Johnga 8
8
1Jesus Oliw‐xe eja hina.
2Egi hainixjinig shige kirina wohokhu‐hojhixeteja egi wankshigra harnaj hirahirena egi minaganaga egi washa wagigussana.
3Egi wowagax hiperesra egi Pharisera hinugisha hagarni hahirena, hinugjega washa wowonk‐uanku harukos‐hirege, egi jaja hokissageja kereregi,
4Wagairena: Hirukanara, hinug de‐e hojishana washa wowonk‐unaku hawajairena harukos‐hirena.
5Egi Mosesga woehira uishiwina deshesgera ini wigissaghirekje ena: Egi jagu hisheshe?
6De‐e wairena hokit’une nangi‐ine, E washa hiraraj hirekjege. Egi Jesus wakhuna egi nabra hik’uanaga mainja wagaxshana inke warnaxgu kik’uni.
7Egi higiwaxra inke rashjainanigi E minag‐kirinakshana egi wawagena: Hisha inke washa woishana sh’uni harajegi e inira jorni hinugjane hirojiwine.
8Egi shige wakhuna, egi mainja wagaxshana.
9Egi jarnaga naxgungi, hikiperes hiena wewinegi washa woishana unagra, hinikehi hihinabhirena, xetera jorni egi unank’u harnaj hihinabhirena. Egi Jesus inekhi d’unairena egi hinugjega hokissageja nashinjena.
10Egi Jesus minag‐kirinakshana, egi inke hisha hajarni, hinugrashana hijajena, E hinugjega wagena: Hinugra, hajinjanankshe hiraninaj‐nagra? Inke hisha washinohire heweninikjaneshe?
11Hinugjega wena: Inke hisha, Hirukanara. Egi Jesus hinugjega wagena: Nishge inke washinohire ningiunikjanena. Karare egi inke hinupahana washa woishana unianje.
12Egi Jesus shige hit’et’era wawagena: Manegirera hohambra Newinena. Hisha hiroinakhi inke hokawaseja maninikjanena, eshi homamb wankshighi‐ihakjanena.
13Pharisera esge wagairena: Nexji horakikarag rajegaja, horakikaragra inke wogisognina.
14Jesus horniharna egi wawagena: Ne wakikarag hajanunige, wotaghajane hisgexjina. Hajinja wawajira hiaperes‐hajege esge, egi shige hajinja wawatera. Eshi inke horag‐shuruxurugwinina hajinja wawajira, egi hajinja wawatera.
15Woehi‐sh’uharajawina roregi, inke woehi hisha hagiuniajena.
16Woehi‐hauhajegi woehi harnira wogisognana, inke inekhi harninina, eshi Newineanaga egi Hianjihiwira E huigigina.
17Hishge woehi hashiniwira wagaxankshana wankshigra nup worag harnira wogisogshana.
18Ne‐shawinena wakikarag hajane, egi Hianjihiwira E huingigira hunakshana.
19Egi wagairena: Hianjraga hajinja‐nakshe? Jesus horniharna: Inke hinaperes‐winigaja, hishge Jajiga inke hiraperes‐winigaja. Hinaperes‐wigishi, Jajiga hishge hiraperes‐wishgunina.
20Hoit’e de‐e Jesus jhiakohi shuroshueja wena, wohokhu‐hojhixeteja washa wagigusjane. Egi inke hisha nabrehinina, howagix earnira kheni jinige esge.
21Egi Jesus shige wawagena: Nagu harnira wawakerekjanena, egi hunanikjanihawina, egi washoirohirera wakarani‐shjekjanihawina. Hajinja wawategi inke hija hi‐shuruxurug‐nikjanihawina.
22Esge Judra wairena: D’e‐khinkjaneshe? Hajinja wawategi inke hishuruxurug‐nikjanihawina are esge?
23Egi wawagena: Khuhanegi horawarajiwina, wangregi wawajina. Ma‐degi ninewina, inke ma‐degi winenina.
24Esge wanigawina, washoirohirera wakarani‐shjekjanihawina. Inke harnainaxguwinigi she‐e Newinera, esge washoirohirera wakarani‐shjekjanihawina.
25Egi wagairena: Peshe nineshe? Egi Jesus wawagena: Jornineja jagu hornigitagwira.
26Washara roha hinigekjanihawina, egi washara roha woehi‐nigiunkjanihawina. Egi hisha huingigira wogisogshana, egi jagu E naxgura, she‐e managre hirowakit’e hajena.
27Inke naxguinanina Hianjihiwira E wirowakit’ajera.
28Esge Jesus wawagena: Jaja Wankshig‐hinigra shuruawigi, eegi hiraperes‐janihawina Newinera, egi inke washanisha Newaunina, eshi jasge Jajiga washingigusra shesge hihajena.
29Egi E huingigira hakishu ha‐uanjena, Hianjihiwira inke inekhi hit’unanijena, jasge giphira hoishib ha‐uanjena esge.
