MATEYO 12
12
1KU kikondo kieki kwakaya Yisu ku dituku dia sabado mu bibidi bia miebele ; yi beyi banci bakadi yi ncala, bakabanga kubuka mitongu yi kudya. 2Mo baFalixi pakamonabo bakamwambila ene, Mona, beyi bebe bencenca mutasolelekyela yi bwadi kwencebwa ku sabado. 3Kaninga akabambila ene, Nonu kanwabala mwakakwenca Dafidi pakadiyi yi ncala, yi bobo bakadi yinanci ? 4Mwakabwelayi mu ncibo a Ncembi, yi akadya mampa madisa ataxedibwa kudiyi, ndo kudi bantu bakadi yinanci, kaninga kudi makanda matupu ? 5Ndo kanwabala ku bwadi ene, ku diba dia sabado kwonona makanda a mu tempelo sabado kutena kwona ? 6Kaninga nwatôyela ene, kunu kudi muntu adika tempelo. 7Mo ximbi nwamalubukwa diyi dedi ene, Ngwadila mwengo, kumoni dilongi, kanuxebela bantu batena yi kwona. 8Bwalo budi Mwana a Muntu Fumu a sabado.
9Yi pakancukayi koku, akalwa munda mwa kixindigilu kiabo, yi mona, muntu yi kianca kienci kiamakwoma. 10Yi bakamwapangusa ene, Kwalelekyela yi bwadi ndo kupandisa ku sabado ? bixemusanyabo. 11Kaninga akabambila ene, Muntu kai utani yinenu, udi yi mukwakwa umoumwe, aka lolo you amapona mu dina ku sabado, unanyañana kumukwata yi kumwombulula kunci ? 12Ape muntu kiena apudika mukwakwa ? Mbwôso kwalelekyela yi bwadi ndo kwenca kunengela ku sabado. 13Kunyuma akatôyela muntu ene, Xombola kianca kiebe. Yi akakixombola, kiakalwa kincimancima luna muna kwanci.
14Kaninga baFalixi bakancuka, bakamwelañana nkanyi, muxemuxipabo. 15Mo Yisu akalubukwa yi akancuka koku, yi bimbukuma binene biakamulandudila ; yi akabapandisa masama bungi bwabo ; 16yi akabatôyela ene, kabamusakodi kunci ; 17bixefikixibwa diyi diakatôyebwa kudi Esaya mudimuxi, ene, 18Mona musadi amene unaputunga, munangibwi amene, unapuxekyelela ku mucima. Nakuteka Mwoxixi amene kulu kwanci, yi unasambola mabila malo. 19Kanatanda, kanakwamena, muntu kanakwombwa diyi dienci ku miaka ; 20kananyowa muxembi mutapiki, kanancima kadilu katani kincimi ; binabatusayi lopelo ku bumanya ; 21yi ku dina dienci kunadingidila mabila.
22Kunyuma kwakacwadibwa kudiyi muntu amakwacibwa kudi kidimu kibi, mufofo yi muna kimeme, yi akamupandisa biakatôya muna kimeme, yi mufofo akamona. 23Yi bimbukuma bioso biakakama, yi bakatôya, ene, You ndo Mwana a Dafidi ?
24Kaninga pakakwombwa baFalixi, bakatôya ene, You apaula bidimu bibi kudi Belesebubu, fumu a bidimu bibi. 25Mo yei akalubukwa nkanyi yabo akabambila ene, Bufumu bwoso bwamadisambukila ndo budiaxipa dyendeli, yi bula bwoso ndo ncibo mwoso bwamadisambukila kabunasala. 26Aka lolo Satana amapaula Satana amatanda yi mikyenci, yi bufumu bwanci bunasala beci ? 27Meme ndo ngwapaula bidimu bibi kudi Belesebubu, bana benu babiapaula kudi ñani ? Mbwôso bobo banakala basambodi benu. 28Kaninga meme ndo ngwapaula bidimu bibi kudi Mwoxixi a Ncembi, bufumu bwa Ncembi lolo bwamalwa kunudi sôsôlwo. 29Muntu unabwela mu ncibo a muna ngulu beci kuya sanca bima bienci, kutena amasuka muna ngulu buxi ? kunyuma kunasancayi ncibo anci. 30You utena yinami amatanda yinami, yi you utasokokyeya yinami amacakanisa.
