Jenesis 41
41
O Jose sikavel so phenel o suno katar o Faraon
1Kana nakhle dui burs, o Faraon dikhla iek suno. Ando suno vou saia pasa o pai, 2ta katar o pai likena efta guruva sukar ta thule kai jana char pasa o pai. 3Ta pala lende sea efta guruva gado ta suke kai likiste katar o pai, ta thodepe pasa e guruva sukar. 4Mapalal e guruva gado ta suke, jale e guruven kai sea sukar ta thule. Ondaka o Faraon llungadilo.
5Ta o Faraon pale sovto ta dikhla aver suno. Dikhla kai katar iek kastorro likena efta krangura sukar ta pherde lliu. 6Ta pala lende likena aver efta krangura suke ta phabarde e balaviatar kai avel katar likel o kham, 7ta gala krangura suke jale ogolen efta krangure thule kai sea pherde lliu. Ondaka o Faraon llungadilo ta llangla kai saia iek suno.
8A thiarinako rano o Faraon ustilo but brigime ta bichalda te ikharen sa e llenen kai cheren chirimate, ta sa e llenen kai sea bizai ando Ejipto. Ta o Faraon phenda lenge pe sune, ta niko lendar nasti phenda leke so phenena gola sune. 9Ondaka o gazda katar e llene kai radina pe sinia e charoki phenda e Faraonoke:
Akana dav man golli katar mo bilachipe kai cherdem. 10Kana o Faraon jolailo pe slugenchar phangla man ta e gazda katar e llene kai cheren o marrno e charoke, ta kana thode amen ande rubie kai saia ando cher katar o kapitan kai arakhel, 11isto ande goia riat me ta vou dikhlam sune, ta suako suno phenela vareso. 12Ta kote ande rubie saia amenchar iek lleno terno ebreo kai saia sluga katar o kapitan kai arakhela. Leke phendam amare sune ta vou phenda amenge so phenena gola sune. 13Ta gia sar vou phenda amenge, isto gia avilape. Me boldien kai mo rado, a ogole llene unblade le.
14Ondaka o Faraon bichalda te ikharen e Josee. Ta ikande le oma katar e rubie. Ondaka o Jose rranglape, premenisailo, ta avilo angla o Faraon. 15Ondaka o Faraon phenda e Joseeke:
Dikhlem iek suno ta niko nasti phenel mange so phenel gua suno. A llanglem kai tu kana asune iek suno sai phene so phenel gua suno.
16O Jose phenda leke:
Man inai goia zor, a e Devle si le. Vou ka phenel chuke so phenel gua suno. 17Ondaka o Faraon phenda e Joseeke:
Ande mo suno, me sema pasa o pai, 18ta katar o pai likiste efta guruva thule ta sukar kai jana char pasa o pai. 19A palal pala lende likiste aver efta guruva kai sea suke ta gado. ¡Me nikada ni dikhlema gia gado guruva ando Ejipto! 20Ta e guruva suke ta gado jale e purve guruven thule, 21ta i kana jale len niko nasti acharda soke achile isto gia suke sar sea omanglal. Ta me llungadilem.
22Ta mapalal dikhlem ande aver suno kai katar iek kastorro likena efta krangura sukar ta pherde lliu. 23Ta pala lende likena aver efta krangura kai sea suke ta phabarde e balaviatar kai avel katar likel o kham. 24A gala krangura suke jale golen efta krangure sukar kai sea pherde lliu. Gava suno phendem le e llenenge kai cheren chirimate, ta ni iek lendar nasti phende mange so phenela gua suno.
25Ondaka o Jose phenda e Faraonoke:
E dui sune kai dikhla o Faraon si iek. O Del sikada chuke so ka cherel. 26E efta guruva thule si efta burs, ta e efta krangura sukar si efta burs. E dui sune si iek. 27Ta i e efta guruva suke ta gado kai likiste pala lende, si efta burs, ta i e efta krangura suke ta phabarde e balaviatar katar likel o kham, ka aven efta burs kai ni ka avel jape. 28O Del mangel te llane so ka cherel, gia sar phendem chuke Faraon. 29Ka aven efta burs kai ka avel but jape ando Ejipto, 30ta kana ka nakhen gola bursa, ka aven efta burs kai ni ka avel jape. Ta niko ni ka delpe golli kana saia but jape ando Ejipto, soke ka avel gia bari bok kai ka zatril e phuv. 31Ta katar gola bursa kai saia len but, niso ni ka dikhol pala e bari bok kai ka avel. 32O Faraon dikhla dui droma isto iek suno, gava si kai o Del ka cherel gala ezgode, ta ka cherel le but oma.
