Ima̍tiyu 20
20
Wɔ̄chīije yī alu̍ku̍rɔ̍ ɛha̍
1“Ɔchwɔ̄lɛ̍ Oro̍ōre̍ yī Ɔwɔ lɛ bāa lɛlā yī ɔngrɔ̄ɔ ɔha̍ nīi hi̍ yɛrɔ̄ yī īkpɔ̄ɔ̄chi̍ ma̍. O̍ bōbū la ɔ̄chɔ̄chī ge̍ē kpo̍ āchɛ nīi ge̍ē ya̍ u̍ku̍rɔ̍ la yɛrɔ̄ yī īkpɔ̄ɔ̄chi̍ ɔla̍ā ma̍. 2O̍ chrōoko̍o ge̍ē de okpo lɔkɔ nīi olu̍ku̍rɔ̍ ē nāa la ɔ̄chī ūkpo̍he ma̍, idana̍ri ūkpo̍he-ūkpo̍he ē de ɔnyɔnyɛ. O̍ wā ge̍ de wa̍ tɛ̄rɔ̄ pīya ge̍ē ya̍ u̍ku̍rɔ̍ la yɛrɔ̄ ɔla̍ā bɛ̍ɛ̄nɛ̄. 3O̍ gba̍a wā ge̍ pīya ga o̍gra la yɛ̄grāa ɔha̍ bāa oje arāanɛ ma̍ gāa ge̍ ma̍ āchɛ ɛha̍ nīi gblāa abɔ̍ɔ i̍ngɔ̍ɔ ji. 4O̍ da wa̍ hīka ɛ̍lɛ ge̍ pīya ga yɛrɔ̄ yī īkpɔ̄ɔ̄chi̍ yī anu̍ ge̍ ya̍ u̍ku̍rɔ̍ i̍ngi̍ngɔ̍ɔ ma̍a anɔ̍lɔ ge̍ē kla̍ ɛ̍lɛ ure̍ hwɔhi hwɔhi. 5Āchɛ ɛla̍ā wā ge̍ pīya gānyɔ̄. O̍ gba̍a ya̍ i̍ngi̍ngɔ̍ɔ la yɛ̄grāa yī oje igwo̍lɛpa ba̍la oje ɛta̍ yī ɔ̄nɛ̄. 6Oje ɛrwɔ̄ yī ɔ̄nɛ̄ yɛ ge̍ē gwō ma̍, o̍ gba̍a wā ge̍ pīya ga o̍gra ge̍ ma̍ āchɛ ɛha̍ nīi gblāa abɔ̍ɔ i̍ngɔ̍ɔ ji. O̍ che wa̍ ikpo̍ ka oji̍ nīi ɛ̍lɛ nāa yɛ̄grāa ta̍anū, gblāa ma̍ i̍ngɔ̍ɔ ji i̍chɛ nūma̍ wa̍a̍ ma̍/? 7E̍ ka de ɔ̍ ka ɔ̄chɔ̄chɛ ɔ̍lɔ i̍ hī aa̍ ɛra̍ yī u̍ku̍rɔ̍ ni̍ ɔ̍lɔ ohu̍ a̍nɛ. O̍ ka ɔ̍lɔ hwɔhi! Ɔ̍lɔma̍, ɛ̍lɛ ge̍ pīya ge̍ ya̍ u̍ku̍rɔ̍ la yɛrɔ̄ yī īkpɔ̄ɔ̄chi̍ yī anu̍ gɛ!
