मर्कुस 9
9
1तसौ येसुइ उखर्ह्वालाइ यन्हिं बोल्लाहा, “साँच्चिय, मुँइ तोहोराखर्ह्वालाइ बोल्मेहेंर्ला, यछि ठड्ध्यालाहारमध्ये कुन्हुँ-कुन्हुँ रहट्थ्ला, जैहिं परमेस्वरक् राज्जे बर्के सक्तिमा आइल नहिंदेख्बासम्म नामोरोथ्।”
येसुक् रुप बद्लल
(मत्ति १७:१-१३; लुका ९:२८-३६)
2यि कहिन् बाज्ल छउ दिनपाछु येसुइ पत्रुस, याकुब, आउँ यहुन्नालाइ आफ्निक्सङ्हिं लेहिन् एक्टा अल्गो डाँराइ जाइलक्। ओछि उखर्ह्वा माटेन् रैल्हुहुन्। तसौ चेलालके दिठातिहि-दिठातिहि येसुक् रुप बद्ललकुन्।#२ पत्रुस १:१७-१८ 3तसौ ओक्राक् लुगा यट्का चहँकारो आउँ गोरो भेलकुन् कि, यरङ् ता पिर्थिबिमा कुन्हुँहि धोइबानाइ ओट्का गोरो पार्बा नाप्पारेक्। 4उहेटाकै ओछि मोसा आउँ एलिया देख्वार पोर्लुहुन्, आउँ येसुक्सङ्हिं कहिन् कर्बा ठाल्लुहुन्। 5तसौ यि देखिहिन् पत्रुसे येसुलाइ यन्हिं बोल्लोकुन्, “गुरु, हामि आको यछि भेल कट्का राम्रो भेउकुन्! हामि यछि तिनग्वा छप्रा बानाहुँक्। एक्टा तोरा लागि, एक्टा मोसाक् लागि आउँ एक्टा एलियाक् लागि।” 6पत्रुसे यरङ् बाज्लक्, किसाबुने उ आउँ ओक्राक् सङलक् एकदमे डराल रैल्हुहुन्। तसौ ओर्को किवा कहिन् बोल्बा पोर्लाहार बाजिहिन् थाहाय नहिंभेलकुन्।
7उहेटाकै एक्टा बादर आइलकुन् आउँ ओक्राक् छायाँइ उखर्ह्वालाइ झाँकालाहा, आउँ बादरक्भटे यन्हिं बाजिहिन् आवाज सुन्लुहुन्, “यि मोरा पियारो छाउरा हो, यहिं बाज्ल कहिन् तोहोलेके मानहँ!”#मत्ति ३:१७; मर्कुस १:११; लुका ३:२२ 8यरङ् बाज्ल सुनेहेबिट्के चेलालके चारौपाखा दिठाटे ता कुन्हुँहिलाइ नहिं देख्लुहुन्। तर येसुलाइ माटेन् देख्लुहुन्।
9उखर्ह्वा डाँराक्भटे टर झर्तिहि कर्टे येसुइ चेलालकलाइ बोल्लाहा, “मुँइ मानुसक् बेटायक मोरिहिन् फेरि नहिं जिउँटबासम्म तोहोलेके आजु जे देख्ल रौंहे, उ कहिन् कुन्हुँहिलाइ बुन् बोल्बेहेरा,” बाजिहिन् आग्या देलाहा।
10उहेसैर्हे उखर्ह्वाइ येसुइ बाज्ल कहिनलाइ उहेखर्ह्वाक् माझिहिमा धर्लुहुन्, तर “मोर्लोक्भटे जिउँटो भेबाक्” बाज्ल किवा हो बाजिहिन् एक्टाइ ओर्कोक्सङ्हिं कहिन् कर्बा ठाल्लुहुन्। 11तसौ उखर्ह्वाइ येसुलाइ यन्हिं बाजिहिन् सोर्ल्हिहिंक्, “धर्म-गुरुलके किसा खिरिस्ट आबाइसौ पैल्हा एलिया आबा पोर्लाहार बाजट्थ्ला?”#मलाकि ४:५; मत्ति ११:१४
12येसुइ बोल्लाहा, “साँच्चिय, पैल्हा एलिया आइस् आउँ सेब्भ्रोउ कहिन् फेरि बानाइस्। तर मुँइ मानुसक् बेटाहिके थुप्रोय दुक्ख भोग्बा पोर्लाहार आउँ जम्मा मानुसलकक्भटे त्यागिजाबा पोर्लाहार बाज्बाक् कहिनसेहे धर्मसास्ट्रै किसा लेख्ल भेका ते? 13दिठाहो, मुँइ तोहोराखर्ह्वानि बोल्मेहेंर्ला, एलिया आहिन् सक्ल रहैस्, आउँ ओक्राक् बिसइमा धर्मसास्ट्रै लेख्ल अनुसार मानुसलके ओक्रालाइ जेहे कर्बाक् मन लाग्लाहा, उहे कर्लिहिंक्।”
येसुइ भुत लाग्ल ठिठालाइ राम्रो पार्ल
(मत्ति १७:१४-२१; लुका ९:३७-४३)
14जख्नि येसु आफ्निक् तिनजेना चेलालकक्सङ्हिं फर्किबानाइ ओर्को चेलालक् रैल्ह ठाँओइ पुग्लुहुन्, ओछि उखर्ह्वानि बर्के धुइरोइ चारौभटे घेरिबानाइ उखर्ह्वाक्सङ्हिं धर्म-गुरुलके बहस कर्तिहि रैल्ह देख्लुहुन्। 15ओछि रैल्ह सेब्भ्रोउ मानुसलके येसुलाइ देखेहेबिट्के छक्क पोर्लुहुन्। आउँ दग्रटे जाइबानाइ ओक्राक्लाइ ढोक् कर्लिहिंक्। 16तसौ येसुइ चेलालकलाइ सोर्ल्हाहा, “तोहोराखर्ह्वा इखर्ह्वाक्सङ्हिं किसक् बिसइमा बहस कर्तिहि रहला?”
