Jenesis 35
35
O Del blagosil e Jakobe ando Betel
1O Del phenda e Jakobeke:
Uste ta lla te zivi ando Betel. Kote ka vazde iek altar e Devleke kai sikadilo chuke kana nasea katar cho phlal o Esau.#Jen 28.11-17. 2Ondaka o Jakob phenda pe familiake ta sa e llenenge kai llana lea:
Ikanen sa e dela kai si maskar tumende, ta naion ta thoven aver patave pe tumende. 3Ta aven oma ando Betel, soke incha ka vazdav iek altar e Devleke kai pomozisarda man kana sema ande nuzda, ta kai llelo manchar pe suako rig kai llelem.
4Gia von die kai o Jakob sa gola dela kai sea lende ta e chea kai sea ande lenge kan, ta o Jakob prajosarda len telal katar iek kas kai saia pasa o Sikem. 5Kana von likiste, o Del cherda sa e forura kai sea pase te avel len iek bari dar, ta goleke ni llele te marenpe e Jakobeke chaurrenchar.
6O Jakob ta sa e llene kai llana lea avile ando foro kai ikhardol Luz kai i gua foro ikharenle Betel, kai si ande phuv katar o Kanaan. 7Ta kote vazdia iek altar, ta ikharda gua than El Betel, soke kana vou nasela katar po phlal, kote o Del sikadilo leke. 8Ta i kote muli e Devora e diskinia kai arakhlaia e Rebeka, ta prajosarde la telal katar iek kas, pasa o Betel, goleke ikharde gua than o Kas e Roimako.
9Kana o Jakob irilape katar o Padan Aram, o Del sikadilo leke pale ta blagosisarda le, 10gale alavenchar:#Jen 32.28.
Tu ikhardo Jakob,
a akana ia ni ka avel cho anav Jakob,
katar gava llive angle cho anav ka avel Israel.
11Ta phenda leke:
Me sem o Del kai si le sa e zor,
te avel tut but chaurre ta baro porodo.
Tutar ka likel iek phuv ta but sueto ta phuvia,
ta maskar cho porodo ka aven charura.
12E phuv kai diem e Abraame ta e Isaake,
ka dav la chuke,
ta che porodoke kai ka avel mapalal tutar.#Jen 17.4-8.
13Ta kana o Del llelotar kotar katar dia orba e Jakobea, 14o Jakob lia iek barr ta thoda le pe porrne te sai dikhol, ta pe gua barr thoda mol ta zeitino. 15Ta ikharda gua than kai o Del diaia orba lea, Betel.#Jen 28.18-19.
O meripe e Rakelako
16Mapalal lleletar katar o Betel, ta kana lena te resen ando Efrata, e Rakel maladila lake but bare dukhenchar. 17Ta kana saia mai trudno te maladol lake, e diskinia kai pomozila la phenda lake:
Na dara kai ka maladol chuke i gava minono. 18A voi saia po meripe, ta kana chirdela po lli te merel, thota o anav e minoneko Benoni, a leko dad ikharda le Benjamin.
19Gia si sar e Rakel muli, ta prajosarde la po drom katar o Efrata kai akana si o Belen. 20Ta o Jakob chidia barra ta thoda len iek upral pe aver, ta llik akana dikhol kai si o limori e Rakelako.
21Ta o Israel laglo ta inzarda pi chara mai incha katar o zido katar o Migdal Edar. 22Ta avilape kai kana o Israel zivila ande goia phuv, llelo o Ruben ta sovto e Bilaia, iek katar e rromia e Jakobeke, ta gava llanglale o Jakob. A e chaurre e Israeleke sea desudui:
E chaurre e Jakobeke
1 Kr 2.1-2
23E chaurre kai avila le e Leaia si gala:
O Ruben leko chaurro o mai purano, o Simeon, o Levi, o Juda, o Isakar ta o Zabulon. 24E chaurre kai avila le e Rakelaia si gala:
O Jose ta o Benjamin. 25E chaurre kai avila le e Bilaia e sluga, si gala:
O Dan ta o Neftali. 26Ta e chaurre kai avila le e Zilpaia e sluga e Leaki, si gala:
O Gad ta o Aser. Gala si e chaurre e Jakobeke kai biandile ando Padan Aram.
O meripe e Isaakeko
27Mapalal o Jakob llelo te dikhel pe dade e Isaake ando Mamre, kai o foro Arba, kai si Jebron. Kote si kai zivisarda o Abraam ta o Isaak.#Jen 13.18. 28O Isaak zivisarda stotina ta ojtovardes burs. 29Ta o Isaak kana saia po meripe ta saia but phuro, mulo, ta leke chaurre o Esau ta o Jakob prajosarde le ando limori e familiako.
Okuqokiwe okwamanje:
Jenesis 35: BACHRO
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Biblia ande chib Romani © Sociedad Bíblica Chilena, 2018.