Mpiin 14
14
Abram aah nan gaa Lot lii pu na aabɔr
1N‑yoonn mue, bibɔrb binaa bibaa nan bi: Babiloŋ aabɔr u bi nan yin u ke Amrafel, ni Elasar aabɔr u bi nan yin u ke Ariok, ni Elam aabɔr u bi nan yin u ke Kedolaomer, ki kpee Goyim aabɔr u bi nan yin u ke Tidal na, 2le bi nan buen bi ti faa bibɔrb biŋmu biken butɔb. Baah nan buen bi ti faa bibɔrb biŋmu bi butɔb na aayimbil sɔ: Sodom aabɔr u bi nan yin u ke Bera, ni Gomora aabɔr u bi nan yin u ke Birsa, ni Adma aabɔr u bi nan yin u ke Sinab, ni Seboyim aabɔr u bi nan yin u ke Semeber, ni Bela aatiŋ aabɔr. Bi ki yin Bela ke Soar. 3Bibɔrb biŋmu bee le nan kpokl tɔb, le baajab buen Sidim aafataŋ ni; dandana wee nnyusakpem mu bi yin mu ke N‑yaan Aanyun na le bi nima. 4Kedolaomer aabɔr le nan joo bi, ki ti saa ŋibin kipiik ni ŋilee, le libiln kipiik ni litatar aayoonn, bibɔrb ngbaan nan kpokl ke baan ki li bi utaab. 5Ŋibin kipiik ni ŋinaa ni, le ubɔr Kedolaomer, ni bibɔrb biken nan di baajab ti to ki nyaŋ Refa aanib bi nan bi Asterof Kanayim aatiŋ ni na, ni Sus aanib bi nan bi Ham aatiŋ ni na, ni Em aanib bi nan bi Kiriataim aafataŋ ni na, 6ni Hor yaab bi nan bi Edom aajoo pu na, ki san dii bi ti saa Elparann aatiŋ ki bi nteersakpiin aagbaan na. 7Le bi fenn ki mann ki ki gir ni Kades aatiŋ, ki bi nan ki yin ki ke Enn Mispat na. Bi nan to ki nyaŋ Amalek yaab aatim, le ki nyaŋ Amor yaab bi nan bi Hasasonn Tamar ni na.
8Le bibɔrb bi bi Sodom, ni Gomora, ni Adma, ni Seboyim, ni Bela aatim ni na, ni baajab nan kuun buen Sidim aafataŋ ni, 9le ki ton Elam, ni Goyim, ni Babiloŋ, ni Elasar aabɔrb butɔb. Bibɔrb biŋmu ngbaan le nan fii sil, ki ton bibɔrb binaa ngbaan butɔb. 10Baah nan bi kifataŋ ki ponn ni na nan kpa kootaal aabuu pam, nima pu na, Sodom ni Gomora aabɔrb ni baajab aah nan ban bi san na, ngem nan lir ŋibuu ngbaan ni; le bi gur na nan san buen ŋijoo ŋibaa paab, le ki ŋmar. 11Bibɔrb binaa ngbaan aah nan nyaŋ Sodom ni Gomora aabɔrb na, bi nan yoor tiwan mɔmɔk, ki kpee baajikaar mu, le ki di buen. 12Le Lot u nan ye Abram aanaal aajapɔɔn na mu nan bi Sodom aatiŋ ni, le bi nan kpaan chuu u ni waah kpa tiwan nimɔk na, ki di buen.
13Tɔ, unii ubaa le nan san ŋmar, ki buen ti tuk Abram, u ye Hiibru aanii, ki nan ka gbɔk Amor aanii Mamre aasui sakpiin na, le u ni unaatiib Eskol ni Aner nan si Abram aachaŋ ni. 14N‑yoonn mu Abram nan ŋun ke bi chuu unaal aajapɔɔn Lot na, le u yin waanib bi to butɔb, ki ye binib ikui itaa ni kipiik ni biniin na, le bi mɔmɔk nan san dii bibɔrb binaa ngbaan, ki ti saa Dann aatiŋ ni. 15Nima chee le Abram nan yakr waanib ngbaan ŋiker ŋiker, le ki buen ti lir waadim ngbaan pu kinyeek, le ki nyaŋ bi. U nan dii bi kina, ki ti saa Hoba aatiŋ ki bi Damaskus aaŋangan wɔb na, 16le ki gaa baah nan yoor tiwan nimɔk na. U nan gaa ni unaal aajapɔɔn Lot, ni waawan mɔmɔk, ki kpee bipiib, ni binib bi bibɔrb ngbaan nan chuu bi na mɔmɔk.
Melkisedek aah nan ŋa tinyoor ŋa Abram pu pu na aabɔr
17Buyoonn Abram nan ti nyaŋ ubɔr Kedolaomer, ni bibɔrb biken, aan ki gir choo kun ni na, le Sodom aabɔr nan tooh u nsan pu, le bi nan ti ton tɔb, Safe aafataŋ ki bi yin ki ke Ubɔr Aafataŋ na ni. 18Le Melkisedek u nan ye Salem aabɔr, ki ki ye Uwumbɔr u kaa kpa ŋeen aatɔ na aatotoor na, nan joo ni tijikaar, ni ŋisubil aadaan nan tii Abram, 19le ki ŋa tinyoor ŋa u pu, ki bui ke, “Uwumbɔr u kaa kpa ŋeen aatɔ, ki naan paacham ni kitiŋ na, ŋa tinyoor ŋa Abram pu. 20Uwumbɔr u kaa kpa ŋeen aatɔ, ki cha aa nyaŋ saadim na, kan kipak.” Le Abram nan nyan tiwan nimɔk u nan gaa na nibaabaa kipiik mɔk ponn ni, ki di tii Melkisedek.
21Le Sodom aabɔr ngbaan nan bui Abram ke, “Li joo tiwan ngbaan mɔmɔk, ki tee di maanib mɔmɔk tii mi.”
22Le Abram bui u ke, “M puu tipuukpaan, Tidindaan Uwumbɔr u kaa kpa ŋeen aatɔ, ki naan paacham ni kitiŋ na aanimbiin ni, 23ke maan joo saawan nibaa. Hali ni yaa ye tikokonn, bee linaatakl aagban kan, maa ban ni. Nima kan, saan ŋmaa len ke sin le ŋa Abram uwankpadaan. 24Maan gaa nibaa ki li joo, see maanib aah jin tijikaar ti nsan ni na. Tɔ, cha Aner, ni Eskol, ni Mamre aanib bi ter mi na kan baah ban pu na.”
Tans Gekies:
Mpiin 14: xonB
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
©1998, 2014 Wycliffe Bible Translators, Inc. All rights reserved.
