Markus 7
7
Sikini yabori seneragto ul piropneag neleplamekne toman Yahudi nimiri Allah yubu abolag nenelameka
(Matius 15:1-20)
1Ik nhon sum Farisi nangap, Musari yubu amohirop nang etpareap as Yerusalema Yesusag yaek. 2Yaekti kemelamsiekpa, Yesusap eldi yubu ka'ero neleptop nangap tanekori kwaneng telamekpa kemelamsiek. Yesus elkaboapti kwaneng telamekag aneko eldi yubu ka'ero neleptop nang nhon-nhondi sae a'elban koma kwaneng telamekpa kembamsiek. Farisi nangap, Musari yubu amohirop nangap tanekori kembamsiekti, senelamek nena, “Sembenga kaolbahin saeag agha kwaneng telamang,” senelamek.
3Tamna undo. Yahudi nimi sikinisag yabori samenag ambarelamsiekti, “Allah whingag sembenga pabibeagti, undo maghag a'alel dalamebe taneogna, kwaneng telamukap,” aro ambarelamsiekti, ul palamek. Ane sembe Farisi nimiri babe, Yahudi nimi niri babe sop-sop sikinisag yabori ambarelamsiekne sunsunum uro ul palamekti, sae a'elban koma kwaneng telamek kom. 4Sa'a-sa'a kamna kapto tol pina, nimi longorobag palamekti, samoro yalamek tanena, sae maghag a'elban koma kwaneng telamek kom. Sae aghabog kom aghana, sikinisag yabori ul palamekne, mag ma'i ologne, nubunge babe, kwaneng ingiro tena babe, wali uro mag a'elban koma kwaneng telamek kom. Sikinisag yabori ul palamekne sunsunum uro Yahudi nimiri sop-sop ul palamek.
5Ane sembe Yesusti yubu ka'ero neleptop nangdi sae a'elban koma kwaneng telamekpa, Farisi nangap, Musari yubu amohirop nangap tanekori ipsiekti, Yesusag hailamekti, “Sa'a sembe andi yubu ka'ero neleptop nangdi sembenga kaolbahin saeag agha kwaneng telamang? Nunisag yabori, ‘Undo-undo ul palamlulom,’ aro ambarelamsiek yubu phibang,” seek.
6Seekpa Yesusti samoro ambarelamsiogti, “A'unna, ‘Wali sembanukang,’ aro lero urop nimi wamlom. Samenag Yesaya ponekori a'un sembe Allahri yubu silimu tiplamogti, sik uro mome toro pibog nena,
‘Nimi tanekori pamag agha na omeklamneang aghana,
sindi wanaagna sik uro omeklamneang kom.
7Sindi nimiag yubu ambarelamsiang nena,
Nimiri senenneag agha, “Undo-undo ulamukang,” aro ambarelamsiang.
Na Allah sembe wanaag seneragna koma
omeklamneang aghana, ka'elamna kom,’
aro Allahri ambarogpa, Yesayari tipto mome toro pibog.#Yesaya 29:13 8Nimiri, ‘Undo-undo unualulom,’ aro ambatsiropne mikip uro saelba ulamlom aghana, Allahri aruksirop yubu lilobi agha saelba ulamlom kom,” seog.
9Yesusti Farisi nangap, Musari yubu amohirop nangap tanekoag tipto ambarelamsiogti, “Yaghe, a'undi ul palamlom nena, ‘Nunisag yabori ul piroba nunag ambarelamsiekne mikip talul,’ aro a'un Allahri aruksirop yubu abolag nenelamlom. A'undi undo walia ulamlom te? 10Unulamlom aghana, samenag Musari yubu lelamog nena, ‘Ani anindi yubu ka'ero kiplamsululam,’ seog.#Keluaran - Lambaeka 20:12; Ulangan - Sariktoba 5:16 Apna, ‘Nimi etneri ili ilin yo'olamsile tanena, nimi eneko ya'ag oplulom,’ seog.#Keluaran - Lambaeka 20:17; Imamat - Memnang 20:9 11-12Wene seog aghana, a'undi nimi ambarelamsilomne toman Allahri aruksirop yubu lilobi agha ambarelamsilom. A'undi yubu ambarelamsilom nena, nimi nhondi eldi nong nimiag yubu lelamsori, ‘Nai kain, nari saeag wamlange agha yepsisene aghana, nari samenag, “Allah sembe pimnun,” aro salag pimno. Salag pimno ane sembe, a'un yepsinep kom,’ aro lemnep. ‘Nong nimi yepsinun kom,’ sele nimi enekori Musari aruksirop yubu, ‘Ani anin kipsululom,’ seogne sunsunum uro urop kom. Sunsunum kom aghana, a'un Farisi nangap, Musari yubu amohirop nangapti, ‘Nong nimi yepsinun kom,’ selenge ponekoag, ‘Hae, andi saeag agha, “Allahag tatnun,” aro salag pibom ane sembe, andi nong nimi yepsululam kom,’ aro nimiag ambarelamsilom. 13Tam neneog kom aghana, tam nene saogne maikno ulamlom. A'undi amona nimiag ambarelamsilomdi, ‘Nunisag yabori ul palamekne sunsunum uro ulamsebe,’ aro ambarelamsilomne toman a'undam nimiri Allahri aruksirop yubu lilobi agha wail ibarelamlom,” seog.
