Shitatiko 24
24
Bakuhuhwila mukazi Ishaki
1Haya Abulahama wengile kakulukazi shikuma, pe Nyambi ya Ngula wamutandalishilenga mu byuma nimwabyo. 2#24:2.Niho Abulahama ambile ku mukamulimo wendi wamukulwane, ou wengile mukulwane ku byuma nimwabyo ekalile nabyo ngayi, “Yaka liboko lyobe mukati ka bilama byami#24:2mukati…bilama: Eye yengile nzila balibezelenga luhaho lwa kubula kumana. pe ulibeze. 3Nikushinga unkulupishe na mbeza kuli Nyambi ya Ngula, Nyambi wa muyilu na hanci, ngayi ukabule kuyekela mwanami mbuyama wa litunga lino lya Kenaani. 4Uku fwanina kuboka ku litunga lyami, mukati ka bawushinda wami na kuyekelako mwanami Ishaki mbuyama.”
5Ngoboni mukamulimo wepwile ngayi, “Nahiti ndi mbuyama kwitabila wufwako kwiza nendi ku litunga lino? Kati nikabweshe mwanobe ku litunga oku wafumine ndi?”
6Abulahama wambile ngayi, “Byo, hinga ukabwesha mwanami kuyo. 7Nyambi ya Ngula, Nyambi wa muyilu, ou wamfumishile ku munkanda wa batate na kumfumisha ku litunga lya bawushinda wami, kami wankulupishile ngayi ukapanika litunga lino bazukulyami. Niye ukatuma lingeloyi lyendi kumbili yobe, pe obe ukayekelako mwanami mbuyama. 8Ngoboni ndi mbuyama kaliha uketabila kwiza nendi, obe ukashoboloke ku kulupisha okwe. Ngoboni hinge byuma bikaluhe nahiti, obe kaliha uku fwanina ku bweshelako mwanami.” 9Nohobene mukamulimo wayakile liboko lyendi mu bilama bya hekulyendi Abulahama, pe walibezele kutenda ngonehe niye amunyepele.
10Niho mukamulimo ashimbile makamela likumi a hekulyendi na minyemvu yayingi ya ndando. Pe wakatukile na kuya ku munzi wa Nahole ku Meshopotamiya. 11Oho akumine wamfunkamishile makamela hanci ku lishima ha munkanda wa munzi. Shengile shikati sha mazolo oho bambuyama batutikanga ha munkanda na kutekula mema. 12Niho alombelele ngayi, “Obe Nyambi ya Ngula, Nyambi ya hekulyami Abulahama, nikukunyepa ngayi ntandalishe lelo na ku monesha nceshe zobe za mwaya myaka kuli hekulyami ha kulama shikulupisho shobe kukwendi. 13Mona, ami nili kuno ku lishima oku bali na kwiza batunkanga bamu munzi mu kutekula mema. 14Nikamba kuli umo wabo ngayi, ‘Tula taha ntesho yobe hanci, umpeko mema ninwe.’ Ndi ukwamba ngayi, ‘Nwamo, pe nikanwisha makamela wenu kami,’ ou mwanga enge niye unahatili ndungo yobe Ishaki. Ndi eshe shiku moneka nikalimuka ngayi unamoneshe nceshe zobe kuli hekulyami.”
15Oho shilolokale amanishe kulombela, Lambeka wakumine na ntesho yendi ya mema ha shifuzi. Wengile mwana Mbetuwele wa mbuyama. Ou wengile mwana Milika, mukaza Nahole mukonzo wa Abulahama. 16Wengile kankanga wamuwahe shikuma wabula kulimuka mulume, wakunkulukile ku lishima, wenzalishile ntesho yendi na mema, pe wafumine ku lishima. 17Niho mukamulimo amwitukilile na kumuhangana pe wambile ngayi, “Mpindileko taha mema mu ntesho yobe, ninwe.” 18Wambile ngayi, “Nwamo hekulyami.” Pe wanguwangu wafumishile ntesho yendi ha mafuzi, pe wayikwatile mu liboko oho anwinenga. 19Oho uya mukamulimo amanishile kunwa, Lambeka wambile ngayi, “Nikutekwila kami makamela wobe mema, hantu anamanishi kunwa.” 20Wanyankupile kupingwila ntesho yendi mu linkuluba lyanwinanga bimuna, pe wetukilile kami ku lishima na kutekula mema amengi hantu noho anwishile makamela wendi nimwawo. 21Mulume wamupenzelenga umwe, ngayi amone ndi Nyambi ya Ngula wamutandalishakale. 22Oho Lambeka amanishile kunwisha makamela, uya mukamulimo watolele kambalamunwe ka ngolinde ka ndando yayinene pe wakayakile ku muzulu wendi na makaya abili ku maboko wendi.
