Akisy. 22
22
Tolimok Akuj Aburaam alemun Isaka erae amuronot
(Ŋibur. 11:17-19)
1Kelunyar ŋakiro ŋun daadaŋ, kikatak Akuj Aburaam tonyara iŋes tema, “Aburaam,” Tema Aburaam, “Ayai.” 2Tema Akuj, “Ya lokoku kon Isaka ŋolo donupei ŋolo imina iyoŋ, toloto nakibois ŋina enyaritae Moria. Ani idolete nen, ikiinak iŋes ayoŋ erae amuronot ŋina epeyo alomukura a epei a nen, a ŋolo eketoodikini ayoŋ iyoŋ.” 3Tonyou nai Aburaam taparacu sek, toenik esigirya keŋ; ya ŋisorok ŋiarei ŋulu arae ŋiketiyak keŋ kaapei ka Isaka lokoku keŋ. Kibelu ŋakito ŋunapeyet amuronot, tolot nakibois ŋina alimokinit Akuj iŋes. 4Ani edolete ŋirwa ŋiuni, kiŋoliya Aburaam kiŋaren, kiŋolik akibois ŋina alosi iŋes keapuu. 5Tolimok Aburaam ŋisorok keŋ ŋul tema, “Kidoŋo iyes ne kaapei ka esigirya; ikirukori ayoŋ ka edya ama nakibois ya akilip, ido nai toboŋunoe neni kus.” 6Tolacu Aburaam alosigirya ŋakito ŋunapeyet amuronot, toatok neni a lokoku keŋ Isaka, totiŋ iŋes akim ka ekileŋ, toloto ikes make ŋiarei. 7Tema Isaka neni a papa keŋ, “Papa,” Tema papa keŋ, “Ayai lokoku.” Kiŋit Isaka iŋes tema, “Eyakasi akim ka ŋakito ne, nai nyaani bo imesek ŋini erae amuronot ŋina epeyo?” 8Tema Aburaam, “Lokoku, Akuj alope elemuni imesek ŋini erae amuronot ŋina epeyo.” Torubakis ikes ŋiarei make elosete.
9Ani edolunete ikes nakibois ŋina alimokinit Akuj Aburaam, todukok Aburaam Namuroet nen, kinapinapak ŋakito ejok, toen lokoku keŋ Isaka kidokok nakito kidiama Namuroet. 10Kiopeu Aburaam ekileŋ a akan aarya lokoku keŋ. 11Nai tonyara emalaika ke Ekapolon Aburaam anakuj tema, “Aburaam, Aburaam.” Tema Aburaam, “Ayai.” 12Tema emalaika, “Kimyek edya, nyitiya idiobore neni keŋ, anerae ayenu ayoŋ atemar ikerit iyoŋ ŋuna ka Akuj, ido nyimika iyoŋ Akuj lokoku kon ŋolodonupei.” 13Kikeu Aburaam ereet keŋ, toŋoleŋolek, kiŋolik emesek ikamunito ŋaten ŋuna ke elogilog anamoni ŋamomwar. Tolot Aburaam toriku emesek inak neni ka Akuj erae amuronot ŋina epeyo akilo ainakin Akuj lokoku keŋ. 14Aŋun, abu Aburaam tolimok ekiro a akibois a ŋin, “Elemuni Ekapolon”; tari tokona ebasi ŋituŋa, “Alomukura a ŋolo ke Ekapolon, ikilemikinio.”
15Tonyara emalaika ke Ekapolon Aburaam anakuj anyaraet ŋina a ŋaarei, 16tema, “Ebala Ekapolon, ekoŋ ayoŋ alokiro kaŋ ebe, ‘Aŋakiro aŋuna itiya iyoŋ a ŋun, a ŋina nyimika iyoŋ ayoŋ lokoku kon ŋolodonupei, 17eketerereŋi ayoŋ iyoŋ kire jik, ido akainakini ayoŋ iyoŋ kire jik ŋipapae ŋulu alalak ikwa ŋikacer alokidiama ka elalata ikwa asinyon alokipetot a anam. Ikamarete ŋiletok kon ŋitaunio daadaŋ a ŋimoe kec, 18ido eterereŋi ayoŋ ŋituŋa ŋulu ka akwap daadaŋ aŋuna a ŋiletok kon, anerae idau iyoŋ akiwuap ŋakiro kaŋ.’” 19Toboŋo Aburaam a nen, tolot neni aya ŋisorok keŋ ŋulu sek emyekinit iŋes, toboŋosi kaapei Beeriseba; ido torubak Aburaam iboi alo Beeriseba.
Ŋidwe a Naor
20Kelunyar ŋakiro ŋun, tolimokinae Aburaam ebe, “Aryamu lokaato kon Naor ŋidwe aneni a Milika a aberu keŋ. 21Ekiro a ŋolo esyaunan erae Us, lokaato keŋ iŋes Bus, Kemuel papa ka Aram iŋes epei, ŋuluce ikes lu: 22Kesed, Aso, Pilidas, Yidilap ka Besuel.” 23Touru Besuel Rebeka. Milika aberu a Naor alokaato ka Aburaam iŋes abu touru ŋidwe ŋul ŋikanikauni. 24Touru apese a Naor ŋina anyaritae Reuma ŋidwe lu: Teba, Gaam, Taas ka Maaka.
Okuqokiwe okwamanje:
Akisy. 22: NIB2008
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Ngakarimojong Interconfessional Bible © Bible Society of Uganda, 2008.