14Seogti nimi maikno longolaek nimi taneko yopsiogti, yubu ambarelamsiogti, “A'un ni wali uro ka'ebanumundi seneraglamlulom! 15Nimiri sa'a-sa'a tenba, kulomag wa'in tanena, nimi eneko sembe Allahri sembenga kaolbanne senelamla kom. Ot nimiri wanaag agha seneraghongkia mali-malia lero ulamlange sembe Allahri sembenga kaolbanne sembanep. 16Aori ka'ebalomne nene nimi niri wali uro seneragto saelbamlulom,” seog.
17Wene seogti, Yesus nimi maikno taneko laplobi agha piogti, eldi yubu ka'ero neleptop nangap aeag wa'iek. Wa'iekti eldi yubu ka'ero neleptop nangdi elag hailamekti, “Sunumna nimiri tenaba sembe ambatsilamne sa'a sembe leplam?” aro haibaek.
18-19Haibaekpa Yesusti sinag hailamsiogti, “A'un olog seneraglom kom te? Nimiri sa'a-sa'a tenba, kulomag wa'in tanena, nimi eneko sembe Allahri sembenga kaolbanne senelamla kom. Tam nenena, a'un wana hekto seneraglom kom te? Nimiri sa'a-sa'a tenaba terop tanena, nimi kulomag wa'irop aghana, wanaag ya'ag wa'irop kom. Nia mangkina nimiri tenaba tenba, monag kulukandi, ti yarobag lambanep,” seog.
Eldi yubu lebogne neneag agha, “Nia mangkina tenaba waliri, nimiri terop, tanena Allahri sembenga kaolbanne sembalul kom,” aro tam karepto pibog.
20Wene seogti, nen ambarelamsiogti, “Nimiri wanaag agha lero uropne sembe Allahri sembenga kaolbanne sembanep. 21-22Nimiri wanaag agha lero urop nena, ‘Malia unuahane,’ aro seneragtopne agha mali-malia lelamlari ulamla. Nimiri wanaag agha seneraghongkia mali-malia ulamang nena, kelabo nengabo top tangkamna koma salik-malik teklop tangtop, ora nimiri kelabo nengabo haogha pelepsirop, nimiringe haogha torop, nimi ya'ag ohirop, aboapti topsene senerop, yoaba uahane senerop, pan khesirop, nimiri wana bobongeag agha ali nenep tangtopne urop, yog nimiringe sembe naringe taho senerop, nimi san tilipsirop, metmereng arop, wanaag seneragna koma ua urop. 23Nimiri malia uroba ni lemnange tanekori agha nimiri wanaag seneraghongkia undo unurop tanena, Allahri sembenga kaolbanne sembanep,” seog.
Yahudi sisa kom kel nhondi Yesusag sikne aro wana palilamogha
(Matius 15:21-28)
24Wene seogti, Yesusti mog so'o Galilea laplobi agha mog so'o Tirus peramag piog. Piogti, “Tektek papto wamnun,” sembaogti, “Nimiri imneikag,” aro ae nhonag wa'iogti wamog. Wamog aghana, nimiri el yal aro el taek. 25Kelabo nhon elmangkel phia yonge kulomag wamog kel enekori ka'elamogpa, “Yesus yal,” ana ka'ebaog. “Yal,” ana ka'ebaog abeneko pere kel eneko yingkina, “Yesus kipnun,” aro el whingag yabu sanukto u amupto malingkiog. 26Yesus sekamogpa, yanag malingkiogti, Yesusag mololamogti, “Namangkelag phia yonge wamlaba, yamendi, yag lambalulam,” aro wanaag agha sarikto-sarikto molbaog. Molbaog aghana, kel eneko nimi sisa Yahudi kel kom. Mog so'o Siro-Fenisia nimiri mangkaek kel wamog aghana, Yesus whingag mololaog.
