Ima̍tiyu 19
19
Lɛlā yī lɛba̍ ode kwɛ̍ɛjī
(Ima̍aki 10:1-12)
1Iji̍sɔ̄ɔsi kwɛ̍ɛjī lɛlā nūma̍ wa̍a̍ la ɔkɔ̄ka ma̍, o̍ pīya hī Iga̍līli ga ajɛ yī Ijudi̍ya nīi hɔ̄ la oe̍ ɔla̍nū yī Ɔkpa̍ yī Ijɔ̍dan ma̍. 2Āchɛ lyɛ̄mɛ̄ kpɛ̍ɛ nīi pɛ̍ ku ɔ̍ ma̍. O̍ de wa̍ nyiya wa̍a̍ abɔ̍ɔ.
3Āchɛ yī Ifa̍rasīi ɛha̍ wā dikpo̍ba̍ ɔ̄ abɔ̍ɔ. E̍ chikpo̍ ge̍ē trɛ̍ɛda ē gwō ɔ̄ la ikpo̍ yī lɛlā ɔha̍. E̍ che Iji̍sɔ̄ɔsi ikpo̍ hīka, “Lihɔ yī alɔ ma̍ chɛ̄ ka ɔ̄chɛ ɔ̍lɔ ge̍ ta̍ ɔnyā yī ɔ̍lɔ wu̍chē yī lɛlā ɔha̍ nīi - ɔ̍lɔ ge̍ hɔ̄ ma̍?”
4Iji̍sɔ̄ɔsi hīya aa̍ ɔkɔ hīka, “O̍ re̍ka ala̍ i̍ ma̍ Īpū yī Ɔwɔ po̍ i̍ngɛ̍ɛ̄nɛ̄ je̍ ni̍?
“ ‘La owu̍tu, Ɔwɔ nīi ya̍ ɛjā wa̍a̍ ma̍ ya̍ ɔngrɔ̄ɔ ba̍la ɔnyā.
5Ɔwɔ ka bɛ̍ɛ̄nɛ̄ hīka, wu̍chē ɔla̍ā nīi ɔngrɔ̄ɔ ɔ̍lɔ ē pīya
hī a̍dā yī ɔ̍lɔ ba̍la ɛ̍nɛ̍ yī ɔ̍lɔ ge̍ē ngmo̍tu̍chɛ̄ ba̍la ɔnyā yī ɔ̍lɔ a̍nɛ.
Ɛ̍lɛ āchɛ ɛpa ɛla̍ā ɛ̍lɛ de ē pīya āchɛ ūkpo̍he bɛ̍ɛ̄nɛ̄.’
6Bū la ɛbɛ ɔla̍ā, e̍ i̍ re̍ka āchɛ ɛpa gɛ ni̍;
āchɛ ūkpo̍he kpo̍kpo̍ bɛ̍ɛ̄nɛ̄ nɛ.
Ɔjā nīi Ɔwɔ de ngmo̍tu̍chɛ̄ la ɛbɛ ūkpo̍he ma̍,
ɔ̄chɔ̄chɛ ge̍ e̍e gba̍a de ɔ̍ yi̍ya gɛ ni̍.”
7Āchɛ yī Ifa̍rasīi ɛla̍ā gba̍a che ɔ̍ ikpo̍ hīka, “Oji̍ chī - ohu̍ nīi Imo̍sīisi ka de alɔ ka ɔ̄chɛ ɔ̍lɔ ge̍ de īpū de ɔnyā yī ɔ̍lɔ ka hīka lɛba̍ ɔ̍lɔ kwɛ̍ɛjī mɛ̍ nīi lɛba̍ ē de ē kwɛ̍ɛjī i̍ngɔ̍ɔ ma̍?”
