Markus 8

Yesusti nimi teng-tengne (4.000) tena tatsiogha

(Matius 15:32-39)

1Sin taneko ik etpare wamekpa, nimi maikno Yesus wamoghag longolaek. Longoro ulamekpa, kwaneng orogti kwaneng yo ulamsiogpa, Yesusti ipsiog. Ipsiogti Yesusti eldi yubu ka'ero neleptop nang yopsiogti, yubu lelamogti, 2“Nimi maiknori nanag nelepto kemel aneongpa, wamap paghabog inipna ik wilindip sum tal. Ik wilindip sum talba, kwaneng orogti kwaneng yo ulamsilba, yareag senelamsin. 3Sin tane wamang nimi etpare weag nimi agha yingkina wamang. Ane sembe, nari sinag mo, ‘Pululom,’ aro ambatsisene tanena, sin kwaneng yoapti mandu aro phukul pinep,” seog.

4Seogpa eldi yubu ka'ero neleptop nangdi samoro lelamekti, “Sin nimi along taneko sembe kwaneng teneba orog pagha, pai aldesag wamaptina, tala siba nimiri kwaneng roti sunuro tol pinep?” seek.

5Wene seekpa Yesusti, “Kwaneng roti etpare saelbamlom,” aro haibahiog.

Haibahiogpa sindi, “Kwaneng roti saekpare wamla,” seek.

6Wene seekpa, Yesusti nimi maikno wamek nimi tanekoag, “So'oag puksut,” seog. Pukekpa kwaneng roti saekpare taneko tobogti Allahag, “Nani, wali tatsilam,” aro kibog. Allah kibogti, kwaneng roti saekpare taneko saeri khepto-khepto eldi yubu ka'ero neleptop nangag, “Tarel phululom,” aro tatsiog. Tatsiogpa nimi maikno taneko pogsiek. 7Sin wamekne anabiag nimiri ikan ologne etpare babe poamek. Ikan ologne taneko babe Yesusti tobogti Allahag, “Nani, wali tatsilam,” seog. Seogti ikan taneko babe elag neleptop nangag, “Pogsululom,” aro tatsiogpa, pogto tarel pihiek. 8-9Pogto tarel pihiekpa, nimi ni teekpa, mon og tahiog. Sin kwaneng teek nimi taneko wamek nena, kabuni mo a'ilbahin tanena, teng-tengne (4.000) wamekti, mon og uro teekpa, teneba phelektopne babe wamog. Eldi yubu ka'ero neleptop nangdi kwanengap ikan sopap kheptoba phelektopne poloro pibekti, haing agha kau wiroba nubunge saekpareag libaek.

Wene teekpa, mon og tahiog taneogna, Yesusti nimi tanekoag, “A'undi asag pululom,” seog. 10Seogti ta'ap sen koma elap eldi yubu ka'ero neleptop nangap kabong lomag waelbaekti, mag sin kauro mog so'o Dalmanuta sip piek.

Farisi nangdi Yesusag, “Kekneba nhon ualulam,” seeka

(Matius 16:1-4)

11Piekpa Farisi nimi etpare, “Mibukap,” aro Yesusag yaekti, elap alniro yubu lel dalamek. Yubu lelamekti, “Imagne ponekori sik uro an pere agha ulamla tanena, kekneba nhon ualulam,” seek.

12Sindi elag sik semban koma wene aro ambarekpa, Yesusti hain nubu uro ebogti, wana ikin senelamog. Wana ikin senelamogti, samoro ambarelamsiogti, “A'un wene wamlom nimiri na sembe ka'elamlomdi ililamnelom. Sa'a sembe nanag, ‘Kekneba ualulam,’ aro mololamnelom? Nari yubu sikne agha ambatnuahin. Nari kekneba a'un sembe nen tatsinun kom,” seog. 13Seogti Farisi nimi taneko lilobi agha Yesus kabongag waelbaogpa, eldi yubu ka'ero neleptop nangap mag kauro tara sip piek.

Roti waelbalul aro yamoropneag sunumna tol pina Yesusti Farisi nangap Herodesap sembe lebogha

(Matius 16:5-12)

14Kabong lomag agha mag alip toman mag kauro palamek. Palamek abeneko pere sin el taekti, “Kwaneng roti sembe ekon taapti, nhonog payaap,” aro el taek. 15Sin kabong lomag agha mag alip toman palamek nimiag, Yesusti wenero ambarelamsiogti, “Farisi nimiap, nimi nubunge Herodesap sin tanekori wanaag seneraglamangne, ‘Roti waelbalul,’ aro yamoroba saog uro wamlaba, ‘Nunag taleag,’ aro haing whi uro togtangto yae wamlulom,” seog.