33Goleke, avela sukar Faraon te rode iekhe llene bizai te thove le te gazdaril pe phuv katar o Ejipto. 34Ta i thov llenen te chiden o panchto katar sa so chiden ande phuv katar o Ejipto ande gala efta bursa kai ka avel but jape. 35Ta te chiden sa o lliu katar gala efta bursa lache kai ka aven, ta te thoven o lliu ande iek than te sai gazdaril o Faraon pe gua jape ta te guruvel len ande forura te sai den te jan e llenen. 36Ta gia o lliu ka avel gurudino e phuviake, te na meren e llene bokhatar kana ka aven e efta bursa kai ni ka avel jape ando Ejipto.
O Jose gazdaril ando Ejipto
37Gaia orba pela drago e Faraonoke ta i e llenenge kai radina leke. 38Ondaka o Faraon phenda lenge:
¿A kai ka malava aver lleno sargo gava kai si le o duo e Devleko?
39Ondaka o Faraon phenda e Joseeke:
Inai niko mai bizai neko tu, soke o Del cherda tut te llane sa gala ezgode.
40Goleke tu ka ave o mai baro pe mo cher ta pe mo foro, ta von ka cheren sa so tu ka phene lenge. Samo me ka avav mai baro tutar, soke me sem o charo.#Ech 7.10. 41Dik kai akana me thovav tut te gazdari pe sa e phuv katar o Ejipto.
42Ondaka o Faraon ikanda katar po va pi angrusti kai saia pe late o sello e charoko, ta thoda la ando va e Joseeko. Ta mapalal phenda te thoven pe lete e mai lache patave kai si cherde katar o lino o mai lacho, ta te thoven iek nizo sunakuno pe leki korr. 43Ta mapalal cherda le te likel pe po duito bordon kai llala pala lete, ta phenda te urkin angla le gala alava:
¡Te den tenemava angla le! Ta gia si sar o Jose gazdarisarda pe sa e phuv katar o Ejipto.
44Ondaka o Faraon phenda e Joseeke:
Me sem o Faraon, a niko ande sa o Ejipto ni ka cherel niso te na pheneale tu.
45Ta o Faraon thoda e Joseeko anav Safnat Panea, ta zinisarda le e cheaia katar o Potifera, popo katar o On, voi ikhardola Asenat. Ta llelo o Jose pe sa e phuv katar o Ejipto. 46E Joseeke saia tranda burs kana inllarde le angla o Faraon o charo katar o Ejipto, ta llelo ande sa e phuv katar o Ejipto.
47Ande gola efta bursa lache e phuv dia but. 48Ta o Jose chidia sa o jape ande gola bursa lache kai e phuv diaia but, chidia o jape ande forura, ta kote mukla o lliu kai chidiea ande umalia kai sea truial. 49O Jose chidia o lliu sargo e chisai e moraki, pe gachin chidia kai nasti llindola.
50Ta mai anglal te avel o purvo burs katar e bok, avila le dui minone kai dia le e Asenat, e chei katar o Potifera kai saia popo ando On. 51O Jose thoda o anav katar po purvo chaurro, Manases, soke phenda:
O Del cherda te bistarav sa e duk kai nakhlem, ta sa me familia kai avel katar mo dad. 52Ta thoda o anav katar po duito chaurro, Efrain, soke phenda:
O Del cherda te aven man chaurre ande phuv kai nakhlem duk.
53Gia nakhle e efta burs lache kai saia but jape ando Ejipto. 54Ta thode te aven e efta burs kai ni saia so te jan, isto gia sar phendaia o Jose kai ka avelpe. Ta saia bari bok ande sa e phuvia, neko ando Ejipto, soke kote saia so te jan.#Ech 7.11. 55Ta kana e llene katar o Ejipto thode te bokhaon, llele te mangen lliu katar o Faraon. Ondaka o Faraon phenda sa e llenenge katar o Ejipto:
Llan kai o Jose ta cheren so vou ka phenel tumenge.#Jn 2.5.
56Ta kana e bok avili ande sa e phuv, o Jose putarda sa e sobe kote kai saia o lliu te bichinel le e llenenge katar o Ejipto, soke sa mai bariola e bok ande goia phuv. 57Ta avena katar sa e phuvia ando Ejipto, te sai chinen lliu katar o Jose, soke ande ni iek phuv ni saia jape te jan.
Okuqokiwe okwamanje:
Jenesis 41: BACHRO
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Biblia ande chib Romani © Sociedad Bíblica Chilena, 2018.