23Pe wambile ngayi, “Ntongweze taha kati tatiyobe yani? Kuwuli mwanya ku litala lya tatiyobe ngayi ami na bantu bami tulanganeko uno wushiku ndi?”
24Lambeka wambile kukwendi ngayi, “Ami tate Mbetuwele, mwana Milika na Nahole. 25Kuwuli mwila wawingi na byakulya ku litala lyetu, kami kuwuli mwanya wakutulila.”
26Niho mukamulimo wa Abulahama ashinkamine na kulemesha Nyambi ya Ngula, 27pe wambile ngayi, “Yemezenu Nyambi ya Ngula, Nyambi wa hekulyami Abulahama, ou unalama shishemo shendi sha mwaya myaka na kwoloka kuli hekulyami. Nyambi ya Ngula unantwaminini shiwahe wahe ku litala lya hekulyami.”
28Niho kankanga etukilile ku litala lya mandiyendi na ku shimika lushango nimwalwo. 29Lambeka wekalile na mpanzendi lizina lyendi Lambani, pe wetukilile ha munkanda na kuya ku lishima kuya kwekalile mukamulimo wa Abulahama. 30Oho Lambani amonene kambalamunwe kakumuzulu na makaya ku maboko a mpanzendi, kami wayuvwile Lambeka hamba ebye amutongwezele mukamulimo wa Abulahama, wayile ku lishima na kumushimbawila, pe wakamuwanine hinga emana ku kamela yendi. 31Lambani wambile kukwendi ngayi, “Tuyenga ku munzi, obe muntu wakutandalishiwa kuli Nyambi ya Ngula. Kaliha wafwanina kwimana ha munkanda? Ami nakuwahishilakale mwanya mu litala lyami, kami kuwuli mwanya wa makamela obe.”
32Pe mukamulimo wa Abulahama wenginine mu litala, Lambani washobwele makamela na ku wapana ntende na mwila wakubalisha. Niho aletele mema ku mukamulimo wa Abulahama na bantu bendi akuyowela ku mawulu wabo. 33Oho baletele byakulya mukamulimo wa Abulahama wambile ngayi, “Kulya nifwako hantu nashimikili lushango lwami.”
Lambani wambile ngayi, “Haya, amba tuyuvwe.” 34Niho atatikile kwamba ngayi, “Ami nili mukamulimo wa Abulahama.” 35Nyambi ya Ngula unatandalishi hekulyami shikuma na kumwingisha wakuheta. Unamupana matanga a bambelele na bampongo na nawa a zingombe na shiliva naya ngolinde, hamo na bandungo babalume na naba babambuyama na makamela na bambongolo. 36Shala, mukaza hekulyami, wamubelekelele mwana wamulume oho niye wakulumpalakale. Hekulyami unamupaniki byuma nimwabyo ebye aheta. 37Hekulyami wanyambilile ngayi nilibeze na lubeza lwa kwombatala ndayano zendi wambile ngayi, “Hinga ukayekela mwanami mbuyama waku litunga lya Kenaani. Omu nili na kwikala. 38Ngoboni yanga ku bakatate na bawushinda wami, ukamuhatileko mbuyama.” 39Pe ami nambile kuli hekulyami ngayi, “Haya shikekala nahiti uya mbuyama ndi wufwako kwitabila kwiza nendi. 40Ngoboni niye wambile kukwami ngayi, ‘Nyambi ya Ngula ou nikwombatala shikati nimwasho ukatuma lingeloyi lyendi hamo na nobe na ku kutweshesha. Pe ukayekela mwanami mbuyama waku bawushinda wami na waku ba lupashi lwa batate. 41Ukenga wakushoboloka kulubeza lwobe ndi ukaya ku bawushinda wami, baka kana pe ukashoboloka ku lubeza lwobe.’”