16Wene seogpa, sin mamun lel dalamekti, “Nunag kwaneng roti orogne sembe wene aro lepla,” aro yubu lelamek.

17Wene alamekne Yesusti ka'ebahiogti hailamsiogti, “Sa'a sembe a'undi kwaneng roti orogne sembe tam nembamlomdi, yubu lelamlom? A'undi wanaag seneraglamlom komdi, a'undi seneragna sao kauplolamsil te? Wana hekamsin komdi, ekon wamlom te? 18A'undinge haing wamla aghana, sa'a sembe ililamlom kom? A'undinge ao wamla aghana, sa'a sembe ka'elamlom kom? Nari uanonge sembe ekon talamsil te? 19Kwaneng roti lambare agha nimi teng-tengne (5.000) khebatsinoba, teongne sembe seneraglamlulom. Kwaneng teongba, mon og tahioba, kwaneng roti phelektopne poloro pibomne, kau wiroba nubunge etpare libaom?” seog.

Seogpa, “Kau wiroba aobare libabo,” seek.

20Wene seekpa, Yesusti nen hailamsiogti, “Nen amik sum kwaneng roti saekpare agha nimi teng-tengne (4.000) khebatsinoba, teongne sembe babe seneraglamlulom. Kwaneng teongba, mon og tahioba, kwaneng roti phelektopne poloro pibomne, kau wiroba nubunge etpare libaom?” seog.

Seogpa sikindina, “Kau wiroba saekpare libabo,” seek.

21Wene seekpa, Yesusti sinag samoro ambarelamsiogti, “A'undi sumene babe anam seneragna koma wamlom te?” seog.

Yesusti as Betsaida nimi haing uropne nhon wali nembaogha

22Kabong lomag agha mag alip toman palameka as Betsaida piek. Piekpa nimiri as enekoag agha nimi haing uropne nhon Yesusag payaekti, “Elag sae pipmendi, wali nembalulam,” aro molbaek.

23Molbaekpa Yesusti nimi eneko sae kiliro as enekoag agha poa lambaog. Poa lambaogti, nimi aneko haingag silumag supto sae phende elag pibog. Sae pibogti hailamogti, “Andi sa'a iplam?” seog.

24Wene seogpa, nimi eneko whingag sip tiboghaogti, yubu lelamogti, “Nimi yabalamangba, tiboghamna aghana, tibin uro iamna kom. Yabalamangba ililamsinne kaldi lebe aro yabaloa saog ililamsin,” seog.

25Wene seogpa, Yesusti nen ik phendep sum sae phende ponekori haingag pibog abeneko pere, nimi aneko haing kwelekaog. Kwelekaogpa el nia mangkina tibin uro ililamog. 26Tibin uro ililamogpa, Yesusti ponekoag aruklamogti, “Nimi asag ambatsin koma aeag pululam,” seog.

Petrusti Yesus sembe lag phoro lebogha

(Matius 16:13-20; Lukas 9:18-21)

27Tanena Yesusap eldi yubu ka'ero neleptop nangap as nubunge Kaisarea-Filipi kanero wamek asag piek. Inaag palamekti, Yesusti sinag hailamsiogti, “Nimiri lelamangdi, na sembe etne alamang?” aro haibahiog. 28Wene aro haibahiogpa, samoro ambarelamekti, “Nimi nenneri an sembe, ‘Yohanes maghag pelengehiropne nen kamag taonge poneko ane,’ senelamangdi yubu lelamang. Nenneri, ‘Elna samenag Allah yubu silimu tiptopne Elia poneko samoro kamag taogne wamla,’ senelamangdi yubu lelamang. Nenneri, ‘Elia kom aghana, samenag Allah yubu silimu tiptopne yogne kamag taogne wamla,’ senelamangdi lelamang,” seek.

29Wene seekpa, Yesusti nen hailamsiogti, “Aghana a'un morina na sembe etne senelamnelom,” aro Yesusti haibahiog.

Wene aro haibahiogpa, Petrusti samoro lelamogti, “Anna Allahri wepto pogkeogne Kristus wamlam,” seog.

30Wene seogpa, Yesusti wenelamsiogti, “Andi na sembe yubu leplamne neneko nimi nhonag babe lag phoro ambatsiseng kom,” seog.