8“Ɔ̄nɛ̄ wā ge̍ de gbo ma̍, ɔlɔjā yī yɛrɔ̄ ɔla̍ā koko̍o de ɔlɛhu̍ yī alu̍ku̍rɔ̍ yī nū ka ɔ̍lɔ ge̍ hī alu̍ku̍rɔ̍ ɛra̍ nīi ɔ̍lɔ ge̍ kla̍ ɛ̍lɛ ure̍ yī ɛ̍lɛ. Ɔ̍lɔ ge̍ wu̍tu bū la āchɛ nīi anɔ̍lɔ kpo̍ gwīihi ma̍ ge̍ chɛ̄ la āchɛ nīi anɔ̍lɔ kpo̍ yɔbū ma̍. 9Āchɛ nīi ya̍ u̍ku̍rɔ̍ bū la oje ɛrwɔ̄ yī ɔ̄nɛ̄ ma̍, o̍ de idana̍ri ūkpo̍he de ɔnyɔnyɛ-ɔnyɔnyɛ. 10Wu̍chē yī ɔla̍ā, āchɛ nīi o̍ kpo̍ rāarāa ma̍ yɛ ge̍ē nāa okpo yī wā ma̍, e̍ je̍ka aɛ̍lɛ ge̍ē nāa ē mwɛbɛ ē hī ɔla̍ā. Aa̍ titi, ɔngrɔ̄ɔ ɔla̍ā kla̍ āā ure̍ la idana̍ri ūkpo̍he-ūkpo̍he. 11E̍ de okpo yī wā nāa bī la abɔ̄ ma̍, e̍ kū la ogwi̍ngwrī tū ɔ̄chɛ nīi kpo̍ wā la u̍ku̍rɔ̍ ma̍ bɛ̍ɛ̄nɛ̄. 12Āchɛ ehēhī nūma̍ nīi ɔ̍lɔ kpo̍ ɛ̍lɛ ma̍ gwīihi ma̍, ɛ̍lɛ chī ya̍ u̍ku̍rɔ̍ la ākārākā ūkpo̍he ɔbɔbɔ. Aa̍ nīi aɛ̍lɛ ya̍ u̍ku̍rɔ̍ bū la ɔ̄chɔ̄chī kpɛɛ ge̍ ku ɔ̄nɛ̄ lipu̍ yī yɛnɔ ɔnɔ̄kɔ̄kū ɔla̍ā ma̍, ɔ̍lɔ chōo̍chē kla̍ ɛ̍lɛ ure̍ jɔ̄ɔ̄jɛ̄ tāa aa̍! 13Ɔlɔjā yī yɛrɔ̄ ɔla̍ā ka de ɔha̍ yī wā du̍mɔ̍ hīka, ‘Ma̍ ko̍ō, ɔya! N i̍ ya̍ wɔ ɔyɔ̍ɔ̄ya̍ ni̍. Je̍ka aa̍ a chrōoko̍o ge̍ē ya̍ u̍ku̍rɔ̍ yī ɔ̄chī ūkpo̍he la idana̍ri ūkpo̍he? 14Nāa okpo nīi - iyī wɔ ma̍ nīi a ā pīya yī wɔlɛ̍. N chikpo̍ ge̍ē de okpo ē de ɔ̄chɛ ogwīihi nūma̍ lɔkɔkɔ nīi n de de ala̍ ma̍. 15N lwɔhu̍ ge̍ē bī okpo yī u ē ya̍ lɔkɔ nīi o̍ hi um ɔtū ma̍. Kɛ̄ɛ lɔkɔ nīi lɛ yaya ma̍ nīi ala̍ ē tū um uji ma̍?’ ”
16Iji̍sɔ̄ɔsi de chlɛhu̍ bɛ̍ɛ̄nɛ̄ hīka, “Wu̍chē yī ɔla̍ā, egwīihi ge̍ē yɔbū, ɛyɔbū ge̍ē gwīihi.”