17उहेटाकै उ धुइरोक्भटे एकजेना मानुसे येसुलाइ यन्हिं बोल्लोकुन्, “गुरु, मुँइ मोरा छाउरालाइ तोराठालाइ आन्ल धरम्ना, किसाबुने भुत लाग्ल सिहिरे उ साराबाय नाप्पारै। 18जख्नि भुते मोरा छाउरालाइ छुयला ओहिं ओक्रानि भिंसओइ पट्कि पाठायला, आउँ ओक्राक् मुखक्भटे फेहेन निस्केक्ला, आउँ दार्हा किचिबानाइ काँक्राक्कुक्रुक् पारेला। मुँइ हजुरक् चेलालकलाइ भुत निस्काइदेहेक् बाजिहिन् बिम्ति कर्लम्, तर उखर्ह्वाइ बोइनें पार्लुहुन्।”
19तसौ येसुइ उखर्ह्वालाइ बोल्लाहा, “ए अबिस्वासि पुस्ता, मुँइ तोहोरासङ्हिं कट्का दिनसम्मसेहे बसिहिन् रहबा? मुँइ तोहोरालाइ कख्नि सम्मलाइ सहिन् बस्बा? उ ठिठालाइ मोराठालाइ आनहँक्।” 20तसौ उखर्ह्वाइ उ ठिठालाइ येसुक्ठालाइ आन्लिहिंक्, उ भुते येसुलाइ देखेहेबिट्के उ ठिठालाइ लाछाङ्-लुछुङ् पार्लकुन् आउँ उ भिंसओइ लर्लक्। उ ठिठाइ मुखक्भटे फेहेन निस्कातिहि यसाक् आउँ ओसाक् लरिबरि कर्बा ठाल्लक्।
21तसौ येसुइ उ ठिठाक् बापिहिंकलाइ यन्हिं बाजिहिन् सोर्ल्होकुन्, “कख्निसौ यक्रानि यरङ् भेल?” बापिहिके बाज्लक्, “चुटुनाहिंसौ।”
22“यि भुते यक्रानि घरि-घरि आगि आउँ पानिमा पारिहिन् मार्बाक् खोजेला। हजुर! तुँइ किच्छु कर्बा पारस्ला भेइबुने हाम्रा उप्रै दया करिहिन् मदप करिदे।”
23येसुइ ओक्रानि बोल्लोकुन्, “पारस्ला बाजिहिन् तुँइ किसा बाजस्ला? परमेस्वरै बिस्वास कर्लाहारलकक् लागि ता सेब्भ्रोउ थोक् भेबा पारेला”
24यि कहिन् सुनेहेबिट्के उ ठिठाक् बापिहिके बर्के चोटे यन्हिं बाजिहिन् सारालक्, “पर्भु, मुँइ बिस्वास करम्ना। असौ मोरा कमजोर बिस्वासलाइ बल्यो बानाबाक् मदप कर्दे।”
25तसौ येसुइ मानुसलकक् धुइरो आफ्निक्पटि आबाठाल्ल देखिहिन् ओहिं उ भुतलाइ यन्हिं बाजिहिन् हप्कालकुन्, “अ लाटा आउँ बैर्हा पार्लाहार भुतस्ले, यि ठिठाक्भटे निस्किहिन् जाइहाल्, आउँ फेरि कख्नुहुँ ओक्राक् भिट्र बुन् आउ।”
26तसौ उ भुत चिहिरिबानाइ आउँ उ ठिठालाइ लाछाङ्-लुछुङ् पारिहिन् ओक्राक्भटे निस्किहिन् जाइलक्। आउँ उ ठिठा मोर्लोहिंक् परौ भेलक्, उहेसैर्हे ओछि रैल्ह थुप्रोय मानुसलके ओक्रानि “यि ता मोरोगे” बाजिहिन् बाज्बा ठाल्लुहुन्। 27ओरोङ् भेल भेटौ येसुइ ओक्राक् हाथ गर्थिबानाइ उठालकुन्, आउँ उ ठिठा जुरुक्क उठ्लक्।
28तसौ जख्नि येसु घर जाइलक् उहे मौका पारिहिन् चेलालके चुप्चुपे येसुलाइ यन्हिं बाजिहिन् सोर्ल्हिहिंक्, “हामिसेहे उ भुतलाइ किसा निस्काबा नहिंपारुहुँक्?”