30Hoit’era deshesge e‐gi, roha harnaxguna.
31Egi Jesus Judranaka harnaxgunega wawagena: Hoit’e harninegi sh’uanajegi, hisgexji Ne wironag harninikjanihawina.
32Wogisogra hiraperes‐hikjanihawina, egi wogisogra hikikurukana nigiunkjanihawina.
33Hornigihairena: Abraham su warnira newinewina, egi inkaga hisha warnihi hiuinawinina, jasgegaja wa’sheshe hiakikurukana‐kjanihawishe?
34Jesus wornigiharna: Hisgexjina, hisgexjina hinigawina, higu peshe washa woishana ungi, washa woishana warnihi waunjanana.
35Egi warnihira inke manegus jhieja unanikjanena, eshi Hinigra manegus hijaunkjanena.
36Esge Hinigra hikikurukana nigiunkjanihawina, hisgexji hirakikurukanakjanihawina.
37Hiapereshajena Abraham su warnira neninewira, eshi d’eina‐nanash’iwina, hoit’e harnira inke harnainagixguwinige esge.
38She‐e wagajena jagu Jajiga eja hajhara, egi shesge rarajawina jagu hianjwarawiga eja hashjawigi.
39Hornigihairena egi wagairena: Abraham hianj‐hawira herena. Jesus wawagena: Abraham e ninkjang harniniwingi, Abraham wore harnira sh’u‐harajawinana.
40Eshi shegunegi d’eina‐nanash’iharajena wankshig hisha wogisogra hornigiragwira, e Maura eja naxguna, Abraham inke shesge hinina.
41Hianjrawiga wore harnira sh’u‐harajena. Egi wagairena: Inke wakeg hojaina wankshig‐ha’iwinina. Hishankira hianj‐hawina Maura.
42Jesus wawagena: Maura ne‐hianjrawigi woiragixetewinana. Maura eja hiahinab huna egi eja wawajina, inke nexji kik’u‐hunina, eshi E huigigina.
43Jagu‐u inke hiat’at’ajane nainaxguwinishe? Inke hoit’e harnira naxgu shuruxurug‐winige esge.
44Hianjwarawiga waxopinishishig hirena, hianjwarawiga jagu roguinera, sh’u‐harajawina. E jeghojikere‐hieja wankshigd’ehina, egi inke wogisogra eja unijena, inke nige wogisogni jege esge. Jaja hit’et’ega ret’unk, e hit’et’era hik’unjena. Ret’unkeisherena, egi ret’unkera hianjhirena.
45Egi wogisogra hornigitag hajege esge inke harnainaxguwinina.
46Egi hajanga hunagisharaikjanihawishe washa woishanara hisha ha‐uanjegi? Egi wogisogra hihajegi, jagu‐u inke harnainaxguwinishe?
47Hisha Maura earnigi, Mau hoit’era naxgunana, esge inke nanaxguwinina inke Maura earniniwinige esge.
48Egi Judra hornihairena egi wagairena: Inke phiwahawininashe Samarit‐wankshig‐ranina, egi waxopinishishig hisha hashinina?
49Jesus horniharna: Inke waxopinishishig hisha harninihajena, eshi Jajiga hakaraish’ag hajena, egi inkinaish’agwinina.
50Egi inke Ne gloria wakinini hajena, hisha hornijena egi woehi‐unjena.
51Hisgexjina, hisgexjina hinigawina, hisha hoit’e hihare hingiungi inke hot’e hajarnikjanena manegus.
52Egi Judra wagairena: Shegunegi hiaperes‐wigaja waxopinishishig hisha hashinirajera. Abraham d’egaja, egi prophetra, egi hishena: Hisha hoit’e harnira hingiungi inke hot’e harajabenikjanena manegus.
53Ne hiranijerashe hianj‐hawira Abraham, e d’ena, egi prophetra d’airera, peshe hererakhi wa’sheshe?
54Jesus horniharna: Ne hakish’akhi, gish’ag harnira inke washinkisgarninana. Jajiga hingish’agshana, E Mau hashiniwishe hi’shawira.
55Egi inke hirapereswinina, de‐eshi hiaperessana, egi inke hiaperesnina hihegi, reat’unkshgunina hinikisgawishgunina, de‐eshi hiaperessana egi hoit’e earnira hagiuanjena.
56Hianjrawiga Abraham wogishawana hamb harnira hajara, egi hajarna egi wogishawana.
57Esge Judra wagairena: Kheni ma kerepana‐saja raninigaja, egi Abraham hashjashe?
58Jesus wawagena: Hisgexjina, hisgexjina hinigawina, kheni Abraham hereni, winena.
59Egi ini rus‐hiranaga hirojinainena, eshi Jesus nuxawana egi wohokhu‐hojhixeteja hihinabshana, horogra howakerena egi deshesge hiwaixarna.
Okuqokiwe okwamanje:
Johnga 8: WIN
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Published by the American Bible Society in 1907.
