ลูกา 17
17
ปือมือเลา อาฌัยํ นะ เยซู ซือตืองัฮ
(มัดทัย 18.6-7,21-22; มาระโก 9.42)
1กะฆีเตอ_ เยซู มือเลา กะ มูเระ นะ ญา จะ_ “ฆาโดฮ อาดา ลาฆู แนฮฌือแนฮ_ นู นะ บูวัจ บรี ซือมียา ซาลัฮ ฌาลัด. ตาปี จือลากา เลอ_ ซือมียา นู บูวัจ บรี ซาลัฮ กะฆีเตอ. 2ดัฮ อาเมด บาตู ฆีลิก ตือโปก_ ฆาโตก เดะ ลีเฮ ซือมียา อีตู_ บือปี ฌาลา กะ ลาโวจ บูวัก เลอ_ บาฌิ เดะ นู นะ บรี ญา บาวา นานะ ดือมิ กะฆีนี_ ซืออูรัก โปด_ ปี ซาลัฮ ฌาลัด ดัฮ. 3กะฆีเตอ_ กือนา ฌาฆา ญาวา บรี บาฌิ เลอ.
“ดัฮ ดีบราดี บูวัจ ซาลัฮ กะ เกา_ กือนา อูจะ กะ ญา. ดัฮ ญา บราเลฮ ฮาตี_ กือนา อาเกะ ซาลัฮ กะ ญา เลอ. 4ตาปี มีเซ ญา บูวัจ ซาลัฮ กะ เกา_ ซืออารี ตูโฌฮ กาลี โปด_ ตาปี ญา อาเลฮ มาแรฮ มียา เกา_ บือกะ ตูโฌฮ กาลี อีตู เตอ_ มือเลา จะ_ ‘กู บราเลฮ ฮาตี ดัฮ’_ กือนา อาเกะ ซาลัฮ กะ ญา เลอ.”
5โซะ โกะ ปือญูโรฮ กูญา มือเลา กะ ตูฮัด เยซู จะ_ “มีตา บรี ลูมอฮ กามี นะ ปือจายา_ บรี บาญะ ซือรูโลยํ เลอ.”
6ตูฮัด เยซู ญา มือเลา จะ_ “ดัฮ ลูมอฮ กาเญา อาดา ลาฆู ปือจายา กิดีกิ_ ตารา บีฌี ตาโระ นู มิดือมิ ซือบีฌี_ กาเญา นะ ซูโรฮ ปูโฮด กายู อีนี จะ_ ‘เกา กือนา กือตัจ ฌากัยํ_ ปี ตานัม เดะ ลาโวจ เลอ.’ กะฆีเตอ_ ญา นะ บูวัจ ตูโรจ กะ กาเญา.
7“ซือมียา ดีฮา เดะ ลูมอฮ กาเญา_ อาดา ปราโซฮ กรือฌา บือนัก_ เฆอ จะ_ ปือบือลา กาวัด กาเมก เตอ_ ตานา ปราโซฮ นู อีตู_ ญา บาลิ ดาตัก เดะ บือนัก_ นะ มือเลา กะ ญา จะ_ ‘บางัจ เลอ_ มาแรฮ ดูโดะ มากัด บือซามา ฌางัน กามี’? 8ฮอย. กาเญา เตด มือเลา กะฆีเตอ เลอ_ ตาปี นะ มือญาเระ กะ ญา จะ_ ‘กือนา ซียะ โกะ ซือบารัก บรี กะ กู มากัด. ซือซิก กาเยด_ ซือและ เดะ ปีงัก ตาโรฮ_ บือกรือฌา บรี กะ กู_ ตือดะ กู นะ มากัด โอะ_ กือญัง ดัฮ. เดะ บลากัก เกา โปด_ นะ บือเลฮ มากัด โอะ ปูลัก เลอ.’ 9ตกเก อีตู นะ มือโอจ กะ ปราโซฮ เฆอ_ ซาเบะ ปราโซฮ บือเลฮ บูวัจ ตูโรจ กะ ญา เตอ? เตด โบะ. 10กะฆีเตอ ฌูฆา เลอ_ โซะ กาเญา_ ตานา บูวัจ ตูโรจ ลาฆู ซือมูฮา_ นู กือนา ปือซัด ดัฮ_ กาเญา กือนา มือเลา จะ_ ‘กามี ฌาดี ปราโซฮ นู เตด ปาโตจ นะ กือนา มือโอจ เลอ. กามี บือเลฮ บือกรือฌา บูวัจ_ บือกะ กามี ฆาโดฮ นะ บูวัจ_ ซา อีตู เลอ.’ ” เยซู ญา จะ.
