मर्कुस 6
6
नासरत सहरै येसुलाइ इन्कार कर्ल
(मत्ति १३:५३-५८; लुका ४:१६-३०)
1ओच्छिसौ निस्किबानाइ येसु आफ्निक् सहर नासरतै जाइलक्। ओक्राक् चेलायकलकौ ओक्रिहिक्सङ्हिं जाइलुहुन्। 2बिसारिक दिनै येसुइ सिच्छा देबा ठाल्लक्। ओक्राक् सिच्छालक् सुन्लाहार थुप्रोय मानुसलक् छक्क पोरिहिन् यन्हिं बाजिहिन् कहिन् कर्बा ठाल्लुहुन्, “यि मानुसे यरङ् कहिनलक् कछिसौ सिख्लक्? यहिं कनङ् बुद्धि पाइलक्! कहने यरङ् अचम्मक् कामलक् कर्बा पार्लक्? 3किस् यि मरियमक् बेटायक उहे सिकर्मि बोइने ते? यि ता याकुब, योसेफ, यहुदा आउँ सिमोनक् दाजेक् बोइने? यक्राक् बैन्हेकलक् आको हाम्रेसङ्हिं ता रहट्थ्ला!” यरङ् बाज्तिहि उखर्ह्वाइ येसुलाइ सुइकार नहिंकर्लिहिंक्।
4तसौ येसुइ उखर्ह्वा जम्माहिंलाइ बोल्लाहा, “अगमबक्तालाइ जम्मा ठाँओइ मान भेला, तर आफ्निक् गाँओइ नातागोटाइ आउँ सहरै मान नाकरेथ्।”#यहुन्ना ४:४४
5उहेसिहिरे ओछि येसुइ कुन्हुँ-कुन्हुँ बेरामिलकलाइ माटेन् हाथ धरिबानाइ राम्रो पार्ल कामेसौ ओर्को कुन्हुँ बर्के कामलक् कर्बा नहिंपार्लक्। 6उखर्ह्वालकक् अबिस्वास देखिबानाइ येसु छक्क पोर्लोक्।
तसौ येसु गाउँ-गाउँलकै जाइबानाइ सिखाटे बुल्बा ठाल्लक्।
येसुइ बार्ह जेना चेलालकलाइ पाठालाहा
(मत्ति १०:१; १०:५-१५; लुका ९:१-६)
7ओक्राक्पाछु येसुइ बार्ह जेनालाइ हाँख्राइबानाइ उखर्ह्वालाइ भुत निस्काबाक् अधिकार देलाहा, आउँ उखर्ह्वालाइ दुइ-दुइजेना करिहिन् गाउँ-गाउँ आउँ सहरलकै पाठालाहा। 8उखर्ह्वानि यरङ् आग्या देलाहा, “तोहोराखर्ह्वा जाइलटाकै टेक्बाक् ठेङ्हाँइसौ उप्रान्त किच्छुय जुन् बोक्पा, ना ता पिठा, ना ता झोला, ना ता पैसा अथबा ओर्को किच्छु जुन् बोकोहो।#लुका १०:४-११ 9जुत्ता पेहेरह, तर साटबाक् लुगा बुन् लेगाहो।” 10येसुइ उखर्ह्वानि बोल्लाहा, “तोहोलेक जाइलटाकै जुन् घरै स्वागत करेहेर्ला, उ गाँओक्भटे नहिंजाबायसम्म तोहोलेक उहे घरिहिमा बसह। 11आउँ कुन्हुँ ठाँओइ जाइलटाकै मानुसलके तोहोरालाइ स्वागत नहिंकरिबुने आउँ तोहोराखर्ह्वाक् कहिन् सुन्बा नहिंमानिबुने, तोहोराखर्ह्वा ओच्छिसौ निस्कल टाकै ओस्कोक् मानुसलकलाइ परमेस्वरे कर्बाक् नियाँक् साछिक् लागि आफ्निक् पैतलाक् धुर ओच्छिहि टक्टक्याइ देहिखान्।”#प्रेरित १३:५१
12तसौ उ चेलालक् ओच्छिसौ जाइलुहुन् आउँ मानुसलकलाइ “पस्चताप करिहिन् पाप कर्बा छारह” बाजिहिन् पर्चार कर्बा ठाल्लुहुन्। 13उखर्ह्वाइ भुत लाग्ल थुप्रोय मानुसलकक्भटे भुतलक् निस्काइदेलाहा, आउँ थुप्रोय रोग लाग्ल मानुसलकलाइ तेल लागाहिन् राम्रो पार्लाहा।#याकुब ५:१४
बप्तिस्मा देलाहार यहुन्नालाइ मार्ल
