Madiu 11
11
Yoni Tobafitaiso ana tomuliya tufoidi
Yesu againe gi'iveninisedi.
Luke 7:18-23
1Yesu ana tomuliya tuwelo gikivetuvetunudi gihavaina, gilowoga be gina Galili melalai-dina agaidiya givehavehawala ada Yaubada bonana gilulumamaledi.
2Tu Yoni Tobafitaiso deliya gimiyami, ada Keliso yana faisewa valeyana ginogalini-yo ana tomuliya tufoidi Bana againe gi'iveninisedi be hinatoliluveluvena. 3#Mal 3:1Badi hi'ela Yesu againe higahe higayo, “Yoni gigahema vaita kaliva sa'eyana higa Yaubada yana Tovegida gina'ela. Ka'i O'eni bana kalivai-nina o ka'i kaliva sa'eyana aimo anabodana?”
4Yesu gigahedi gigayo, “Wanana ada gavaimi wanoganogalina kadu wa'ita'itana-ma Yoni wanavenuwa'atana. 5#Md 8:2-4, 9:1-8,23-26,27-30,32-33E, wanagahena higa vaita tomatakoyo matadi gimahalina tovefela hinunudadana tovedawodawowo yadi aulolo gihavaina totagakweu tagadi gi'afolena to'alika himididi-havagi, kadu koyokoyo Venuwa'ata Yamumuna Yaubada yana kibababala fa'ina hi'ela'ela hinoganogalina. 6Kadu Yoni yana toliluvaluva inubaku fa'ina wanagahena hai kaliva Iya fa'ikuya keke gidanuwaluga, medema yana vemwamwala gavatubuga!”
Yesu Yoni Tobafitaiso fa'ina gilukahihi.
Luke 7:24-35, 16:16
7Badi Yoni ana tomuliya hilowoga be hinauna tu Yesu yo'oyo'o agaidiya givebutu Yoni fa'ine gilukahihi gigayo, “Boi omi'iyao Yoni wa'itana yamina babigaga againe ana toveya, wanuwanuwa ma vaita gavadi wada'itani? Isisi'u bolimana againe gilewalewa amine, ka'i wana vaita kaliva kowakowana wada'itani? 8Keke hidede amine wada'itani tu wana be ka'i gavadi wana'itani? Ka'i kaliva ana wavaigau vaita wada'itani? Keke, fa'ina kaliva adi vaigau hagihagina ma tokikaiwabu yadi manuwa lakahina againe himimiyami. 9Au wanagaheku, omi wana ka'i gavadi wada'itani? Ka'i wana be Yaubada bonana ana to'awatalatalaina wana'itana? E, wona velemona to'awatalatalaina wa'itana tu bana Yoni to'awatalatalaina moya'aidi gikaiwabuhegedi. 10#Mal 1:3; Mk 1:2; Yo 3:28Tuwai-mo'ena bana Yoni fa'ine Yaubada bonana eto'etoladina gigahe higa vaita Yaubada yana Tovegida againe gidagahe gidagayo,
U'ita, yaku tovenuwa'ata gana'iveninisena
be bana wai ginanagona,
ya eda kaliva ase'asediya ginakidewedewena.
11Au gagahemi velemo'ena Yoni Tobafitaiso kaliva moya'aidi babiya hitubuyemu-ma gikaiwabuhegedi, tu gava kaliva ana egana kabisona Yaubada yana yo'ogaga agaidiya tu givetumagane-mo'eku, medema bana Yoni ana egana ginakaiwabuhegena. 12E, Yoni Tobafitaiso tomiyababi moya'aidi gikaiwabuhegedi, fa'ina omi gaveyao kaliva koyomiyao yana laumamala fifiwalana ase'asemi gi'onana be nuwanuwami lakahina Yaubada yana yo'ogaga agaidiya wanaluku. Nuwanuwami lakahina wanaluku fa'ina wayo'oyo'o wafifaiwala alu'aluwami givedivediwe be higa vaita Yaubada yana yo'ogaga agaidiya wanaluku. Ada au Yoni givebutu gilumamala ana toveya hidedemi wahuluhuluva wanunauwena adamoya Iya yaku toveya. 13Ada boi tuwai-mo'ena Yaubada bonana ana to'awatalatalaina moya'aidi kadu Mosese yana buki-vehimeya againe Yaubada yana yo'ogaga ana luku fa'ina hilulukahihi be hinunauwena Yoni yana toveya. 14#Md 17:10-13Ada boi tuwai-mo'ena to'awatalatalaina moya'aidi higaheye-vagahina vaita aimo tova mulina to'awatalatalaina sa'eyana vaita Elaiya amine ginalakayemu. Ada ka'i nuwanuwami yaku venuwa'ata wanavetumaganena digo, au hidedemi wanahalamanena higa Yoni au vaita bana Elaiya amine. 15Kaliva watagami, au bonaku wadavenogalena.
16-17Tu omi kaliva hida tovai-nadi babiya watubuyemu-ma gavadi amine yo ganahawaluveluvemi? Au omi we'owe'o amidiya, melaleya hihiyoto tu hivetavetaunega. Yo'o sa'eyana yo'o velugadi agaidiya hikovakova higayo, Modawa akalikalina tu omi keke wadavagavaga wadayeluyelu. Alulaukuhi vaita alika ana tova amine tu omi keke wadatagitagiya. Gavaimi anaga-yo nuwami anakiveyamumuni? Hidede amine we'owe'o higahe.
