Mak, echî 6
6
Ane eték í Jisos á jiŋ yê
(Mat 13.53-58; Luk 4.16-30)
1Jisos a mághe mân njû Jayirus, a chə́bhe njəm ka eték ejê. Atóbhá abhê á jak na yê. 2Ka ofú oyoá-biji, a róghe ekpíím ane achot ka óchâm Obhasi. Ane etî-etî á rî áfo á yugha yê. É kpô ábho biji kpe-eji, á gyê atem ebhə́bhə́m sê, “A kóe iyîm mbí chénchén fan? Oməŋa-ejûm obhê mbí, ó dʉ̂ fan? É dʉ̂ nan kpá títí ta a kí yim etûm okpógha-biji ntʉ́ghi njí? 3Nkúmá-njû nnyó nná asík a? To a ri mmon i Meri nnyó nná, to abhon-í-nnyen abhê mba ane-arûm a ri Jems na Josis na Juda na Simun, mba ane-akáé fə́ne to á kúma mfá na êt?” Ane mbá á jîŋ yê mân na oyámá-ḿbə́ŋé.
4Kən Jisos a sə́re ábho se, “Nkara-otîp Obhasi nnyo á foná ejík nji sê é dʉ̂ mbâ ane eték ejê na mbâ ndə́p-i-njû eye cháŋ. Ejík ejê é dʉ̂k ka bifun.”#Jon 4.44.
5Nâ ńjə́ne Jisos á ka yim ntûm okpógha-biji ka eték ejê etî-etî, é ká chiŋi ekəmə́m etʉ̂ ane mba á fóne bimaŋé obhô, a yimá ábho á soná. 6É jóe yê a ri okpógha-biji ejûm nji ane abhê á ká ki ḿbə́ŋé na yê.
Jisos a tûm ágbán abhê ófó na ábháe ejen
(Mat 10.5-15; Luk 9.1-6)
Jisos a mághe mân eték ejê a jená a fará nték nnyi a ri áfo kpírí-kpírí, a kpík ane achot Obhasi. 7A bhîŋ ágbán abhê ófó na ábháe a tûm ábháe-ábháe se á jí kpí ane achot Obhasi. A káre ábho ikom se á yighá ojê ka ḿbə́ŋé ane. 8A kâk ábho ebhín se, “Ka fî ên kpe édî, kpe ntâk ejen, kpe ntí. Fî ên a ri ítí ejen ḿfə́ne-mfənê.#Luk 10.4-11. 9Kak ên iyîm-akát, o jak ên na nkʉ̂ biji nnyə́ne-nnyənê, nnyi tat o kâ fî ên”.
10A kpô sə́ré ábho se, “Ó si ên eték, njû-njû nnyi ó gye ên, kâ ên áfo ta o mághe eték áji. 11Ó si ên ka eték nji á bhó fi ên na ogyebhá-ḿbə́ŋé, á bhó yuk okpígha-ejûm obhə́né, maghê ên ńjə́ne. Ebhú o kí maghé ên, bhûk ên ebhəm eték áji nji é yághe ên ka akát, maghê ên mbá-njəm. Ńji tîk é jóe noŋ eriŋ nji ó tʉ ên ane eték áji obhô ka otûŋ.”#Etûm 13.51.
12Ágbán mbá á yə̂p mân á jak. Kpe bhaghé eték nji á síi, á səra ane sê á yóŋé ḿbə́ŋé ábho, á mághe obhí eyimím. 13Á bhima fə́ne ojê ó mághe ane etî-etî mba ó kára oseŋe. Á choma ane akʉ́ noŋ eriŋ, á yimá fə́ne ábho á soná.#Jems 5.14.
Ekʉ̂ Jon nnyo mfúgha-ane-ayép
(Mat 14.1-12; Luk 9.7-9)
14Kən Ntûfâm Erot a yûk esə́re Jisos nji ta é jen é jabhe ngûm. Etʉ̂ ane á kí səre sê a ri Jon nnyo mfúgha-ane-ayép nâ a chəbhê njəm ka ekpin, nâ ńjə́ne a fonê áno ikom a yimá iyîm okpógha-biji.#Mat 16.14; Mak 8.28; Luk 9.19. 15Ane mba tat sê a ri Erayija. Kən etʉ̂ sê a ri nkara-otîp Obhasi yót ka mba éməné.
16Nji Erot a yúghi, a chôt se, “Nne nnyó a ri Jon nnyo mfúgha-ane-ayép. N karê ikom á gbût yê echî, kən yên, a chə́bhe njəm ka ekpin.”