(मत्ति १४:१-१२; लुका ९:७-९)
14येसुइ कर्ल कामलकक् बिसइमा चारौपाखा फिंज्ल रैल्हकुन्। उहेसिहिरे हेरोद राजाइ आको ओक्राक् बिसइमा सुन्ल धर्लक्। कुन्हुँ-कुन्हुँइ ता यन्हिंऔ बाज्तिहि रैल्हुहुन्, “बप्तिस्मा देलाहार यहुन्ना मोर्लोक्भटे जिउँटल रहैस्, यिहेसैर्हे ओक्राक्भटे यरङ् सक्तिक् कामलक् भेबाठाल्ल रहेला!”#मत्ति १६:१४; मर्कुस ८:२८; लुका ९:१९
15तर ओर्कोलकेसेहे यन्हिं बाज्लुहुन्, “यि ता एलिया अगमबक्ता हो।”
आउँ अज्झ ओर्कोलकेसेहे यन्हिं बाज्लुहुन्, “यि ता उबेर्कोक् पालाइ रैल्ह अगमबक्तालकिहिंक् परौ एकजेना अगमबक्ताय हो।”
16यट्का कहिन् सुन्नेसौ हेरोद राजाइ बाज्लक्, “यि ता बप्तिस्मा देलाहार यहुन्नाय हो, जक्राक् मुर् मुँहि काट्बा लागाल धर्लम, उ ता मोर्लोक्भटे जिउँटल रहैस्!” 17-18हेरोद राजाइ किच्छु समइ आगारिय आफ्निक् भायक फिलिपक् बोहेक हेरोदियासलाइ बहु बानाहिन् धर्ल रैल्हक्। तर यहुन्नाइ हेरोदलाइ घरि-घरि, “तुँइ तोरा आफ्निक् भाइर्हक् बोइकोलाइ धर्बाक् राम्रो नाभेक्!” बाजिहिन् बोल्लो धर्लकुन्। उहेसैर्हे हेरोदियासलाइ खुसि पार्बाक् लागि हेरोदे यहुन्नालाइ पक्रबा लागाइबानाइ बार्हिहिन् झेलखारै हाल्लिहिंक्।#मत्ति ४:१२; लुका ३:१९-२०
19उहेसिहिरे हेरोदियासे यहुन्नाक् उप्रै इख धर्ल रैल्हक्, आउँ यहुन्नालाइ मार्बाक्नि चाहाओइ, भेटौ मार्बा नहिंपार्ल धर्लकुन्। 20किसाबुने हेरोद राजाइ यहुन्नालाइ धर्मि आउँ पबित्र मानुस बाजिहिन् चिन्ल्ह धर्लकुन्, उहेसिहिरे हेरोद यहुन्नाक्सङ्हिं डराओइ, आउँ ओक्रानि जोगाहिन् धर्लकुन्। यहुन्नाइ सिखाल कहिनलक् सुन्लटाकै हेरोद एकदमे बिचलित भेओइ, भेटौसुधा ओक्राक् कहिन् सुन्बाक्नि मन पोराओइ।
21चुटेक् समइपाछु हेरोदे आफ्निक् जर्मल दिनै बर्के भोज लागालटाकै हेरोदियासलाइ बद्ला लेबाक् मौका मिल्लकुन्। उ भोजइ हेरोदे आफ्निक् मुख्य सरखारि अधिकारिलक्, सिपाहिलकक् कप्तानलकलाइ, आउँ गालिल इलाकाक् मुख्य-मुख्य मानुसलकलाइ हाँख्राहिन् बर्के भोज चालालक्। 22उहेटाकै हेरोदियासक् आफ्निक् बेटेक ओछि आइबानाइ नाँच्लक्। तसौ ओक्राक् नाँच देखिबानाइ हेरोद आउँ ओक्राक् पहुनालक् जम्माय खुसि भेलुहुन्। उहेसिहिरे राजाइ ओक्रानि बोल्लोकुन्, “तुँइ किवा चाहास्ला? बाज, मुँइ उ थोक् तोरानि देमेंर्ला।” 23अज्झ फेरि राजाइ ओक्राक्सङ्हिं कसम खाइबानाइ यन्हिं बोल्लोकुन्, “तुँइ मोरासङ्हिं जेहे माङ्स्ला मुँइ तोरानि देमेंर्ला, मोरा राज्जेक् आधा भाग माङेटौ मुँइ तोरानि देमेंर्ला।”
24तसौ ओक्राक् बेटिहिके माँइकक्ठालाइ जाइबानाइ यन्हिं सोर्ल्होकुन्, “माँइ मुँइ किवा माङ्बा हाँ?”
