Nkulunkulu, Ukuphi?! No-John BevereIsampula

Mpompoza, Mthombo!

Ngikhumbula izikhathi eziningana ngezikhathi zonyaka ezomile lapho ngangizama ukuthandaza futhi ngikuthola kunzima ukuthola isiphuzo esiqhabulayo samanzi aphilayo. Ngesinye isikhathi, ngathatha itende lami ngaliyisa epaki likahulumeni ngesikhathi sokuthandaza nokuzila ukudla. Ngalobo busuku ngathandaza, ngase ngifunda, ngase ngiqala ukucula izingoma zokudumisa. Ngachitha cishe amahora amathathu ngenza lezi zinto, futhi kwakubonakala sengathi akukho ndawo engiya kuyo. Akukho okwakubonakala kukusha—ngangomile ngendlela emangalisayo. Ngidumele kakhulu, ekugcineni ngagaqa esikhwameni sami sokulala futhi ngazama ukulala.

Ebusuku, kwakubonakala sengathi wonke amademoni ayenomkhosi—angizange ngilale kahle. Ngangiphenduphenduka, ngizibuza ukuthi kungani uNkulunkulu engazibonakalisi kimi. Ngakusasa ekuseni, ngaphumela ngaphandle futhi ngaqala ukuhamba ezindleleni zepaki lomphakathi, ngithandaza ngoMoya, kodwa ngisazizwa ngomile kakhulu. Lokhu kwaqhubeka elinye ihora nesigamu. 

Ngaphakamisa amehlo, ngathi: “Nkosi, ngicabanga ukuthi ngisehlane.” Imicabango yami yayisithi, Angimane ngibuyele ekhaya ngiyeke ukumfuna. Ungiyekelele kule ndawo eyomile, futhi izinto ngeke zishintshe aze angikhiphe.

Lokhu bekuwukucabanga okuyiphutha! Unkulunkulu akasingenisi kulezi zikhathi ukuze asikhungathekise futhi asenze silahle ithemba aze aguqule izimo zethu! Ihlane alihloselwe ukuba yindawo yokwehluleka, kodwa eyokunqoba! Kuthe kusenjalo, ngezwa izwi elincane phakathi kwami ​​lithi, “Yilwa!”

Lelo gama elincane laliyinhlansi yomlilo nokuphila engangikudinga. Masinyane ngaqala ukuthi, “Vuselela kimi isipho sikaNkulunkulu! Yiza mifula yamanzi aphilayo! Mpompoza, mthombo, kuwo umphefumulo wami!” 

Njengoba ngangilokhu ngiphindaphinda lamazwi atholakala emiBhalweni, umthandazo waba namandla kakhulu ngaze ngazithola ngihla ngenyuka kuleyondlela, ngithandaza futhi ngikhuluma iZwi leNkosi ngokukhulu ukushisekela. Konke kwaba kusha, futhi ngazizwa ngijabule! Ukuba khona kwakhe kwakunami ngendlela eqinile. Emizuzwini embalwa ngaphambilini, ngangizizwe ngisinda futhi ngiphelelwa amandla. Kodwa manje ngase ngilungiselela impi, ngilungele ukubhekana nanoma yisiphi isitha ngeZwi leNkosi!

Imvula ayitholakali ogwadule. Amanzi awatholakali kalula lapho futhi uma enokutholakala, kufanele akhiwe emithonjeni noma esiphethwini. Uma usenkathini eyomile, esikhundleni sokubheka ngaphandle ukuze uvuseleleke, yimba ujule ngaphakathi—lapho uzokha khona emifuleni yamanzi aphilayo.