Yesusti el seklero tebanepne sembe ambatsiogha

(Matius 16:21-28; Lukas 9:22-27)

31Wene seogti, lelamekne neneag agha Yesusti alnibaogti, eldi yubu ka'ero neleptop nangag el amik seklebanepneog wamogne sembe amoro ambarelamsiog. Ambarelamsiogti, “Na mog so'oag nimi tahinge wa'epto epnukang. Na wa'epto epnukang nimina, nu Yahudi nimi sembe wenehirop nimiap, memnang Allah sembe palirop nang sikini yaboap, Musari yubu amohirop nangapti na wa'epto epnepneog wamla. Wa'ebaneikti ya'ag omnukang. Ya'ag omnukang aghana, ik wilindip sum nen samoro kamag tanun,” aro alniro ambatsiog. 32Eldi yubu ka'ero neleptop nang ambarelamsiogti, el seklero tebanepne sembe tognoban koma lag phoro ambatsiog. “Seklero tebanun,” aro ambatsiogpa, Petrusti Yesus sae kiliro kaeag sip poa piogti, “Undo lepseng kom,” aro alniro wembaog.

33Wene aro wembaogpa, Yesusti taongkom agha eldi yubu ka'ero neleptop nang yogne kembamsiog. Kembamsiogti Yesusti Petrusag samoro wenelamogti, “Phia sikini nubunge Satanasti yubu leplamne nene na whingag sip nemban koma wailag sip nembae! Andi leplam nena, Allahri seneragtopne leplam kom aghana, nimiri seneragtopne agha leplam,” aro wembaog.

34Wene aro wembaogti, Yesusti nimi maikno wamekne tanekoap eldi yubu ka'ero neleptop nangap, “Yahut,” aro yopsiog. Yopsiogti sinag yubu ambarelamsiogti, “Nimi etneri, ‘Na Yesusag nelepto nhon palamnunam,’ senelamle nimi enekona, eldamneri wanaag seneragtopne lipsileri, eldi wanaag agha, ‘Nimiri na kalag sipto ya'ag omneika babe, na wana khapto Yesusag neleplamneri, siptop kal nene sa'olamnun,’ senelamle taneogna neleplamnelul. 35Nimi etneri, ‘Na mog so'o aneag wali wamnun,’ aro seneragto ulamle tanena, nimi eneko el kamag wamnepne ka'eseptalul. Aghana nimi etneri, ‘Na wali wamnepne sae limneri, tebahanea babe Allahri yubu walinge saelbaneri, Yesusap ma'ap tanunam,’ aro seneragto ulamle tanena, nimi eneko ya'ag kamag uro unne elag talul. 36-37Wene aro lemnangena, nia mangkina saeag wamnaba, nimiri sa'a agha, ‘Kamag uro unne tomnun,’ aro kamna kapto tomnep? Ane sembe, nimi nhondi nia mangkina mog so'oag wamlange toro saelban aghana, eldamne kamag uro unne loba nenep taho tanena, ‘El tupne wamla,’ sembanep te? 38Wene wamang nimi tanekori Allah wail ibare agha#8:38 Allah wail ibare agha - Yubu kiki Yunani yubuag ane wamlange, “Sikina'ange laploa salik-malik walep tangtop kelabo,” saog wamek. Yahudi nimiri samenag Allahap yubu nikne ingisaploa Allah wail ibare agha laploamekne sembe Allahri sin walamsiogti, “Salik-malik walep tangtop kelabo saog wamlom,” aro wabahiog (Yeremia 3:6-10). mali-malia maikno ulamang. Nimi etneri mog so'oag nimi whingag logti, na sembe babe, nari ambarelamsin yubu sembe babe aliri, ‘Yesusap ma'ap tanunam kom,’ sele tanena, nari babe nimi eneko sembe, ‘Elna nari nimi kom,’ senun. Na imag agha mog so'oag nimi tahinge, amik samoro yalamne sum eneko, Allah Eldamneri arukna imagnang malaikatap yanun. Nani Allahringe imang wareropne nanag wamleba yanun. Yalamne sum eneko nimi etne aliri nanap ma'ap tangtop kom tanena, na amik yane sum eneko babe, na nimi eneko sembe aliri, ‘Nari nimi,’ aro lemnepne lemnun kom,” seog.

Okuqokiwe okwamanje:

Markus 8: kklKOS

Qhakambisa

Dlulisela

Kopisha