31Ku mucwe ou, meme nwatôyela ene, kwona kwoso yi kutangola kwoso kunalekyelebwa bantu, kaninga kutangola Mwoxixi kakunalekyelebwa bantu. 32Muntu mwoso unakala amatôyela Mwana a Muntu diyi, dinamulekyelebwa ; kaninga muntu mwoso unatôyela Mwoxixi a babaia diyi, kadinamulekyelebwa, ndo ku mwociya ou ndo ku mwociya ulolwa. 33Panga muci kunengela yi mamoma anci kunengela ; ndo panga muci bubi yi bimoma bienci bubi. Bwalo bwamalubukibwa muci ku mamoma anci.
34Bana ba nkangi ; nonu badi bubi nunatôya bintu binengela beci ? Bwalo bwasakola musuku malo amakwolubilañana mu mucima. 35Muntu unengela ndo abatusa bintu binengela munda mwa ngombo anci unengela ; yi muntu mubi ndo abatusa bintu bibi munda mwa ngombo anci mubi. 36Mo nwatôyela ene, diyi dioso dia kanana diatôya bantu, banadisakola ku dituku dia lopelo ; 37bwalo bunasuwixibwa ku meyi ebe, yi ku meyi ebe ndo kunabelebwa.
38Kunyuma banga bena mikanda yi baFalixi bakakulumuna ene, Mweyexi, twakyeba kumona kilayixilu kudi. 39Mo yei akabapingasa ene, Mwociya mubi yi ă budibi ndo ăpalala kilayixilu, yi kilayixilu kakinaupebwa kitena kilayixilu kia Yona mudimuxi. 40Bea biakadi Yona mu difu dia yixi munene minyinya isatu yi matuku asatu, binakala Mwana a Muntu minyinya isatu yi matuku asatu mu mucima ă loboko. 41Bena Ninefe banakwemana ku lopelo yi mwociya ou, yi banaubela ; bwalo bwakadibelabo ku diembi dia Yona ; yi mona, muntu adika Yona udi kunu. 42Fumu a babakaxi a ku Sudu unakwombuluka ku lopelo yi mwociya ou, yi unaubela ; bwalo bwakalwayi ku sula kwa loboko ndo kwombwa bwinu bwa Solomono ; yi mona, muntu adika Solomono udi kunu.
43Mo panakala kidimu kia mbindu kiamabatuka munda mwa muntu, kiamakwenda mu bidi biomu, kiamapalala kwomowa kutena kumona. 44Kunyuma kiamatoya ene, Nakupinana mu ncibo amene unakabatuka momu ; yi palolwakio, kimwasañana kanana, mukomba, yi mubongesa. 45Kunyuma kuyeyakio kuya angata yinanci bidimu binga sambwali biamamudika mikyenci bubi ; biamabwela lolo, biamakala momu, yi mwakadilu ă muntu you ă kunyuma ndo ădika mwakadilu ă buxi bubi. Mo nako kunakala yi mwociya ou ă bubi kabidi.
46Mo pakadi ukiambila yi bimbukuma, mona, mamanci yi bana ba mamanci bakakwemana kunci bamapalala kwambilañana yinanci. 47Yi muntu akamwambila ene, Mona, mabebe yi bana ba mabebe bamakwemana kunci, batanapalala kwambila yinebe. 48Kaninga akapingasa muntu you akamutôyela ene, Mamami ndo ñiani ? yi bakunyi bamene ndo bañani ? 49Yi akaxombola kianci kienci kwakadi beyi banci, yi akatôya ene, Mona mamami, yi bakunyi bamene ; 50muntu mwoso unakwenca nyinga ya Tetemi udi mu diulu, you ndo mwakunyami, yi ngasanami, yi mamami.
Okuqokiwe okwamanje:
MATEYO 12: Luna_NT
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© La Société biblique de Genève