18 #
Md 3:4
Meda anafaiweya Yoni gi'ela ada keke a'a yamumuna gida'u'ani kadu keke oine gidayuyuni, ada au omi wahawavekoyoyena vaita bana wayafunena. 19#Lu 15:1-2Tu Iya Tohobu'ela ga'ela ada a'a yamumuna ga'au'ana kadu oine gayuyuna, ada au kadu Iya wahawavekoyoyeku wagayo, Wa'ita, Bana hima to'a-fa'ila oine ana toyu-fa'ila, kadu takesi ana toyaudi be tokoyona velugadiyao givetobohiyanedi. Hidedemi wagahe tu gavaimi anahuluva-yo nuwami anakiveyamumuni? Tu Yoni kadu Iya'eku ama'iselu Yaubada yana nuwahuya againe ka'i velemo'ena afifaisewa ma yama faisewa guwana againe wanahalamanena.” Au hidedemi Yesu yo'o agaidiya gigahe.
Melala keke hidanuwaviladi-ma Yesu givehoiyoiyedi.
Luke 10:13-16
20Kadu'e, melala tufoidi agaidiya Yesu yana aituha fifiwaladi moya'ai-mo'edi gifaisewadi tu kaliva yadi dewa koyona keke hidavenikohiyeni-yo hidahagaviladi, fa'ina Yesu givebutu melalai-dina gihawavekoyoyedi. 21Gigayo, “Hoiyoi miKolasini! Hoiyoi miBedasaida! Tova vita-mo'ena agaimiya ginalakayemu. Gavadi-yo? Ka'i aituha fifiwaladi omi hinafamiya gafaisewadi-ma badi miTaiya miSaidoni kaliva koyodiyao hinafadiya gadafaisewadi digo, badi tuwai-mo'ena yadi dewa koyona hidahegena, hidaludabudabu hidave'ofu higa yadi nuwavilana ana iya'iyaya hida'iveyemaunina. 22#Emo 1:9-10Au gagahemi aimo vedewayauga ana toveya omi miKolosini kadu miBedasaida ami matahiwadi miTaiya miSaidoni adi matahiwadi ginatubuhegena, fa'ina yaku aituha fifiwaladi wa'itadi tu keke wadavetumaganeku. 23#Aba 19:24-28; Yu 1:7Ada omi miKafeneumi ma nuwanuwami taumiyao ami egana wanakilakahina vaita lobameya wadalaka tu abaga koyona againe hinahegehobuyemi. Ka'i hida yaku aituha fifiwaladi omi hinafamiya gafaisewadi-ma badi miSodoma hinafadiya boi tuwai-mo'ena gadafaisewadi digo, miSodoma yadi dewa koyo-mo'ena fa'ina keke hidakwaha-'owoga, au tova adamoya aimo hidamiyami. 24#Md 10:15Au gagahemi aimo vedewayauga ana toveya omi miKafeneumi ami matahiwadi miSodoma adi matahiwadi ginatubuhegena, fa'ina yaku aituha fifiwaladi wa'itadi tu keke wadavetumaganeku.” Hidedemi Yesu gigahe.
Veyawai Yesu againe kananuhagana.
Luke 10:21-22
25 #
1Ko 1:26-29
Tu medema tovai-nadi Yesu Yaubada againe gilukahihi gigayo, “Kamaku, O'eni lobama be babi ana Kaiwabu. O againiya gavesiule fa'ina yaku vehawala ana nuwanuwa badi tonuwahuya agaidiya usevauyena be keke hinahalamaneni fa'ina, tu badi tonaufani vaita kwamana kabi'ona amine agaidiya uhawavemogatalena. 26Ika Kamaku, ya nuwanuwa yamumuna amine au ahe uhuluva.” Hidedemi Yesu give'o'ola.
27 #
Md 28:18; Yo 1:18, 3:35 Kadu Yesu gigayo, “Kamaku gaitoma moya'aidi nimakuya gisedi. Keke tamo hakwadi Iya Yaubada Natuna gidahalamaneku, au Kamaku anakaibe gihalamane-mo'eku, ada keke tamo hakwadi Kamaku gidahalamaneni, au Iya Natuna akukaibe gahalamane-mo'ena, kadu gava kaliva againe Iya nuwanuwaku Kamaku gana'ivemogatalina, au bana ginahalamanena.
28Au gaveyao moya'aimi wafaisewa-fa'ila be vainuwana vitana wawahiwahina fa'ina wowomi gilogilogi, au Iya agaikuya wana'ela be wanaveyawai. 29Yaku vehimeya vaita ewa amine. Yaku ewa unavaina be vainuwana buye kana'avalana, higa yaku vehimeya ana itave'avina againe ganavelugami. Iya kaliva umaumaku, ada keke Tauku aku egana gadakilakahini fa'ina halamana Iya agaikuya wanavaina, ada ase'asemi ana vainuwana ganavetaigina. 30#1Yn 5:3Yaku ewa higa yaku vehawala keke vitana, kadu yaku vainuwana higa yaku vehimeya au ihayana.” Hidede amine Yesu gigahe.
Tans Gekies:
Madiu 11: viv
Kleurmerk
Deel
Kopieer
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Faf.png&w=128&q=75)
Wil jy jou kleurmerke oor al jou toestelle gestoor hê? Teken in of teken aan
© 2003, Wycliffe Bible Translators, Inc. All rights reserved.