Jenesis 19
19
O Del zatril e Sodoma ta e Gomorra
1Lela te perel e riat kana e suechura avile ande Sodoma. O Lot saia besindo kai o udar e foroko, ta kana dikhla len ustilo ta llelo te lel len. Kana avilo angla lende thodape tele llik kai e phuv, 2ta phenda lenge:
Gazda murne, molivman tumenge te aven kai o cher katar tumaro sluga. Kote sai ka jalaven tumare porrne, ta thiarinako rano sai ka traden drom. A von phende:
Na, fala. Gaia riat ka nakhala po drom.
3A o Lot pe zor cherda len te llan kai leko cher, ta kana avile cherda lenge iek lacho jape, ta cherda lenge marrno kai inai le levadura, ta von jale.
4Ta mai anglal te thovenpe te soven, avile sa e murusa katar o foro katar e Sodoma, ta thodepe truial katar o cher, katar o mai terno llik o mai phuro. 5Ta thode te ikharen e Lote ta phenena:
¿Kai talen e murusa kai avile gaia riat ande cho cher? ¡Ikan len avri kai manga te sova lenchar!
6Ondaka o Lot likisto ta phangla o udar pala pe, 7ta phenda lenge:
Molivman tumenge phlalalen, te na cheren gava bilachipe. 8Man si dui chorra kai si chea kai nikada ni sovte murusea, me ka ikanav len avri te cheren lenchar sogo tumen mangena, a gale manusenge te na cheren lenge niso, soke von si me gostura.
9A von phende leke:
¡Le tut kotar! Samo gava aduricharaia, iek lleno sargo tu kai avel katar aver phuvia te phenel amenge so si te chera. ¡Akana ka chera chuke mai but bilachipe neko lenge! Ta isto kote thode te espiden e Lote kotar te sai peraven o udar.
10Ondaka e manusa kai avilea kai o Lot inzarde po va ta thode e Lote ando cher lenchar, ta phangle o udar. 11Ta e llenen kai sea po udar e chereko korrade len katar o mai terno llik kai o mai purano, ta chinile te roden o udar. 12Ondaka e manusa kai avilea ando cher, phende e Loteke:
Te si tut ande gava foro aver chaurre, o chorra, llamutre, o aver familia, ikan len katar. 13Soke amen ka zatri gava than, soke o Del asunda but orbe bilache katar so cheren gala llene, goleke o Del bichalda amen te zatri gale foro.
14Ondaka o Lot llelo te del orba pe llamutrenchar kai saia te zininpe leke chorrenchar, ta phenda lenge:
¡Usten ta llantar katar, soke o Del ka zatril gale foro! A leke llamutre mislina kai marela espurnia. 15Ta kana pharrona e zore, e suechura sigarena e Lote, ta phenena:
¡Oma! Uste ta le che rromia ta che duie chorren kai si kate, te na mangea te mere kana ka zatri gale foro.
16A sar o Lot ni sigarela, e suechura istarde le katar o va, soke o Del avila leke zao letar, ta i lie leke rromia, ta leke duie chorren, ta ikande len katar o foro.#2 P 2.7. 17Kana ikande len katar o foro, iek katar suechura phenda:
¡Praste pala cho zivoto! ¡Na dik pala tu ta na achi ande gaia umal, nas po burdo te na mere!
18A o Lot phenda lenge:
¡Na, murne gazda, molivman tumenge! 19Tumen cherden mange but sebapi, ta sena but lache manchar kai braduisarden mo zivoto, a me nasti ka nasav po burdo soke e zatrania sai resel man po drom ta ka merav. 20Katar pase si iek forichi ta kote sai nasav. ¡Muken man te llav incha te braduiv mo zivoto, soke de istina si iek forichi minono!
21Ondaka iek lendar phenda:
Asundem tut ta ka cherav so manglan. Ni ka zatriv e foro kai phendan mange, 22akana sigar ta nas incha, soke nasti ka cherav niso lligo ni ka rese incha. Goleke gua foro thode leko anav Soar.
23Ta kana llivosaola o Lot avilo ando Soar. 24Ondaka o Del cherda te delpeke asufre ta iag pe Sodoma ta pe Gomorra. 25Ta zatrisarda e forura, ta sa e llenen kai zivina ande lende, ta zatrisarda sa so bariola ande goia umal.#Mt 10.15; 11.23-24; Lk 10.12; 17.29; 2 P 2.6; Jud 7. 26Ondaka e rromi katar o Lot kai llala pala lete, dikhla palpale ta isto kote laki esnaga cherdili loneki.#Lk 17.32.
27Kana nakhlo gua llive thiarinako rano, o Abraam llelo kote kai diaia orba e Devlea, 28ta dikhla karing e Sodoma ta e Gomorra, ta i karing e umal, ta dikhla kai pe goia phuv vazdiniaola o thuv, sargo katar iek furnava. 29Gia si sar o Del zatrisarda e foronen kai sea ande bari umal kote kai o Lot zivila, a o Del diape golli katar o Abraam ta ikanda e Lote katar e zatrania.
Katar aven e moabitura ta e amonitura
30Mapalal o Lot avila leke dar te achel ando Soar, ta llelotar pe duie chorrenchar karing e burdura, ta kote achile te zivin ande iek putardipe kai saia ando burdo. 31Ondaka e chorri mai purani phenda e mai terniake:
Amaro dad si phuro ta pe sa gaia phuv inai murus te zinilpe amenchar gia sar si sikade te cheren sa pe gaia phuv. 32Goleke aide ta matarale ta sova lea te sai avel amen porodo letar.
33Ta isto goia riat die te pien mol pe dade ta e mai purani sovti lea, a lako dad ni acharda niso ni kana voi sovti lea ni kana ustili. 34Kana nakhlo gua llive, e chorri mai purani phenda e mai terniake:
Dik, gaia riat kai nakhli me sovtem me dadea, goleke gaia riat pale ka matarale te sai i tu sove lea, gia e dui ka avel amen porodo letar.
35Goia riat pale die pe dade te piel mol, ta e mai terni sovti lea, a o Lot ni acharda kana voi sovti lea ni kana ustili. 36Ta gia e dui chorra katar o Lot achile khamne letar. 37E mai purani avila la iek minono kai thoda leko anav Moab, kai si o dad llik allive katar e moabitura. 38E mai terni i voi avila la iek minono kai thoda leko anav Ben Ami, kai si o dad llik allive katar e amonitura.
Okuqokiwe okwamanje:
Jenesis 19: BACHRO
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Biblia ande chib Romani © Sociedad Bíblica Chilena, 2018.