तसौ माँइके ओक्रानि बोल्लोकुन्, “बप्तिस्मा देलाहार यहुन्नाक् मुर् माङ्!”
25तसौ तुरुन्ते ओक्राक् बेटेक राजाक्ठालाइ जाइबानाइ यन्हिं बाजिहिन् बिम्ति कर्लक्, “हजुरे अख्निहिं मोरानि बप्तिस्मा देलाहार यहुन्नाक् मुर् थारिमा हालिबानाइ देल मुँइ चाहाम्ना।”
26यरङ् कहिन् माङ्ल सुनिहिन् राजाक् मन एकदमे दुख्लकुन्। भेटौ ओहिं भोजै रैल्हाहार पहुनालकक् आगारि आफ्नि कसम खाइलसिहिरे बेटिहिंक्लाइ देमेंर्ला बाज्ल कसम तोर्बा नहिंपार्लक्। 27उहेसिहिरे राजाइ ताट्काले एकजेना सिपाहिलाइ “यहुन्नाक् मुर् काटिबानाइ आन्” बाजिहिन् हुकुम देलक्। तसौ उ सिपाहिय झेलखारै जाइबानाइ यहुन्नाक् मुर् काटिदेलकुन्। 28आउँ ओक्राक् मुर् थारिमा हालिबानाइ हेरोदक् बेटिहिंक्ठालाइ आनिदेलिहिंक्। तसौ ओहिं उ मुर् लेगिबानाइ आफ्निक् माँइकलाइ देलकुन्। 29तसौ यि कहिन् सुनिबानाइ यहुन्नाक् चेलालक् आइलुहुन्, आउँ उखर्ह्वाइ यहुन्नाक् मोर्लो देहि बोकिहिन् चिहानै लेगिबानाइ गार्लुहुन्।
पाँचग्वा पिठा आउँ दुइग्वा माछा पाँच हाजार मानुसलकलाइ खुवालाहा
(मत्ति १४:१३-२१; लुका ९:१०-१७; यहुन्ना ६:१-१४)
30ओक्राक्पाछु बार्हजेना प्रेरितलक् फर्किबानाइ येसुक्ठालाइ आइबानाइ आफ्नि कर्ल कामलक्, आउँ उखर्ह्वाइ मानुसलकलाइ सिखाल जम्मा कहिनलक् जानालुहुन्। 31तसौ येसुइ उखर्ह्वानि बोल्लाहा, “असौ तोहोलेकौ मोरेसङ्हिं एकान्त ठाँओइ आहो, आउँ हामि किच्छु समइ साँथाहुँक्।” किसाबुने ओछि थुप्रोय मानुसलक् आइतिहि-जाइतिहि करथ्। उहेसैर्हे येसु आउँ ओक्राक् चेलालके खाबाहुँक् फुर्सट नहिंपाइल धर्लुहुन्। 32तसौ येसु आउँ ओक्राक् चेलालक् डोङाइ चर्हिहिन् एक्टा एकान्त ठाँओइ जाइलुहुन्।
33भेटौ कट्का जेना मानुसलकेसेहे उखर्ह्वालाइ जाबा ठाल्ल देख्लुहुन्, तसौ येसु आउँ ओक्राक् चेलालकलाइ चिन्हिहालाहा। उहेसिहिरे थुप्रोय मानुसलक् उ जम्मा सहरलकक्भटे दग्रटे जाइबानाइ येसु आउँ ओक्राक् चेलालकलाइ जिटिहिन् एकान्त ठाँओइ आगारिय पुग्लुहुन्। 34जब येसु डोङाक्भटे पाखाइ नाँभ्लक्, ओहिं पाखायभोरि मानुसलकक् एक्टा बर्के हुल देखिहिन् ओक्रालाइ सार्होय दया लाग्लकुन्। किसाबुने उखर्ह्वा चह्र्वा नहिंभेल भेंरालकक्परौ रैल्हुहुन्। तसौ येसुइ उखर्ह्वानि थुप्रोय कहिनलक् सिखाबा ठाल्लाहा।