MATA 10
10
MATA 10
1Yeesu el walɛsɛrɛ ɔ̧ɔ̧ wɔ koobl daa eerɛ gaahi tɛŋko an hi ninin loorɛha̧a̧l wɔ, hi tuusil gums sɛw a dood muulɛ hi zaŋdums sɛw. 2Tɔmsya wɔ koobl daa eerɛ nuŋgya̧ gɛrɛ: doos bɔ nuŋgɔ a Simɔŋ (nuŋgɔ zaa a Piyɛr ), yɛ̧ɛ̧tɔ Andrɛ, Zebede waatɔ Yakuba hi yɛ̧ɛ̧tɔ Yohana. 3Filib hi Bartelemi, Tumas hi tooszekya bɔ Mata, Alfe waawal Yakuba hi Taade; 4Simɔŋ Hɛbtwaa Gàbs bɔ hi Yahuda Iskaryudi yɔ rɛ̧ɛ̧ Yeesu . 5Yeesu yaa walɛsɛrɛ ɔ̧ɔ̧ koobl daa eer wɛrɛ woosɛ raahi
anyɔ lɛ a bɔnɛ rek a lɛlyɔ dood hi mɛɛ Bɛt gɛ ge, bɔnɛ rek a Samariya waal za gbɔɔl du. 6Rekin a dood Israhilaya wɔ hi gi an tam yɔ wag hi. 7Gɔ nɛ réko gin Bɛt dɔglɔ dɔk nɔɔha nɛ raako a Bɛt wáátɔ sɛ̧ɛ̧bɔ. 8Za̧a̧sin gumtil wɔ, rɛmsin wɔrkɛ wɔ, za̧a̧sin dood wɔ hi gin ɗobtil muulɛ. Tuusin loorɛha̧a̧l wɔ hi gi a dood muul du. Yɛrɛ nɛ dag Bɛt tɛŋkɔ ya̧a̧rtɔs, da nɛ gaa dood ya̧a̧rtɔs be. 9Gɔ nɛ reko, bɔnɛ loo hɛɛlmɔto, bɔnɛ loo tusɛ, zaabe tus dɛɛto nɛ yaa a nɛ ziba du, 10bɔnɛ loo saa, bɔnɛ loo gbandil eerɛ, bɔnɛ loo taalɛ, bɔnɛ loo sɔɔlɛ. Ya̧a̧nɛ, rii an woosya gi dag leesɔ dagɔ.
11Gɔ nɛ gul a waal gbɔɔl za du, zaabe, a raat dɛɛt zaadɛ du, warin kinsa doo rɔb gi du an gi dagin a gi lɛl du; gɔ gi anbɔ ɗɔɔtin a za̧a̧n bɔ gi lɛl du gi tuur a rek nɛ ɔ̧ti. 12Gɔ nɛ gulk a raa bɔ gedu boonɛge, nɛ raa a an Bɛt boolumɔ gigi hi nɛya! 13Gid dood wɔ hi waak a raa bɔ gedu hi rii an hi daginɛ, boolum nɛ bɔ ɔksige hi dood wɔ duhɔ. Wɛɛ gid hi tuur dood rɔbɛ an hi dagin hi raa du gɛ, boolum nɛ bɔ bɔgi ɗɔɔt a hi zulha, wɛɛzig a nɛɛ ge.
14Gid nɛ tuur a raa za du, zaa lab gɛ a waal gbɔɔl za du doodya̧ hi dāgin gɛ, hi tā̧ā̧sin dɔgl nɛ bɔ lak gɛ, tuunɛ nɛ ɔɔ raa bɔ, zaabe waal gbɔɔl bɔ nɛ pubsihi luus bɔ nɛ dɔɔkuu ha. 15Be gisin raak rɔbo: waal gbɔɔl bɔrɔ ya̧a̧rhantɔ gi ɓaa gi daar Sodɔma hi Gɔmɔra hɛbt ɔnɛ a dɔgl gbaak-ɔ̧ti. 16Laginɛ, yɛrɛ be gin yaak an tamɔ a lergum tees du. Ginin kɛ̧ɛ̧tig an beksɛ, wɛɛn dood zulhɔnikyaadɛ an gutu. 17Oon zul nɛ hi doodɛ. Dood hi wa̧a̧nɛ hi ka̧nɛ a dɔglyɛ̧ɛ̧k-yaadɛ muutdu hi lɛbtin a hi mɔksilluk wɔ du hi kpooti.
18Hi wɛɛ hi dirkinɛ hi kanɛ a hɛbtzulya wɔ hi, hi waar ɛ wɔ hi muutdu a be dɔŋgo an nɛ boo dɔgl be a hi muutdu hi a dood wɔ hi mɛɛ Bɛt gɛ hi muutdu. 19Gɔ hi wa̧a̧nɛ hi ka̧nɛ a dɔglyɛ̧ɛ̧kya wɔ hi muutdu bɔ kol gi tuunɛ a nɛ dɔg ri, zaabe a hinyɔ gɔ nɛ dɔg geha. Hinyɔ gɔ nɛ dɔko, Bɛt gii gin gaazig ɓɔrbɔ an nɛ dɔgɔ . 20Dɔgl wɔrɔ lab hi taa fu̧u̧k a nɛ zulha, Baa nɛ Bɛt Mɔkilɔ gii gi bookya̧a̧ a nɛ kpoos du.
