Mak, echî 5
5
Jisos a yîm nne nnyo nchəme-ojê á noghá yê a sôn
(Mat 8.28-34; Luk 8.26-39)
1Jisos na ane mba á tóbha yê á yáŋe njəm aya Gariri, kpáát á jî sî ka ebhat Gerasin. 2Ebhú jə́t nji Jisos a fábhe ka okpi, nne-ndûm yót nnyo nchəme ojê á kará yê oseŋe, a dʉ ka ebhat ayəm-áyə̂m a bhák mbâ eye. 3Chénchén ebhú nne-ndûm nnyó á kumá ka ngûm ayəm. Kpe nne cháŋ nnyo kə́n a kpô fi yê a bhôp na mkpokobhé. 4Ntə̂m etî-etî á fi yê, á bhop akát, á bhop abhô. Kən kpe bhaghé ebhú a kí joghe mkpokobhé nnyí ka abhô na akát, a ruá. Kpe nne nnyo a sonê a bhîk yê efiím cháŋ. 5Na atʉ́ na efín, nne nnyó á bhuŋa ka ngûm ayəm, a jená a gyʉ́rá agúí a bhərá, a kúghá a bhómá biji na atáé.
6Nji nne nnyó a yéne Jisos a kə́ bha ńgô, a bhéne a jî bhə́ne yê ka akát. 7A kûk káŋ káŋ káŋ se, “Wóó Jisos, Mmon Obhasi ósô! Ó woma jen na mme? Ka mbiŋ Obhasi, ń gore wâ, ka kpə́re ə̂m.” 8Echî nji á chorá áno é rî sê Jisos ta a kí səre ojê mbí se ó fáp ó mághe nne-ndûm nnyó.
9Jisos a bhə̂p mân yê se, “Mbiŋ eya á kamá jen?”
Nne-ndûm nnyó se, “Mbiŋ amé a ri Nchəme-ojê, ka é ti otí.” 10Kən á ka re egoróm Jisos a kâ bhîm ábho á mághe eji áji.
11Ekpatə́m ekam akûk é rî áfo é dik édî ka mkpe egúí. 12Nchəme-ojê nnyí á góre Jisos sê a túm ábho á gyé akûk mmá. 13Jisos a kâm. Nchəme-ojê nnyí á mághe mân nne-ndûm nnyó á jî gyê akûk mmá. Akûk mmá á bhéne á bhə̂t ḿkpábhé egúí, á jî gbô ka aya á tân. Mfan akûk á kí si ejûm bəre ntem-esam ntə̂m-ntə̂m érôn.
14Nji nchot nnyí a fábhe, ane mba á bhábha akûk áma á bê á jak nnyi eték. Á jak ka eték na mbin chénchén á fáre. Ane á jak á jí yén ejûm nji é fábhe. 15Ebhú á síi mbâ Jisos, á yên nne nnyo nchəme-ojê á noghá yê nná, a sóbhe biji a kúmi áfo na nnyen i ḿbə́ŋé eye. Efup é yîm chénchén ábho kpe-eji. 16Mba á yéne oyén na amə̂t á sə́re ane nji é fábhe na nne-ndûm nnyó. Á sə́re fə́ne ekpak é fábhe é kpê na akûk mma á rî áfo. 17Nji ane á yúghi nchot nnyí, á róghe Jisos egoróm sê a maghé ebhat eték ábho.
18Ebhú Jisos a kí gye ka okpi, nne nnyo nchəme-ojê a karê nná yê oseŋe a góre se a tóp yê. 19Kən Jisos á ka kam. A sə́re yê se, “Chəbhê njəm mbâ ane abhâ, choŋ osə́ré ábho énoê etûm nji Ńtâ Obhasi a yimî a káre wâ na ekpak nji a rî wâ nsôn.” 20Nne ányo a mághe mân a jak. A jên a fáre Ntek Ofo nnyi a ri ka ebhát áji, a sə́re ejûm nji Jisos a yimî a káre yê. Biji í kpô ane chénchén kpe-eji.
Jisos a sʉ̂k mmon i Jayirus nnyo a kpóe, a yîm fə́ne nne-nkáé nnyo á maŋá emaŋé a sôn
(Mat 9.18-26; Luk 8.40-56)
21Jisos a chə́bhe njəm a yáŋe njəm aya mmá. Ekpatə́m ekam ane á fáre yê á kâk ka étíŋanti. 22Nne-echî ka óchâm Obhasi yót a kamá se Jayirus, a yên yê a bhâ gbô yê ka akát. 23A góre na ḿbə́ŋé-a-ḿbə́ŋé se, “Mmon omé nnyo nne-nkáé a kí maŋé kpe-eji. Ítəbhé, bhá kəmê yê na obhô obhâ a son, a kâ kpô.” 24Jisos a yə̂p mân a kí ji na yê.
