Markus 9

1Seogti nen tipto yubu lelamogti, “A'un tane wamlom nimiag yubu sikne agha ambarelamsin. A'un tane sekamlom nimi nhon-nhon anam teban komag, Allahri mog so'oag nimi saelbamsilula lag taleba iplulom. Allahri mog so'oag nimi saelbamsilula nenena, eldamneri mikipneag agha lag nembaleba, anam teban komag a'un nimi nhon-nhondi iplulom,” seog.

Yesus nong a'eropne tangom agha haing omomne warebaogha

(Matius 17:1-13; Lukas 9:28-36)

2-3Wene seogpa, ik no'opbare wameka, Yesusti Petrusap Yakobusap Yohanesap enero poa main wenge nhonag waelbaekti, sin tombare mo wamek. Mo wamekpa, sikin whingag agha Yesus nong a'eropne taogpa, eldi ag wangkamogne haing omomne kororo yame warebaog. Eldi ag kororo warebaogne nenena, nimi mog so'oag nimiri ag a'elbanepne sunsunum wamog komdi, haing omomne kororo warebaog. 4Kororo warelamogpa, kemelamekpa Yesus wamoghag aneko Allah yubu silimu tipto ulamdek nang Musaap Eliaap lag tangom agha Yesusap nhon yubu lelamekpa ipsiek. 5-6Yubu lelameka ipsiekti, Petrusap, Yakobusap, Yohanesap sin wanaag lo'om seekti, logti Petrusti, “Sa'a senep,” sembaog. “Sa'a senep,” aro Yesusag yubu lelamogti, “Nai, yubu amohinne nubunge wamlamne! Nu tane wamap nena wali. Ane sembe ae wilindi soro kaluna kaulbaukap. An sembe nhon, Musa sembe nhon, Elia sembe nhon sobatsukap,” seog.

7Wene seogpa, toa pololonga niknilogsiogpa, Allahri imag agha yubu lelamogti, “Anena na Name, nari wanaag me o'ona senelamnange wamla. Eldi yubu ka'elamlulom,” alamogha ka'ebaek.

8Wene alamogpa, ka'ebaek abeneko pere, whing tangabom agha tilamekpa, sin Yesusap lelamek nimi abeneko ipsin koma, ot Yesus mo sinap nhon wameka ibek.

9Undo unuaogpa, Yesusap elkabo wilindi tanekoap mainag agha kuluklamekti, Yesusti irikto yubu ambarelamsiogti, “A'undi mainag anekoa wene iplomne sembe nimi nhonag babe ambatsiseng kom. Na mog so'oag nimi tangtopne wamna aghana, amik tebaneri, nimi teptopne anabiag agha nen samoro kamag tanun. Na nen samoro kamag tane taneogna, a'undi wene iplomne sembe hae nimi ambatsululom,” seog.

10Wene seogpa, Yesusti yubu ka'ebaekne sunsunum uro nimi ambatsiek kom. Nimi ambatsiek kom aghana, sin mamun hail dalamekti, “Sa'a sembe Yesusti, ‘Imag agha mog so'oag nimi tahinge amik nimi teptopne anabiag agha kamag tanun,’ sel?” aro yubu hail dalamek.

11Sikin mamun yubu hail dalamekti, Yesusag babe hailamekti, “Sa'a sembe Musari yubu amohirop nangdi ambarelamsiangdi, ‘Elia sam yale taneogna, Allahri wepto poglenge poneko amik yalul,’ aro ambarelamsiang?” aro haibaek.

12-13Wene aro haibaekpa, Yesusti ambarelamsiogti, “Elia ponekori sam yingkina, ‘Nia mangkina o'oro wali nembanun,’ aro wero uanepne sembe sik uro ambarelamsiang. Aghana nari a'unag ambarelamsinne, Elia poneko sik uro yaogpa, nimiri el sembe karongdi, ‘Malia uaukap,’ senenne sunsunum uro ni uaong. Sikindi elag malia uaongne sembe anam uro yabin komag, Allahri sam el wamogti, eldi yubu mome toro pairop nangag ambatsiogha sunsunum uro mome toro pibeka wamla. Aghana tamna undo. Sindi Allah yubu tipto samenag mome toro pibek nangdi, ‘Imag agha mog so'oag nimi talenge ponekona, nimiri wa'eplamikpa seklebalul,’ aro mome toro pibek. Wali uro seneraglapmundi, ‘Sa'a sembe mome ane toro pibek?’ aro seneraglamlulom,” seog.

