Madiu 13
13
Otova babi tulina tulina againe ana gahetalahobuhobu.
Maki 4:1-9; Luke 8:4-8
1Tu medema aiyetai-nadi Yesu manuweya gihobu gina tobu fafaline givetoga be higa ginavehawala. 2Kaliva moya'aidi hiyo'oyo'o ada himidififina fa'ina, waka againe giyage be givetoga tu yo'o taliyeya himidimidi. 3Ada nuwanuwa tulina tulina gahetalahobuhobu amine givehawaledi. Gigayo, “Kaliva sa'eyana witi nafona yana faheya ginauwena be gina'iyauyaulena. 4Witi nafona gi'i'iyauyaulena tu tufona edeya gibe'u au manuga hi'ela be hi'ana. 5Tufona babi dabodabona againe gibe'u. Medede againe babi yamumuna keke lakahina gidadauda. Ada babi yamumuna keke vewabana fa'ina witi nafona gimadukabu. 6Tu kauwana gilaka againe witi tubuvaguna gikabuna be gibou, walamina keke gidavegilili velemo'ena fa'ina. 7Kadu tufona aboda againe gibe'u ada au yogo gifaiwala be witi gilufave'alikana. 8Atu tufona babi yamumuna againe gibe'u be gitabo yamumuna. Witi guwana ma tufona hanaledi (100) amine, tufona sikisiti (60) amine kadu tufona teti (30) amine. 9Omi kaliva watagami, au bonaku wadavenogalena.” Hidedemi Yesu gigahetalahobuhobu.
Yesu gahetalahobuhobu inubana gilukahihiyena.
Maki 4:10-17; Luke 8:9-10
10Tu badi tomuliya Yesu againe hi'ela hitoliluvaluva higayo, “Gavana fa'ina yo'o agaidiya gahetalahobuhobu amine uvehawaledi?”
11 #
1Ko 2:10
Yesu gigayo, “Yaubada yana itave'avina ana nuwanuwa sevasevauyana omi agaimiya giyauna tu badi kaliva-kawowo agaidiya keke gidayauni. 12#Md 25:29; Lu 8:18Hai kaliva Yaubada yana nuwanuwa ginogalina be gi'ita'itave'avina, medema againe kadu nuwanuwa moya'aina ginayauna be Yaubada ana halamana bana againe ginatubuga-mo'a. Atu hai kaliva Yaubada yana nuwanuwa keke gida'ita'itave'avini, medema yana halamana kabi'ona Yaubada ginavaihegena be ginamiya-kawowo. 13Yaku nuwanuwa hi'ita'itana tu keke hida'itahalamaneni. Yaku gahe hivanevanenegena tu keke hidavenogaleni o ka'i hidahalamaneni. Keke hidanogali-hagihagiyeni fa'ina, yaku nuwanuwa gahetalahobuhobu amine gavehavehawaledi.
14 #
Ais 6:9-10; Yo 12:40 Tuwai-mo'ena Yaubada bonana ana to'awatalatalaina ana egana Aiseya badi tomiya-kawowo fa'idiya gigaheye-vagahina ada tova adamoya gilakayemu velemo'ena. Gigayo,
Tova moya'aina bonaku wananoganogalina
tu keke ana nuwanuwa wanahalamaneni.
Kadu wana'ita'itana tu keke wana'itahalamaneni.
15Fa'ina hida yo'o taudiyao nuwadi hikivefanina
tagadi hi'ivekuluna matadi hikive'uyuyuna.
Keke hidahawahegedi be matadi ganakivemahalina
o ka'i tagadi ganakifolena o nuwadi ganakiyauna.
Au keke nuwanuwadi Iya agaikuya
hinahagaviladi be ganakiveyamumudi fa'ina.
Au hidedemi Yaubada bana Aiseya awane gigahe.
16Tu omi aku tomuliya ma matami sinasinahina, kadu tagami folefolegina fa'ina yami vemwamwala gavatubuga! 17#1Fi 1:10-12Au gagahemi velemo'ena, tuwai-mo'ena Yaubada bonana ana to'awatalatalaina kadu kaliva yegayegadiyao moya'aidi nuwanuwadi lakahina yaku faisewa omi wa'ita'itana-ma hina'itana, tu keke hida'itani. Kadu nuwanuwadi yaku vehawala omi wanoganogalina-ma hinanogalina, tu keke hidanogalini.”