#गन्ति २७:१७; १ राजा २२:१७; २ इतिहास १८:१६; इजकिएल ३४:५; मत्ति ९:३६ 35तसौ सुर्ज डुब्बा लाग्लटाकै येसुक् चेलालके ओक्राक्ठालाइ आइबानाइ यन्हिं बाज्लुहुन्, “यि एकान्त ठाउँ रहेला, आउँ बियारौ पोरिहिन् सक्कुन्बे। 36उहेसिहिरे यि मानुसलकलाइ फर्काहिखान्, आउँ उखर्ह्वाइ छेंउ-छाओइ रैल्ह गाउँलकै जाइबानाइ आफ्निक् लागि किच्छु खाबाक् थोकलक् किनिबानाइ खाउस्।”
37तर येसुइ उखर्ह्वानि यन्हिं बोल्लाहा, “तोहोराखर्ह्वाहि इखर्ह्वालाइ खाबा देहो।”
तसौ चेलालके ओक्रालाइ बोल्लिहिंक्, “किस् हामि दुइ सइ चाँरिक् डब्बल पैसा खर्च करिहिन् पिठा किनिबानाइ आनिहिन् इखर्ह्वालाइ खाबा देबा ते?”
38येसुइ चेलालकलाइ बोल्लाहा, “तोहोराठालाइ कइगोटा पिठा रहेर्ला? दिठाहो ता!”
तसौ उखर्ह्वाइ दिठालुहुन्, आउँ ओक्रानि जानालिहिंक्, “पाँचग्वा पिठा आउँ दुइग्वा माछा रहेला।”
39ओक्राक्पाछु येसुइ जम्मा मानुसलकलाइ समुह-समुह बानाहिन् हर्व चौरिमा बासाहाखान् बाजिहिन् चेलालकलाइ आग्या देलाहा। 40उहेसिहिरे उखर्ह्वा सइ-सइ आउँ पाचास-पाचास जेनाक् समुह बानाहिन् बस्लुहुन्। 41तसौ येसुइ उ पाँचग्वा पिठा आउँ दुइग्वा माछा लेलक् आउँ स्वर्गोक्पाखा दिठाइबानाइ परमेस्वरलाइ धन्यबाट चार्हालक्। तसौ ओहिं उ पिठा भाँचिबानाइ जम्माहिंलाइ बाट्ह बाजिहिन् चेलालकलाइ देलाहा। उहेरङ् करिहिन् उ दुइग्वा माछा आको जम्माहिंलाइ बाँटिदेहिखान बाजिहिन् देलाहा। 42तसौ जम्माहिं आघाउन्याँ करिहिन् खाइलुहुन्। 43तसौके चेलालके उब्रल पिठा आउँ माछाक् टुक्रालक् सङ्र्हाटे ता बार्हगोटा ढक्या भोर्लोकुन्। 44ओछि पिठा खाइलाहारलक् पुर्खर मानुसलक् माटेन् पाँच हाजार जट्का रैल्हुहुन्।
येसु पानिक् उप्रै हिंठ्ल
(मत्ति १४:२२-३६; यहुन्ना ६:१५-२१)
45तसौ येसुइ तुरुन्ते आफ्निक् चेलालकलाइ डोङाइ चार्हाइबानाइ आफ्निसौ आगारि तालावक् ओसाक्पार बेथसेदा गाँओइ पाठालाहा, आउँ आफ्निसेहे मानुसलकलाइ बिदा कर्बाक्नि ओछि बस्लक्। 46उखर्ह्वाक्भटे बिदा भेहिन् सक्नेसौ येसुसेहे पाराथ्ना कर्बाक्नि डाँराइ जाइलक्। 