8Iji̍sɔ̄ɔsi hīya aa̍ ɔkɔ hīka, “Ala̍ ma̍ gɛ ko̍ō! Wu̍chē lɔkɔ nīi ala̍ lichi̍chi̍ lɛlā ongū ala̍ ongōngū ma̍, anu̍ - ohu̍ nīi Imo̍sīisi chɛ̄ ka ala̍ ɔ̍lɔ ge̍ ta̍ anyā yī ala̍ i̍ngɔ̍ɔ a̍nɛ. Nɛ̄ni̍, o̍ i̍ lɛ i̍ngɔ̍ɔ bū la yɛ̄grāa nīi Ɔwɔ ya̍ ɛjā wa̍a̍ ma̍ ni̍. 9N chī ge̍ē koko̍o ē de ala̍! Ɔ̄chɛ nīi ge̍ ta̍ ɔnyā yī nū, nīi ɔnyā ɔ̍lɔma̍ i̍ ge̍ ya̍ u̍mūda̍rī o̍bū ni̍, ɔlɔjā ge̍ pīya ge̍ wu̍ ɔnyā ɔha̍, o̍ re̍ka ɔlɔjā la̍ ɔ̍bɔ̍ɔ̄nyā.”
10A̍chi̍kpo̍ yī Iji̍sɔ̄ɔsi ka bɛ̍ɛ̄nɛ̄ hīka, “Ɔ̍lɔma̍ o̍ ge̍ - i̍ngɛ̍ɛ̄nɛ̄ nīi lɛlā yī ɔngrɔ̄ɔ ba̍la ɔnyā yī nū lɛ a̍nɛ, o̍ i̍ ngma̍ nīi ɔ̄chɛ ē wu̍ ɔnyā ni̍.”
11Iji̍sɔ̄ɔsi hīya aa̍ ɔkɔ hīka, “Ala̍ ma̍ gɛ ko̍ō! Lɛlā ongōngū nūma̍ i̍ lā ku āchɛ wa̍a̍ ni̍. Āchɛ nīi Ɔwɔ de de wa̍ ma̍ nīi o̍ lā ku wa̍ a̍nɛ. 12Lɛlā lyɛ̄mɛ̄mɛ̄ nīi ē hu̍ nīi āchɛ i̍ ē wu̍ ɔnyā ni̍ ma̍: Āchɛ ɛha̍ i̍ ē wu̍ ɔnyā ni̍, wu̍chē yī ɔmɔ̄ma nīi e̍ ma wa̍ i̍ngɔ̍ɔ ma̍. Ɛha̍ i̍ ē chī wu̍ ni̍, wu̍chē yī ɔyɔ̍ɔ̄ya̍ nīi āchɛ ɛha̍ de wa̍ ya̍ i̍ngɔ̍ɔ ma̍. Āchɛ ɛha̍ i̍ ē chī wu̍ ni̍ wu̍chē yī lɛlā yī ɔchwɔ̄lɛ̍ Oro̍ōre̍ yī Ɔwɔ. Ɔ̄chɛ nīi ge̍ yɛ ge̍ē ya̍ ē mɛ, o̍ ge̍ nāa lɛlā ongōngū nūma̍ i̍ngɔ̍ɔ!”
Iji̍sɔ̄ɔsi de ɔpiyɛ de aɛ̍pɛ̄ enīchi̍chɛ̍
(Ima̍aki 10:13-16; Ilu̍uku 18:15-17)
13Āchɛ ɛha̍ bī aɛ̍pɛ̄ enīchi̍chɛ̍ wā ge̍ de Iji̍sɔ̄ɔsi hɛ̄ɛbɛ nīi o̍ ge̍ē de abɔ̄ che wa̍ lɛhu̍ ē jɔhā de wa̍. A̍chi̍kpo̍ yī Iji̍sɔ̄ɔsi ka tāa āchɛ ɔ̍lɔma̍. 14Iji̍sɔ̄ɔsi ka bɛ̍ɛ̄nɛ̄ hīka, “Ala̍ pi̍ye̍mā hī aɛ̍pɛ̄ nīi e̍ ge̍ wā dikpo̍ba̍ u. Ala̍ e̍e gū wā ɔpɔ̄pū ni̍; ma̍a ɔpiyɛ yī ɔchwɔ̄lɛ̍ Oro̍ōre̍ yī Ɔwɔ - iyī āchɛ bāa aa̍ enūma̍ ma̍ nɛ.”
