Lukas 14
14
Pinakoleꞌ weꞌ si Isa aꞌa masakihin
1Dambuwaꞌ ellew liꞌi, pī si Isa mangan si lumaꞌ dambuwaꞌ nakuraꞌ meꞌ Pariseohin. Paglaꞌi iye, pinateng-patengan iye weꞌ meꞌ aꞌa malaꞌihin. 2Niyaꞌ laꞌi aꞌa saki, bahaꞌ lengngennen duk pusuꞌnen. 3Tinilew weꞌ si Isa meꞌ guru si saraꞌ āgamahin duk meꞌ Pariseohin, paꞌinne, “Ngalanggalan saraꞌ ke magpakoleꞌ si ellew liꞌihin atawa gaꞌi?” 4Saguwaꞌ gaꞌ siye nambung. Manjari inantan weꞌ si Isa aꞌa masakihin duk pinakoleꞌ weꞌ ne, ubus bu pinapoleꞌ ne weꞌ ne. 5Ubus miyaꞌan, tilewne meꞌ aꞌahin, paꞌinne, “Ine hinangbi bang upama niyaꞌ anakbi atawa sapiꞌbi laboꞌ dem kupung baytu ellew liꞌi? Araꞌ-araꞌku asal magtawus kaꞌam pī nabang iye bisan ne ellew liꞌi.” 6Gaꞌ ne siye kapanganjawab.
Panoloꞌ si meꞌ tabatikin duk magbatikin
7Tapandoga si Isa meꞌ aꞌa tabatikin, weꞌ peneꞌde meꞌ paningkoloꞌan para si meꞌ mabangsahanin. Hangkan inakahan siye weꞌ ne dambuwaꞌ dalilan, paꞌinne, 8“Bang kew tabatik pī si pagkawinan, daꞌa kew ningkoloꞌ si paningkoloꞌan para si meꞌ mabangsahanin. Kaw-kaw pe niyaꞌ bangsahan amban kaꞌu tabatik. 9Bu ne pī dapuꞌ pagkādjaꞌanin duk magpaꞌin si kaꞌu, ‘Palinda be kew. Ambat aꞌa inin ningkoloꞌ luꞌu.’ Manjari iyaꞌ kew bu subey ne kew ningkoloꞌ si tindakan. 10Saguwaꞌ bang kew tabatik, ningkoloꞌ kew si tindakan, duk pagpī dapuꞌ pagkādjaꞌanin, paꞌinne du si kaꞌu, ‘Bagay, daꞌa kew ningkoloꞌ luꞌu. Pī kew pakōkan.’ Manjari takite du weꞌ meꞌ sinduwe tabatikin weꞌ pinahadje kew. 11Peggeꞌ sine-sine mahadje dine, pinadiyawaꞌ du. Duk sine-sine madiyawaꞌ dine, pinahadje du.”
12Manjari paꞌin si Isa si aꞌa makabatik iyehin, “Na, kaꞌu isab, bagay, bang kew ngahinang pagjamu-jamuhan, daꞌa iye batikun meꞌ bagaynun atawa meꞌ pungtinaꞌinun atawa meꞌ usbanun, atawa meꞌ saweꞌnu magtapit lumaꞌ madayahanin. Peggeꞌ bang siye binatiknun, batikde du kew isab iyan bang siye magkādjaꞌan. Manjari tatumbasande hininangnu si siyehin. 13Saguwaꞌ bang kew ngahinang pagjamu-jamuhan, iye batikun meꞌ aꞌa mamiskinin, makukuꞌin, mapengkaꞌin, duk mapessekin. 14Bang inin hinangnu, kēgan du kew iyan manamal peggeꞌ gaꞌi kew katumbasande. Tuhanin manumbasan kaꞌuhin si ellew dambuli bang pinakellum ne balik meꞌ aꞌa mabentelin.”
Dalilan sabab pagjamu-jamuhan mahadjehin
(Mateo 22:1-10)
15Dangan meꞌ mamangan malaꞌihin, pagkalene meꞌ binissā si Isa miyaꞌan, paꞌinne, “Asal kēgan paꞌin aꞌa mamangan si pagjamu-jamuhan dem pagbayaꞌan Tuhanin.” 16Manjari inakahan iye weꞌ si Isa dambuwaꞌ dalilan, paꞌinne, “Niyaꞌ aꞌa bakas magpanyap pagjamu-jamuhan hadje duk ekka tabatiknen. 17Pagtekka ellew pagjamu-jamuhin, dinaꞌak weꞌ ne daraꞌakannen pī si meꞌ tabatiknen moꞌo bissā, pinaꞌin, ‘Dayiꞌ ne kaꞌam, panyap ne kēmon.’ 18Saguwaꞌ saliꞌ-saliꞌ siye kēmon magtubad. Paꞌin tagnaꞌ papīhannen, ‘Gaꞌi ku tapī peggeꞌ bakas ku makabelli bulak duk subey dahuꞌ payamanku pī. Daꞌa ku puggutanun.’ 19Duk paꞌin dambuwaꞌin, ‘Bakas ku makabelli sapiꞌ sampūꞌ kayuꞌ duk tiyaꞌ ku dahuꞌ pī nginaman siye bang kapagbadjaꞌan ke. Daꞌa ku hadja puggutanun.’ 20Duk paꞌin dambuwaꞌin, ‘Baꞌahu du ku bakas kinawin, hangkan gaꞌi ku tapiyu.’ 21Manjari hap lumaꞌ ne daraꞌakanin duk inakahan weꞌ ne amunen. Astel teꞌed amunen pagkalene miyaꞌan duk paꞌinne si daraꞌakannen, ‘Pakale kew, pī kew palakkes si meꞌ kalsara duk si meꞌ kalān-lānan tuꞌu si lahat inin, duk boꞌohun pitu meꞌ mamiskinin, meꞌ makukuꞌin, meꞌ mapessekin, duk meꞌ mapengkaꞌin.’ 22Gaꞌ tiggel tekka ne balik daraꞌakanin duk paꞌinne si amunen, ‘Bakas hinangku ne pangandaꞌakannun, Tuwan, saguwaꞌ niyaꞌ pe lugal.’ 23Manjari paꞌin amuhin si daraꞌakannen, ‘Pī kew si meꞌ kalān-lānan mapadiyataꞌin duk si meꞌ lahat diyalemin duk buyuꞌ-buyuꞌun meꞌ aꞌahin nuhut pitu supaya pennoꞌ lumaꞌkun. 24Peggeꞌ akahante kaꞌam,’ paꞌinne, ‘gaꞌ niyaꞌ meꞌ aꞌa tabatikku dehelluhin makakinam kinakan pinanyapkun.’ ”
Kahunitan patindeg pu si Isahin
(Mateo 10:37-38)
25Palanjal ne isab si Isa si palengngananne duk banes teꞌed aꞌa nuhut iye. Manjari paharap iye si siye duk paꞌinne, 26“Bang niyaꞌ aꞌa pitu mabayaꞌ patindeg si aku, subey lasane si akuhin hadje amban lasane si saꞌi-samanen, duk si anak-andanen, duk si meꞌ pungtinaꞌinen lella-dende. Duk bisan lasane si dinen subey gaꞌi pahadje amban lasane si akuhin. Bang gaꞌi du kuweꞌ inin, gaꞌi iye makajari tindegku. 27Duk subey iye maglillaꞌ nandal kabinasahan duk bisan pe pinapatey sabab panuhutne akuhin. Dalilnen, kuweