NgokukaMakhu 8:22-38

Bafika eBhethsayida, baletha kuye impumputhe, bamncenga ukuba ayithinte. UJesu wayibamba ngesandla impumputhe wayiholela ngaphandle komuzi, waphimisela amathe emehlweni ayo, wabeka izandla zakhe phezu kwayo, wayibuza, wathi: “Kukhona yini okubonayo na?” Yabheka, yathi: “Ngibona abantu, ngibabona behamba; kungathi yizihlahla.” Waphinda futhi wabeka izandla zakhe emehlweni ayo, yavula amehlo, yasinda, yabonisisa konke ngokucacileyo. Wayiphindisela ekhaya, wathi kuyo: “Ungangeni emzini wabantu.” UJesu wasuka nabafundi bakhe, waya emizaneni eKhesariya Filiphi. Besesendleleni, wababuza abafundi bakhe, wathi kubo: “Abantu bathi ngingubani na?” Baphendula bathi kuye: “UnguJohane uMbhabhadisi;” abanye bathi: “Ungu-Eliya,” abanye bathi: “Ungomunye wabaphrofethi.” Wayesebabuza ethi: “Nina-ke nithi ngingubani na?” UPhethro waphendula, wathi kuye: “Wena unguKhristu.” Wabayalisisa ukuba bangatsheli muntu ngaye. Waqala ukubafundisa ngokuthi iNdodana yomuntu imelwe ukuhlupheka ngokuningi, ilahlwe ngamalunga, abaphristi abakhulu, nezazimthetho, ibulawe, kepha ivuke emva kwezinsuku ezintathu. Leli lizwi walisho ngokusobala. UPhethro wamdonsela eceleni, waqala ukumthethisa. Kepha uJesu waphenduka, wabheka abafundi bakhe, wamthethisa uPhethro, ethi: “Buyela emva kwami, Sathane. Awuzibuki izinto ngeso likaNkulunkulu, kodwa ngelabantu.” UJesu wayesebiza isixuku nabafundi bakhe, wathi kubo: “Uma umuntu ethanda ukungilandela, makazidele, athathe isiphambano sakhe, angilandele. Ngokuba yilowo nalowo othanda ukusindisa ukuphila kwakhe uyakulahlekelwa yikho, kodwa olahlekelwa ngukuphila kwakhe ngenxa yami nangenxa yevangeli, uyakukusindisa. Ngokuba kuyakumsiza ngani umuntu ukuzuza izwe lonke, alahlekelwe ngukuphila kwakhe na? Yini umuntu anganikela ngayo ukuze ibe yisihlengo sokuphila kwakhe na? Ngokuba yilowo nalowo onamahloni ngami nangamazwi ami kulesi sizukulwane esiphingayo nesonakeleyo, neNdodana yomuntu iyakuba namahloni ngaye lapho iza ngenkazimulo kaYise kanye nezingelosi ezingcwele.”