MATA 9
9
MATA 9
1Yɔ Yeesu re gi kar a lɛmb za du, wɛɛ kar mɛmbal bɔ rek a gi waal gbɔɔl du.
2Yɔ rek anbɔ hi kamsig wal za zaŋgdi a sil ha. Yɔ Yeesu gbɛn dood wɔ ɗɔbsigya̧ be, raa
wal zaŋgd bɔ a waa be, ɓaasum muul mɔ, be bitsum hinha̧a̧l mɔ bitsɔ!
3Yɔ anbɔ Bɛtmaakdɔkya zaadɛ hi mɔkig hi kpoos du be a wal yɛrɛ gi book ya̧a̧ha̧a̧l
a Bɛt zulha!
4Yɔ Yeesu mɛɛ hinyɔ wɔrɔ hi mɔkig hi kpoos du be, warihi
a nɔ nɛ gin mɔkil ha̧a̧l wɔrɔ nɛ kpoos du anbɔ nɔ? 5An be raa doo zaŋgd bɔ a be bitsim hinha̧a̧l mɔ wɔ bitsɔ, hi zaa ráákɔ a ɗukum ha mɔ ɛmbɔ, nɔni ɓaa gi daarlɛl nɔ? 6Yɛrɛ ɔbe zunsin hin an nɛ mɛɛ a Za̧a̧n Waa bɔ gin tɛŋk a hɛbtdi an gi bits dood hinha̧a̧lɛ.
Wɛɛ raa
doo zaŋgd bɔ a ɗukumɔ mɔ loo sil mɔ mɔ wɛɛ mɔ lɛlɛ!
7Wal bɔ ɗundɔ loo silɔ re gi lɛlɛ. 8Yɔ dood saal wɔ hi gbɛn hini daa anbɔ hoobha̧a̧hiha̧, hi wɛɛ hi baan Bɛto anyɔ gaa dood tɛŋk anbɔ.
9Yɔ Yeesu ɗund hɔdi gi fɔk gbɔnɔ a tooslukya̧ gbarɔ, gbɛn doo za gi ɗɔɔtig a toosluk bɔ gedu nuŋgɔ a Mata, elige,
a fɔbzibe.
Mata ɗundɔ fɔge.
10Yɔ Yeesu ɗɔɔt gi hinlek a Mata raa du, tooszekyaadɛ hi dood hinha̧a̧l wookyaadɛ kittɔnɔ hi zaa hi ɗɔɔt hi hinlek elo, hi Yeesu hi walɛsɛrɛ ɔ̧ɔ̧ wɔ be. 11Yɔ Farisaya wɔ hi zaa hi gbɛn anbɔ hi war walɛsɛrɛ ɔ̧ɔ̧ wɔ
a hingokya nɛ bɔ gi hinlek nɔ hi tooszekya wɔ hi hinha̧a̧l wookya wɔ nɔ?
12Yɔ Yeesu lag anbɔ raa
a dood wɔ muulya̧ gi rɔbtɔnɔ ha̧a̧hi gɛr gɛ, ha̧a̧ gumtil wɔ hiya. 13Da nɛ gok hinyɔ hi bi̧i̧ a Bɛt ɗɛɛrwol du, an nɛ kɛm hinɔ rɔbtɔnɔ: a Bɛt raa a ha̧a̧be an hi mɛɛtin ya̧a̧rɛ, hā̧ā̧be maaknamb wɔ hi gbɛɛtirgo gɛ. Yɛrɛ bé zāā an be el dood rɔbɛ gɛ, be zaa an be el dood hinha̧a̧lya wɔ hiya.
14Yohana walɛsɛrɛ ɔ̧ɔ̧ wɔ hi zaa a Yeesu ge hi warige
a wiya hi Farisaya wɔ wi hinlilko, nɔ ɔnɛ walɛsɛrɛ mɔ wɔ hi lilhin ya̧nɛ zaŋ gɛ?
15Yeesu ta̧a̧ raahi
a nɛ mɔk a rɔ̀bɛ wɔ hi elzihi a lottins naab du hi ɗɛɛ an hi mimɔ anyɔ hi gi hi nislookya bɔ ket ya? Taa anbɔ! Yɛrɛ ɔ̧tyɔ gɔ hí wa̧a̧ nislookya bɔ hi ha̧sig a hi teesdu, gɔ gi tuurɔ hi lil gɔ. 16Doo za gɔ lōō gbandil taakil seg yɔ nukt gɛ an gi haktin gbandil wɔm gɛ, à anbɔ gɛ, gbandil seg taakil bɔ nukt gɛ yɔ taar gbandil wɔm bɔ yɔ daarlɛl ɓɛ. 17Gɔ hi tɔ̧ɔ̧ bum mukt a tik wɔm du gɛ, à anbɔ gɛ, tik wɔm bɔ yɔ foo bum bɔ yɔ gub hɛbtdi. Gɔ hi tɔ̧ɔ̧ bum mukt a tik seg du, bum bɔ hi tik bɔ sɛw hi kɔm rɔbtɔnɔ. Anbɔ hinza yɔ ha̧tir gɛ.
