Hoixgara 19
19
1Egi herena, Apollos Korinth‐eja hahiunjau, Paulus iromahainja manaka e wawogiwena Ephesus‐eja kirina egi wironagra hisge hiena.
2Wawagena: Jasge Naxirag Wakanjangra shuruswishe harnanaxguwinegi? Egi wagairena: Inkaga washa naxguwinina Naxirag Wakanjang hisha nige jigi.
3Egi wawagena: (Rash) jaguisha hawau ni‐harniwaxunawishe? Egi wairena: John ni‐wawaxu harnira hiu.
4Egi Paulus wena: Hisgexji Johnga ni‐wawaxuna najge‐karategra ni‐wawaxu harninera hiu, wankshigra wawagena: Hisha hiroinag jikjanegi harnaxguinekje, Kristus Jesus herejena.
5Jaja de‐e naxguinegi Hirukanara Jesus rash harnira hiu ni‐wawaxu hirena.
6Egi jaja Paulus nab harnira nassu hihageja wat’umbgi Naxirag Wakanjangra wawirajina, egi hit’e jeg hit’e hajiarairena, egi prophet‐hajiarairena.
7Wangra harnajra kerepanaishanaga‐nup‐hashana wauna.
8Egi wohokhu‐hojhieja hokewena egi wi daniha inke nuwangini hit’et’ena Maura hung ma harnira wawirokit’ena egi waraxurugnaina.
9Egi jaja hota wanuxshag hiregi egi inke harnaxgu hiranina, eshi woroha joweja nagu she‐e washinohira higairena, wat’unakerena egi wironagra injab washurna, egi hisha Tirannus higairera wawagaxhajojhi harnieja hambokahi wirokit’arnankshana.
10Egi de‐e ma‐nupaha inkaga harushjainanina, egi jarnaga Asia‐eja jhiakhi harnaj Hirukanara Jesus hoit’e naxguinekjege Judra egi Hellenistra.
11Egi Maura washa wowakanjang rokanaisha Paulus nab harnieja ungigirena.
12Deshesgehina, hishja‐hiwasha egi nabhiwasha ro harnira hikawashagi warus‐hiranaga egi howashaija wakanaghirega, howashara rushjainena egi naxirag shishigra hihinabhirena.
13Egi Judra hikiwarekera hisge wang‐doshewe waunankshana, hiunjairena naxirag shishig harninankhi wawagairena Hirukanara Jesus rash harnira hiu wairena: Unishiwina Jesus hiauwi E Paulus wihokhunjera.
14Egi Jud‐hisha Skewa higairera nabhoruxaj hirukana hungra herera, shagowi hinighira de‐e e wauinena.
15Egi naxirag shishigra horniharna egi wena: Jesus hiaperes‐shana egi Paulus hiaperes‐shana, eshi peshe ninewishe?
16Egi wang naxirag shishig hojhijega wat’ambhurna egi wawarnana egi washinohira wagiuna, deshesgehirena nanoka egi kunugrara jhieja gias‐hirena.
17Egi de‐e Judra egi Hellenistra jarnaga Ephesus‐eja jhiakhi harnaj hiperes‐hirena. Egi harnaj naxire jijerena egi Hirukanara Jesus rash harnira rajankjinena.
18Egi harnaxgunankhi roha jina egi hokaraghirena egi woshga warninera wakawahairena.
19Egi roha hishge jina e wang‐doshewe wiunankhi wawagax warninera warnihajirena, egi taxu‐wahirena wankshignanka jowehireja. Egi hoikisgera wigikarabhirena egi shurasgara hogihixete‐kerepana‐saja hikisge hierena.
20Deshesge Maura hoit’e harnira hotirera rokanana egi wawarnana.
21Egi washa de‐e rushjanaga hageja, Paulus naxirag harnira hikiwarenaina Makedonia egi Axaia‐eja hianaga, hagnigi Jerusalem‐eja howarekje. Wena, eja hahianaga hagnigi jasgegi Rome hishge wajakjanena.
