मर्कुस 8
8
येसुइ चार हाजार मानुसलकलाइ खुवाल
(मत्ति १५:२९-३९)
1उहे समइमा मानुसलकक् धुइरो फेरि येसुक्ठालाइ जउर भेबा ठाल्लुहुन्। आउँ उखर्ह्वाइ लेहिन् आइल खाबाक् थोकलकौ सिधाहिन् सक्ल रैल्हाहा। तसौ येसुइ चेलालकलाइ आफ्निक्ठालाइ हाँख्राहिन् यन्हिं बोल्लाहा, 2“यि मानुसलक् मोरासङ्हिं रैल्ह आजु तिन दिन भेहिन् सकुहुन्बे, आउँ इखर्ह्वाक्सङ्हिं खाबाक् थोकलकौ किच्छु बाँकि बोइने, उहेसिहिरे मोरानि दया लाग्ल रहैस्। 3मुँइ इखर्ह्वालाइ भुखे घर पाठाइगल्मिखानबुने इखर्ह्वा पैंदाहिमा भुखे मुर्छा पोरोट्थ्ला। किसाबुने इखर्ह्वामध्ये कुन्हुँ-कुन्हुँ ता एकदमे टार्होइसौ आइल रहट्थ्ला।”
4तसौ येसुक् चेलालके ओक्रानि यन्हिं बोल्लिहिंक्, “खै ते, असौ यि उखास लाग्दो ठाँओइ यट्का धेरेक्कुर मानुसलकलाइ खुवाबाक् पिठा कछि पाबा ते?”
5तसौ येसुइ उखर्ह्वालाइ सोर्ल्हाहा, “तोहोराठालाइ कइगोटा पिठा रहेर्ला?”
उखर्ह्वाइ बाज्लुहुन्, “सात गोटा।”
6तसौ येसुइ उ मानुसलकलाइ भिंसओइ बस्बा लागालाहा। आउँ ओहिं सातौग्वा पिठा हाथै लेहिन् परमेस्वरलाइ धन्यबाट चार्हालक्। पिठा टुक्रा पारिबानाइ चेलालकलाइ बाट्बा देलाहा। तसौ उखर्ह्वाइ मानुसलकलाइ बाँटिहिन् देलाहा। 7चेलालकक्सङ्हिं मसिनो खालक् चुटेक् माछालकौ रैल्हाहा। येसुइ उहौ माछाक् लागि आको परमेस्वरलाइ धन्यबाट चार्हालक्, आउँ मानुसलकलाइ बाँटिहिन् देहेखान् बाजिहिन् चेलालकलाइ आर्हालाहा। 8तसौ ओछि रैल्ह जम्मा मानुसलके आघाउन्याँ करिहिन् खाइलुहुन्, आउँ उखर्ह्वाइ खाइबानाइ उब्रल टुक्रा-टाक्रिलक् सङ्राटे सात गोटा ढक्या भोर्लोकुन्। 9ओछि खाइलाहार मानुसलक् चार हाजार जट्का रैल्हुहुन्। ओक्राक्पाछु येसुइ उखर्ह्वा जम्माहिंलाइ आफ्नि-आफ्निक् घर पाठालाहा। 10तसौ येसुसेहे तुरुन्ते आफ्निक् चेलालकक्सङ्हिं डोङाइ चर्हिहिन् दलमनुथाक् इलाकाइ जाइलक्।
फरिसिलके येसुक्सङ्हिं सङ्केत माङ्ल
(मत्ति १६:१-४)
11कुन्हुँ-कुन्हुँ फरिसिलके येसुक्ठालाइ आइबानाइ बाद-बिबाद कर्बा ठाल्लुहुन्, आउँ उखर्ह्वाइ येसुलाइ जाँच कर्बाक्नि यन्हिं बोल्लिहिंक्, “हाम्रानि स्वर्गोक्भटे एक्टा सङ्केत देखाउ।”#मत्ति १२:३८; लुका ११:१६ 12यि सुनिबानाइ येसुइ लामो सास फेरिहिन् यन्हिं बाज्लक्, “यि पुस्ताक् मानुसलके किसा सङ्केत दिठाबा खोजोट्थ्ला? साँच्चिय, मुँइ तोहोरानि बोल्मेहेंर्ला, यि पुस्ताक् मानुसलके किच्छुय सङ्केत देख्बा नापाथ्।”#मत्ति १२:३९; लुका ११:२९
13तसौ येसुइ उखर्ह्वालाइ ओछि छारिहिन् फेरि डोङाइ चर्हिबानाइ ओर्साकपार जाइलक्।
फरिसिलक् आउँ हेरोद राजाक् सिच्छाक्भटे चेताउनि
(मत्ति १६:५-१२)
