Jenesis 31
31
O Jakob mangel te nasel katar o Laban
1A o Jakob asunda so phenena e chaurre e Labaneke, von phenena:
O Jakob lia sa so saia amare dadeko ta gia barvalio. 2Ta i o Jakob acharda kai o Laban ni saia lea sar saia omanglal. 3Ondaka o Del phenda e Jakobeke:
Irisao kai e phuv che dadengi, kote kai si chi familia, ta me ka avav tuia.
4Ondaka o Jakob bichalda te ikharen e Rakela ta e Lea te aven ande umal kai saia vou pe bakrenchar, 5ta phenda lenge:
Me achardem kai tumaro dad inai manchar sar saia omanglal, a o Del me dadeko si manchar. 6Tumen llanen kai sa me zoriaia radisardem tumare dadeke, 7ta tumaro dad kojada man ta des droma parruda po pochindipe, a o Del ni mukla te cherel mange ni iek bilachipe. 8Kana vou phenela: Me ka pochinav chuke e bakrenchar kai si makhle, ondaka sa e bakria maladona lenge makhle, a kana vou phenela: Ka pochinav chuke golenchar kai si sivke pe lende, ondaka sa sivke sea pe gola kai maladona. 9Gia si sar o Del lia e zivirinie katar tumaro dad ta dia len mange.
10Avilape ande iek llive kana e bakre lel len te aminpe e bakrienchar, avila pe mande iek suno ta dikhava kai e busne kai ucharena e busnien sea ande sivke ta makhle. 11Ande gua suno o suecho e Devleko phenda mange gia: Jakob, a me phendem leke:
Kate sem. 12Ondaka o suecho phenda mange:
Thou sama ta ka dikhe kai sa e busne kai ucharen e busnien si sivke pe lende ta si makhle, soke me dikhlem sa so o Laban cherda chuke. 13Me sem o Del kai sikadilo chuke ando Betel, kote kai thodan pe iek rig o barr ta jalan mange sovel. ¡Uste Akana! ta llatar katar, ta irisao ande phuv kote kai biandilan.#Jen 28.18-22.
14Ondaka e Rakel ta e Lea phende leke:
Amen inai amen niso te adurichara te del amen amaro dad. 15Ta i dikhel amen sargo diskinie kai ni pinllarel. ¡Llik reslo te bichinel amen, ta jala sa e faidava kai lia pala amende! 16O chachipe si kai sa o barvalipe kai o Del lia amare dadetar, si amaro ta amare chaurrengo. Goleke cher sa so phenda chuke o Del.
O Jakob llaltar katar o Padan Aram
17Ondaka o Jakob ustilo, ta thoda pe chaurren ta pe rromien upral pe deve, 18ta inllarda sa so saia le, ta llelotar sa pe zivirinienchar kai dobisardaia pe radoia ando Padan Aram, ta istarda o drom te irilpe kai po dad ande phuv katar o Kanaan. 19A o Laban llelo pe aver rig te chinel e bal e bakrenge, a e Rakel chorda e dela pe dadeke. 20Gia si sar o Jakob kojada e Labane o arameo, soke ni phenda leke kai llalatar. 21O Jakob naslo ta inllarda pea sa so saia le, ta oma nakhlo o pai kai ikhardol Eufrates, ta llelo karing o burdo Galaad.
O Laban llal pala o Jakob
22Pala e trin llive o Laban llangla kai o Jakob naslo. 23Ondaka o Laban llelo pe phlalenchar pala o Jakob te malavel le, ta llelo pala le efta llive, ta reslale po burdo katar o Galaad. 24A goia riat o Del sikadilo leke ande iek suno ta phenda leke:
Arak tut te na de orba e Jakobea silnomaia.
25O Laban resla e Jakobe po burdo katar o Galaad, ta kote kai o Jakob vazdiaia pi chara. Isto kote pe gua burdo vazdia pi chara o Laban pe phlalenchar, 26ta o Laban phenda e Jakobeke:
¿So cherdan? ¿Soke kojadan man? ¡Andan me chorren phangle sargo ando maripe! 27¿Soke kojadan man ta naslan po chorial, ta ni phendan mange niso? Te llanglema, muklema tut te llatar veselimaia ta llilienchar basalde ande tambore ta ande arpe. 28Ta ni muklan ni te chumidav me chorren ta ni me unukonen. ¡Gala ezgode cherdanlen dilimaia! 29Ande me va si te zatriv sa tumen, a gaia riat o Del che dadeko dia orba manchar ta phenda mange:
Asun te na de orba silnomaia e Jakobea. 30Sukar si kai mangea te llatar, soke zelia te ave ando cher che dadeko, ¿a soke chordan me dela?