Iji̍sɔ̄ɔsi gba̍a kɛlā ku̍ ɔpīyaku̍ yī nū o̍mgbo̍mɛta̍
(Ima̍aki 10:32-34; Ilu̍uku 18:31-34)
17Iji̍sɔ̄ɔsi pīya yɛ gāa Ijɛru̍sālɛm ma̍, o̍ nyā la a̍chi̍kpo̍ yī nū āchɛ igwo̍lɛpa ɛla̍ā ga ɛkū ge̍ kɛlā fi̍yɛ̍ de wa̍. E̍ chī yɛ abɔ̍ɔ ē yɛɛ i̍ngi̍ngɔ̍ɔ ē ga iyɔ̄bū. 18O̍ koko̍o de wa̍ hīka, “Ala̍ ma̍ gɛ ko̍ō! Ijɛru̍sālɛm nīi alɔ yɛ ma̍ yɛ gāa a̍nɛ. E̍ ge̍ē wa̍ābɔ̄ la Ɔyi̍ yī Ɔngrɔ̄ɔ ē de alɛhu̍ aligbe ba̍la āchɛ ongū Lihɔ yī Iju̍u; e̍ ge̍ē hɛ̍ ɔ̄ ɔpīyaku̍. 19E̍ ge̍ē wa̍ābɔ̄ la anu̍ ē de Ɛchɛkɔcha. E̍ ge̍ē bī ɔ̄ ya̍, ē gwō ɔ̄ lijē la a̍grɛ̄chi̍, o̍bū de ɔ̍ ē gwōba̍ la ɔchi̍ ɔhrɛ̍ɛpa. Ɔ̄chī ɔmɛta̍, o̍ ge̍ē hye̍ēyī la okū wā la ɔhɔ̄leyī.”
Ɔjā nīi ɔnyā ɔha̍ chikpo̍ de ayi̍ yī nū ma̍
(Ima̍aki 10:35-45)
20Ɛ̍nɛ̍ yī ayi̍ yī Ijɛ̍bɛ̄di bī ayi̍ yī nū anāngrɔ̄ɔ āchɛ ɛpa ɛla̍ā wā dikpo̍ba̍ Iji̍sɔ̄ɔsi ge̍ē ra̍ābɔ̄ yī lɛlā ɔha̍ pu̍ kpɛ̍ɛ de Iji̍sɔ̄ɔsi.
21Iji̍sɔ̄ɔsi che ɔ̍ ikpo̍ ka oji̍ nīi ɔ̍lɔ chikpo̍ ma̍?
O̍ ka de Iji̍sɔ̄ɔsi bɛ̍ɛ̄nɛ̄ hīka, “N chikpo̍ nīi a ge̍ē ya̍ lɛbɛ nīi ayi̍ yī u anāngrɔ̄ɔ āchɛ ɛpɛpa nūma̍ ge̍ hɔ̄ bla̍a awɔ yɛ̄grāa nīi a ge̍ē re̍ Ɔchwɔ̄lɛ̍ ma̍. Ɔha̍ ge̍ hɔ̄ la wāā yī abɔ̄ līre̍ yī wɔ, ɔha̍ ge̍ hɔ̄ la abɔ̄ līfīyē.”
22Iji̍sɔ̄ɔsi hīya aa̍ ɔkɔ bɛ̍ɛ̄nɛ̄ hīka, “Ala̍ i̍ je̍ ɔjā nīi ala̍ yɛ aa̍ ē chikpo̍ ma̍ ni̍. Ala̍ ma̍ ge̍ē gwa̍ ɔjā la ɔgba̍galā yī ichi̍ nīi ami ge̍ē gwa̍ ma̍ ē mɛ?”
Aa̍ āchɛ ɛpɛpa de chɛ̄ ka aɛ̍lɛ ge̍ē gwa̍ ē mɛ.
23Iji̍sɔ̄ɔsi koko̍o de wa̍ bɛ̍ɛ̄nɛ̄ hīka, “Lēchi̍ nɛ, ala̍ ge̍ē gwa̍ ɔjā la ɔgba̍galā yī u. Ami i̍ chī lwɔhu̍ ge̍ē hu ɔ̄chɛ nīi ge̍ē hyāhɔ̄ la abɔ̄ līre̍ yī u kɛ̄ɛ abɔ̄ līfīyē ma̍ ni̍. Ɛbɛ ɛla̍ā lā de āchɛ nīi Ɔwɔ A̍dā yī u ya̍ lā de wa̍ ma̍.”