Yesusti phia yonge me kulomag agha yag lambaogha

(Matius 17:14-21; Lukas 9:37-43)

14Wene seogpa, Yesusap elkabo wilindi tanekoap nen samoro mainag agha kulukul alamekti, eldi yubu ka'ero neleptop nang yogne wamekag yaek. Yalamekti kemelamsiekpa, nimi maikno longolaeka nusamag Musari yubu amohirop nang etpareri Yesusti yubu ka'ero neleptop nang yogne taneko toraptangto lel dalamekpa ipsiek. 15Ipsiekti yalamekpa, nimi longkamek nimi tanekori Yesus tiboghaekti, “El yalamla,” aro awi maikno senelamekneag agha merero tol piek. 16Tol piekpa, Yesusti sinag hailamsiogti, “Sa'a sembe tam nenero yubu lel dalamlom?” aro haibahiog.

17Wene aro haibahiogpa, nimi longolaekne anabiag agha nimi nhondi samoro ambarelamogti, “Nai, amohiropne wamlam. Nari me anag poa yanne, ‘Wali nembalulam,’ aro payan. Phia yonge el kulomag wa'iogti, yubu kom nembaog. 18Phia yonge nenekori elag ulamlange, yamoro eplamlari, so'oag oro man alamla. Man alamlaba, me eneko si keleng tepto si ka'en toman kamola makel alamlari, nong ni kikiplamla. Ane sembe, payandi andi yubu ka'ero neleptop nangag, ‘Wali nembatnululom,’ aro molbahin aghana, sumbangba eraruktina, wali nembanep kom saog wamla,” aro Yesusag ambarog.

19Wene aro ambarogpa, Yesusti sinag yubu lelamogti, “Eh, a'un nanag sik semban koma ulamlom nimi. Na ko'o ik etpare a'un anabiag wamneri, ‘Nanag sik senelamseng,’ aro wana pailingkina wamnep? Me eneko nanag payahut,” seog. 20Seogpa me aneko Yesusag payaek. Payaekpa phia yonge neneko Yesus ililamog abeneko pere, me anekoag uloghog nena, konkonoro so'oag mambirogpa, so'oag pemagto lologlamogti, si ka'en toman kamola makel alamog. 21-22Si ka'en toman makel alamogpa, Yesusti iliag hailamogti, “Etsuma phia yonge el kulomag wa'iori ulamla,” aro haibaog.

Haibaogpa, ili ponekori samoro ambarelamogti, “El olog wamoghag agha wa'iogti, phia yonge nenekori, ‘Omnun,’ aro ik nhon-nhon aukag wepto talamlari, ik nhon-nhon babe maghag wepto talamla. Nu sembe yareag sembahisomdi, yepsisom senelamna. Andi el wali nembanep to, kom to?” aro Yesusag molbaog.

23Wene aro molbaogpa, Yesusti samoro ambarelamogti, “Sa'a sembe andi nanag, ‘Yepsinep to, kom to,’ aro haibanelam? Allahri elag sikne aro wana palirop nimi sembe nia mangkina uanep,” seog.

24Yesusti wene seog abeneko pere, me eneko ili ponekori yubu haum aro lelamogti, “Nari sik senelamna aghana, nari sik senenne kom taleagti, nari anag sikne aro wana pimnunne yepnululam,” seog.

25Seogpa Yesusti kemelamsiogpa, nimi maikno merero longolaek. Merero longolameka kembahiogti, Yesusti phia yonge nenekoag aruklamogti, “An phia me aneag pam lepto ao leplamlamne, nari anag, ‘Lambae,’ aro yaglangken. Me eneag agha lambamendi, nen samoro wa'al alulam kom alamna,” seog.

26Wene seogpa phia yonge me eneko kulomag wamogha haum aro lanalamogti, me eneko nong lolog murulamog pere agha lambaog. Lambaogpa me eneko tebalo nimi saog uaogpa, nimi maikno tanekori, “Ya'ag loba tal,” alamek. 27“Loba tal,” alamek aghana, Yesusti me eneko sae salero toro sekirogpa, me aneko sekog.

28Me eneko wali taogti sekogpa, Yesus eldi yubu ka'ero neleptop nangap ae lomag wa'ina, mo wamek. Sin Yesusap nhon mo wamekti, elag hailamekti, “Sa'a sembe nuri phia me eneko kulomag ua uropne neneko nuri yag lambanep kom?” aro haibaek.

