higa Yesu hinaluve'alikana.
Yesu Yaubada yana tofaisewa.
15Tu Yesu Falisi yadi nuwanuwa gihalamanena againe, mena melala gihegena. Yo'o lakahina hibwa'ulina ada yadi to'aulolo moya'aidi gisiveyawa-'owodi. 16Gisiveyawadi tu gihawatadi be Bana'e yadi tosiveyawa keke kaliva agaidiya hinalukahihiyeni. 17Gihawatadi be higa Yaubada yana gahe bonana ana to'awatalatalaina ana egana Aiseya tuwai-mo'ena gigaheye-vagahina ma a ginalakayemu velemo'ena. Bana Yesu fa'ine Yaubada gigahe gigayo,
18 #
Ais 42:1-4
#
Md 3:17
Wa'ita, Bana hidevama yaku tofaisewa gavegidena
amanadi, yaku nuwanuwa Bana againe gasena
ada Bana nuwaku gikiveyamumu-mo'ena.
Alu'aluwaku Bana againe ganasena be ginafaiwalavelena,
ada yaku vehimeya tunutunugina yo'o tulidi tulidi ginavehawaledi.
19 #
Md 11:29; 2Ti 2:24 Keke kaliva ginavekwageyedi o ginagahe'awafatafata.
Keke tamo hakwadi Bana agona melaleya ginanogalini,
fa'ina Bana umaumana.
20Badi kowakowadiyao isisi'u gi'afilina-ma amine
keke ginakilowedi, au ginavelugadi,
kadu badi matadi adobona lamufa noya'aina gilewalewa-ma amine yawaidi keke ginaluvekwe'uni, au ginavelugadi.
E, yana faisewa againe ginafifaiwala ginafifaiwala tu Yaubada yana vehimeya tunutunugina mali nuwanuwa ginatubuhegena.
21Yo'o tulidi tulidi adi kibababala fa'ina Bana'e hinavetumaganena.
Au hidedemi Aiseya gigaheye-vagahina.
Falisi higahe vaita Biyelisibuli higa Setani Yesu gidaluvaiyeni.
Maki 3:20-30; Luke 11:14-23
22Tu kaliva sa'eyana gimiyami wayafunena fa'ina givematakoyo kadu agona gisebodana. Kaliva tufoidi bana kalivai-nadi Yesu againe hi'aliyena ada gisiveyawana, au awana gita'ala be givebutu gilukahihi kadu matana giyamumu be gi'italele. 23#Yo 7:31Kaliva moya'aidi hiyaulowoga hive'atoliluvaluva higayo, “Ka'i Bana hidevama Devida bwanenena higa Yaubada yana Tovegida?”
24 #
Md 9:34
Tu Falisi kaliva yadi gahe hinogalini-yo buye hive'agahegahe higayo, “Hida hima kaliva keke Tauna yana faiwala againe yafune gidawavidi. Au yafune adi tovehimeya ana egana Biyelisibuli yana faiwala againe giwavidi.”
25Tu Yesu yadi nuwanuwa gihalamanena ada gigahedi gigayo, “Hai fafali ana melala tulina tulina buye hilulugaviya, medema taudiyao hinavehavaidi. Kadu hai melala o ka'i yo'o ana kaliva tova moya'aina buye hivekwavekwageya, medema hina'abi'ota'ota be melala o ka'i yo'o ana egana ginahavaina. 26Meda anafaiweya ka'i Setani tauna yana yo'o higa yafune giwaviwavidi digo, bana tauna yana yo'o ginavehavaidi ada au yana abavehimeya ginahavaina. 27Omi wagahe vaita Biyelisibuli yana faiwala againe yafune gadawavidi. Ka'i Iya Biyelisibuli yana faiwala againe gawavidi digo, hakwadi yami kalivamomo faiwala giveledi-yo yafune hiwavidi? Ka'i Biyelisibuli faiwala giveledi? Keke-mo'a. Omi wagahe-kawowo ma taumiyao yami kalivamomo hinavenuwa'atami. 28#Af 10:38Atu ka'i Iya Yaubada Alu'aluwana yana faiwala againe yafune gawavidi amine o Yaubada yana itave'avina againe wavebutu wamimiyami ase'asemiya givehivehimeya. 29#1Yn 3:8Ka'i kaliva manimaninina yana manuweya ginamiyami tu mali kaliva anafaiweya ginaluku kaliva yana lokoloko ginavaina? Keke-mo'a. Nagona kaliva manimaninina ginayogoni-yo yana lokoloko ginavaina. Meda anafaiweya Iya Setani ganayogoni-yo kaliva wayafunedi gana'ihagihagiyedi.