Yesu gahetalahobuhobu babi tulina tulina fa'ina
gikivetuvetunudi.
Maki 4:13-20
18Kadu Yesu ana tomuliya gigahedi gigayo, “Au wanogali. Gahetalahobuhobu guwana ana iyauyaula ana nuwanuwa wanahalamanena. 19Witi nafona edeya gibe'u-ma ana nuwanuwa hidede amine. Ka'i kaliva laumamala Yaubada yana itave'avina fa'ina ginogalina tu keke ana nuwanuwa gidahalamaneni amine o bana againe kaliva koyona gi'ela be gavadi tolaumamala kaliva ase'asene gifahana-ma gilemana. 20Kadu nafona babi dabodabona againe ana nuwanuwa amanadi kaliva Yaubada bonana ginogalina be yana wavemwamwala ase'asene gisena. 21#Kl 2:7Tu bonana keke gidanuwa-nunauyeni ada walamina keke ase'asene gidavegilili fa'ina, tova kabisonaga gi'atuvefa'ila. Ka'i tova vitana bana againe ginalakayemu o ka'i yana hawahega Yaubada againe fa'ina aulolo tagiya kaliva nimadiya ginanuhagana, yana hawahega Yaubada againe au ginamadunuwayewa. 22#Lu 12:16-21; 1Ti 6:9-10Kadu nafona abodeya ana nuwanuwa amanadi kaliva Yaubada bonana ginogalina tu babi ana gaitoma fa'ina givevenuwanauna, kadu tova moya'aina mani lokoloko nuwadi givaivaina fa'ina mena gaitomai-dina Yaubada bonana gilufave'alikana ada guwana keke. 23Atu nafona babi yamumuna againe ana nuwanuwa amanadi kaliva Yaubada bonana ginogalina be ana nuwanuwa gihalamanena, ada au yana dewa againe guwana giseseyemaunena. Kaliva sa'eyana guwana ka'i hanaledi (100) amine, kadu sa'eyana sikisiti (60) amine, kadu sa'eyana teti (30) amine.” Hidedemi Yesu gigahe.
Gahetalahobuhobu faha ana yogo fa'ina.
24Tu Yesu kadu gahetalahobuhobu sa'eyana gilukahihiyena gigayo, “Kaliva Yaubada yana itave'avina againe himimiyami be ase'asediya givehivehimeya-ma yadi miyami hidede amine. Kaliva sa'eyana witi nafona yamumuna yana faheya gi'iyauyaulena. 25Tu bogi sa'eyana moya'aidi hidauda tu kaliva nibaina gi'ela yogo nafona witi ana iviya kadu gi'iyauyaulena au gina. 26Himiyami tu witi gitabo a'a-mo'ena gisena au kadu yogo gitabo.
27Tu tofaha yana tofaisewa bana againe hi'ela higahe higayo, Kauveya, witi nafona yamumuna ya faha againe ufahana. Gavadi-yo yogo gikabu?
28Bana gigayo, Medema nibaiku nimana. Badi tofaisewa hitoliluvaluva higayo, Ka'i ime anana yogo anahabuna?
29Bana gigayo, Auwe, fa'ina ka'i yogo wanahabuhabuna amine kadu witi tubuvaguna buye wanahabuna. 30#Md 3:12Au witi kadu yogo buye ginadauda tu a'a-mo'ena ana aitalaga ana tova ginayemu. Medema tovai-nadi badi to'aitalaga ganavenuwa'atadi be higa vaita yogo hinamidiyaudi ada hina'itavani-yo hinakabuna. Muliya witi hinatalana be yaku kweda againe hinasena.” Hidedemi Yesu gigahetalahobuhobu.
Yaubada yana itave'avina masitada isi
yadi tubutubuga amine.