17É fábhe nan? Ebhú Jon a ri mbít, Erot a káre ikom se á fî yê á kâk ka ókúmí. É dʉ̂ ka obhô Erodiyas, nkáé mmon-i-nnyen owe Firip nnyo yê a tabhê a kô.#Luk 3.19-20. 18Kən Jon a kə̂t esə́rə́m Erot se, “Ó gbo ebhín nji o kóe áno nkáé mmon-i-nnyen owa.”
19Toŋ Erodiyas a kâk Jon ka ḿbə́ŋé. A róghe mân mbá ewómóm nnyi yê a kí yui Jon, kən á ka yén. 20É sóne yê eyúúm Jon, ka Erot á fubhá Jon ofup, a ríŋi se Jon a ri nne Obhasi nnyo a fonê fə́ne nnyen erû. Ka obhô mbí, a kí bhabhe Jon. A kí fonâ onoghá-ḿbə́ŋé eróŋ chénchén ebhú nji á yugha nchot i Jon, kən ḿbə́ŋé nâ á bhó kəp, a kí korâ eyúghúm achot mmá.
21Kən ofú bhə́t Erodiyas a fôn mbá eye. A ri ofú mbi Erot a fiî erom se yê a jíghi ofú mbi á jíi yê. Erot a yâk akpatə́m atúi-ofâm mba á fíi ikom eték na ane ayúp ane-enok, é kpê na atúi eték í Gariri. 22Kən mmon Erodiyas nnyo nne-nkáé a fâp a bhə̂n ebhə̂n ka erom njí. É gyébhe Erot na ane mba á bháe erom kpe-eji. Ka ogyebhá-ḿbə́ŋé mbí, a chími a sə́re mmon nnyó se, “Sə́re ə̂m nji-nji o wóme, n kí karé wâ. 23Kpe o sə́re ə̂m se ń káre wâ ebhát otúi obhámé ndə́m, n kí karé.”
24Kən mmon nnyó a bhéne a jak mbâ nnyen, a jî bhə̂p yê se, “Mmá, ḿ bə́p ntûfâm a karé ə̂m jen?”
Nnyen se, “Bhə̂p yê a karé wâ echî Jon nnyo mfúgha-ane-ayép.”
25Mmon nnyó a chə́bhe njəm babhap a bhâ sə́re Erot se, “N kí wom bəre ka ngyím nnyí, ó kó echî Jon nnyo mfúgha-ane-ayép ka okpere ó bhá káre ə̂m.”
26Erot a môt, kən á ka wóm a yóŋé nji a chimî ka ochî ajéné abhê. 27A tûm nne yót ka mba á bhábha yê se a ji, a bhá na echî Jon. Nne nnyó fə́ne a jak ka njû-ókúmí, a jî gbût echî Jon a kô a bhák. 28Á kô fə́ne echî njí ka okpere á káre mbâ mmon nnyó, a tábhe a jî káre nnyen. 29Nji ágbán í Jon á yúghi ekʉ̂ ńsé ábho, á jak á jî kô biji ibhê á bhâ kə̂n.
Jisos a káre édî mbâ ekpatə́m ekam ane
(Mat 14.13-21; Luk 9.10-17; Jon 6.1-14)
30Ágbán í Jisos á chə́bhe njəm mbâ ejen nji á dʉ̂. Á bhâ sə́re yê chénchén iyîm mbi ábho á yími na ekpak nji á kpíi ane achot Obhasi.
31Nji a ri áfo na ábho, ane etî-etî á bhəra, etʉ̂ á kʉra. Ka obhô mbí, Jisos na atóbhá abhê á ká fon ebhú nji á dîk iyîm. A sə́re ábho se, “Bhák é jî ên ka eji nyamḿ, ó kúmi ên ó yóe ên biji.” 32Á gyê fə́ne ka okpi á yə̂p á kí ji, ábho-ábhô. 33Ane etî-etî mba á yéne ábho á kí ji, ta á mə́ŋe ábho. Etî-etî á mághe nték ábho, á jak ka akát á jî chîk ábho mbá-ochî.
34Nji Jisos a fábhe ka okpi, a yên ekpatə́m ekam ane njí, a fôn nsôn kpe-eji na ábho, ka á rî noŋ ojô-obhúi mbi ó ká fon nne nnyo á bhabha ábho. A róghe ábho ekpíím iyîm etî-etî.#Mfana 27.17; 1 Atúi 22.17; 2 É fâp 18.16; Ese 34.5; Mat 9.36.
