Jenesis 39
39
O Jose ta e rromi katar o Potifar
1Kana e Josee inllarde le ando Ejipto, iek sudo ejipsio kai ikhardola Potifar, chinda le katar e ismaelitura gola kai inllardea le ando Ejipto. 2A o Del saia e Joseea, ta llela leke but sukar ando cher katar o ejipsio leko gazda.#Ech 7.9. 3Ta leko gazda acharda kai o Del saia e Joseea, ta kai goleke e Joseeke llala gia sukar pe suako ezgoda. 4O Jose pela drago leke gazdake, ta goleke thoda ande leke va po cher ta sa so saia le. 5Ta sar kana o Potifar thoda ande leke va po cher ta sa so saia le, o Del blagosisarda o cher e ejipsioko ta i leke umalia. 6Kana mukla sa pe ezgode ande va e Joseeke o Potifar ni brigilape katar niso, samo te jal. A o Jose saia but sukar.
7Avilape kai kana nakhlo nesavo vreme, e rromi katar leko gazda thoda pe akha pe lete, ta phenda leke:
Sov manchar.
8A o Jose ni kamla, ta phenda lake:
Dik, mo gazda thoda tala mo va sa so si le ta sar kai sem kate, vou ni brigilpe katar niso. 9Ta ande gava cher inai niko mai baro mandar, ta suako ezgoda mukla tala mo va. A tu san leki rromi, ta me te sovav tuia gua avela iek bilachipe but baro ta e Devleke ni avela drago me te cherav gava bilachipe.
10Ta voi suako llive phenela leke te sovel laia, a vou ni thovela lake sama. 11A iek llive o Jose dia ando cher te cherel po rado, ta sar ni saia niko ando cher, 12voi istarda le katar e patave ta phenda leke:
Sov manchar. Ondaka vou naslo prastindo ta mukla pe patave ande lake va. 13Kana voi dikhla kai naslo avri ta kai mukla pe patave ande lake va, 14ikharda e slugen katar o cher ta phenda lenge:
Dikhen, mo rrom anda iek ebreo kai akana marel espurnia amendar. Avilo te dikhel man ta mangela te sovel manchar, a me urkisardem but zurale, 15ta kana asunda kai urkinsardem sa me zoriaia likisto prastindo ta mukla pe patave.
16Mapalal voi guruda leke patave lligo ni avilo lako rrom ando cher. 17Ondaka voi phenda leke isto gola alava:
O sluga ebreo kai andan amenge dia ande mi soba ta mangela te del man ando lallao.
18A kana me urkinsardem sa me zoriaia, vou likisto prastindo ta mukla kate pe patave. 19Gia cherda cho sluga manchar. Kana o Potifar asunda gala alava kai phenela leke leki rromi, but jolailo.
20Ondaka istarda e Josee ta phenda te thoven le ande rubie kote kai sea e phangle e charoke, ta kote achilo phanglo. 21A o Del saia e Joseea ta sikavela leke po volipe, soke cherda te perel drago e lleneke kai gazdarila ande rubie.#Ech 7.9. 22Ta o gazda katar e rubie dia ande va e Joseeke te arakhel sa e phanglen kai sea ande goia rubie, ta vou phenela sa so saia te cherdol andre. 23Ta o gazda katar e rubie ni saia soke te brigilpe katar e ezgode kai cherela o Jose, soke o Del saia e Joseea ta sogo cherela o Jose o Del cherela te likel leke sa sukar.
Okuqokiwe okwamanje:
Jenesis 39: BACHRO
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Biblia ande chib Romani © Sociedad Bíblica Chilena, 2018.