Jenesis 32
32
O Jakob ta o Esau maladon
1Kana o Jakob llelotar po drom, iek suechura e Devleke maladile lea. 2Kana o Jakob dikhla len, phenda:
Gava si o pero e Devleko. Goleke ikharda gua than Majanaim.
3O Jakob bichalda nesave llenen te llan kai leko phlal o Esau, ande phuv katar o Seir, kai si katar e umal katar o Edom, 4ta phenda lenge te phenen gia leke gazdake e Sauleke:
Gia phenel chu sluga o Jakob: Sa gava vreme zivisardem e Labanea, 5ta si man guruva, magarchura, bakre, ta sluge murus ta i diskinie. Bichalav gaia poroka me gazdake, ta aduricharav te avel chuke zalba mandar.
6Ta e llene kai inllarde e poroka irisaile kai o Jakob, ta phende:
Llelam te dikha che phlale e Esaue, ta isto vou avel te lel tut ta llan lea star stotine llene.
7Kana asunda gaia orba o Jakob, but darailo ta achilo but brigime. Ondaka fulada e llenen kai sea lea ta i e bakren e guruven ta e deven, ande dui pere, 8ta phenda:
Te avilo o Esau te marelpe, ka marelpe iekhe perea, a o gua pero ka nasel. 9Ta o Jakob thoda te molilpe gia:
O Del katar mo papo o Abraam ta katar mo dad o Isaak, kai phendan mange te iriv man kai mi phuv, ta kai mi familia, ta kai phendan kai ka chere te llal mange sukar, 10me ni sem niso angla sa cho volipe kai avila tut manchar, ta gia chacho avilan manchar kai me nakhlem o Jordan ta sa so saia man saia mi rovli, ta akana si man dui pere. 11¡Moliv man chuke, braduisar man katar e va me phlaleke e Esaueke, soke si mange dar letar! ¡Soke sai avel te mundarel e deen ta lenge chaurren! 12A tu phendan kai ka chere te llal mange sukar, ta kai mo porodo ka avel gia baro sargo e chisai e moraki kai nasti llindol.#Jen 22.17.
13Ta goia riat o Jakob sovto kote, ta lia nesave ezgode so saia le po va te del pe phlale e Esaue: 14Dui stotine busnia, bis busne, dui stotine bakria, bis bakre, 15tranda deve diskinie kai maladila lenge pe minonenchar, saranda gurumia, des telchura, bis magarche ta des magarchura. 16Ta dia kai suako sluga iek stoka, ta phenda lenge:
Llan tumen angle, ta na llan but pase maskar iek stoka ta aver.
17Ta e llene kai bichalda mai anglal phenda leke:
Kana ka malavel tut mo phlal o Esau, ta kana ka puchel tut ¿Ko si cho gazda? ¿Ta kai lla? ¿Ta kake si e zivirinie kai inllare? 18Ondaka tu ka phene:
Gazda Esau, gava si so del tut cho phlal o Jakob cho sluga. Vou avel pala amende.
19Ta e duito lleneke, ta e trito lleneke ta sa e llenenge kai inllarena e stoke, o Jakob phenda lenge gia:
Kana ka malaven e Esaue, phenen leke isto gala alava. 20Ta i ka phenen leke:
O Jakob cho sluga avel pala amende. O Jakob bichalda gaia poroka soke mislilape: Me ka achavav leki joli e ezgodenchar kai bichalav leke, ta kana ka dikhav le sai avelpe kai ka lel man postenimaia.
21Ondaka bichalda sa e ezgode kai saia te del le mai anglal te avel lete, ta vou achilo te nakhel e riat ande po pero.
O Jakob marelpe iekhe suechoia
22Ta isto goia riat o Jakob ustilo, ta lia pe duie rromien, pe duie slugen ta pe desuiekhe chaurren, ta cherda len te nakhen o pai kai ikhardol Jabok. 23Ta nakhle o pai sa pe ezgodenchar. 24Ta kana o Jakob achilo korkorre, mardape lea iek lleno sorro riat lligo ni llivosaila. 25Ta kana gua lleno dikhla kai nasti dobila le, dodisarda le po kuko ta o kuko e Jakobeko ikandilo katar po than kana vou marelape lea. 26Ondaka gua lleno phenda:
Muk man, soke len te pharron e zore. A o Jakob phenda leke:
Te na blagosia man, ni ka mukav tut.
27Ondaka gua lleno phenda leke:
¿Sar ikhardo? Vou phenda:
Me ikhardivav Jakob.
28Ondaka gua lleno phenda leke:
Tu ni ka ikhardo ios Jakob. Cho anav akana ka avel Israel, soke mardan tut e Devlea ta e manusenchar, ta dobisardan.#Jen 35.10.
29Ondaka o Jakob puchla le:
Phen mange akana sar ikhardo. A o lleno phenda leke:
¿Soke puche mo anav? Ondaka gua lleno blagosisarda le isto kote. 30Ta o Jakob ikharda gua than Peniel, soke phenda:
Dikhlem e Devleko mui ta achilem llundo.
31Ondaka kana o Jakob lela te nakhel o Peniel likisto o kham, a cheres po kuko o Jakob langala. 32Goleke llik allive o porodo katar o Israel ni jan e plieska kai si po kuko, soke pe goia rig gua lleno dodisarda e Jakobe.
Okuqokiwe okwamanje:
Jenesis 32: BACHRO
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Biblia ande chib Romani © Sociedad Bíblica Chilena, 2018.