21Dood hi gaa yɛ̧ɛ̧dɛya̧ an hi gbɔ̧hi, baaba wɔ be hi gaa waatya̧ an hi gbɔ̧hi be. Waat wɔ be hí ɗund a baa wɔ raa du hi zulha hi gbɔ̧hi. 22Dood sɛw hi hɛ̧ɛ̧ninlɔl a be dɔŋgo. Yɔ anbɔ za̧a̧nyɔ gɔ gi mɔm hin wɔrɔ gi tuur a da̧a̧ki gi za̧a̧. 23Gɔ hi gin zɛksig a waal za gbɔɔl du, nɔɔn nɛ dɔŋg a waal za gbɔɔl du. Be gisin raak rɔbo: Za̧a̧n Waa bɔ gɔ gi zaako nɛɛ nɛ ɛmbik a Israhila waal gbɔlɛ ɔ̧ɔ̧ wɔ du te, nɛ da̧a̧sir kɛn gɛ hɛw.
24Walsɛr dāār ɗɛntɔ hi gbɔlums gɛ, wɛɛ taa an gbaar gi daar ɗɛntɔ hi gbɔlums be. 25Rii an walsɛr gi wɛɛ an ɗɛntɔ, gbaar bɔ be gi wɛɛ an báátɔ, à hi el za̧a̧n raatya bɔ gii a Belzebil, yɔ hi dɔ̧ɔ̧s doodɔ wɔ raa du nuŋg ha̧a̧l yɔ daarlɛl gɛ ya?
26Yɔ anbɔ, bɔ hoob gi ha̧a̧nɛ doodɛ. Hinyɔ yaat sɛw, hí ɔɔg midigɔ gɛ, hinyɔ gi ya̧a̧luurya sɛw hí ɔɔg mɛksigɔ gɛ. 27Hinyɔ be gisin raak a lɛlniŋkum du raalin a ɔ̧t du a dood lɔlgbar sɛw. Hinyɔ be gisin raak hi ya̧a̧tamsɛ, karin a luk zulha nɛ ɓoolɔ. 28Wɛɛ bɔ hoob gi ha̧a̧nɛ dood wɔ hi gbɔŋk muulɛ hi wɛɛ hi ɗɛ̄ɛ̄ kol gbɔŋk gɛ. Hoobha̧a̧nɛg Bɛt yɔ ɗɛɛ kol gbɔŋko hi muulɛ hi yaakɔ a laazɛŋk du.
29Nɛ gɔ hi zebr zaw eerɛ tus dɛɛt gbun ma mi? Yɛrɛ gi hā̧ā̧ Baa nɛ Bɛt gɛ nɔɔs za gbun taa mɛɛk hɛbtdi. 30Bɛt ɓɛr susug nɛ wɔ zulha sɛw. 31Bɔ hoob gi ha̧a̧nɛ hinza; nɛ wɛɛ hin ɗɔbt nɛ daar zaw kittɔnɔ daarɔ. 32Yɔ anbɔ, za̧a̧n yɔ boo dɔgl be a dood muutdu, bee be boo dɔglɔ a Baa be Bɛt yɔ gi bɛtha gi muutdu be. 33Yɛrɛ za̧a̧nyɔ faabe a dood muutdu a mɛɛb gɛ, bee hɛw be faage a Baa be yɔ gi a bɛtha gi muutdu a be mɛɛg gɛ be.
34Bɔnɛ mɔk a be zaa an be kamz boolumi a waal du, bé kāmz boolum gɛ, be kamzig nɔko. 35Be zaa an be gɛ̧ɛ̧ waa hi baatɔ, waasiŋgo hi nɔɔtɔ, nisɛ hi waltɔ nɔɔtɔ. 36Yɔ anbɔ, dood wɔ hi gi a za̧a̧n za raa du hii hi wɛɛsig lɔlɔhɛ̧ɛ̧nikyaadɛ.
37Za̧a̧nyɔ ha̧a̧ge baatɔ, zaabe nɔɔtɔ gi daar beya tuur doo rɔb an gi wɛɛ fɔkya be gɛ. 38Za̧a̧nyɔ pɛɛ dɔ̧ɔ̧rɔ gi fɔ̄bzib gɛ, rı̄ı̄ an gi waa hi bee gɛ. 39Za̧a̧nyɔ ha̧a̧g an gi za̧a̧s kolɔ gi waksige. Wɛɛ za̧a̧nyɔ waks kolɔ a be dɔŋg be, gı̄ zɛm za̧a̧tigɔ a Bɛt wáát du.
40Za̧a̧nyɔ daginɛ, dag beya. Wɛɛ za̧a̧nyɔ dag beya, dag Za̧a̧nyɔ yaazib ga. 41Za̧a̧nyɔ dag Bɛtya̧a̧kɛŋkya a Bɛt ya̧a̧ɔ bɔ gi kɛŋk gi gi dɔk gi dɔŋgo, gi dag dɔɔrɔɔsɔ gi riitin an Bɛtya̧a̧kɛŋkya bɔ ɔnɛ bɔ, wɛɛ za̧a̧nyɔ dag doo riiti a woosɔ riit bɔ gi dɔŋgo, gi dag dɔɔrɔɔsɔ gi riitin an doo riit bɔ ɔnɛ bɔ be. 42Be raasin rɔbo: za̧a̧nyɔ gaa waat wɛrɛ zaaya̧ gbun mɛmyɔ̧k dakwaa gbunu anyɔ gi fɔkya benɛ, taa dɔɔrɔɔsɔ lɔɔk nɛ zaŋ.
Okuqokiwe okwamanje:
MATA 10: NTD
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Doyayo New Testament © Bible Society of Cameroon, 1991.
