Jenesis 27
27
O Isaak blagosil e Jakobe ta e Esaue
1Nakhle e bursa ta o Isaak phurilo ta achilo korro. Ta iek llive ikharda pe chaurre e Esaue, o mai purano, ta phenda leke:
¡Murno chaurro! O Esau. Ao e Esau phenda leke:
Kate sem.
2O Isaak phenda:
Dikhe kai sem but phuro ta ande gala llivesa sai merav. 3Goleke mangav te lla po burdo le cho arko ta che llide ta istar varesavi zivirinia. 4Ta cher iek zumi sukar gia sar si mange drago, ta an gua jape te sai javle ta te blagosiv tut mai anglal te merav.
5A e Rebeka asunela so phenela o Isaak e Esaueke, goleke kana o Esau llelotar po burdo te istarel varesavi zivirinia pe dadeke, 6voi phenda pe chaurreke e Jakobeke:
Dik me asundem che dade kana dela orba che phlalorrea e Esauea, kai phenela leke gia: 7Lla ta istar varesavi zivirinia, ta cher iek zumi sukar te jav, ta ka blagosiv tut angla o Del mai anglal te merav. 8Goleke, bre chaurrea, thov sama so ka phenav chuke te chere: 9Lla kai si e stoka, ta an mange dui katar e mai lache busne, ta ka cherav iek zumi sukar che dadeke gia sar si leke drago. 10Ta tu ka inllare leke gua jape te jal le, ta gia vou ka blagosil tut mai anglal te merel.
11A o Jakob phenda pe dake:
Mo phlal si balalo pe sa pi esnaga, a me iok. 12A mo dad te dodisarda man ka mislilpe kai me sem iek kojamno, ta ka anav pe ma armaia ta ni kalav o blagosipe.
13A leki dei phenda leke:
Bre chaurrea, gola armaia te pheren pe mande. A tu cher so ka phenav chuke ta an mange gola busne.
14Ondaka o Jakob llelo pala e busne ta anda len kai pi dei, ta leki dei cherda iek zumi sukar gia sar saia drago e Isaakeke. 15E Rebeka ikanda e mai lache patave e Esaueke lako chaurro o mai purano, kai sea gurudine ando cher, ta thoda len po Jakob lako chaurro o mai terno. 16Mapalal, lia e morcha e busnenge ta ucharda leke va ta leki korr kote kai ni saia le bal, 17ta dia lete e zumi ta o marrno kai cherdaia.
18Ondaka o Jakob dia kote kai saia leko dad, ta phenda leke:
¡Dade! A o Isaak phenda leke:
Savo katar me dui chaurre san tu.
19A o Jakob phenda pe dadeke:
Me sem cho chaurro o mai purano o Esau, cherdem gia sar phendan mange. Uste akana ta bes te ja katar e zivirinia kai istardem, ta blagosisar man. 20Ondaka o Isaak phenda pe chaurreke:
¿Sar istardan gia oma iek zivirinia bre chaurrea? O Jakob phenda leke:
O Gazda cho Del pomozisarda man te malavav la.
21A o Isaak phenda leke:
Aide pasa ma te dodiu tut, te dikhav dal san tu mo chaurro o Esau.
22O Jakob avilo pasa le te sai dodil le leko dad. Ondaka o Isaak phenda:
O avazi si e Jakobeko, a e va si e Esaueke. 23Ta ni pinllarda le, soke leke va sea but balale, sargo katar leko phlal o Esau. Ta kana lela te blagosil le, 24pale phenda leke:
¿San tu mo chaurro o Esau? O Jakob phenda leke:
Ea, me sem.
25Ondaka leko dad phenda leke:
An bre chaurrea e zumi te jav katar e zivirinie kai istardan, ta ondaka ka blagosiv tut. Ta o Jakob anda leke e zumi ta i anda leke mol, ta jala ta pila.
26Ta mapalal phenda leke:
Aide pasa ma bre chaurrea ta chumide man.
27Kana o Jakob avilo pasa le te chumidel le, o Isaak khandia leke patave ta ondaka blagosisarda le gale alavenchar:
Ea, gaia khand si me chaurreki.