15O̍ wā ge̍ de abɔ̄ che wa̍ lɛhu̍ i̍ngɔ̍ɔ wa̍a̍ o̍bū pīya.
Oye̍kre̍biya ɔha̍ nīi - ɔlwɔdu ma̍
(Ima̍aki 10:17-31; Ilu̍uku 18:18-30)
16Yɛ̄grāa ɔha̍, ɔngrɔ̄ɔ ɔha̍ wā dikpo̍ba̍ Iji̍sɔ̄ɔsi ge̍ chikpo̍ hīka, “Ɔngūlɛ̄lā be̍e! Lɛlā ɔnɛ̄ɛhɛhi ɔna̍ nīi n ge̍ē ya̍ o̍bū nīi n ge̍ē lɛ ɔhɔ̄leyī i̍mɔ̄mɛni̍ ma̍/?”
17Iji̍sɔ̄ɔsi hīya anu̍ ɔkɔ hīka, “Oji̍ - ohu̍ nīi a che um ikpo̍ yī lɛlā ɔnɛ̄ɛhɛhi ɔyɔ̍ɔ̄ya̍ ma̍? Je̍ka Ɔwɔ lōri̍īnū - ɔ̄chɛ ɔnɛ̄ɛhɛhi a̍nɛ. A ge̍ chikpo̍ ge̍ē chɛ̄ gāa ɔhɔ̄leyī, ɔ̍lɔma̍ de Lihɔ yī Ɔwɔ gbō.”
18O̍ che iji̍sɔ̄ɔsi ikpo̍ ka ɔ̍lɔ - Lihɔ ɛna̍ nɛ?
19Iji̍sɔ̄ɔsi hīya anu̍ ɔkɔ hīka, “Lihɔ nīi hɔ̄ ma̍ ma̍ nɛ: A ā ngmo̍ ɔ̄chɛ ni̍. A ā la̍ ɔ̍bɔ̍ɔ̄nyā ni̍. A ā wūwī ni̍. A ā warīmɛ̄ ni̍. Tū a̍dā yī wɔ ba̍la ɛ̍nɛ̍ yī wɔ lichō. Ywɔ̍ɔnyɛ yī ɔ̍nyīmɔ̄chɛ yī wɔ bāa awɔ ɔlɔjā ma̍.”
20Oye̍kre̍biya ɔla̍ā ka de Iji̍sɔ̄ɔsi hīka anɔ̍lɔ gbō Lihɔ nūma̍ i̍ngɔ̍ɔ wa̍a̍ mɛ̍. Oji̍ nīi anɔ̍lɔ ge̍ē gba̍a ē ya̍ ma̍?
21Iji̍sɔ̄ɔsi koko̍o de ɔ̍ hīka, “A ge̍ chikpo̍ ge̍ē hwɔhi ē gɔ̄grāa, gāa ge̍ de ɛjā nīi a lɛ wa̍a̍ ma̍ kpo̍ ra̍, nīi a ā de okpo yī nū kɔ̄ de alyeklo̍, hɛ̄ɛbɛ nīi wɔdu yī wɔ ge̍ hɔ̄ la ɛbɛ yī Ɔchwɔ̄lɛ̍ Oro̍ōre̍ yī Ɔwɔ. Nīi a ā pīya wā ge̍ ku u la u̍tu.”
22Oye̍kre̍biya ɔla̍ā plɛ̍ɛ̄lā nūma̍ ma̍, o̍ pīya la eyīwɔnɔ-eyīwɔnɔ; wu̍chē oji̍ nɛ, o̍ gbwɔdu kpɛ̍ɛji.