18Yɔ Yeesu gisihi hin wɔrɔ dɔk anbɔ Yahuduya mɔk-silluk zulya za zaa zagl gi muutdu raage
a waa be siŋg wɔr ɓɔryɔ, yɛrɛ zaamɔ mɔ gbaasig naan muulɛ gi za̧a̧.
19Yeesu ɗukɔ hi walɛsɛrɛ ɔ̧ɔ̧ wɔ hi fɔ wal bɔ. 20Nis za lis gig fɔk wɛl kooblɛ daa eerɛ, zaa pɛt gi kuudu, ki̧i̧ gbandilɔ tɔlya̧ bɔ. 21Da gi mɔkig a gi kpoos du be
a à be ki̧i̧ nɛ gbandilɔ bɔ gii mɔɔti, be mɛɛ a be za̧a̧za̧.
22Yɔ nis bɔ zɛmr gi ki̧i̧ gbandilɔ bɔ anbɔ Yeesu zɛmr seege wɛɛ raage
a waa be siŋgo, ɓaasum muul mɔ, yɔ mɔ ɗɔbs a mɔ kpoos du a be za̧a̧, mɔ za̧a̧za̧.
Yɔ anbɔ nis bɔ lisɔ bɔ da̧a̧ gɔ ɓɔrbɔ be.
23Yɔ Yeesu zaa a mɔksilluk zulya bɔ gi raa du gi zɛm dood hi waŋgoor utugo, zaadɛ hi ya̧a̧ɓooluko hi kaal be, 24raahi
a tuunɛ, yɛrɛ waa bɔ wɔr gɛ, gi yokyo.
Yɔ dood wɔ hi lag anbɔ hi kpɛ̧ɛ̧lig-kpɛ̧ɛ̧lɔ. 25Hɔnɛyɔ hi yaa dood saal wɔ hi tuu lakdi, Yeesu gul gɔ a luk bɔ gedu wa̧a̧ waasiŋ bɔ naan muulɛ, waa bɔ ɗund gɔ ha. 26Dɔglɔ hɛks gɔ waal bɔ gedu sɛw.
27Yɔ Yeesu ɗuk hɔdi gi daak gi rek lɛlza, yɔ̧ɔ̧rɛ eerɛ hi fɔge hi ya̧a̧ɓooliki
a Dawda waawalɔ, mɛɛsiwi ya̧a̧rɛ!
28Yɔ Yeesu re gi tuur raa du, yɔ̧ɔ̧rɛ wɔ eerɛ hi sɔɔ gi dɔŋdi, gii wɛɛ warihi
a nɛ ɗɔbs nɛ kpoos du a be gin tɛŋk an be woo hinɔ ya?
Wɔrɔ hi wɛɛ hi ta̧a̧ge a hɔɔ,
Waar i, wi ɗɔbsɔ!
29Yeesu gbaa naan hi lɔl du dɔgɔ
a an hinɔ gi wooy anyɔ nɛ ɗɔbs nɛ kpoos du!
30Dood eerɛ wɔ lɔlya̧ wɛɛ gaa hi gbɛn gɔ, Yeesu wɛɛ raahi
hi naati a lagin bɛttɔnɔ, bɔ doo gi mɛɛ hinɔ.
31Hɔnɛ yɔ̧ɔ̧rɛ wɔ hí bɛɛ tuuko hi rek hi ɛmbin nuŋgɔ a waal bɔ gedu sɛw.
32Yɔ Yeesu tuu gi rek hi walɛsɛrɛ ɔ̧ɔ̧ wɔ, dood hi kams Yeesu za̧a̧nza yɔ gin loorɛha̧a̧l gi muul du gi wɛɛnig su̧u̧ki. 33Yɔ tuus loorɛha̧a̧l bɔ a za̧a̧n bɔ gi muul du, za̧a̧n bɔ baar ya̧a̧booko. Yɔ dood saal wɔ hinkɔmsihi gɛrs be hi raa
a hi gbɛn hinza tuudir a Israhila hɛbt du gi riitin an yɛrɛ gɛ.
34Hɔnɛ wɛɛ Farisaya wɔ hi dɔg be
a loorɛha̧a̧l wɔ waar ya̧ bɔ gii gaa Yeesu tɛŋko gi tuusin loorɛha̧a̧lɛ!
35Yeesu ɛmb gbɛ̧ɛ̧ka a waal gbɔlɛ wɔ du hi raat dɛɛt wɔ du sɛw gi hingok a mɔksilluk wɔ duge gi dɔk Bɛt wáátɔ Dɔgl Rɔb bɔ, gi tuusilgo gums sɛw hi gums sa̧ytya zaadɛ kittɔnɔ. 36Yɔ Yeesu gbɛn dood saal wɔ hi mɔɔ be, muulya̧ gi wɔlihi an tam wɔ hi taan nɛɛrawaa be, hi ha̧a̧sig ya̧a̧rɛ. 37Raa walɛsɛrɛ ɔ̧ɔ̧ wɔ
a totɓɛs bɔ woosɔ tɔɔtɔ, wɛɛ woosya hi kit gɛ be. 38Da nɛ zɔ̧b wooszulya bɔ gi yaaz woosya kittɔnɔ hi zaa a totɓɛsɔ bɔ gedu.
Okuqokiwe okwamanje:
MATA 9: NTD
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Doyayo New Testament © Bible Society of Cameroon, 1991.