เยซู ปือบือลา ซือมียา ซาเกะ_ ซือปูโลฮ อูรัก
11กาลา เยซู ตืองัฮ บือฌาลัด ญาแญะ ปี กะ นังฆรี เยรูซาเลม_ ญา บือฌาลัด โซะ ตืองัฮ ตือกอซ นังฆรี ซะมาเรีย ฌางัน ฆาลิลี. 12ตานา เยซู นะ มาโซะ กะ ตูโปะ_ ซา ตูโปะ_ อาดา ซือมียา ปือญาเกะ ปูรู ซือปูโลฮ อูรัก_ มาแรฮ บือดาปัจ ฌางัน ญา. กูญา บือดีรี ฌาโวฮ_ 13บือซูระ จะ_ “โอ เยซู_ บูมอยํ เออ. ตือจีฮัด กะ กามี เลอ.”
14ตานา เยซู ลีฮัจ กูญา ดัฮ_ ญา มือเลา จะ_ “ปี เลอ. ปี ซารี โกะ ซามี_ บรี กูญา ซาซัจ กาเญา.”
กะฆีเตอ_ วะตู กูญา ตืองัฮ บือฌาลัด ปี_ กูญา ซือนัง บาฌิ ดัฮ. 15ซือมียา ซืออูรัก เดะ ลูมอฮ อีตู_ ตานา ญา ลีฮัจ จะ_ ญา ซือนัง บาฌิ ดัฮ เตอ_ ญา อาเลฮ มาแรฮ ซารี เยซู_ บือซูระ บูริ_ มือโอจ กะ ตูฮัด เดะ อาตัซ เลอ. 16ญา ตือมะ มูคา รอจ กะ ตานัฮ_ เดะ โซะ กากี นะ เยซู_ บรี ซือลามัจ กะ ญา. ซือมียา อีตู เตอ_ ฌาดี ซืออูรัก เดะ บักซา ซะมาเรีย. 17กะฆีเตอ_ เยซู มือเลา จะ_ “ซือปูโลฮ อูรัก ซือนัง บาฌิ ดัฮ_ บูกัด เฆอ? ตาปี นู ซือมีลัด อูรัก อีตู_ อาดา ปัจ ดีฮา? 18บูวัจ นามา เลอ_ ฮอย ซือมียา ดีฮา บาลิ มาแรฮ มือโอจ กะ ตูฮัด เดะ อาตัซ_ ลือเบฮ ซือมียา บักซา อาซิก_ แนฮ ซืออูรัก อีนี เลอ?” 19กะฆีเตอ_ เยซู มือเลา กะ ญา จะ_ “บีกัซ ปี เลอ. นู เกา ปือจายา อีนี_ บูวัจ บรี เกา ซือนัง บาฌิ ดัฮ เลอ.”
ปาซัน นู ตูฮัด เดะ อาตัซ ฌาดี ราฌา
(มัดทัย 24.23-28,37-41)
20อาดา ลูมอฮ ฟาริซี ตาญา เยซู จะ_ นู ตูฮัด เดะ อาตัซ นะ มาแรฮ ฌาดี ราฌา นะ ปือบือลา อูมัจ ซือมียา_ นะ บือฌาดี กาลา? เยซู ญา ตีกัฮ จะ_ “นู ตูฮัด ญา มาแรฮ ฌาดี ราฌา เตอ_ บูกัด จะ อาดา ปือนานา_ นะ ลีฮัจ บือฆารี ฌางัน มาตา เลอ. 21ฮอย ซาปา นะ มือเลา จะ_ ‘มาแรฮ ลีฮัจ_ ปัจ อีนี.’ เฆอ จะ ‘ปัจ อีตู เลอ’. ซาเบะ จะ_ นี เลอ_ ตูฮัด ญา อาดา ปือบือลา ฌาดี ราฌา_ เดะ ตืองัฮ กาเญา ดัฮ.”