Si sargo e khand katar iek umal
blagosime e Devletar.
28O Del te del tut o pai katar o miloso,
te chide o mai sukaripe kai del e phuv,
but lliu ta but mol.
29Ta but sueto te avel tala cho va,
ta e phuvia te den changa angla tu.
Gazdarisar isto pe che phlal,
¡Te den changa angla tu!
Ta gola kai dena tut armaia pe lende ka peren e armaia,
a gola kai blagosina tut ka aven blagosime.#Jen 12.3; Ebr 11.20.
30Kana o Isaak blagosisarda e Jakobe, ta kana o Jakob likela kotar katar saia leko dad, o Esau irisailo kotar kai lleloia te istarel zivirinie. 31Ta i vou cherda iek zumi but sukar ta inllardala kai po dad, ta phenda leke:
Uste dade, ta ja katar e zivirinia kai istarda cho chaurro, ta blagosisar man.
32Ondaka o Isaak phenda leke:
¿Ko san tu? A vou phenda leke:
Me sem cho chaurro o mai purano o Esau.
33O Isaak chudisailo, ta phenda:
¿Ko si kai avilo kate, kai istarda zivirinie ta anda mange te jav, ta me jalem katar sa so anda mange mai anglal te ave tu ta blagosisardem le? ta akana vou achilo blagosime
34Kana o Esau asunda so phenda leko dad, thodape te rovel bare zalbaia, ta urkisarda:
¡Dade blagosisar i man akana!
35A o Isaak phenda leke:
Avilo cho phlal ta kojada man, ta lia o blagosipe kai saia chuke.
36O Esau phenda:
¡Goleke thode leko anav Jakob, soke dui droma kojada man! O purvo lia mandar o zakono katar o phlal o mai purano, ta akana lia mandar o blagosipe kai saia te lav me. ¿A nasti blagosi i man?#Jen 26.29-34. 37Ondaka o Isaak phenda e Esaueke:
Dik, me diem e Jakobe te gazdaril pe tute ta diem le te avel gazda pe tute ta diem sa che phlalen te aven leke sluge, ta manglem te avel le but lliu ta but mol. ¿A so kadau tut akana mo chaurro?
38A o Esau phenda pe dadeke:
Dade ¿Samo iek blagosipe sai de? ¡Blagosisar i man! Ta pale thoda te rovel bare avazea.#Ebr 12.17.
39Ondaka o Isaak phenda leke:
Ka zivi dur katar e phuv lachi kai del septelie.
Ta i katar o bursin kai perel katar o miloso.
40Ta e jarniea ka arakhe cho zivoto.
Ta ka ave sluga che phlaleko.
A kana ka zuriao ka bradui tut letar.#Jen 36.8; 2 R 8.20; Ebr 11.20.
O Jakob nasel katar o Esau
41Sar kotar o Esau istarda murzania po Jakob pala o blagosipe kai diaia le leko dad, ta mislilape gia: But oma ka ava zalosne pala o meripe me dadeko, ta mapalal me ka mundarav me phlale e Jakobe.
42Kana e Rebeka llangla so mangela te cherel o Esau, bichalda te ikharen e Jakobe ta phenda leke:
Dik cho phlal mangel te mundarel tut ta gia te ikanel bi duk. 43Goleke bre chaurrea, kande me alava. Uste ta nas kai o cher me phlaleko o Laban kai si ando Aran, 44ta achi lea nesave llivesa lligo ni ka lelpe e joli che phlaleki, 45lligo ni ka bristarelpe so cherdan leke. Ondaka ka bichalav te anen tut. ¡Ni kamam te jasarav me duie chaurren ande iek llive!
46Ondaka e Rebeka phenda e Isaakeke:
Sem chiñi katar mo zivoto cheres e chorra katar o Jet. O Jakob te lela rromi katar e chorra katar o Jet, mai sukar avela mange te merav.
Okuqokiwe okwamanje:
Jenesis 27: BACHRO
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Biblia ande chib Romani © Sociedad Bíblica Chilena, 2018.