47रात पोर्लोटाकै चेलालक् चर्ल्ह डोङा तालावक् माझै पुगिहिन् सक्ल रैल्हकुन्, उटाकै येसुसेहे पाखाइ अस्करे रैल्हक्। 48उहेटाकै बातास उल्टाक्पटि बहल सिहिरे आफ्निक् चेलालकलाइ डोङा चालाबाक्लाइ गार्हो पोर्लो येसुइ देख्लक्। तसौ येसु झन्ने बिहानकोक् तिन बजेक्पाखा तालावक् पानिक् उप्रे-उपर हिंठिबानाइ चेलालक् भेल ठाँओइ जाइलक्। तसौ येसुइ उखर्ह्वानि जितिबानाइ आगारि जाबाक् खोज्लोक्। 49तसौ चेलालके ओक्रानि पानिक् उप्रै हिंठ्तिहि कर्ल देखिबानाइ यि ता भुत हो बाजिहिन् सोंचिबानाइ चिच्याबा ठाल्लुहुन्। 50किसाबुने उखर्ह्वा जम्माय जेना ओक्रालाइ देखिबानाइ एकदमे डराल रैल्हुहुन्।
तसौ येसुइ तुरुन्ते बोल्लाहा, “साहस करह, मुँहि हो, बुन् डराहो।”
51ओक्राक्पाछु येसु डोङाइ चर्ल्हक्, आउँ बातासौ थम्हिहाल्लकुन्। यरङ् देखिबानाइ चेलालक् सार्होय छक्क पोर्लुहुन्। 52किसाबुने येसुइ पाँच हाजार जेनालाइ पिठा खुवाल बिसइक् कहिन् उखर्ह्वाइ बुझ्लय नहिंरैल्हुहुन्। उखर्ह्वाक् मन एकदमे कठोर भेल रैल्हाहा।
गनेसरेतै येसुइ बेरामिलाइ राम्रो पार्ल
(मत्ति १४:३४-३६)
53येसु चेलालकक्सङ्हिं तालाउ कटिबानाइ ओसाक्पार गनेसरेत बाज्ल ठाँओइ पुग्नेसौ उखर्ह्वाइ डोङा तालावक् पाखाइ धर्लुहुन्। 54जब उखर्ह्वालक् डोङाक्भटे नाँभेहेबिट्के ओस्कोक् मानुसलके येसुलाइ चिन्हिहाल्लिहिंक्। 55उहेसिहिरे उखर्ह्वाइ लज्जिकै रैल्ह जम्मा गाउँलकै दग्रटे जाइबानाइ येसु आइल बाजिहिन् खभर सुनालुहुन्। तसौ जछि-जछि येसु रहैस् बाजिहिन् मानुसलके सुन्लुहुन्, ओच्छि उखर्ह्वाइ बेरामिलकलाइ बिछौनाहिंक्सङ्हिं बोकिबानाइ येसुक्ठालाइ आन्बा ठाल्लुहुन्। 56यरङ् करिहिन् येसु उ गाउँ, सहर आउँ बस्तिलकै जछि-जछि जाओइ, ओछि-ओछि मानुसलके बेरामिलकलाइ येसु जाबाक् पैंदाइ आनिहिन् धरथ्। आउँ येसुक् लुगाक् छेंओइ माटेन् छुबा पाउस् बाजिहिन् मानुसलके बिम्ति करथ्। आउँ जट्काजेनाइ ओक्राक् लुगा छुथ् उखर्ह्वा जम्माय राम्रो भेथ्।
Okuqokiwe okwamanje:
मर्कुस 6: DEWZ
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2024 (Active), Mother Tongue Translators Society and Wycliffe Bible Translators, Inc. All rights reserved.
