Akisy. 13
13
Totyakas Aburam ka Lot.
1Towuotu Aburam alo Ijipit kaapei ka aberu keŋ ta ibore daadaŋ ŋini kebu iŋes toryamu. Arukito iŋes ka Lot ewuosete lowae ŋolo a Negeb.
2Apaki ŋin, abarit Aburam nooi, ayakar ŋibaren, esilipa ka egolid. 3Torubak Aburam ewosi iwadio a ŋirwa ameun alowae a ŋolo a Negeb tari neni adolio Besel, nakibois ŋina paan ekiŋaren abu iŋes kigurok eema apaki ŋina alomitor iŋes kidiŋ Besel ka Ai. 4Nakibois ŋin abu iŋes ekiŋaren todukok Namuroet, kilipya alokiro a ŋolo ke Ekapolon. 5Lot daŋ ŋolo awuosete kaapei ka Aburam, ayakar ŋamesekin ka ŋaatuk ta ŋiemae. 6Pa apedorit ebari kec akisiboi ikes kaapei anakwap a ŋin, anerae alal ebari kec nooi. 7Aŋun, abu ebura toyakaun kidiŋ ŋikeyokok a ŋibaren ka Aburam ka ŋikeyokok a ŋibaren a Lot. Ayakasi daŋ apaki ŋin, Ŋikanaani ka Ŋiperisi nakwap ŋin.
8Tolimok Aburam Lot tema, “Nyemaikina ebura edio min kidiŋ kaŋ ka iyoŋ, kori kidiŋ ŋikeyokok kaŋ ka ŋikeyokok kon, anerae ikirae iwon ŋikilyok ka ikirae ŋikaitotoi. 9Iite bo iyoŋ akwap na daadaŋ! Ekelipit ayoŋ iyoŋ otyakas ka ayoŋ. Ani kiseu iyoŋ akiwuot lowae ŋolo alo kedyeny, awuosi ayoŋ lowae ŋolo alo teten; kori ani kiseu iyoŋ akiwuot lowae ŋolo alo teten, awuosi ayoŋ lowae ŋolo alo kedyeny.” 10Toŋoleŋolek Lot erounit akwap ŋin daadaŋ, ani iŋoliyari lowae ŋolo a Yorodan, kiŋolik ŋadipoe ŋuna a Yorodan erae ŋuna elelenakini ejok alowaetin a daadaŋ, ikwaan ke emanikor ŋolo ke Ekapolon ka akwap ŋina a Ijipit alowae a ŋolo a Soar. Apaki ŋin, ariŋa Ekapolon nyinyasuna Sodoma ka Gomora. 11Toseu Lot ŋadipoe ŋuna a Yorodan, towot lowae ŋolo alo Kide; aŋun, totyakas ikes. 12Kiboi Aburam alo Kanaan, ido kiboiyo Lot lotaunio ŋulu a ŋadipoe a Yorodan, todukok eema keŋ Sodoma. 13Nai aneni ke Ekapolon, aroko ka arae ŋikasecak nooi ŋikilyok ŋulu alo Sodoma.
14Kedau Lot atyakar aneni ka Aburam, tolimok Ekapolon Aburam tema, “Toŋoleŋolek mono iyoŋ kiŋoliya a ne aneni iyai iyoŋ lowae ŋolo alo Kuju ka ŋolo alo Kwap, lowae ŋolo alo Kide ka ŋolo alo To. 15Akainakini ayoŋ iyoŋ ka ŋiletok kon akwap na daadaŋ ŋina ite iyoŋ toruwor ŋina kus jik. 16Etipituni ayoŋ ŋiletok kon tolalata ikwa apuwa ŋina ka akwap, ani kepedori ituŋanan akimar apuwa, iŋes atemar epedor ŋiletok kon daŋ akimarun. 17Tonyou! Kirimok akwap ŋin daadaŋ etya neni etya, anerae abuni ayoŋ ainakin iŋes neni kon.” 18Towotok Aburam a nen tocuna eema keŋ, bu tolom kidiŋ ŋikuyono ŋulu a Mamure anakwap a ŋina enyaritae Eburon. Todukok Aburam Namuroet nen aŋuna ke Ekapolon.
Okuqokiwe okwamanje:
Akisy. 13: NIB2008
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
Ngakarimojong Interconfessional Bible © Bible Society of Uganda, 2008.