24A̍chi̍kpo̍ yī Iji̍sɔ̄ɔsi āchɛ igwo̍ ehēhī plɛ̍ɛ̄lā ɔla̍ā ma̍, e̍ de kpo̍ wɔ̍ɔ̄tū tāa aɛ̍nɛ̍ āchɛ ɛpa ɛla̍ā. 25Wu̍chē yī ɔla̍ā, Iji̍sɔ̄ɔsi hī wā ɛra̍ wa̍a̍ ngmo̍tu̍chɛ̄, koko̍o de wa̍ hīka, “Ala̍ jo̍ōkū hīka āchɛ nīi ē deyīrɛ ɛbɛ yī ɛchɛkɔcha ma̍ ē ya̍ nīi āchɛ yī wā tū wā lichō. Alɛhu̍ yī wā ē de wɔhu̍ yī wā ē chabɔ̄. 26I̍ i̍ngɔ̍ɔ nīi iyī ala̍ ma̍ ge̍ē lɛ a̍ni̍. Ɔ̄chɛ ɔha̍ yī ala̍ ge̍ chikpo̍ ode pīya ɔmaga, ɔlɔjā ge̍ē hɔ̍chɛ̍ yī ala̍ āchɛ ehēhī. 27Ɔ̄chɛ ɔha̍ yī ala̍ ge̍ chī chikpo̍ ode pīya ɔ̄chɛ okwīyɔ̄bū, ɔlɔjā ge̍ē wɛ ɔfiyɛ yī ala̍ wa̍a̍. 28Lɔkɔ nīi Ɔyi̍ yī Ɔngrɔ̄ɔ lɛ ma̍; Ɔyi̍ yī Ɔngrɔ̄ɔ i̍ wā nīi āchɛ ge̍ē chrāa anu̍ ɛrɔ̄ ni̍. O̍ wā ge̍ē chrɛ̄ɛrɔ̄, nāa ɔhɔ̄leyī yī nū de hɛ̄ɛbɛ de āchɛ yɛ̄mɛ̄mɛ̄ hīya lɛfiyɛ.”
Iji̍sɔ̄ɔsi nyiya angrɔ̄ɔ āchɛ ɛpa ɛha̍ nīi priyī ma̍
(Ima̍aki 10:46-52; Ilu̍uku 18:35-43)
29E̍ yɛ ē pīya ē bū la Ijɛ̍rīko ma̍, āchɛ lyɛ̄mɛ̄ kpɛ̍ɛ nīi pɛ̍ ku Iji̍sɔ̄ɔsi ma̍. 30Angrɔ̄ɔ āchɛ ɛpa ɛha̍ nīi priyī ma̍ hyāhɔ̄ abɔ̍ɔ bla̍a oko̍o yī ɔpɔ̄pū. E̍ po̍ hīka Iji̍sɔ̄ɔsi ɔ̍lɔ yɛ ē ga a̍nɛ ma̍, e̍ kū la oto̍ohwe̍e hī ɔ̄ ɛra̍ bɛ̍ɛ̄nɛ̄, “Ībī yī Ide̍bīidi! Chu̍chu̍u mlɛ̍ha̍ yī alɔ oo, Ādā!”
31Āchɛ ka tāa aa̍ ka ɛ̍lɛ ge̍ cho̍cho̍ la ojiya. Ɔla̍ā kpɛ̍ɛ nīi e̍ e̍e to̍ohwe̍e gbōō we̍ a̍nɛ, “Ībī yī Ide̍bīidi! Chu̍chu̍u mlɛ̍ha̍ yī alɔ oo, Ādā!”
32Iji̍sɔ̄ɔsi ku̍ jīyarɛ bɛ̍ɛ̄nɛ̄, de ɛra̍ hī wā, che wa̍ ikpo̍ hīka oji̍ nīi ɛ̍lɛ chikpo̍ nīi anɔ̍lɔ ge̍ē ya̍ ē de ɛ̍lɛ ma̍?
33E̍ ka ɔ̍lɔ ge̍ Ādā, aɛ̍lɛ chikpo̍ nīi ɔ̍lɔ ge̍ē de īkprī yī aa̍ lwāa.
34Iji̍sɔ̄ɔsi mlɛ̍ha̍ yī wā de abɔ̄ gwō wā la īkprī. Ɔpɔ̄ɔpɛ̄, e̍ de myɛ̍ma̍ i̍ngɔ̍ɔ ke̍e̍. E̍ pīya ku Iji̍sɔ̄ɔsi la u̍tu.
Okuqokiwe okwamanje:
Ima̍tiyu 20: YBASR
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2020 Bible Society of Nigeria (second edition)
