Mak, echî 4
4
Egan í nyima-ebhin
(Mat 13.1-9; Luk 8.4-8)
1Jisos a kpô róghe ane achot ekpíím ka mkpe aya Gariri. Ekam ane nji é fáre yê é kâk ka étíŋanti é fâŋ é chîŋ. Jisos a bhə̂t mân ka aya, a jî gyê ka okpi a kúmi, ekam njí é chúi ka mkpe aya.#Luk 5.1-3. 2A ri na ngan nâ Jisos a kóe a kpík ábho iyîm etî-etî. Kən a kí kpi ábho se,
3“Ofú bhə́t, nyima-ebhin yót a jak a jí bhe nkap ka ebhin ejê. 4Ebhú a kí bhe nkap nnyí, aməghe mma tat á gbô ka mbá. Nnón ḿ bâ dî. 5Etʉ̂ á gbô ka ngûm atáé-átáe, á dʉ̂ etʉri-étʉ́ri áji, ka nsi-édî á ka tí. 6Kən njúí a kpo to a fáp, nkap nnyi ta a dʉ nná a kpô fép, ka arʉk á ká gye nsi nono. 7Etʉ̂ á gbô ka ajoŋe, ajoŋe mmá á kúi á nyére nkʉi, nkʉi á ka karé asûm. 8Etʉ̂ á gbô ka nsi nnyi no. Áma á kúi á káre nkap. Nsə́n etat a káre aməghe esam na ófó, etʉ̂ nsam ésá, nnyi tat nsam érôn.”
9A bhâ sə́re mân ane se, “Deê nne mân nnyo a fonê atûŋ mma á yugha mbá, a yúk.”
Echî nji Jisos á chorá nchot ka ngan a ri jen?
(Mat 13.10-17; Luk 8.9-10)
10Nji Jisos a ri yê átíŋ, ágbán abhê ófó na ábháe na etʉ̂ ane mba á rî na yê, á bhak á bhâ bhə̂p yê sê a sə́ré ábho echî ngan eye. 11A táme ábho se, “Obhasi a káre ên aron se ó mə́ŋe ên ejûm ebhə̂t nji é rî ka otúi obhê. Kən ane mba á ká ki ḿbə́ŋé na yê, tîk á yugha achot chénchén a ri ka ngan.
12Tîk á kébha mân ka etʉri, kən á bhó yen.
‘Tîk á yúgha, kən á bhó məŋé echî.
Echî aŋ? Á kí yim nan á yén á mə́ŋe echî,
á chə́bhe njəm á kî ḿbə́ŋé na Obhasi,
a ri nsôn a su obhí ábho?’ ”#Asa 6.9-10.
Jisos a sə́re mân echî egan í nyima-ebhin
(Mat 13.18-23; Luk 8.11-15)
13Jisos a bhə̂p mân ábho se, “Ájoé ó ka məŋé ên echî egan njí, o kí yim ên mân nan ó mə́ŋe echî egan kpe jə́t?” 14A sə́re mân ábho se, “Ejûm í nkap nji nyima-ebhin a kóe a jí bhe ka ebhin é rî bəre otîp Obhasi. 15Ane mba tat á kí yuk otîp mbí, kən kpe ebhú é bhó rap, Satan a kí yighí ḿbə́ne ka ḿbə́ŋé ábho. Ntʉ́ghi otîp mbí ó rî noŋ nkap nnyi a gboê nná ka mbá. 16Ane mba tat á rî noŋ nkap nnyi a gboê ka eji atáé-átáe. Á kí yuk otîp Obhasi á kô ḿbə́ne na ogyebhá-ḿbə́ŋé, 17kən otîp mbí ó bhó fon arʉk ka ḿbə́ŋé ábho. Ka obhô mbí, ó bhó ka. Ebhú sê kpe nchot kpe oseŋe ó fâp ka obhô otîp mbí, ane ntʉ́ghi mbá á kí yighí obhô ka ḿbə́ne ka ngyím ányi. 18Etʉ̂ ane á rî noŋ nkap nnyi á wúbhi ka ajoŋe. Á kí yuk otîp Obhasi, 19kən íkíkéré ngun na ekot í ntí na achot ekpin ka mkpak ka mkpak í bhó karé mbá otîp mbí ó kúí ka ḿbə́ŋé ábho. 20Mân ane mba tat mba á yúghi otîp mbí, á kâm nnyen ekamám na ḿbə́ŋé ábho á rî noŋ nkap nnyi a gboê ka nsi-édî, kən a kâp fə́ne ka ńgyímí ka ńgyímí. Nji á bhóŋe, etʉ̂ nsə́n a káre aməghe esam njəm ófó, etʉ̂ nsam ésá, etʉ̂ nsam érôn.”