30Hai kaliva keke tobohiyaku, medema nibaiku. Kadu hai kaliva tomuliya adi yaudi againe keke gidavelugaku, medema gihuluva vaita kaliva gidawavidi be keke hinamuliyeku. Iya Alu'aluwa Mahalina yana faiwala againe yafune gawavidi tu omi wagahe vaita Setani yana faiwala againe gadawavidi. 31#Hi 6:4-6Medema fa'ina wanogali! Yaubada kaliva yadi dewa koyona tulina tulina ginayawelina, o ka'i yadi gahe-kawowo againe Yaubada hinahawatagona-ma ginavenuwauluyena. Atu hai kaliva yana gahe-kawowo againe Alu'aluwa Mahalina ginahawatagona, medema yana koyona Yaubada keke ginayawelini, keke-mo'a. 32Hai kaliva Iya Tohobu'ela ginahawavekoyoyeku, medema yana koyona Yaubada ginayawelina. Atu hai kaliva Alu'aluwa Mahalina ginahawatagona, medema yana koyona tova adamoya kadu tova mulina Yaubada keke ginayawelini, au yana koyonai-nadi ginaduva-vagata.
33Kadu'e, ka'i wanagahe vaita ai guwana yamumuna, kadu wanagahe vaita ai-mo'ena yamumuna. O ka'i wanagahe vaita ai guwana koyona kadu wanagahe vaita ai-mo'ena koyona. Fa'ina ai ka'i yamumuna o ka'i koyona ma guwana againe kahalamanena amine, kaliva ka'i yamumuna o koyona yana dewa againe wanahalamanena. 34#Md 15:18Omi vaita oloto koyodi amine. Omi kaliva koyomi fa'ina keke amifaiweya gahe hagihagina wanalukahihiyeni, keke-mo'a. Gavadi ase'asemiya gidadauda medema awamiya ginalakayemu. 35Kaliva yamumuna gidewadewa yamumuna bana nuwana yamumuna fa'ina. Meda anafaiweya kaliva koyona gidewadewa koyona bana nuwana koyona fa'ina. Au nuwada yada dewa givehimeyena. 36Tu gagahemi, aimo tova mulina vedewayauga ana toveya kaliva yadi gahe-kawowo tulina tulina fa'ina Yaubada againe hinakotu. 37Ka'i yami gahe au velemo'ena digo, Yaubada ginahawaveyamumuyemi. Ka'i yami gahe au fwaya amine digo, Yaubada ginahawavekoyoyemi. E, yami gahe fa'ina ginavedewayaugimi.” Hidemi Yesu gigahe.
Tonagona nuwanuwadi Yesu aituha fifiwalana ginafaisewana.
Maki 8:11-12; Luke 11:29-32
38 #
Yo 6:30; 1Ko 1:22 Tu badi Falisi kadu Mosese yana vehimeya ana tovehawala tufoidi Yesu higahena higayo, “Tovehawala, nuwanuwama O nima ana iya'iyaya unafaisewana be a inuba anahalamanena.”