29Wene aro haibaekpa, Yesusti samoro ambarelamsiogti, “Phia yonge nene saogne yag lambahinep nena, mo yubuag agha, ‘Lambae,’ arop tanena, yag lambanep kom. Ot Allahag molona mololapmun taneogna, el mikipne pere agha yag lambanep,” seog.

Yesusti, “Ya'ag omnukang,” aro eldi yubu ka'ero neleptop nangag nen sarikto ambatsiogha

(Matius 17:22-23; Lukas 9:43-45)

30-31Seogti Yesusap eldi yubu ka'ero neleptop nangap mog so'o aneko laplobi agha mog so'o Galilea phiro piek. Palamekti Yesusti senelamogti, “Nari yubu ka'ero neleptop nangap mo wameberi, ot sin aghabog el nenero ambarelamsinun. Ane sembe nu tane wamapne sembe nimiri el taikag,” aro lag palamek kom. Yesusti eldi yubu ka'ero neleptop nang ambarelamsiogti, “Na mog so'oag nimi tahinge nimi nhondi na pan khero aisa nimiri saeag nembanelul. Sindi saeag taneba, ya'ag omneikpa, tebanea ik wilindi wamneri, nen samoro kamag tanun,” aro ambatsiog.

32Yesusti wene aro ambatsiogpa, yubu neneko sindi wali uro seneraghek kom aghana, elag haibanepne sembe logti, haibaek kom.

Nimi etne nimi nubunge tanepne sembe Yesusti ambatsiogha

(Matius 18:1-5; Lukas 9:46-48)

33Sin mog so'o Galilea palamekti, as Kapernaum yaek. Yaekti aeag wa'iekti, Yesusti eldi yubu ka'ero neleptop nangag hailamsiogti, “Usa inaag yalamap abeneko tam huropne sembe yubu leple yalamlom?” aro haibahiog.

34Wene aro haibahiogpa, samoro yubu lebek kom. Elag samoro ambarek kom nena, inaag yalamekti, sin mamun, “Nun anabiag agha etne agha nubunge?” aro yubu lep tang-tang yalamek. Ane sembe aliri, yubu lebek kom. 35Ambarek komba, Yesus pukogti, eldi yubu ka'ero neleptop nang aobare nang taneko yopsiog. Yopsiogti yubu ambarelamsiogti, “Nimi etneri, ‘Na whingagne tanun,’ senelamle tanena, nimi enekori eldamne amikne nenep taleri, ‘Nimi ni yepsinun,’ aro arukna nenep tale taneogna, whingagne tanep,” seog.

36Wene seogti me ologne nhon tobogti, sin nusamag sekirogti, somoro saelbamog. Somoro saelbamogti, yubu lelamogti, 37“Me ologne nene saog nimi nhon wamleba, nimi etneri nari siag kekhaekto nembaleri, ‘Yesus kiploa saog uro kipnun,’ aro toro piple tanena, nimi enekori na babe toro pimneloa saog ulamlul. Na toro kipnelul nimi eneko na mo kipnelul kom aghana, na kipnelenge pere agha na mog so'oag pogneogne poneko babe kiplul,” seog.

Yesusti, “Nu aisa nembamsil kom nimi nungkae wamla,” seogha

(Lukas 9:49-50)

38Wene seogpa, Yohanesti Yesusag yubu lelamogti, “Nai, amohiropne wamlam! Nuri kemelamoboba, nunap nhon yabalamap kom nimiri phia yonge nimi kulomag wamsionge an siag yag lanalamsioba ibobo. Ibobo aghana, nimi aneko nuri anag neleplangkeap saog uro anag sop nelepto yabalamla kom. Ane sembe, ‘Yesus siag phia yag lambahiseng kom,’ aro irikabo,” seog.

39Wene seog aghana Yesusti, “Nimi nhondi na siag kekhaekto wamlangeag agha Allah mikibari uanepne kekneba ulamle tanena, nimi enekori nik sum eneko na san tilibanep kom. Ane sembe na siag kekhaekto Allah mikibari uanepne kekneba ulamle nimi irikaheng kom. 40Irikaheng kom alamnangena, nimi etneri nu aisa nenehirop kom tanena, nimi eneko nungkae wamla. 41Tam nene sembe yubu sikne agha ambatnuahin. Nimi etneri a'un sembe, ‘Allahri wepto poghogne Kristus poneko ma'ap tangtop nimi wamlom nimi yepsisene,’ aro a'un mag tebatsile nimi babe, Allahri ekon tan koma nimi eneko sembe kamna tatlul,” seog.