14डोङाइ चर्हिहिन् ओर्साकपार जाइलटाकै चेलालके पिठा लेहिन् आबा बिस्राल बाज्बाक् कहिन् थाहा पाइलुहुन्, आउँ डोङाइ उखर्ह्वाक्सङ्हिं एक्टा माटेन् पिठा रैल्हाहा। 15तसौ येसुइ चेलालकलाइ खिसा बाज्तिहि चेताउनि देलाहा, “होस्यारो भेहो! फरिसि आउँ हेरोद राजाक् खमिरक्भटे जोगिहिन् बसह।”#लुका १२:१
16“हाम्राठालाइ पिठा बोइनें सैर्हे येसुइ यरङ् बाज्बा ठाल्ल ना,” बाजिहिन् चेलालके एक्टाइ ओर्कोक्सङ्हिं कहिन् कर्बा ठाल्लुहुन्।
17तसौ येसुइ यि कहिन् थाहा पाहिन् उखर्ह्वालाइ यन्हिं बोल्लाहा, “तोहोराखर्ह्वाइ पिठा बोइनें बाजिहिन् किसा कहिन् करहला? किस् तोहोलेके अज्झौ नाहा देखह, आउँ किच्छु नाँबुझह? किसा तोहोराखर्ह्वाक् मन कठोर भेल रहेर्ला? 18तोहोराखर्ह्वाक् आँख ता रहेर्ला भेटौ नाँदेखह? कान ता रहेर्ला भेटौ किसा नाँसुनह? किस् तोहोलेके नाँसम्झह?#यर्मिया ५:२१; इजकिएल १२:२; मर्कुस ४:१२ 19जब मुँइ पाँचगोटा पिठा पाँच हाजार मानुसलकलाइ खुवाल कहिन् किस् तोहोलेके बिस्राउहेबे? तोहोलेके ओछि उब्रल पिठाक् टुक्रा-टाक्रि कइ ढक्या सङ्र्हाउहे?”
उखर्ह्वाइ बाज्लुहुन्, “बार्ह ढक्या।”
20येसुइ फेरि उखर्ह्वानि सोर्ल्हाहा, “जख्नि मुँइ सातगोटा पिठा भाँचिहिन् चार हाजार मानुसलाइ खुवाल रैल्हम्, उटाकै तोहोलेके उब्रल पिठाक् टुक्रा-टाक्रि कइ ढक्या सङ्र्हाउहे?”
तसौ उखर्ह्वाइ बाज्लुहुन्, “सात ढक्या।”
21फेरि येसुइ उखर्ह्वालाइ बोल्लाहा, “किस् तोहोलेके अज्झौ नाहा बुझह?”
येसुइ एकजेना अन्धा मानुसलाइ राम्रो पार्ल
22ओक्राक्पाछु येसु चेलालकक् सङ्हिंय बेथसेदा गाँओइ आइपुग्लक्। ओछि मानुसलके एकजेना अन्धा मानुसलाइ ओक्राक्ठालाइ आन्लिहिंक्, आउँ यक्रालाइ छुहिन् राम्रो पारिहिंक् बाजिहिन् बिम्ति कर्लुहुन्। 23तसौ येसुइ उ अन्धा मानुसक् हाथ गर्थिहिन् दोर्याटे गाउँयसौ बाहार लेगालकुन्। आउँ ओक्राक् आँखै थुकिहिन् आफ्निक् हाथ ओक्राक् उप्रै धरिहिन् सोर्ल्होकुन्, “किस् तुँइ अख्नि किच्छु देख्ल धरस्ला?”
24तसौ ओहिं वरिपोरि दिठाहिन् यन्हिं बाज्लक्, “मुँइ मानुसलकलाइ देख्तिहि ता रहम्ना, तर उखर्ह्वा गाछलक् हिंठ्लक् परौ पे देखम्ना।”
25येसुइ फेरि ओक्राक् आँखै आफ्निक् हाथे छुइदेलकुन्, आउँ उ मानुसे एकेहोरि दिठाटे ता सेप्थोक् राम्रोइसौ देख्बा पार्लक्। 26तसौ येसुइ ओक्रानि यन्हिं बाजिहिन् घर पाठालकुन्, “तुँइ यि गाँओइ नहिंपोसिहिने सरासर घर जा।”
पत्रुसे येसुलाइ मुक्ति देलाहार खिरिस्ट बाज्ल
(मत्ति १६:१३-२०; लुका ९:१८-२१)
27ओक्राक्पाछु येसु चेलालकक्सङ्हिं कैसरिया फिलिप्पि सहरक् वरिपोरिक् गाउँलकै जाइलक्। पैंदाइ जाइतिहि कर्लटाकै ओहिं चेलालकलाइ यन्हिं बाजिहिन् सोर्ल्हाहा, “मानुसलके मोरालाइ कुनजेन बाजिहिन् बोलोट्थ्ला?”