39Yesu gigayo, “Omi kaliva tova adamoya babiya watubuyemu-ma kaliva koyomi, keke Yaubada againe wadamiyave'avina, fa'ina nimaku ana iya'iyaya walelelena. Atu keke mena iya'iyaya wana'itani. Au iya'iyaya sa'eyanaga ganavehawalemi, higa iya'iyaya Yaubada bonana ana to'awatalatalaina ana egana Yona againe gilakayemu-ma amine. 40#Yon 1:17E, bana Yona igana lakahina kamone aiyeta tohiye kadu bogi tohiye gidauda amine, meda anafaiweya Iya Tohobu'ela babi hinagene aiyeta tohiye kadu bogi tohiye ganamiyami. 41#Yon 3:5Aimo tova mulina vedewayauga ana toveya miNiniva hinatowamidi be omi hinahawavekoyoyemi. Fa'ina badi miNiniva bana Yona yana laumamala hinogalina againe hivenogalena be hinuwaviladi. Tu omi wanogali! Bana Yona yana laumamala gaitoma lakahina tu tova adamoya yaku laumamala wanogalina-ma gaitoma lakahi-mo'ena tu omi keke wadavenogaleni. 42#1Kin 10:1-10Kadu'e, tova mulina vedewayauga ana toveya fafali sa'eyana wabolimaneya ana tokaiwabu kwamayoku hinatowamidi be omi hinahawavekoyoyemi. Fa'ina tuwai-mo'ena yuwa lauveya hitauya be miIsileli yada tokaiwabu Solomoni yana vehawala nuwahuyahuyana hinanogalina. Atu tova adamoya yaku vehawala Solomoni yana vehawala gitubuhegena tu omi keke nuwanuwami wananogalini.”
Ka'i kaliva boi wayafunena ma Alu'aluwa Mahalina keke ginaluvaiyeni, au yafune ginayewana.
Luke 11:24-26
43-44Kadu Yesu gigayo, “Ka'i yafune kaliva ginanuyabuyabuna amine, ginanauna ai'aveya abaveyawai ginalelena. Ka'i ginalele-wayoga au ginagayo, Ganana be yaku abamiyami ganuyabuyabuna-ma againe ganayewaku. E, bana yafune ginalakayemu yana manuwa gina'itana mena kakawana, ada manuwa yegayegana vaita tamo hakwadi gida'ihagihagiyeni. 45#2Fi 2:20Au kadu ginana tobohiyaneyao yafune seveni ginavega'auledi be badi moya'aidi kaliva hinaluvaiyena. Bana yafune nagona koyona tu yafune seveni koyo-mo'edi. Nagona kaliva yana miyami koyona tu muliya yafune moya'aidi hinaluvaiyena againe yana miyami au ginakoyo-mo'a. Meda anafaiweya omi kaliva tova adamoya babiya watubuyemu-ma yami miyami ginakoyo-mo'a.” Hidedemi Yesu gigahe.
Yesu hinana kadu taineyao hilakayemu.
Maki 3:31-35; Luke 8:19-21
46 #
Md 13:55
Yesu aimo yo'o agaidiya gilulukahihi tu hinana kadu taineyao hilakayemu. Melaleya himidimidi nuwanuwadi hina'itana. [ 47Kaliva sa'eyana givenuwa'atana gigayo, “Hina kadu taimomo buye wade melaleya himidimidi, nuwanuwadi yadi nuwanuwa hinalukahihiyena.”] 48Yesu gigayo, “Hakwa'adi hinaku? Kadu gaveyao tobohiyakweyao?” 49Gigahe-yo ana tomuliyamomo givenimatunetuneyedi gigayo, “Hidema hinaku kadu tobohiyakweyao. 50#Yo 15:14Fa'ina hai kaliva o vevine Kamaku lobameya yana nuwanuwa hi'ita'itave'avina, medema tobohiyaku o nouku o hinaku.” Hidedemi Yesu gigahe.
Tans Gekies:
Madiu 12: viv
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2003, Wycliffe Bible Translators, Inc. All rights reserved.