29तसौ येसुइ उखर्ह्वालाइ बोल्लाहा, “यरङ् खालक् भुतलाइसेहे पाराथ्नाक्भटे माटेन् धापाबा पारेला, ओर्को किच्छुय उपाय बोइनें।”
येसुइ आफ्नि मोर्बाक् बिसइमा फेरि कहिन् कर्लक्
(मत्ति १७:२२-२३; लुका ९:४३-४५)
30तसौ येसु आउँ ओक्राक् चेलालक् उ ठाउँयसौ हिंठिबानाइ गालिल इलाकाक् पैंदा भेहिन् जाइलुहुन्। यि कहिन् कुन्हुँहि थाहा बुन् पाउस् बाज्बाक् ओक्राक् मनै रैल्हकुन्। 31किसाबुने येसुइ आफ्निक् चेलालकलाइ माटेन् सिखातिहि रैल्हक्। ओहिं उखर्ह्वानि यन्हिं बोल्लाहा, “मुँइ मानुसक् बेटाहिंक्लाइ धोखा देहिन् पक्रिबानाइ मानुसलकक् हाथै सोंपट्थ्ला, आउँ उखर्ह्वाइ मोरानि मारट्थ्ला, तर मुँइ मोर्लो तिन दिनपाछु फेरि जिउँटो भेहिन् उठ्म्ना।”
32तर येसुइ बाज्ल यि कहिनक् अर्थ चेलालके बुझ्बाय नहिं पार्लुहुन्, आउँ येसुलाइ सोर्भाक्नि आँट कर्बा नहिंपार्लुहुन्।
सेब्भुहिंसौ बर्के कुन्ग्वा?
(मत्ति १८:१-५; लुका ९:४६-४८)
33येसु आउँ ओक्राक् चेलालक् कफर्नहुम सहरै आइपुग्लुहुन्, आउँ घर भिट्र पोस्लुहुन्। ओछि येसुइ यन्हिं बाजिहिन् चेलालकलाइ सोर्ल्हाहा, “टख्नि पैंदाइ आइलटाकै तोहोराखर्ह्वाइ किवा कहिनलक् करिगलेहे?”
34तर उखर्ह्वा दापदिप्प भेलुहुन्, किसाबुने पैंदाइ आइलटाकै उखर्ह्वाइ “हाम्रा माझै सेब्भुइसौ बर्के कुन्ग्वा रहैस्?” बाजिहिन् कहिनलक् कर्टे आइल धर्लुहुन्।#लुका २२:२४ 35तसौ येसु बसिबानाइ ओक्राक् बार्हजेना चेलालकलाइ हाँख्राहिन् यन्हिं बोल्लाहा, “कुन्हुँ मानुस सेब्भुइसौ बर्के भेबा चाहाइस् भेने, ओहिं जम्माहिंसौ चुटुनाइ बनिबानाइ जम्माहिंक् सेबक बन्बा पोर्लाहार।”#मत्ति २०:२६-२७; २३:११; मर्कुस १०:४३-४४; लुका २२:२६ 36ओक्राक्पाछु येसुइ एकजेना चुटुकन बालखलाइ उहेखर्ह्वाक् आगारि आन्लकुन्, आउँ ओक्रानि कोख्लाइ बोकिबानाइ चेलालकलाइ यन्हिं बोल्लाहा, 37“जैहिं मोरा खातिरै यहेरङ् चुटुकन बालखलाइ सुइकार करट्थ्ला, ओहिं मोरानि आको सुइकार कर्ल भेट्थ्ला, आउँ जैहिं मोरानि सुइकार करैस् ओहिं मोरानि माटेन् बोइनें, तर मोरानि पाठालाहार परमेस्वर पिताहुँलाइ सुइकार कर्ल भेइस्।”#मत्ति १०:४०; लुका १०:१६; यहुन्ना १३:२०
जैहिं तोहोरा बिरोध नाकरथ्, उ तोहोरे पछेक् भेट्थ्ला
(लुका ९:४९-५०)
38तसौ यहुन्नाइ येसुलाइ यन्हिं बोल्लोकुन्, “गुरु, एकजेना मानुसे तोरा नाउँ लेइबानाइ भुतलक् निस्कातिहि कर्ल हामि देख्लुहुँक्। तर उ हाम्रा पाछु नहिंआइल सिहिरे हामि ओक्रालाइ रोक्लुहुँक्।”