35Nji atʉ́ á kí bhət, atóbhá abhê á bhâ sə́re yê sê, “Eji njí a ri etə́m, ofú fə́ne ó ji. 36Sə́re ane mbá á jî ka nték nnyi a ri mfá kpít á jî nâm édî á dí.”
37Kən Jisos se, “Karê ên ábho iyîm á dí.”
Á fê fə́ne Jisos sê, “Áfo nâ e kí ko ntâk i ntí ébháe kən e nâm édî é bhîk ekam ane njí ndə́m.”
38Jisos a bhə̂p mân ábho se, “Choŋ okép ên kpá, o fôn ên nsûm i brêt é bhík?” Á bhâ sə́re yê sê nsûm a ri érôn na nsí ébháe.
39A sə́re mân ábho se á kíri ane fép ka nkam ka nkam, á kúmi ka nsi. 40Á kúmi ka ekpak nji yê a toê, ngûm etat nsam érôn, nnyi tat nsam ébháe na ófó. 41Jisos a kô mân brêt nnyí érôn na nsí ébháe a fî, a yûŋ echî ka ósô a káre ekûp mbâ Obhasi. A bhêk brêt nnyí a káre mbâ atóbhá abhê se á kíri á káre ane. A yâ fə́ne nsí nnyí ébháe, a káre, á kíri mbâ ane mbá chénchén. 42Chénchén ane á dî édî njí á gyʉ́ri. 43Ágbán abhê á bhûp akpât édî mma á kə́re á kâk ka bikáé ófó na íbháe í súi. 44Ane-arûm mba á díi édî áji, á rî ntem-esam ntə̂m-ntə̂m ófó na ébháe na ejûm (5,000).
Jisos a jên njəm-ósô ayép noŋ nsi
(Mat 14.22-33; Jon 6.15-21)
45Kpe é ká kət, Jisos a sə́re ágbán abhê se á gyé ka okpi á râŋ mbá nnyi Besayida, eték ebhat í njəm aya Gariri. Yê a kə̂t áfo a dâŋ ekam ane njí é kʉra. 46Nji á kʉ́ri, a jak ka egúí a jí goré Obhasi.
47Kən ágbán abhê á bhúghí á sí étíŋanti aya, egu é si, Jisos a kə̂t yê átíŋ njəm aya mbí. 48A yên se á kí fon oseŋe ebhúghúm, nchot i mfêp. Nkok i ndaŋa-mbá ta a kûk ebhú áji, Jisos a róghe mân ejeném njəm-ósô ayép. A síghá eji ábho á rî, a yîm noŋ a kí chiŋ. 49Kən ágbán abhê á kpó to á yén nne á jená njəm-ósô ayép, á kera sê a ri ńkʉ́, á kûk káŋ káŋ káŋ, 50ka efup é rî ábho ka ḿbə́ŋé kpe-eji.
Kən Jisos a sə́re mân ábho ntə̂m yə́t se, “Ka fûp ên. Son ên ḿbə́ŋé. A ri mme áno.” 51A gyê mân ka okpi na ábho. Nji a gyée, mfêp a kími, ngûm a nâ chák. Biji í kpô ágbán abhê kpe-eji, 52ka kpe nchot i brêt a nyə́ne á ka jáé ábho. Á nyə́ne á ká tʉrí oyén echî ejê.
Jisos a yîm ane bimaŋé ka Genesaret á son
(Mat 14.34-36)
53Nji Jisos na ágbán abhê á yáŋe aya, á tə́me ka eték í Genesaret, á sə̂t okpi ábho. 54Nji á fábhe ka okpi, ta ane á ríŋi Jisos. 55Ane ebhat áji ndə́m á kə̂n ane bimaŋé ábho ka mkpa, á tobha yê á jak mbá-mbá á yúghi sê a ri. 56Kpe ebhát njə́n nji Jisos a síi, kpe njə́n eték, kpe a síi ka mbin, ane á kí kən ane bimaŋé ábho á jî ka éré ogəm á gorá Jisos sê a kam ane bimaŋé mbá á kə́me kpe otûŋ-éfô ejê ḿbə́ne-mbənê. Chénchén fə́ne mba á kə́me, á sôn.
Okuqokiwe okwamanje:
Mak, echî 6: ETUNT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Ejagham New Testament © Bible Society of Nigeria and Bible Society of Cameroon, 1996.