Maki 4:30-32; Luke 13:18-21
31Tu Yesu kadu gahetalahobuhobu sa'eyana gilukahihiyena gigayo, “Kaliva Yaubada yana itave'avina againe himimiyami be ase'asediya givehivehimeya-ma yadi tubutubuga hidede amine. Kaliva sa'eyana ai ana egana masitada nafona givaina be yana faha againe gifahana. 32Mena masitada nafona ma kabikabi'ona nafona tulina tulina adi loi againe. Kabikabi'ona nonogana ginakabu againe ana tubuga lakahina. E, ginave'aihala be manuga hina'ela laganina againe hinave'uba.” Hidedemi Yesu gigahe.
33Tu Yesu gigahe-yo kadu gigahetalahobuhobu-havagi gigayo, “Kaliva Yaubada yana itave'avina againe himimiyami be ase'asediya givehivehimeya-ma yadi tubutubuga vaita isi amine. Kwamayoku sa'eyadi isi hivaina be falawa wanau'ana tohiye hivilana be falawa hinagene ginauna tu beledi matatabuna gitubuga.” Hidedemi Yesu gigahe.
Yesu yo'o gahetalahobuhobugaga amine givehawaledi.
Maki 4:33-34
34Yesu mena gaitomai-dina moya'aina givehawaledi. Ada gahetalahobuhobugaga amine givehawaledi. Keke gahe-mo'ena amine gidavehawaledi, au yana vehawala gahetalahobuhobugaga amine. 35#Sam 78:2Medede amine gihuluva be higa gavaimi tuwai-mo'ena Yaubada bonana ana to'awatalatalaina Yesu yana vehawala fa'ina gigaheye-vagahi, medema ginalakayemu velemo'ena. Gigayo,
Gahetalahobuhobu amine ganavehawaledi,
gaitoma sevasevauyana babi ana abave'inuba againe
tova adamoya ganalukahihiyena.
Yesu yogo ana gahetalahobuhobu fa'ina gikivetuvetunudi.
36Tu Yesu yo'o gihegedi tu manuweya giluku. Ana tomuliya Bana againe hi'ela higahe higayo, “Yogo ana gahetalahobohobu fa'ina unakivetuvetunuma.”
37Yesu gigayo, “Bana kaliva witi nafona yamumuna gifahana-ma vaita Iya Tohobu'ela amine. 38#1Ko 3:9Faha ma vaita tomiyababi amine, ada nafona yamumuna vaita kaliva Yaubada yana itave'avina againe himimiyami be ase'asediya givehivehimeya amanadi amine. Yogo ma vaita badi kaliva Setani yana abavehimeya againe himimiyami-ma amine. 39Ada kaliva nibaina yogo gifahana-ma vaita Setani tauna amine. Witi ana aitalaga ma vaita hida tova ana lauyabu amine, ada to'aitalaga ma vaita Yaubada yana tovenuwa'ata amine. 40Yogo hiyaudi be ai'ala'alata againe hikabuna amine, meda anafaiweya hida tova ana lauyabu againe ginalakayemu. 41-42#Md 25:31-46Iya Tohobu'ela yaku tovenuwa'ata gana'iveninisedi be gaveyao yaku itave'avina againe himimiyami atu tobohiyadiyao koyona againe hivebe'udi kadu gaveyao koyona tulina tulina hififaisewana, medema hinasevehailedi be ai'ala'alata againe hinahegedi. Mena ai'ala'alata againe hinatagitagi lakahina, kumidi hinahobe'uwana nuwadi ginavekubokubo. 43#Dan 12:3Koyodiyao hinasevehailedi tu yegayegadiyao Yaubada Tamadi yana itave'avina againe hinamiyami be kauwana give'akinamanamalena amine badi hinakaiwabu. Omi watagami, au bonaku wadavenogalena.” Hidedemi Yesu gigahe.
Gahetalahobuhobu tulina tulina.
44Kadu Yesu gigahetalahobuhobu gigayo, “Kaliva Yaubada yana itave'avina againe himimiyami be ase'asediya givehivehimeya-ma yadi hawahega hidede amine. Tuwai-mo'ena tamo hakwadi mani lokoloko hagihagina bokesiya giseni tu gava babi hinagene yana faheya gisevauyena. Gidauda ma kaliva sa'eyana gifahafaha tu ginuhagana. Ginuhagani-yo givetaubodana au yana wavemwamwala gina yana lokoloko moya'aina gikimonevedamaneni tu giyewana be mena fahai-nadi gikimonena.” Hidedemi Yesu gigahe.
