SAGARIA 14:9-15

Die HERE sal koning wees oor die hele aarde. Op daardie dag sal daar een HERE wees en net sy Naam sal aanbid word. Die hele land van Geba af tot by Rimmon, suid van Jerusalem, sal een groot plein word, maar Jerusalem sal gelig word tot sy oorspronklike posisie en sal bewoon word vanaf die Benjaminpoort tot by die plek waar die ou poort was, dan tot by die Hoekpoort, en van die Gananelpoort af tot by die koning se wynperse. Jerusalem sal bewoon word, ’n veilige plek en wat nooit weer vervloek of verwoes sal word nie. Die HERE gaan al die nasies wat teen Jerusalem veg, met ’n plaag tref. Hulle sal soos wandelende lyke word terwyl hulle vleis wegvrot. Hulle oë sal wegkrimp in hulle oogkasse en hulle tonge sal wegvrot in hulle monde. Op daardie dag sal hulle paniekbevange raak. Die HERE sal hulle tref met ’n groot verwarring. Hulle sal mekaar te lyf gaan. Juda sal ook in Jerusalem veg. Die rykdom van al die naburige volke sal bymekaargemaak word, groot hoeveelhede goud en silwer en klere. Dieselfde plaag sal ook die perde, muile, kamele, donkies en al die ander diere in die vyand se kampe tref.

Gratis leesplanne en oordenkings oor SAGARIA 14:9-15