31Ondadaka o Jakob phenda e Labaneke:
Soke darailem. Me mislisailem kai ka le mandar che chorren pe zor. 32A vareko kai si kate te si lete che dela ¡te merel! Amari familia ka phenel o chachipe:
Phen mange te si vareso chiro mande, lele ta inllarle. A o Jakob ni llanela kai e Rakel chordaia e dela.
33Ondaka o Laban dia ande chara e Jakobeki, mapalal ande chara e Leaki ta i ande chara e slugengi, ta ni malada e dela. Kana likisto katar e chara e Leaki ta dia ande chara e Rakelaki, 34e Rakel lia e dela, ta thoda len telal katar e zen e devaki, ta besli pe lende. A o Laban rodia sa ande chara, ta ni malada len. 35Ondaka e Rakel phenda pe dadeke:
Dade, na joliao te na ustav angla tu, soke allive avila pe mande mo chon, o Laban rodia e dela ta ni malada len. 36Ondaka o Jakob jolailo ta jalape e Labanea ta phenda leke:
¿Savo bilachipe cherdem? ¿Pe so sem dosalo kai llelan pala ma gale bare jolinaia te mare man? 37Tu anadan ande sa me ezgode, ¿ta so maladan katar che ezgode che chereke? ¡Thou len kate, angla chi familia ta angla murni, ta von te chinen e kris! 38Gala bis burs kai radisardem tuia, ni iek katar che bakria ta che busnia kana maladila lenge, nikada ni jasaila lenge ni iek, ta nikada ni jalem ni iek katar che busne. 39Kana iek zivirinia divi mundarela iekhe bakre, me pochinavale chuke. O kana ollivesea o orachaia chorena varesavi zivirinia, tu mangea me te pochinaula chuke. 40Olivesea merava tatimatar, a orachaia merava siletar, ¡llik e lindri llalatar mandar! 41Ta gia sema bis burs ande cho cher, desustar burs radisardem chuke pala che dui chorra, ta sov burs pala che zivirinie, ta des droma parrudan mo pochindipe. 42Te na avilaia manchar o Del e Abraameko, o Del kai blagosila mo dad o Isaak, me llanav kai bichaldana man chuche vastengo. A o Del dikhla mi zalba ta so radisardem, ta gaia riat o Del dia pe tute.
O Jakob ta o Laban achen pe iek orba
43Ondaka o Laban phenda e Jakobeke:
E chorra si me chorra, e unukura si me unukura, e bakre si me bakre. ¡Sa so tu dikhe kate si murno! ¿A so sai cherava akana me chorrenge ta lenge chaurrenge kai avila len? 44Goleke aide tu ta me, ta ka acha pe iek orba, te sai dikhol pe savi orba achilam e dui.
45Ondaka o Jakob lia iek barr ta thoda le pe porrne te sai dikhol. 46Ta phenda pe familiake:
¡Chiden barra! Ta saurre chidie barra ta cherde iek umpa, ta kote jale upral pe gola barra. 47A o Laban thoda anav katar gua than ande piri chib, Jegar Saaduta, a o Jakob thoda leko anav ande piri chib Galaad.
48Ondaka o Laban phenda:
Gala umpe barr ka dikhon te sai llana e dui pe savi orba achilam. Goleke gua than ikharde le Galaad, 49ta i ikharde le Mizpa, soke o Laban phenda:
O Del te lel sama maskar amende dui, kana amen ka ava dur iek averetar. 50A te marea me chorren o te zinia tut avere diskinienchar, i te na avela niko pe gaia orba kai achilam e dui, o Del si ko asunda gaia orba pe so achilam.
51Ta o Laban ios dia orba e Jakobeke ta phenda:
Dik kate si e umpa barra kai dikhon, von si maskar amende dui. 52Von sikaven pe savi orba achilam, kai ni me ta ni tu ni ka nakha pe ogoia rig te mara amen. 53Te chinel e kris maskar amende o Del che papoko e Abraameko ta me papoko e Najoreko. Ondaka o Jakob jala sovel po Del, gua Del kai leko dad o Isaak blagosila. 54Ondaka o Jakob dia kurbanura po burdo ta ikharda pe familia te jan marrno. Ta kana jale nakhle goia riat po burdo.
55Thiarinako rano, o Laban ustilo ta chumidia pe unukonen ta pe chorren, ta mapalal blagosisarda len, ta irisailo kai pi phuv.
Okuqokiwe okwamanje:
Jenesis 31: BACHRO
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Biblia ande chib Romani © Sociedad Bíblica Chilena, 2018.