“Malia uaukang,” aro nimiri wana alukto suknubahinepne sembe Yesusti ambatsiogha

(Matius 18:6-9; Lukas 17:1-2)

42Wene seogti, Yesusti sunumna yubu etpare nen lelamogti, “A'undi usa, ‘Etne nubunge,’ aro leptalom aghana, sin olog nimi agha nanag sikne aro wana palilamneang nena wali. Wali aghana, olog nimiri nanag wana paliro nelebanep ina toman nimi nhondi sindi wana toro, ‘Wail ibarukang,’ aro punpun tiptoba pipleba, puri tikto phukul ingkiik tanena, punpun tiptoba piple nimi enekoag Imagneri tam ikinne piplul. Punpun tiptoba piple nimi eneko ngangag kirik ikinne kerekto mag laut longorop mag nubungeag talobol pinepne ane olog keyagman saog. Imagneri nimi enekoag ikinne piplulne aghabog ikin sirik. 43-44A'un nimi nhondi sae tarari malia uanepne sembe, an malingeag phukul ingkinep tanena, ‘Malia uaneag,’ aro sae aneko karepto tobogloplulam. Sae ni phende wali wamnep aghana, sae nhondi malia ulapmenne sembe an sarangtop kom auk nubungeag nimi teptoba urobag wa'ina, sop-sop ebek mheklamloa teptop komag ya'ag wapmen tanena, wali senep kom. Andamneri, ‘Malia uaneag,’ aro sae nhon karepto tobogahomba, sae tarange nhon wamna koma kamag uro unne wa'inep, taneogna wali. 45-46A'un nimi nhondi yan tarari uro pinepne sembe, an malingeag phukul ingkinep tanena, ‘Malia uaneag,’ aro yan aneko karepto tobogloplulam. Ni yan mamun wali wamnep aghana, yan nhondi malingeag palapmenne sembe an sarangtop kom auk nubungeag nimi teptoba urobag toboglopkeleba, sop-sop ebek mheklamloa teptop komag ya'ag wapmen tanena, wali senep kom. Andamneri, ‘Malia uaneag,’ aro yan nhon karepto tobogahomba, yan tarange nhon wamna koma kamag uro unne wa'inep, taneogna wali. 47-48Haing tarari kemelapmenne agha, an malingeag phukul ingilapmen tanena, ‘Malia uaneag,’ aro haing wana neneko kwheloplulam. Haing ni phende wali wamnep aghana, malia ulapmenne sembe an sarangtop kom auk nubungeag nimi teptoba urobag toboglopkeleba, sop-sop ebek mheklamloa teptop komag ya'ag wapmen tanena, wali senep kom. An haing wana nhonog uro Allahri saelba ulamsil nimi tanep ina wa'imenba, saelba ulangkele, taneogna wali.#Yesaya 66:24

49Nimiri garam yamolamloa saogne nimi niag auk kulukul alul.#9:49 Samenag Yahudi nimiri saeag agha, “Allah sembe pimnun,” aro tarel payalamek abeneko pere, memnang Allah sembe palirop nangdi, “Nunap Allahap ma'ap tabu,” senenneag agha Allah sembe pimnepne alibag garam yamoro aukag tarel palamek (Imamat - Memnang 2:13). Undop agha Yesusti lelamog nena, “Nimi niri seneragto nelagha weplamikti, ‘Nandamneri Allah sembe pimnepne aukag taploa saog uro nandamne elag tarel pimnun to, Allahri nanag tam ikinne pelengero aukag toboghanelul to,’ aro nimi niri seneragto weplamukang,” seog sembanep.

50Garamna sao wali aghana, emem aropne kom tale tanena, nimiri nen samoro garam sao wali nembanep komdi, teba'en sembanep. Ane saog uro, a'un mamun ma'ap tangto wapmunneag agha garam sao walinge yamolamloa saog ulapmundi, waptan koma ma'al dalamlulom,” seog.

Okuqokiwe okwamanje:

Markus 9: kklKOS

Qhakambisa

Dlulisela

Kopisha