22เยซู มือเลา กะ โกะ มูเระ นะ ญา จะ_ “อาดา ซา วะตู นู นะ มาแรฮ_ นู กาเญา นะ ซูกา ลีฮัจ อารี นะ นานะ นะ อูมัจ ซือมียา แนฮ ซืออารี เตอ_ ตาปี นะ ลีฮัจ เตด บือฆารี. 23อาดา ซือมียา นะ มือเลา ฌางัน กาเญา จะ_ ‘มาแรฮ ลีฮัจ นู อีนี’_ เฆอ จะ_ ‘ปี ลีฮัจ นู อีตู เลอ’. ฌางัน ตรือเบะ ปี ตูโรจ กูญา. 24ซือรูปา บือกะ กีลัจ เตอ_ นู และ ตรือเบะ เดะ ลาแงะ ซือบือลัฮ_ ซูโลฮ ปี รอจ กะ ลาแงะ นู ซือบือลัฮ เตอ_ กู นู นานะ นะ อูมัจ ซือมียา_ นะ ฌาดี กะฆีเตอ เลอ_ เดะ อารี นะ กู. 25ตาปี กู ฆาโดฮ ตาฮัด ซูซัฮ บาญะ ฌือแนฮ ดูลู. โกะ ซือมียา ฮาดัจ อีนี นะ ตีเมา ซาโมจ กู เลอ. 26เดะ ฮาดัจ นะ โนฮา#ลมล 6.5-8; 7.6-24 ลาฆู บือเลฮ บือฌาดี กะฮามี เตอ_ ฮาดัจ นะ นานะ นะ อูมัจ ซือมียา โปด_ นะ ฌาดี กะฆีเตอ ฌูฆา เลอ. 27กูญา บือเลฮ มากัด_ บือเลฮ โอะ_ บือเลฮ บือนีกัฮ_ อาเกะ บรี ฌาดี ลากี บีนี ฌูฆา_ ตือดะ รอจ กะ อารี อีตู_ นู โนฮา บือเลฮ มาโซะ กะ ดาลับ กาปัน บือซัยํ_ อาเย บือเลฮ อาโปฮ_ บรี โกะ ซือมียา ฌาฮานัม ฮาบิฮ. 28เดะ ฮาดัจ นะ โลด #ลมล 18.20—19.25 โปด_ ฌาดี กะฆีเตอ ฌูฆา. กูญา บือเลฮ มากัด_ บือเลฮ โอะ_ บือลี_ ฌูวัน_ ปุยปรุย ตานัม ตาโระ_ บูวัจ โกะ รูมัฮ เลอ. 29ตาปี เดะ อารี อีตู_ นู โลด ญา ตรือเบะ เดะ นังฆรี โซโดม_ อาปี ฌางัน บลีรัก ญา ฆูโฆยํ ดาตัก เดะ โซะ ลาแงะ_ จูโจฮ นังฆรี_ ปือลัฮ ฮาบิฮ. 30เดะ อารี อีตู_ นู นานะ นะ อูมัจ ซือมียา_ นะ มาแรฮ ปลีฮัจ เตอ_ นะ ฌาดี ซือรูปา กะฆีเตอ ฌูฆา เลอ.
31“เดะ อารี อีตู_ ซือมียา นู อาดา เดะ รูวัก โซะ อาตัซ รูมัฮ_ โกะ ซือบารัก นะ ญา อาดา เดะ ดาลับ รูมัฮ_ ฌางัน บรี ญา ตูโรด มาโซะ ดาลับ รูมัฮ_ อาเมด โกะ ซือบารัก อีตู บือปี. ซือมียา นู อาดา โซะ บือนัก เตอ_ ฌางัน บรี ญา ปาเระ มาแรฮ ฌูฆา เลอ. 32กือนา บรีงัจ จะ_ บีนี นะ โลด_ ญา กือนา ลาฆู นามา#ลมล 19.26 เลอ. 33ซือมียา ดีฮา กือวาซา ตูโลก ญาวา ตะอาซิก_ บรี ดูโดะ ซือนัง เตอ_ ญาวา ญา นะ ฌาฮานัม เลอ. ตาปี ซือมียา ดีฮา นู ซรัฮ ญาวา นะ ญา_ บรี ฌาฮานัม_ ซือมียา อีตู นะ บือเลฮ ฮีโดะ ลือปัซ บาฌิ เลอ. 34กู มือญาเระ กะ กาเญา จะ_ เดะ มาลับ อีตู_ นะ อาดา ซือมียา ดูวา อูรัก_ ตีโนะ เดะ ตือปัจ ตีโนะ ซือตือปัจ เตอ_ นะ ซาโมจ บือปี ซืออูรัก_ นะ ตีงัน ซืออูรัก. 35-36นะ อาดา นีบีนี ดูวา อูรัก_ ฆีลิก ตือโปก บือซามา เตอ_ นะ ซาโมจ บือปี ซืออูรัก_ นะ ตีงัน ซืออูรัก.#17.35-36 ซูรัจ ลามา ซือตืองัฮ ตามัฮ จะ_ “นะ อาดา กีลากี ดูวา อูรัก_ บือกรือฌา บือนัก บือซามา เตอ_ นะ ซาโมจ ซืออูรัก บือปี_ นะ ตีงัน ซืออูรัก บูวัก.”” เยซู ญา จะ.
37กูญา ตาญา เยซู จะ_ “นะ บือฌาดี ปัจ ดีฮา_ ตูฮัด เออ?”
เยซู ตีกัฮ จะ_ “อาดา บาดัด ปัจ ดีฮา_ กาวัด บูโรก อีแรก นะ บือมุน มากัด ปัจ อีตู เลอ.”
Okuqokiwe okwamanje:
ลูกา 17: ULBIBLE
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