Ane etî-etî á bhúi yê áfo, á kí top á jak. 25Nne-nkáé yót a ri áfo nnyo á maŋá emaŋé nji agyʉ́ŋ á fábha yê ka biji. Emaŋé áji é nok yê ka nyâ ófó na ébháe. 26A yên oseŋe ka emaŋé njí kpe-eji, a jên ojû-ajân a fáre. A bhíbhi ntí ḿ man, kən kpe echî na ndə́p á ka yén, emaŋé é nyígha onyíghí.
27-28Nne-nkáé nnyó a yûk esə́re Jisos. A jak mân njəm-ńjə̂m a jî chə̂m ane mba á tóbha yê. A kâm ka ḿbə́ŋé eye se yê á nok a kə́me kpe nkʉ̂-ńkʉ̂ nnyi Jisos, tîk yê a sôn. A dâŋ fə́ne ta a jî kə́me nkʉ̂ nnyi Jisos, 29agyʉ́ŋ áma á kími ka ngyím ányi. Mfone a yûk se emaŋé ejê é man.
30Ka ngyím ányi, Jisos a ríŋi se ikom í fap yê ka biji, a fáre amə̂t a kêp, a bhə̂p se, “Énê a kəmê nkʉ̂ amé?”
31Kən atóbhá abhê sê, “Ó yen ekam ane mba á fáre wâ á kâk ka étíŋanti. Nan kən o kí bhəp nne nnyo a kəmê nkʉ̂ eya?” 32Kən Jisos á ka yúk nnyi ábho, a kébhá, yê a yén nne nnyo a kəmê yê.
33Nji nne-nkáé ányo a riŋî nji é fábhe na yê, a bhák na efup a bhâ gbô Jisos ka akát, a sə́re yê chénchén, kpe ejûm á ka bhə́t. 34Jisos a sə́re yê se, “Mmon omé, ḿbə́ŋé eya nnyi o kíi na Obhasi, a yîm wâ o sôn. Deê Obhasi a joé na we, biji í nâ wâ, o kâ kpô maŋé.”
35Nji Jisos a nyə́ne áno a chorá mbâ nne-nkáé ányo, ágbán etat á bhak nnyi mbâ njû Jayirus, á sə́re Jayirus se, “Mmon owa a kpô. Ka kpó yui biji o kará ńsé oseŋe.”
36Jisos, kpe echî á ka kak na ábho, a sə́re Jayirus se, “Ka fûp, kî a ri ḿbə́ŋé na Obhasi.” 37Jisos á ka kam kpe nne yót a tóp yê, é ká chiŋi Pita na Jems na mmon-i-nnyen owe Jon. 38Á yə̂p á jên kpáát á sî ka njû Jayirus. Nji á síi ágo, Jisos a yên onyʉk mbi ó rî, a yên ane noŋ á kúgha á rʉra. 39A gyê ka njû ányi a bhə̂p ábho se, “Jen ên kpá títí, echî onyʉk mbí a ri jen? Ó kughá ên o rʉ́rá ên jen? Mmon nnyó á ka kpó okpó, á yaá a ri eyô.”
40Ane mba á rî áfo á yóe yê amə̂ŋ. Kən Jisos a bhîm ábho á fâp ka éré. A bhîŋ ńsé na nnyen i mmon ányo, é kpê na ágbán abhê mbá ásá, á gyê á jak ka eji nji á núŋi mmon nnyó. 41A fî mmon ányo ka obhô a chôt se, “Tarita koum,” nâ é fap se, “Mmon i nsop, n kí səre wâ, duî ngyím.” 42Nsop ányo á tə̂m a rúi ngyím ntə̂m yə́t, a róghe ejeném, a fará, ka ta a sî nyâ ófó na ébháe ebhú áji.
Nji Jisos a yimî ejûm njí, biji í kpô chénchén ane mba á rî áfo. 43Jisos a káre ábho ebhín se á kâ yîm kpe nne yót a məŋé. A sə́re ábho se á káre nsop ányo édî a dí.
Okuqokiwe okwamanje:
Mak, echî 5: ETUNT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Ejagham New Testament © Bible Society of Nigeria and Bible Society of Cameroon, 1996.