23Iji̍sɔ̄ɔsi koko̍o de a̍chi̍kpo̍ yī nū bɛ̍ɛ̄nɛ̄ hīka, “Ala̍ ma̍ ko̍ō! O̍ ge̍ē lichi̍ gba̍a̍ ē de ɔlwɔdu la otū la Ɔchwɔ̄lɛ̍ Oro̍ōre̍ yī Ɔwɔ. 24Lēchi̍-lēchi̍, n ā koko̍o de ala̍! O̍ ge̍ē hɛ̍ kpɛ̍ɛ ē de ɛbɛ̍ obīho̍ ogbigū la ɔga la a̍rɛ̍pa̍ yī ɔnya̍ hi̍ ɔlwɔdu otū la Ɔchwɔ̄lɛ̍ Oro̍ōre̍ yī Ɔwɔ.”
25A̍chi̍kpo̍ yī Iji̍sɔ̄ɔsi plɛ̍ɛ̄lā nūma̍ ma̍, o̍ de ya̍ wā lɛbɛ̍bi̍ ɔlamu-ɔlamu. E̍ ka ɔ̄nyɛ kpɛ̍ɛ ɔ̍lɔ chī ge̍ē lɛ ɔhɛ̍ta̍ bɛ̍ɛ̄nɛ̄ ma̍?
26Iji̍sɔ̄ɔsi ma̍ wā chi̍i̍, hīya aa̍ ɔkɔ hīka, “Ala̍ ma̍ ko̍ō! Āchɛ̄ɛchɛ i̍ ē ya̍ ē mɛ ni̍ a̍nɛ. Ɔwɔ ma̍, ɔjɔ̄jā i̍ lichi̍chi̍ de ɔ̍ ni̍.”
27Ipi̍ta hu oko̍o kpa̍ ka bɛ̍ɛ̄nɛ̄ hīka, “Ma̍ gɛ! Alɔ nīi chī pīya hī ɔjāha̍-ɔjāha̍ wa̍a̍, pīya wā ge̍ ku wɔ la u̍tu ma̍ bɛ̍ɛ? Oji̍ nīi alɔ ge̍ē lɛ ma̍?”
28Iji̍sɔ̄ɔsi koko̍o de wa̍ hīka, “Lēchi̍-lēchi̍, n ā koko̍o de ala̍! Yɛ̄grāa yī yɛchɛ onīpīpɛ̄, Ɔyi̍ yī Ɔngrɔ̄ɔ ge̍ē hyāhɔ̄ la atɛ̍ yī rīgā yī nū yɛ̄grāa ɔla̍ā ma̍, ala̍ āchɛ igwo̍lɛpa nīi - alikpɛ̍ɛ yī u ma̍ ge̍ē hɔ̄ la atɛ̍ i̍ngi̍ngɔ̍ɔ hlɛ̍ɛ̄pɔ̄ yī ipwɔ̍ɔma igwo̍lɛpa yī I̍sɛ̄rɛli. 29Ɔ̄chɛmɔ̄chɛ nīi ge̍ chī pīya hī wɔlɛ̍, kɛ̄ɛ aɛ̍nɛ̍, kɛ̄ɛ a̍dā ba̍la ɛ̍nɛ̍, kɛ̄ɛ ayi̍, kɛ̄ɛ yɛrɔ̄ yī nū wu̍chē yī u, Ɔwɔ ge̍ē de ē gla ɔla̍ā ta̍ iko ohu ɛrwɔ̄ de ɔlɔjā. Ɔwɔ chī ge̍ē de ɔhɔ̄leyī i̍mɔ̄mɛni̍ de ɔlɔjā. 30Āchɛ yɛ̄mɛ̄mɛ̄ nīi yɔbū u̍ma̍ama ma̍ ge̍ē de ē gwīihi; āchɛ yɛ̄mɛ̄mɛ̄ nīi chī gwīihi u̍ma̍ama ma̍ chī ge̍ē de ē yɔbū.
Okuqokiwe okwamanje:
Ima̍tiyu 19: YBASR
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2020 Bible Society of Nigeria (second edition)
