Jenesis 40
40
O Jose sikavel so phenen dui sune
1Kana nakhlo nesavo vreme kotar, o lleno kai thovela o jape e charoke ta o lleno kai cherela o marrno e charoke, cherde iek bilachipe pe gazdake o charo katar o Ejipto. 2Ta o Faraon o charo jolailo gale duie llenenchar, po gazda katar e llene kai thovena e sinia e charoke, ta po gazda katar e llene kai cherena o marrno e charoke, 3ta inllarda len phangle kai o cher e kapitaneko kai saia ande rubie, kote kai i o Jose saia phanglo. 4Ta o kapitan katar e rubie thoda e Josee te arakhel len, ta von achile but llivesa ande rubie.
5Ta isto ande iek riat e dui phangle dikhle iek suno, o lleno kai thovela e sinia angla o charo ta o lleno kai cherela o marrno e charoke, ta suako suno phenela vareso. 6Thiarinako rano, kana o Jose avilo lende, dikhla len but brigime, 7goleke puchla len:
¿Soke allive tumaro mui si gia brigime?
8Von phende leke:
Dikhlam iek suno ta inai niko te phenel amenge so phenel gua suno. Ondaka o Jose phenda lenge:
Phenen mange e sune ta o Del ka sikavel amenge so phenen gola sune. 9Ondaka o gazda katar e llene kai thovena e sinia e charoke phenda o suno e Joseeke gale alavenchar:
Ande mo suno dikhava angla ma iek kas drakhako, 10kai saia le trin krangura ta gola krangura dena lulunlla ta e lulunlla cherdona drakha resle, 11ta kai o taso e charoko saia ande me va, ta me lava e drakha ta chedova len ando taso. Ta mapalal isto me dava o taso ande va e charoke. 12Ondaka o Jose phenda leke:
Gava si so phenel o suno kai dikhlan:
E trin krangura si trin llive, 13kana ka nakhen trin llive o charo ka chinel chuke kris, ta ka thovel tut pale ande cho rado, ta tu ka de pale o taso kai o Faraon, gia sar chereale omanglal. 14Ta kana ka avenpe gala ezgode de tut golli mandar, ta cher mange gava sebapi, de orba e Faraonoke cheres ma te sai ikanel man katar, te avel chuke zalba mandar. 15Me sem ebreo ta ande man kate pe zor. Me ni cherdem nisavo bilachipe te sai thoven man kate ande rubie.
16Kana o gazda katar e llene kai cheren o marrno e charoke dikhla kai dia orba sukar katar o suno, phenda leke:
I me dikhlem iek suno kai saia man trin kotariche parrne upral pe mo soro. 17E kotaricha kai saia mai upre, ande late saia but sukar jape ta but lache marrne cherde e Faraoneke, a e chiriklia avena te jan katar e kotaricha kai saia pe mo soro.
18Ondaka o Jose phenda leke:
O suno kai dikhlan sikavel gaia ezgoda:
E trin kotariche si trin llive, 19ta katar trin llive ios o Faraon ka chinel chi kris ta ka cherel te unblaven tut pe iek kas, ta e chiriklia ka jan cho mas.
20Pala e trin llive o charo nakhela iek burs ios ande po zivoto, ta cherda iek baro jape e llenenge kai radina leke. Ta o Faraon phenda te ikanen e gazda katar e llene kai thovena e sinia angla o charo, ta i te ikanen e gazda katar e llene kai cherena o marrno e charoke, ta phenda te anen len angla sa e llene kai vou ikhardaia pe gua jape. 21Ta cherda gole llene kai gazdarila pe llene kai thovena e sinia, te thoven le pale pe po rado, ta gua lleno pale anela o taso kai o charo gia sar cherelale omanglal, 22Ta phenda te umblaven gole kai gazdarila pe llene kai cheren o marrno, ta cherde le isto gia sar o Jose phendaia leke so phenela o suno. 23A o gazda katar e llene kai thovena e sinia e charoke, ni diape golli katar o Jose, ta bristailo letar.
Okuqokiwe okwamanje:
Jenesis 40: BACHRO
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Biblia ande chib Romani © Sociedad Bíblica Chilena, 2018.