27Molbaogpa Yesusti kel enekoag lelamogti, “Nimiri sikinmabo sam kwaneng tarelamsiangdi, amik kam kwaneng tarelamang. Kwaneng roti meri saeag agha pelepto kam sembe toboghatsinepne nene wali kom,” seog.#7:27 Yesusti mabo sembe lebog nena, Yahudi nimi sembe lebog. Yahudi nimi nhon-nhondi nimi sisa yogne sembe kam alamsiek. Ane sembe, Yesusti likiptop yubuag agha, “Na yog asag nimi sam yebel pihinep kom. Namabo Yahudi nimi nari yubu ka'ero neleptop nimi sam komopto yepsisene taneogna, nimi sisa Yahudi kom nimi amik yebel pihinep,” aro lebog.
28Seogpa kel enekori yubu lelamogti, “Nu Saelba Uhiropne, sik leplam. Aghana mabo tanekori kwaneng pairo terobag agha telamnaba, yan tamag wamnep kam ologneri babe ubun pelengel lolamnange togto terop,” seog.#7:28 Kel enekori seneraglamogti, “El mikip sirikti, eldi mikiba ologha sirikagne yepnoho,” aro wanaag seneraglamogti lebog.
29Seogpa Yesusti elag lelamogti, “Andi samoro ambatnelamne wali leplam. Andi molbanelamne wene uro yabil ane sembe, hae pululam. Phia yonge andi kelme kulomag agha lambal,” seog. 30“Lambal,” seogpa kel eneko eldi aeag piog. Piogti kemelamogpa, elmangkelag phia yonge kulomag wamogne neneko lambaogpa, kel eneko tektek papto marobag malamog.
Yesusti nimi yubu lerop komne ao leptopne wali nembaogha
31Wamogha Yesus Tirus mog so'o aneko laplobi agha, Sidon ina agha palamog. Palamogti mag Galilea longorop mag peramag phibom agha heng walelingkirobag sip mog so'o si As Sa'obare as anabi toman piog. 32Piogti wamogpa, nimiri Yesusag nimi yubu lerop komne ao leptopne nhon payaek. Payaekti, “Sae elag pipmenba, wali talul,” aro molbaek.
33Wene aro molbaekpa Yesusti, “Mo wamnunam,” aro yubu lerop komne ao leptopne poneko poa nimi oroghag pabiog. Pabiogpa mo wamdekti, Yesusti sae ma'al agha ao lom abenekoag tobongkibog. Tobongkibogti Yesusti sae ma'alag silumag supto yubu lerop komne ponekori silimuag pelaghirog. 34Silimuag pelaghirogti, imag tiwalengkia Yesusti hain nubu uro ebogti, pho aro lelamogti, “Efata,” seog. Yahudi nimiri lerop yubuag, “Efata,” seog nena, nuri yubuag, “Kube,” aro lebog.
35Wene seog abeneko pere, ao kubogti, pam silimu lebe aro yubu lemnep wamogpa, peket uro yubu lelamog.
36-37Nimi eneko wali taogti, peket uro yubu lelamogpa, Yesusti sin wamek nimi tanekoag, “Tam nene sembe nimiag ambatsiseng kom,” aro irikahiog. Irikahiog aghana, nimi tanekori Yesusti wali nembaogne sembe, “Map, mane agha ual,” aro lo'om seekti, wana awiri ambatto poa yabalamsiek. Yesusti nen, “Ambatsiseng kom,” aro sarikto-sarikto irikahiog aghana, sindi yubu sabo nenero ambatto poa yabalamsiek. Ambatto tongolamsiekpa ka'elamekti, “Nia mangkina wali ulamlari, nimi pam ao leptopne babe kuplamsilba, yubu lelamang,” aro yubu sabo nenero ambarelamsiek.
Okuqokiwe okwamanje:
Markus 7: kklKOS
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2023 (Active), Wycliffe Bible Translators, Inc. All rights reserved.