39तसौ येसुइ उखर्ह्वानि यन्हिं बोल्लाहा, “ओक्रानि उ काम कर्बाकलाइ बुन् रोकहक्, किसाबुने मोरा नाउँ लेइबानाइ अचम्मक् कामलक् कर्लाहारे तुरुन्ते मोरा बिरोधै खाराब कहिन् नाकरथ्। 40जैहिं हाम्रा बिरोध नाकरथ्, उ हाम्रे दप्फाक् मानुस भेट्थ्ला।#मत्ति १२:३०; लुका ११:२३ 41साँच्चिय मुँइ तोहोराखर्ह्वालाइ बोल्मेहेंर्ला, तोहोराखर्ह्वा खिरिस्टलाइ बिस्वास कर्लाहार मानुसलक् हो बाजिहिन् एक लोटा पानि पिबा देहेर्ला भेने ओहिं अबस्य ओक्राक् इनाम पाइस्।”#मत्ति १०:४२
पापक् बिसइमा येसुइ देल चेताउनि
(मत्ति १८:६-९; लुका १७:१-२)
42“जैहिं मोरा उप्रै बिस्वास कर्लाहार यि चुटुकन बालखलाइ पाप कर्बा लागाइस् भेने ओक्रानि ता बरुस एक्टा बर्के दोंखोक् जाँता ओक्राक् घेंचाइ झुँराइबानाइ समुन्रै घुघाल राम्रो भेक्ला। 43यदि तोरा हाथे तोरालाइ पाप कर्बा लागायस्ला भेनेमा ओक्रानि काटिहिन् घुघाउ। दोहोगोटा हाथ लेइबानाइ नरकक् कख्नुहुँ नहिंनिभ्लाहार आगिमा पोर्बाइसौ ता बरुस एक्टा हाथ डुँर्या भेइबानाइ अजम्बरि जिबन लेहिन् स्वर्गोइ जाबाक्सेहे तोरा लागि राम्रो भेस्ला।#मत्ति ५:३० 44[नरकै ना ता किरालक् मोरोट्थ्ला, ना ता कख्नुहुँ आगिय निभेला] 45यदि तोरा टाङे तोरालाइ पाप कर्बा लागायस्ला भेनेमा उहौ काटिहिन् घुघाउ। किसाबुने दोहोगोटा टाङ् भेहिन् नरकै घुघाइजाबाइसौ ता बरुस खोरन्डो भेहिन् अजम्बरि जिबन लेहिन् स्वर्गोइ जाबाक् तोरा लागि राम्रो भेस्ला। 46[नरकै ना ता किरालक् मोरोट्थ्ला, ना ता कख्नुहुँ आगिय निभेला।] 47उहेरङ् करिहिन् तोरा आँखे तोरालाइ पाप कर्बा लागायस्ला भेनेमा उहौ झिंकिबानाइ घुघाउ। किसाबुने दोहोगोटा आँख भेहिनौ नरकै घुघाइजाबाइसौ ता बरुस एकेगोटा आँख भेहिन् परमेस्वरक् राज्जेइ पोस्बाक् तोरानि राम्रो भेस्ला।#मत्ति ५:२९ 48नरकै ना ता किरालक् मोरोट्थ्ला, ना ता कख्नुहुँ आगिय निभेला।#यसैया ६६:२४
49“किसाबुने नुने बलि देल थोकलाइ सुद्ध पार्लक् परौ जम्माय मानुसलकलाइ दुक्ख-कस्टक् आगिहि सुद्ध पारेट्थ्ला।
50“नुन राम्रो चिंज हो, तर नुनक् सुवार हेरिबुने उ किवाइ नुनाल बानाबा?
“तोहोराखर्ह्वाक् जिबनै नुनक् परौ गुन धरह, आउँ एक-अर्काक्सङ्हिं मिलिहिन् बसह।”#मत्ति ५:१३; लुका १४:३४-३५
Okuqokiwe okwamanje:
मर्कुस 9: DEWZ
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2024 (Active), Mother Tongue Translators Society and Wycliffe Bible Translators, Inc. All rights reserved.
