Mpiin 15
15
Uwumbɔr aah nan puu tipuur tii Abram pu na
1Nimina aapuwɔb, le Uwumbɔr nan kpiir ubaa mɔk Abram ki bui u ke, “Abram, taa li san ijawaan. M ga kiir tibɔbir mɔmɔk ti ga dan aa pu na, ki tii si ipiin sakpiin.”
2Tɔ, Abram nan bui ke, “Ndindaan Uwumbɔr, aa ga tee tii mi ba aapiin? Aa mu kan ke maa kpa ubo. Elieser u ye Damaskus aanii na le ye maafaajir. 3Saa tii mi ubo, nima pu na, maanaagbiib ponn ni ubaa le ga ji maafaal.”
4Le u ki ŋun Uwumbɔr len ke: “Saanaagbiija Elieser aan ji saafaal; see aaponn ni aabo le ga ji saafaal.” 5Le Uwumbɔr nan cha Abram nyan sil lipaal, le ki bui u ke, “Yaar lik paacham, ki pɔɔk aabaa ki kahn iŋmabi; saamaal ponn ni aanib ga li wiir kina la.”#15.5: Lik Rom Yaab 4.18; Hiibru Yaab 11.12.
6Abram nan gaa Uwumbɔr aamɔboln ki kii, kina pu na, Uwumbɔr aasui nan piir Abram pu, le Uwumbɔr gaa u ke u ye uninyaan u chee.#15.6: Lik Rom Yaab 4.3; Galasia Yaab 3.6; Jems 2.23.
7Uwumbɔr nan ki bui u ke, “Min le ye Uwumbɔr u nyan ni si Ur aatiŋ, ki ye Babiloŋ yaab aatiŋ na ni, le ki di kitiŋ kimina tii si, ke ki li ye siyaan.”
8Le Abram baa ke, “Ndindaan Uwumbɔr, m ga ŋa kinye ki bee ke kitiŋ ngbaan ga li ye maatiŋ?”
9Le Uwumbɔr nan bui u ke, “Ban ni unaa, ni uŋoob, ni upihja, ni mɔmɔk li ye ŋibin ŋitaa aawakor, ni linanjel, ki kpee libɔrnanjel.” 10Le Abram nan joo ni tiwakor ngbaan Uwumbɔr chee, le ki geei ti ŋigen, le ki di ŋigen ngbaan bil toŋ tɔb, ki lur ni bil ikuul ilee; tɔ, waa nan geei inyoon ilee na ma. 11Nangbatiib nan dan ke bi nan ji tinann ngbaan, le Abram nan jenn bi.
12Nwiin aah nan cha mu ti lir na, le ngeen sakpiin nan lir Abram pu, le u doon ki geen, le ijawaan sakpiin chuu u. 13Uwumbɔr nan ki bui u ke, “Saamaal ga li ye bicham le kitiŋ yayan ponn ni; bi ga li ye binaagbiib nima chee, le bi ga ŋa bi mbiin, ki ti saa ŋibin ikui inaa. 14Le min Uwumbɔr ga daa linibol li ga joo saanib ngbaan tinaagbiir na aatafal, le bi yaa nan ban bi nya kitiŋ ngbaan ni kan, bi ga li joo liwangol sakpeln, le ki di buen.#15.13-14: Lik Lituln 7.6-7. 15Le sin Abram ga por pam, le ki nin kpo nsuudoon aakun, le bi sub si. 16Yaabitiib ŋiker ŋinaa pu le ga jer, nee aapuwɔb le saamaal ga ki gir ni kitiŋ kee pu; ba pu? maan jenn nyan Amor yaab kitiŋ kee pu, see baatunwanbir ti nyaŋ, le m nin daa bitafal.”
17Buyoonn nwiin nan lir, ni bɔnn doo na, le kiŋulk ki kpa iŋmanyuu ni mmiigaal na nan nyan ni, ki jer tiwakor na aanann aakaasisik ni. 18Nima chee le Uwumbɔr nan puu tipuur tii Abram. U nan bui ke, “M puu ke m ga di kitiŋ kimina tii saamaal, ki yoor Ijipt aatiŋ ki ti saa Yufrates aamɔɔl mɔk, 19ki kpee Kenn yaab aatim, ni Kenis yaab aatim, ni Kadmonn yaab aatim, 20ni Hef yaab aatim, ni Peris yaab aatim, ni Refa yaab aatim, 21ni Amor yaab aatim, ni Kanaann yaab aatim, ni Girgas yaab aatim, ni Jebus yaab aatim mɔmɔk.”
Tans Gekies:
Mpiin 15: xonB
Kleurmerk
Deel
Kopieer
Wil jy jou kleurmerke oor al jou toestelle gestoor hê? Teken in of teken aan
©1998, 2014 Wycliffe Bible Translators, Inc. All rights reserved.
