Matiə 6
6
Khaarda ˈlaarɛ
1Na‐n jɩɛ dʋ bʋrɛ na‐n nɩna anɩ bɔ cʋʋ tɩbɩlala wa‐n yɛ ga, a gɩ ha mɛ̃ na ˈlɛ khaardaa anɩ Thɩraakɛ hanɩle ƴũ fɩɩʋrakaˈ.#Mat 23:5 2Gɛr gɩ ɔbɔɔkɛ fɩ‐n hanɩ bɔdara thɩ̃ɛ, fa‐n do wɩ ʋ̃ tutuu afɩ ƴɛra, mɔ̃kɛ bɩnɛ yenyɔdara n cʋʋnɩ Juifisɔɔ Thãgba fʋɔr cɔnanɔaˈ, na ƴatɔɔ tɩbɩla n yɛ wɩ a na khɩa waˈ. Sobɔr mɩ so nar, wɩ ˈlɛr awɩ khaarda thalera pɩ. 3Sɩ fɛrɛ, ado fɩ‐n har bɔdara thɩ̃ɛ, fa‐n dorakɛ afɩ nyɔ̃bɩlã n jɩ gɩrɛɛkɛ afɩ nyɔ̃bɔ n cʋʋnaˈ; 4gɩ do mɛ̃ afɩ thɩ̃ ˈlaa na wolone, dɩ afɩ Thɩɩkɛra yɛ gɩnɩ wolonena ɔr na ka fɩ.
Thãgba bɩɛlɛ
(Lu 11:2–4)
5Dɩ ɔbɔɔkɛ nɩ‐n bɩɛlnɩ Thãgba, na‐n ho bɩnɛ yenyɔdaraakɛ n naannɩ ɩnɩ‐n jɩlɛ na bɩɛlnɛ Thãgba Juifisɔɔ Thãgba fʋɔr cɔnanɔ na hʋ nʋɔrasɔ tɩbɩla na‐n yɛ naˈ. Sobɔr mɩ so nar, wɩ ˈlɛr awɩ khaarda thalera pɩ.#Lu 18:10–14 6Sɩ fɛrɛ, ɔbɔɔkɛ fɩ‐n bɩɛlnɩ Thãgba, lona afɩ du bɩnɔ a khaanɛ loo, sa bɩɛlnɛ afɩ Thɩɩkɛ hanɩ ka keranɩ; dɩ afɩ Thɩɩkɛra n yɛnɩ gɩrɛ keranɩ, ɔr na ka fɩ. 7Dɩ ɔbɔɔkɛ nɩ‐n bɩɛlnɩ Thãgba, na‐n ther thɩmɩa pɛrɛ pɛrɛ a na pɛraˈ, mɔ̃kɛ thɩldara n cʋʋnaˈ, gɩdonɩ wɩ‐n kpɩɛrɛ jɔ mɩɩrɛ na dɔ nɔɔ, dɩ Thãgba na tu awɩ bɩɛl. 8Na‐n ho waa koe, gɩdonɩ anɩ Thɩ jɩrɛ gɩrɛɛkɛ n ɓɔra nɩnɩ, sɩ dɩ na kɔɔ bɩɛlɛɛ paˈ. 9Dɩ gɛr gɩ nɩ bɩɛlnɛ thakɛ:
Asɩ Thɩɩkɛ hanɩle ƴũ,
dɔ afɩ i n dʋbɩrɔ;
10dɔ afɩ fãgadaar do n ɩ̃;
dɔ afɩ tuur na‐n cʋʋ kɛ thɩɩra, mɔ̃ gɩ‐n cʋʋnɩ Thãgbaa dʋɔ.
11Hana sɩ nĩ dɩkorɩkɛ na dana sɩnɩ.
12Faa asɩ puukɛ sɩ‐n cʋʋnɩ na hana sɩ,
mɔ̃ sɛrɛ dakha n faanɩ ɩkhasɔɔ puukɛ wɩ‐n cʋʋ sarnɩ dɩ sa‐n ha wɩ.
13Fa‐n faa sɩ fifiləle n puno saˈ,
sɩ na taa sɩ puu cʋʋ hɩ̃daarɩ nyɔ̃kɔɔ. [
Gɩdonɩ fɛr hɩna nũfiire, na punone, na i dʋbɩrɛ bɔɔ fɛʋ waa khorr. Amɛn.]
14Dɩ ado nɩ‐n faarɛ sopugookɛ tɩbɩla n cʋʋ narnɩ dɩ na‐n ha wɩ, anɩ Thɩɩkɛ hanɩ ƴũ a na faarɛ anɩ sopugo dakha a na‐n ha nɩ.#Mar 11:25–26 15Sɩ ado na‐n faa sopugookɛ tɩbɩla n cʋʋ narnaˈ, anɩ Thɩ na faa dakha anɩ sopugo na ha naˈ.
Nɔ li thɩmɩɩr
16Ɔbɔɔkɛ nɩ‐n lini nʋɔ, na‐n ho bɩnɛ yenyɔdaraakɛ n lenɩ sɩ dɩ wa‐n kpaar na gbobiraˈ, gɩdonɩ wɩ‐n lire yɩɛ dɩ wa‐n nɩna tɩbɩla wɩ jɛ nʋɔ ɩnɩ li. Sobɔr mɩ so nar, wɩ ˈlɛr awɩ khaarda thalera pɩ. 17Sɩ fɛrɛ, ɔbɔɔkɛ fɩ‐n lini nʋɔ, hulo ƴɩɛ, a bʋlana niin yʋʋ; 18dɩ mɛ̃ fa nɩna tɩbɩla wɩ jɩ nʋɔ fɩ ləˈ, sɩ afɩ Thɩɩkɛ hanɩ ka keranɩ ɔr fa nɩna, dɩ afɩ Thɩɩkɛra n yɛnɩ dakha gɩrɛ keranɩ, ɔr na ka fɩ.
