Yeremías 30
30
Dios su promesanan di bienestar pa su pueblo
(Yeremías 46:27-28)
1Yeremías a haña un palabra di SEÑOR. 2SEÑOR, Dios di Israel, a dun'é e siguiente enkargo: ‘Skibi delaster un kos ku Mi a bisa bo den un buki.#30:2 delaster…buki: aki probablemente nos mester kòrda riba e promesanan di Dios, kolekshoná den kap. 30 i 31. E kolekshon di teksto tabata originalmente un buki apart, un buki di konsuelo. 3Pasobra lo yega dianan, ku Mi ta kambia suerte di mi pueblo, tantu di Israel komo di Huda, pa bon i Mi ta bolbe trese nan bèk den e pais ku Mi a duna nan antepasadonan; nan lo bolbe tum'é pa nan, esei Mi ta primintí.’ 4-5Aki ta sigui loke SEÑOR a bisa Yeremías tokante Israel i Huda:
‘Hende ta tende gritu di pániko,
di teror, ku nada no por pasiguá.
6Pensa un ratu, puntra bo mes:
Akaso un hòmber por pari?
Di kon antó Mi ta mira tur hòmber
ku man riba nan barika
manera muhé ku doló di parto
i ku nan kara koló di morto?
7Esta malora! Esaki sí ta un dia!
E no ta di kompará ku niun otro!
Un dia di ansha pa desendientenan di Yakob!
Tòg nan lo keda sano i salvo despues.
8Pasobra ta e mes dia ei tambe,’ SEÑOR soberano ta bisa, ‘Mi ta bai kita e yugo for di lomba di desendientenan di Yakob i kibr'é na pida pida; nan buinan tambe. Nan lo no mester ta katibu mas di shonnan straño, 9pero sirbi Ami, SEÑOR nan Dios, i David, ku lo Mi bolbe nombra komo rei riba nan!’
10‘Abo, desendiente di mi sirbidó Yakob,
no tene miedu’, SEÑOR ta deklará,
‘no pèrdè ánimo, Israel.
Pasobra Mi ta bin saka bo for di e pais leu ei,
Mi ta bin saka bo desendientenan
for di e pais ei, kaminda a desterá nan.#Isaías 49:25
Israel, lo bo bolbe bai kas i haña trankilidat i seguridat,
niun hende lo no spanta bo mas.
11Pasobra Mi ta ku bo i lo salba bo,’
SEÑOR ta deklará,
‘Mi ta bai kaba ku tur e pueblonan,
kaminda Mi a plama bo;
pero abo sí mi no ta destruí,
maske Mi tin ku disipliná bo sí,
manera bo a meresé,
pasobra Mi no por laga bo bai sin mas.’
12SEÑOR ta bisa Herusalèm:
‘Bo frakturanan ta inkurabel,
13no por kura bo heridanan mas;
no tin niun hende pa kuida bo,
no tin remedi pa bo yaganan,
kueru nobo no por sali riba nan.
14Tur bo amantenan a lubidá bo
i no ta ni wòri ku bo mas.
Mi a suta bo mal sutá,
komo si fuera Mi tabata bo enemigu.
Mi a kastigá bo bon kastigá,
pasobra b'a hasi kosnan grave
i bo krímennan tabata inkontabel.
15Di kon bo ta yora di doló pa bo frakturanan,
pa bo heridanan, ku niun hende no por kura?
T'Ami a hasi tur e kosnan akí ku bo,
pasobra bo krímennan tabata asina grave
i bo pikánan inkontabel.#Isaías 1:5-6
16Pero tur ku devorá bo, lo ta devorá;
tur bo opresornan lo bai den eksilio,
tur ku plùnder bo, lo ta iplùnder,
i esnan ku hòrta bo,
nan mes lo ta hòrtá.
17Nan ta bisa ku Mi a repudiá bo:
“T'esei ta Sion,
e siudat ku niun hende no ta buska su drechi!”
P'esei Mi ta laga karni bolbe yena na bo kurpa,’
SEÑOR ta bisa,
‘i Mi ta kura bo heridanan.’#Hoséas 14:4
18T'esaki SEÑOR ta bisa:
‘Mi ta bai kambia boso suerte pa bon,
famianan di Israel,
Mi ta bai tene duele di boso pais.
Boso siudatnan lo ta rekonstruí
riba monton di nan restunan bieu
i un fòrti lo ta lantá atrobe
na su lugá di ántes.
19Kantikanan di gradisimentu
i harimentu di hende lo bolbe resoná.
Mi ta laga mi pueblo oumentá,
no disminuí.
Mi ta duna nan asina tantu prestigio,
ku nunka mas niun hende no ta despresiá nan.
20E desendientenan di Yakob
lo bolbe haña nan privilegionan di ántes,
nan lo bolbe forma un komunidat sólido
ku ta pertenesé na Mi;
Mi ta bai kastigá tur nan opresornan.
21Nan hefe lo ta un hende for di nan mes seno,
un gobernante salí for di nan mes pueblo.
Lo Mi pèrmitié bini den mi presensia,’
asina SEÑOR ta bisa.
‘Pasobra ken ta tribi aserká Mi sin invitashon?’
22‘Boso lo ta mi pueblo atrobe
i Ami boso Dios!’
23Rabia di SEÑOR ta manera orkan,
manera warwarú razu,
ku ta basha riba kabes di malbadonan.
24E no ta stòp di ras
ku no ta te ora e realisá i kumpli
ku tur loke SEÑOR a proponé.
Un añ' riba un dia nan lo komprondé pakiko.#Yeremías 23:19-20
Currently Selected:
Yeremías 30: BPK13
Highlight
Share
Copy
Want to have your highlights saved across all your devices? Sign up or sign in
Papiamentu Bible with DC © Bible Society in Netherlands Antilles and Aruba, 2012, 2013