22Egi nupiwi wagirajegi Makedonia‐eja howare‐wagigina Timotheus egi Erastus. Eshi exji Asia‐eja jakojank hiwusharna.
23Egi higu eegi warapurura inke xununi nashinena woshga de‐e hawau.
24Wang hisha Demetrius higairera, shurasga hikishereisha herena, e shurasga jhi Diana giunjena, egi jarnaga wore de‐e unankhi inke watagnig ruxurug wahinijena.
25E sto‐wahina egi wang ware wore wawikisge ura, egi wena: wangwira hiraperes‐wigaja wore de‐e e hitaje hinkhianjera.
26Egi washjaharajena egi warnanaxgu‐harajena inke Ephesus‐regishana herenina eshi Asia mara jowe harnajna Paulus de‐e waraxurugshana egi wankshigra roha wakshahina, wena, inke mau hiranishe jarnaga nab hiuinegi.
27Esge wore harniwira inke eshana wonakewesganina inke washinkisge hiranikjera, eshi shige mau hinugra Diana higairera wohokhu‐hojhixete harnira howashere hirekjanena egi hoxete harnira maisinshjanena, e Asia ma harnaj egi managre harnaj gikarajnagra.
28Egi jaja washa de‐e aire naxguinegi mashja wogiteg hirena egi uwainena, wairena: Ephesian wankshigra Diana harninera xetejena.
29Egi jhinaganaka harnaj woi‐ingesgera hoixjina egi Gaius egi Aristarxus warukos‐hirena wang Makedonia‐eja here Paulus hikiware wakishura, wanaira hishankira hiu, sagrexji hostokhieja harniwo‐kawairena.
30Egi Paulus wankshig‐hounanka eja hokewe‐naingaja wironagnanka inke giuinanina.
31Egi wang xete Asia‐eja herera hota, e hijakorowahira, wogirag ji wagigirena gitairena, inke hostokhieja hokawarnikjege.
32Egi hota uwa washa airena egi hota washinjahi airena egi hostoaka wowewiharej‐hirena. Egi horohana jagu hawau stoiregi inke hiperes‐hiranina.
33Egi woroha horogeja Aleksander harnihinab‐hirena, Judra joweja howaire‐hirena. Egi Aleksander nabra hikuanaga wigugussana egi wankshignanka wakarashig hikorohorna.
34Eshi jaja hiperes‐hiregi Jud‐hisha herera, harnaj hora hishankira hiu howagix nupaha uwainena: Ephesian wankshigra Diana harninera xetejena.
35Egi jaja jhinag hirukanara wankshignanka gissewewahigi wena: Ephesus wang raniwira, wankshig jaguisha inke hiperes‐nijeshe Ephesus jhinagra Diana mau‐hinugxetera hirakaranagre egi hisgerara e Jupiter‐eja shibre howajina.
36Washa de‐e hirapereswina inke hakira hit’e ruxurug phinina, esge xapguni phiraniwina egi inke wewini inke washa uwinine.
37Wang de‐e washini‐rajiwina, e inke wohokhu‐hojhieja wamanu hiraniguni egi inke mau‐hinug hashiniwira raxjashguni hiranina.
38Esge Demetrius egi wang warera wakishu‐unjane wankshigra hisha washa de‐e wirakiragi, woehieja hiphina, egi hirukanara eja nankshana washara e phinigiu hirawinana.
39Eshi washa hiraijera roraguwingi, waehira hostoeja haehiranana.
40Wonakewesge hiwa‐uanjawina washa wangige hirekjanihawina hamb de‐e woi‐ingesge hihiwire, egi inke washanisha wirakira hinuxurug‐nikjanihawina puruna de‐e.
41Egi jaja deshesge e‐gi hostoaka kerewagigina.
Okuqokiwe okwamanje:
Hoixgara 19: WIN
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Published by the American Bible Society in 1907.