28तसौ उखर्ह्वाइ ओक्रानि बोल्लिहिंक्, “कुन्हुँइ तोरालाइ बप्तिस्मा देलाहार यहुन्ना बाजट्थ्ला, कुन्हुँइ एलिया बाजट्थ्ला। आउँ ओर्को कट्का जेनाइसेहे तुँइ अगमबक्तामध्येक् ओर्को एकजेना भेका बाजट्थ्ला।”#मर्कुस ६:१४-१५; लुका ९:७-८
29तसौ येसुइ उखर्ह्वानि सोर्ल्हाहा, “तर तोहोलेकेसेहे मोरालाइ कुनजेन बाजिहिन् बाजहला ते?”
तसौ पत्रुसे जुबाप देलक्, “तुँइ मुक्ति देलाहार खिरिस्ट हो।”#मत्ति १०:३८; लुका १४:२७; यहुन्ना ६:६८-६९; ८:३४
30तसौ येसुइ उखर्ह्वानि “यि कहिन् कुन्हुँहिलाइ बुन् बोल्बेहेरा,” बाजिहिन् आग्या देलाहा।
येसुइ आफ्निक् मिर्तुक् बिसइमा जानाल
(मत्ति १६:२१-२८; लुका ९:२२-२७)
31ओक्राक्पाछु येसुइ चेलालकलाइ आफ्निक् बिसइमा यन्हिं बाजिहिन् सिखाबा ठाल्लाहा, “मुँइ मानुसक् बेटाहिके बर्के दुक्ख भोग्बा पोरोइस्। यहुदिलकक् अगुवालक्, बर्के-पुझरिलक् आउँ धर्म-गुरुलके मोरानि इन्कार करट्थ्ला, आउँ मोरानि मारट्थ्ला। तर मुँइ तिन दिनै फेरि मोर्लोक्भटे जिउँटो भेहिन् उठम्ना।” 32यहेरङे करिहिन् येसुइ चेलालकलाइ यि कहिन् राम्रोइसौ बुझ्याउन्या करिहिन् बोल्लाहा। तर यि सुनिहिन् पत्रुसे ओक्रालाइ एकपाखा लेगाहिन् “यरङ् बुन् बाज्” बाजिहिन् हप्काबा ठाल्लकुन्। 33तर येसुइ फनक्क फर्किहिन् आफ्निक् चेलालकलाइ दिठाहिन् पत्रुसलाइ यन्हिं बाजिहिन् हप्कालकुन्, “अ सैतान, तुँइ मोराभटे टार्हो जा! किसाबुने तोरा मन परमेस्वरक्पटि बोइने, तर मानुसक्पटि रहेस्ला।”
34ओक्राक्पाछु येसुइ थुप्रोय मानुसलकलाइ आको चेलालकक्सङ्हिं आफ्निक् छेंओइ हाँख्राइबानाइ यन्हिं बोल्लाहा, “दिठाहो, कुन्हुँ मानुस मोरापाछु लागिबानाइ मोरा चेला बन्बा चाहाइस् भेने उ मानुसे आफ्निलाइ माया मारिहिन् त्यागुस्, आउँ मोर्बाहुँक्लाइ समेत तियार भेहिन् आफ्निक् कुरुस बोकिहिन् मोरापाछु हिंठुस्।#मत्ति १०:३८; लुका १४:२७ 35किसाबुने जुन् मानुसे आफ्निक् जिबन जोगाबा खोजोइस्, उ मानुसे अजम्बरि जिबनलाइ गुमाइस्, तर जुन् मानुसे आफ्निक् जिबनलाइ मोरा आउँ खुसिक् खभरक् लागि गुमाइस् भेइबुने, ओहिं अजम्बरि जिबन पाइस्।#मत्ति १०:३९; लुका १७:३३; यहुन्ना १२:२५ 36मानुसे सन्सारभोरिक् धन-सम्पतिलक् हाथ पारेटौ सुधा आफ्निक् अजम्बरि जिबनसेहे गुमाइबुने ओक्रालाइ किस्ग्वा फैधा भेइटे? 37मानुसे आफ्निक् अजम्बरि जिबनक् साट्टाइ किवा देबा पारट्थ्ला? 38यि पापि आउँ बिस्वासघाति पुस्ताक् मानुसलक् जैहिं-जैहिं मोरानि आउँ मोरा बचन सुन्बाक्नि लाजाट्थ्ला, मुँइ मानुसक् बेटायक आको परमेस्वर पिताक् महिमाइ पबित्र स्वर्गोदुतलकक्सङ्हिं आइटे ओक्रालाइ मोरा बाज्बाक् लाजाम्ना।”
Okuqokiwe okwamanje:
मर्कुस 8: DEWZ
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2024 (Active), Mother Tongue Translators Society and Wycliffe Bible Translators, Inc. All rights reserved.
