Shitatiko 25
25
Bazukulya Abulahama bamina
(1 Byambo 1:32-33)
1Abulahama wayekele mbuyama wamina, lizina lyendi Ketula. 2Wamubelekelele Zimilani na Yokishani na Mendani na Mindiyani na Ishimbaki na Shuwa. 3Yokishani wengile tata Shemba na Ndendani, pe bana ba Ndendani bengile ba Ashulimi naba Letushimi naba Leumime. 4Bana ba Mindiyani bengile Efwa na Efwila na Hanoki na Ambinda na Elinda. Aba nimwabo bengile bazukulya Ketula.
5Abulahama washiyililile Ishaki nimwabyo biya ahetele, 6ngoboni oho shilolokale afwe wapanine bishemo kuli bana bendi babalume baya bamubelekelele bakazendi bakwinginina. Pe wabatandile kuya mu kuzika ku litunga lya ku mushamuko kwakutali na mwanendi Ishaki.
Lufu na Kufundiwa kwa Abulahama
7Abulahama wekalile na myaka 175, 8pe wafwile oho hinga enga kakulukazi shikuma. 9Bana bendi ba Ishaki na Ishimaele bamufundile mu linzolongoma lya Makapela, mu mfuba iya yengilenga ya Efweloni mwana Zohali wa mulume wa Kahita, ku mushamuko wa Mamele. 10#Shit 23:3-16. Yengile mfuba iya Abulahama alandile ku Bahita, wubili wabo Abulahama na mukazendi Shala bafundiwile kuyo. 11Oho Abulahama wafwakale Nyambi watandalishile mwanendi Ishaki ou wekalile kwakwipi na “Lishima lya Wakuyoya ou Wamonanga.”
Bazukulya Ishimaele
(1 Byambo 1:28-31)
12Aba nibo bazukulu ba Ishimaele, mwana Abulahama, ou amubelekelele Hangali wa Kaengepita ndungo ya Shala. 13Awa niwo mazina a bana ba Ishimaele babalume omu balikonkelele. Mweli wa Ishimaele wengile Nebayoti, niho Kenda na Andimbelu na Mimbushama, 14na Mishima na Nduma na Masha, 15na Handandi na Tema, Yetula na Nafwishi na Kendema. 16Awa niwo mazina a bana ba Ishimaele babalume na minzi yabo na zimbalila za minkungwa yabo. Nibo bengile bamyene balikumi na babili. 17Ishimaele wekalile na myaka 137 oho afwile. 18Bazukulya Ishimaele bazikile mukati ka litunga lya Habila na Shula ku mushamuko wa Engepita na nzila ya kuya ku Ashiliya, kwakutali na bazukulya Abulahama bamina.
Kuhemuwa kwa Ishau na Yakobo
19Ou niwo mukoka wa Ishaki mwana Abulahama. Abulahama wabelekele Ishaki, 20Ishaki wekalile na myaka makumi anaa oho ayekele mukazendi Lambeka, mwana Mbetuwele wa Kaalemiya waku Meshopotamiya na mpanzendi Lambani. 21Ishaki walombelele kuli Nyambi ya Ngula mukazendi Lambeka, ndaba Lambeka wengile mumba. Pe Nyambi ya Ngula wakumbwile malombelo wendi niho Lambeka, 22wemitile bambuyu. Pe oho shilolokale bahemuwe balinyakwelenga umo na wamina mu livumo lyendi. Lambeka wambile ngayi, “Kati shumangani eshe sha kufweka nehi shikuholoka kukwami?” Niho akepwile kuli Nyambi ya Ngula amutongweze mwa kutendela.
23 #
Lom 9:12. Nyambi ya Ngula wambile kukwendi ngayi,
“Mu livumo lyobe muli matunga abili,
ukabeleka bantu babili bakalwila likona.
Umo ukenga wakushuma kupitakana wamina,
pe wamukulwane ukatendela milimo wa kanuke.”
24Shikati shendi sha kubeleka oho sha kumine, pe wabelekele bambuyu. 25Wakutatika kuhemuwa wengile wakufubila, pe lutu lwendi nimwalwo lwengile ngo shikobelo sha wushako nohobene niye watumbiwile ngayi Ishau.#25:25 Ishau: Lizina elye lyashimbiwa kwinika Sheya, litunga liya bazikile bazukulya Ishau ha kukotoka. Sheya likuyuvwanika ngo lizu lyamu Shihebelu lya kutoya ngayi, “Wambo.” 26Oho mukonzo wendi ahemuwilenga, liboko lyendi lyakwatile shikuma ku ncinzino ya Ishau, nisho shuma amutumbilile lizina Yakobo.#25:26 Lizina Yakobo likutontolola ngayi unakwata ku ncizino hinge Mukakwongeza. Ishaki wekalile na myaka 60 oho bahemuwile.
Ishau Ukulandisha Likona lya wukulwane
27Batwanuke oho ba kulilenga, Ishau wengile shibinda wawunongi, muntu wa mashaka, ngoboni Yakobo niye wengile muntu waku mwena ou wekalilenga ha munzi. 28Ishaki wahakile shikuma Ishau, ndaba walilenga nyama ya tuyamana otu Ishau abuyilenga, ngoboni Lambeka wahakileko Yakobo.
29Mutena umo oho Yakobo atelekelenga likampu lya manyanta a kufubila, Ishau wezile kufuma mu kuyomba mu lishaka.
30Pe wekalile na nzala shikuma. Niho ambile kuli Yakobo ngayi, “Ami nili na nzala shikuma, mpeko bimo ku nobyo bya kufubila” (Eli lizina lya Ishau linalifweke na lizina lya mu Shihebelu likutumbiwa ngayi Endoma.#25:30 Endoma lizina likuyuvwanika ngonehe lizu lya mu Shihebelu ngayi “Kufubila.”)
31Ngoboni Yakobo wambile ngayi, “Umpanike taha likona lyobe lya wukulwane, niho nikakupanike ebye.”
32 #
Bah 12:16. Ishau wambile ngayi, “Shashiwahe, ami nili hahepi na kufwa. Likona lyami likantendela wuwahe ngani?” 33Yakobo wambile ngayi, “Ha kutatika libeze taha ngayi ukampanika likona lyobe.”
Pe Ishau walibezele na kulandisha likona lya wukulwane wendi kuli Yakobo. 34Niho Yakobo apanine Ishau mankende na likampu lya manyanta. Walile na kunwa, niho akatukile na kuya. Nisho Ishau akendele likona lya wukulwane wendi.
Okuqokiwe okwamanje:
Shitatiko 25: LLK
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Libuka Lya Kuyela © Bible Society of Zambia, 2020.