Egan ńtʉ́ríkáŋ nnyi á nyóe
(Luk 8.16-18)
21Jisos a kpô bhə́p ábho se, “Nâ-ngá nne kpe yót a ri nnyo á nyoé ńtʉ́ríkáŋ, a kə̂n ejûm a bhúi na kpe ebhú tat a kî a ri ka esə́n enuŋ a? Nne á nyoé ńtʉ́ríkáŋ, á kik a ri ka echî ébhúní.#Mat 5.15; Luk 11.33. 22Ka ekpak njí, kpe bhaghé ejûm ebhə̂t é rî é tâk ndə́p. Á rî á rə́bhe fə́ne kpe nnyə́n nchot nnyi a ri ka ebhə̂t.#Mat 10.26; Luk 12.2. 23Ájoé nne a fôn atûŋ mma á yugha mbá, deê a yúk.”
Egan nji Jisos a túbhi a kpê na nchot etáŋám
24A kpô sə́ré ábho se, “Kî ên atûŋ nono ka ejûm nji o kí yuk ên. Ka ekpak nji o kí taŋ ên achot atem-ane, məŋê ên sê Obhasi a kí taŋ ên eróŋ. Kən otáŋá-nchot Obhasi ó son ó chíŋi obhə́né.#Mat 7.2; Luk 6.38. 25Məŋê ên sê nne nnyo a fonê ofon á kí kpe yê, kən yê nnyo á ka fon, kpe mkpât nnyi a fonê áno, á kí tabhé.”#Mat 13.12; 25.29; Luk 19.26.
Egan í nkap ekúúm ka ebhin
26Jisos a kpô túp egan se, “Otúi Obhasi ó rî ekan-ékân noŋ nne a kô ejûm í nkap a jî bhê ka ebhin. 27Atʉ́ á nyak, nne nnyó a núŋi a yáe eyô. Ofú ó chê, a nyéme. Á kpó ji ka ebhin, nkap nnyí a dʉ̂ a kí kui, kən yê á bhó məŋé ejûm nji é yími kən nkap eye a dʉ ta a kí kui. 28Nsi átíŋ nâ á kará nkap. Ndaŋa-mbá, nnyo ń kí fəm ka nsi. Ḿ kpó fəm, ń kí kui, ń káre mfem. Mfem á kpo fap, nkap nnyí mân a kâp a káre asûm. Asûm mmá á kpo ka, á kâk aməghe. 29Aməghe á kúi, nne nnyó a róghe egbúrúm a chəmá, ka efʉ é si.”#Jow 3.13.
Egan é kpê na étí nji á bhíŋa sê mósta
(Mat 13.31-32,34; Luk 13.18-19)
30Jisos a bhə̂p ábho se, “Kə́n êt e gáe otúi Obhasi na jen? E kí ko bhaghé egan é tóŋé ekpak nji otúi Obhasi ó rî? 31Otúi Obhasi ó rî noŋ nkap etat nnyi á kamá sê mósta. Ka chénchén nkap ka ngyím ányi, mósta nâ a chébhe a chîŋ ochíŋ. Kən ebhú nne á ko a bhê, 32a kí dʉ, a kúi, esə́n ejê é kí faŋ é chíŋi chénchén átí ka ńgyímí átí ányi. A kí ya arâp mma á fáŋe á bhîk nji nnón ń kə́ bha ḿ bâ gbê ojû.”
33Ka ngan etî-etî noŋ nnyí mfá, Jisos a kí kpi ane otîp Obhasi ka ekpak ane kə́n á kâk ka echî. 34Á bhó səre kpe ejûm nji á ka túp ka ngan. Kən ebhú á kət mbá-njəm na atóbhá abhê, a kí səre ábho echî ngan eye.
Jisos a náre ekpatə́m í mfêp ka aya
(Mat 8.23-27; Luk 8.22-25)
35Ka egu áji, Jisos a sə́re ane mba á tóbha yê se, “É yáŋe njəm aya nnyi ńgô.” 36Á mághe mân ekam ane nji é rî na ábho áfo, á gyê ka okpi mbi Jisos a kun, á bhúghi á jak na yê. Akpi etat á tôp ábho á jak. 37Nji á yáŋa aya, ekpatə́m í mfêp a bhák, ébhúghí-aya é sûm okpi ábho, ayép fə́ne á róghe egyéém ta ó kət kpít ka eterém. 38Kən Jisos a ri enuŋ ka ebhat í ndə́p okpi, a kúni echî ka étí-echî, a kí yae. Ane abhê á sʉ̂k yê, á bhə̂p sê, “Ńsé, kpe aya á bhó kim wâ se e kə́ bha otán ka aya á?”
39Jisos a rúi ngyím a nyân mfêp, a sə́re aya se á nâ. Mfêp a kími, ngûm a nâ chák. 40A bhə̂p mân ábho se, “Jen nji o kí fup ên ka ekpak njí? Ḿbə́ŋé nnyi o kíi ên na Obhasi a ri fan?”
41Efup é yîm ábho kpe-eji. Á kí gəm sê “Énê nná nnyo kpe mfêp na aya í kí yuk yê?”
Okuqokiwe okwamanje:
Mak, echî 4: ETUNT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Ejagham New Testament © Bible Society of Nigeria and Bible Society of Cameroon, 1996.