42Oho nezi ku lishima lelo nanyepe ngayi, “Obe Nyambi ya Ngula, Nyambi wa hekulyami Abulahama, haya ntandalishe kunebye nikutenda. 43Nili kuno ku lishima, oho akwiza kankanga nikamulomba mema akunwa mu ntesho yendi. 44Ndi ukwitabila na kupana kami mema ku makamela wami, mwanga enge mbuyama ou unahata kwinga mukaza mwana hekulyami.” 45Oho shilolokale nimanishe kulombela kwa wumwee, Lambeka wezile na ntesho yendi ha shifuzi, pe wakunkulukila ku lishima mu kutekula mema. Niho nambile kukwendi ngayi, “Mpeko taha mema ninwe. 46Wanguwangu wafumisha ntesho ha shifuzi shendi pe wamba ngayi, ‘Nwamo, pe nikanwisha makamela wobe kami.’ Niho nanwa nanwisha na makamela. 47Niho namwipwile ngayi, ‘Tatiyobe kati yani?’ Pe wankumbulwe ngayi, ‘Nili mwana Mbetuwele, mwana Nahole na Milika.’ Niho nayaka kambalamunwe ku muzulu wendi na makaya ku maboko wendi.” 48Niho nashungumana na kulemesha Nyambi ya Ngula, pe na yemeza Nyambi ya Ngula, Nyambi wa hekulyami Abulahama, ou unantwaminini shiwahe na kundeta kuli kawushinda wa hekulyami, okwe nawana mwanendi wa mbuyama ngayi enge mukaza mwana hekulyami. 49Ndi ukwitabila ku monesha nceshe hekulyami, osho shili kukwobe, haya ntongweze kupwisha. Ndi unakana, amba noho ngayi mwanga nihanganike mwa kutendela.
50Niho Lambani na Mbetuwele bakumbwile ngayi, “Ndaba eshe shambo shinafumu kuli Nyambi ya Ngula, etu, kutwesha ku shiketula tufwako. 51Mona, Lambeka uno, mushimbe muyenga. Shashiwahe enge mukaza mwana hekulyobe, ngonehe anamba Nyambi ya Ngula.” 52Oho mukamulimo wa Abulahama ayuvwile mazu wabo, wafunkamine hanci na kulemesha Nyambi ya Ngula. 53Niho atutwishile ndando ya shiliva na ngolinde na bya kuliyenga bya bivwalo bya kupana Lambeka. Kami wapanine ntutu ya shishemo ya ndando yayinene kuli yayiyendi na kuli bamandiyendi.
54Niho mukamulimo wa Abulahama na bantu bendi balile na kunwa na kwonzelako wushiku. Oho bapindukile ku lumenemene wambile ngayi, “Nyintabilishenu niboke kuli hekulyami.”
55Ngoboni bamandiyendi na mpanzendi bambile ngayi, “Shashiwahe Lambeka ashale kuno nanetu matena akulingana hinge matena likumi, niho akaye.”
56Ngoboni mukamulimo wa Abulahama wambile kukwabo ngayi, “Hinga munyihalisha ndaba Nyambi ya Ngula unatandalishi nzila yami. Ndehenu niye kuli hekulyami.”
57Niho bakumbwile ngayi, “Lehenu taha twihane kankanga, tuyuvwe eshe akwamba.” 58Niho behanine Lambeka bambile kukwendi ngayi, “Ukushinga kuya na nowu mulume ndi?” Pe wakumbwile ngayi, “Ingoi, nikuya.”
59Nohobene bafunzwile Lambeka na shibeleki shendi ngayi bayenga na mukamulimo wa Abulahama na bantu bendi. 60Pe batandalishile Lambeka na mazu awa ngayi,
“Obe mpanzetu,
mwanga winge manda makulukazi a makulukazi.
Bazukulyobe mwanga batambule zinkena za bamalamo babo.”
61Niho Lambeka naba tunkanga bendi baliwahishile kukandama ha makamela na kuya na mukamulimo wa Abulahama.
62Ishaki oho wafumakale ku “Lishima lya Wakuyoya, ou wamonanga” lyamu libelelengwa, wazikilenga ku mwanya waku Nengembu mu litunga lya Kenaani. 63Ishaki wakatukile shikati sha mazolo kuya ku mfuba na kwenda, pe wamonene makamela hieza. 64Oho Lambeka amonene Ishaki, wahulukile ha kamela yendi, 65niho epwile mukamulimo wa Abulahama ngayi, “Uya mulume yani uli mu mfuba uli na kutushimbawila?”
Wakumbwile ngayi, “Niye hekulyami.” Pe Lambeka washimbile likwiza, walifwikile ku lupala lwendi.
66Mukamulimo wa Abulahama watongwezele Ishaki nimwabyo biya atendele. 67Niho Ishaki wengizile Lambeka mu ntanda muya ekalilenga Shala mandiyendi kwinga mukazendi. Wahakile lambeka, nohobene wabengezekiwile ha kufwa kwa mandiyendi.
Okuqokiwe okwamanje:
Shitatiko 24: LLK
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Libuka Lya Kuyela © Bible Society of Zambia, 2020.