45Kadu gahetalahobuhobu sa'eyana gilukahihiyena gigayo, “Kaliva Yaubada yana itave'avina againe himimiyami yadi hawahega hidede amine. Kaliva sa'eyana ginana odo'odo hagihagina gina'unena. 46Gina'une'une tu odo'odo hagihagi-mo'ena fatana lakahina ginanuhagani-yo ginana yana lokoloko matatabuna ginawahi be odo'odo-nadi ginakimonena.” Hidedemi Yesu gigahe.
47Kadu sa'eyana ma gigayo, “Yaubada yana itave'avina ana nuwanuwa vaita alevatu tobuya hihegehobuyena-ma amine. Alevatu hihegehobuyeni-yo igana tulidi tulidi hinabayaumidi. 48Alevatu ginamaga againe tobayauma avaleya hinataina au hinavetoga igana yamumudi foga againe hinadododi tu igana koyodi hinahegedi. 49-50Meda anafaiweya hida tova ana lauyabu againe Yaubada yana tovenuwa'ata hinahobu'ela kaliva koyodi kaliva yamumudi hinafadiya hinamiyami-ma hinasevehailedi be ai'ala'alata againe hinahegedi. Mena ai'ala'alata againe hinatagitagi lakahina, kumidi hinahobe'uwana nuwadi ginavekubokubo.”
51Hidedemi Yesu gigahetalahobuhobu tu ana tomuliya gitoliluveluvedi gigayo, “Ka'i mena gahetalahobuhobu moya'aina galukahihiyena-ma ana nuwanuwa wahalamanena?” Badi higayo, “Ika, ahalamanena.”
52Au Yesu gigayo, “Wa'ita, hai Mosese yana vehimeya ana tovehawala agaikuya givetomuliya be Bana Yaubada yana itave'avina ana nuwanuwa againe gakivetuvetununa, medema vaita tonimanuwa yana wakikaiwabu amine. Yaubada yana vehawala tuwaina kadu yaku vehawala ivaguna yana foseya gi'i'ihobuna be kaliva givehavehawaledi.”
MiNasaledi Yesu hikilowena.
Maki 6:1-6; Luke 4:16-30
53-54 #
Yo 7:15
Tu Yesu hida yana gahetalahobuhobu gilukahihiyena gihavaina, mena fafali gihegena gina Tauna yana melala againe giyewana. Au yadi manuwa-abavehawala ana egana sinagogi againe giluku yo'o givehavehawaledi, ada badi kaliva hiyaulowoga buye hive'agahegahe higayo, “Hida hima kaliva-kawowo nonogana givehavehawala. Hai yana nuwahuya givaini? Kadu hakwadi faiwala givele-yo hida abaveyaulowoga gifaisewadi? 55#Yo 6:42Ide Bana kalivai-nadi inubana kahalamanena. Bana hida manuwa ana to'aiyogona natuna tu hinana adi egana Meli. Kadu tobohiyaneyao kahalamanedi Yemesa Yosefa Saimoni Yudasi. 56Kadu nouneyao buye kamimiyami. E, bana hinafadeya gilakata tu hai yana kaiwabu givaini?” 57Au hidedemi miNasaledi yadi wa'ago'uga buye hive'agahegahe tu hikilowena. Atu Yesu gigahedi gigayo, “Kaliva moya'aidi Yaubada bonana ana to'awatalatalaina hive'amohimohinena, tu tauna yana melala kadu tauna yana yo'o kalivai-dina keke hidave'amohimohineni.” Hidedemi Yesu gigahe.
58Ada badi yadi vetumagana keke fa'ina, kadu keke aituha fifiwalana moya'aina badi hinafadiya gidafaisewani.
Tans Gekies:
Madiu 13: viv
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
© 2003, Wycliffe Bible Translators, Inc. All rights reserved.
