Johnga 9
9
1Egi Jesus waixagi, wangisha hajarna wankshig‐ingi epa hishjaranink.
2Egi hironaghirera higiwaxhirena, wairena: Hirukanara peshe washa woishana ungaja, wang de‐e, nigeshge shagwahira wauinege, hishjaranink wankshig‐ishe?
3Jesus horniharna: Inke wang de‐e washingishananina, shige shagwahira. Mau worera e hiwaharekjege esge.
4Jasgegi wategi phinana hisha huingigira wore harnira haunkjanena hambjanegi, hanhe hakirigi, eja inke hisha ware ruxurugnikjanena.
5Manegi jajaixji haungishi, managre eegi hohambra Newinena.
6Jaja shesge e‐gi, mainja shorna, hoshora maha una, egi mahara hishjaningnaka hishjasueja higiwasharna.
7Egi wagena: Rare, rusharare Siloam teja (Nigehowarehi e wairena). Esge hina, egi rusharna egi waja kirina.
8Esge wawikiwusunshra egi jorni hajaireshunura hishjaraninkshunura airena: Inke de‐e erenishe minaganaga jhi‐hokininagshunura?
9Hota wairena: De‐e erena, hijanera wairena: Hisgeragaja, egi wena: Newinena.
10Esge wagairena: Jasgeragaja hishjasu washinira ninuhas‐hireshe?
11Horniharna egi wena: Wankshigisha Jesus higairera, maha una, egi hishjasu harninegi hingiwasharna, egi waigena, teja howarare Siloam‐eja egi rushaje, egi hahina, egi dusharna egi wajharna.
12Egi wagairena: Hajinja unjeshe? Egi wena: Inke hiaperesnina.
13Egi Pharise‐eja harniahirena jorni hishjaraninkshunura.
14Egi Sabath hambjena Jesus maha uanaga egi hishjasura giruhasga.
15Egi shige Pharisera higiwax‐hirena jasge hiarnaga wajagi. Wawagena: Maha hishjasu harninegi hingishuna, egi dushara egi wajhajena.
16Esge Pharisera hota wairena: Wankshig de‐e inke Maura eja howajinigaja, inke Sabath hambra haisonigaja. Hijanera wairena: Wankshig washa woishana ura hisha wowakanjank shesge u‐ruxurugnashe? Esge nupihikhinena.
17Wang‐hishjaraningjega shige wagairena: Jagu hiragireshe hishjasu washinira warnigiruhasgi? Wena: Prophet hisha heregaja.
18Egi Judra khibagigirena hishjaraning nihegi egi wajajegi, gajanga e shagwahira wagigo hahirena, wajajega.
19Egi wawigiwax‐hirena wairena: De‐e ne‐hinigrawishe, hishjaranink wankshig‐ishe hi’shawi? Jasgehigaja shegunegi wajajeshe?
20Shagwahira hornihairena egi wairena: Hiaperes‐hajena de‐e ne‐hinighawina, egi hishjaranink wankshigina.
21Eshi jasgehigaja shegunegi wajajegi inke hiapereswinina, egi peshe hishjasura giruhasgi inke hiapereswinina. Hikikurukanajena higiwaxwire, e hikarat’et’ekjena.
22Hoit’e de‐e shagwahira wairena, Judra wanakawairege esge. Judra wana‐ina hakishjeg hiraginige, hisha wogisog horakhi Kristus erejena e‐gi wohokhu‐hojhieja hihinab‐gigirekjanege esge.
23Esge shagwahira wairena, hikikurukanajena, higiwaxwire.
24Egi shige wangjega gigoirena, hishjaraningnihera egi wagairena: Maura rajangre, hiaperes‐hajena wang de‐e washa woishana uisha herera.
25Horniharna egi wena: Washa woishana uisha hereshge, inke hiaperesnina, washa hisha hiaperessana, hishjara hinig‐harnihera, shegunegi wajharna.
26Egi shige wagairena: Jagu nigiushe? Jasgehianaga hishjasu washinira warnigiruhas‐she?
27Wornigiharna: Hornigitagwishare, egi inke nanaxguwinishe, jagu shige nanaxgunkjawishe, nishge E wironag harninikjanihawishe?
28Egi najisgirena, egi wagairena: Ne wironag harninijena, de‐eshi Mosesga hirowanag‐hajawina.
29Hiapereswina Maura Mosesga hokit’ena, wang de‐e hajinja howajigi inke hiaperes‐winina.
30Wangjega horniharna egi wawagena: De‐e washa woxixesgesha heregaja, inke hirapereswini hajinja howajigi, egi hishjasu warnira waigiruhasgaja.
31Hinpereswigaja Maura inke washa woishana ura warnaxguninagra, eshi hisha Maura gikarajgi egi woshgara E higiungi e naxgunana.
32Jajaixji managre jinakhi inkaga hisha hishjasura giruhas‐hireshe aire nanaxguwiniguni hisha hishjaranink wankshig‐ingi.
33Wang de‐e inke Maura eja howajinigi, inke washanisha u‐ruxurugninana.
34Hornigihairena egi wagairena: Harnaji washa woishana u wankshig‐sh’ina egi washa hinagigus‐kjanihawishe? Egi jangra hot’unairena.
35Jesus naxguna, jangra hot’unairegi, egi jaja hiegi, wagena: Harnanaxgushe Maura Hinigra?
36Horniharna egi wena: Hirukanara, peshe hereshe, harnaxgunana.
37Egi Jesus wena: Hashjarajena, egi erejena horakit’arajane.
38Egi wena: Hirukanara harnaxguna, egi gikarajshana.
39Egi Jesus wena: Woehira herekjanege, esge maegi hajina, jarnaga inke wajarniankhi wajairekjanena, egi jarnaga wajakhi hishjaraning hirekjanena.
40Egi Pharisera hisge hakishu unjegi hoit’e de‐e naxguinegi wagairena: Nishge hishjara hinighajeshe?
41Jesus wawagena: Hishjaraninig harajegi, inke washa woishana nijuwininana. Eshi wa’sharajawina, wajhajena, esge washa woishana washiniwira hijarnankshana.
Okuqokiwe okwamanje:
Johnga 9: WIN
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Published by the American Bible Society in 1907.