Lẽle thɩ̃ɛɛkɛ hanɩ Thãgba fãgadaarɩ dɩra
(Lu 12:33–34)
19Na‐n khɩɩ lẽle thɩ̃ɛ a thɩɩn kɛ thɩɩra, ka ɔphãkerẽsɔ na dʋʋn na kʋɛ gɩnaˈ, na ka yo na cɩnɩ na cu sɩ na lõ na yuəˈ.#Ja 5:2–3 20Sɩ na‐n khɩa lẽle thɩ̃ɛ a na thɩnɛ Thãgbaa dʋɔ, kãkɛ ɔphãkerẽsɔ na dʋʋn na kʋɛ gɩnaˈ, dɩ yo wɛ a na cɩ na cu sɩ na lõ na yuəˈ. 21Gɩdonɩ kãkɛ afɩ lẽle thɩ̃sɔ hanɩ, le afɩ ha na ha dakha.
Tomɩ lãphã
(Lu 11:34–36)
22Yire dʋɔn lãphã tomɩrra. Ado afɩ yi bɔr, afɩ tomɩ fɛʋ dahɩrɛra ga ha. 23Sɩ ado afɩ yi na bɔraˈ, afɩ tomɩ fɛʋ na har dabirəra. Sɩ ado dahɩrɛɛkɛ fɩ hananɩ afɩ bɩnɔ birəre, ga dor dabirəra na kɔ̃tɩnɛ na ka.
Thãgba agɩbo mũsumo
(Lu 16:13)
24Tibil bɩɛllakɛ na puno na do thɔma kɔ̃tɩna yenyɔra ga, foo a na laarɛ bɩɛl sɩ a na na bɩɛl, agɩbo a na mar kha na bɩɛl sɩ a hɛbɩ bɩɛl. Na puno na do thɔma Thãgbara nakha lẽle thɩ̃aˈ.
Dɛr
(Lu 12:22–31)
25Gɛr gɩ dɩ ɩ̃ so nar: Na‐n too na dɛna anɩ yi gɩrɛraakɛ na khonɩ na‐n yɔna ga, dɩ anɩ tomɩda gɩ gɩrɛraakɛ na tonaˈ. Yire na ba dɩkoraa? Dɩ tomɩr na ba kɩ̃kɩɩnaa? 26Nɩ hɩnɛ mɔ̃kɛ ˈlominə jɩɛra hanɩ. Wa‐n diirəˈ, wa‐n kha ga, wa‐n hana thɩ̃ɛ a ur thʋnɛna ga, sɩ anɩ Thɩɩkɛ hanɩ ƴũ, ɔr n haanɛ wɩ. Anɩ the nɔ ga khɩɩr a jɔ wɛr fĩiəə? 27Ʋmɔ̃ɔ tibil nɛrɛra dɛr na do nɔɔ da puno na dɛɛnɔ ɔɔ yɛ nɔ? 28Dɩ mɔ̃gɩdo dɩ na‐n dɛ kẽkẽ thɩmɩɩrra? Na‐n kpɩɛrna naporsɔ hʋɔnɔ wo na hɩnɛ mɔ̃ wɩ‐n phuni. Wa‐n do thɔma ga, wa‐n kpar kẽkẽ wiirəˈ. 29Sɩ mɩ so narɛ Salomɔ̃ɔ thɛthɛrakɛ, kɛ dɔnɩ fãgadaar, na ɔɔ nyɔ̃kor bɔ fɛʋ na kɔɔ to kɩ̃kɩɩn dɩɩ hona wɛr bɩɛllakaˈ.#1 Fãg 10:4–7; 2 Kur 9:3–6 30Dɩ ado Thãgba na to hʋɔnɩkɛ hanɩle hʋɔnɔ nĩ dɩɩ ha thaa, sɩɩ do cʋɔ wa to garɛ dɔɔ, a na ka na cʋʋ mɛ̃ dakha nɛrɛraakɛ kanɩ hana ha pɛrɛ gbəə? 31Dɩ gɛr gɩ na‐n ha na dɛ a na so: Anye sa kho yaa, na anye sa yɔ yaa, agɩbo anye sa gba na to yaa ga. 32Gɩdonɩ gelesɔ fɛʋ wɩrɛ na jɛnɩ Thãgba ga n ƴaalɛ gɩ. Sɩ anɩ Thɩɩkɛ hanɩle ƴũ, a jɩrɛ gɩrɛ n ɓɔra nɩnɩ. 33Sɩ caca thɩ̃ɛ nɩ ka na ƴaalɛ ɓo Thãgbaa fãgadaar do na ɔɔ fɩl sar, sɩ gelesɔɔlerarakɛ fɛʋ Thãgba na ha nɛr a na ɓaan. 34Dɩ gɛr gɩ na‐n ha na dɛna cʋɔdaa ga, gɩdonɩ cʋɔɔ thɛthɛrakɛ n dɛnanɛ ɔɔbara. Na‐n bãbanɛ na nĩkɛɛ nɩ, gɩ daan.
Okuqokiwe okwamanje:
Matiə 6: LOBIRI
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Bible Society of Burkino Faso 1985.
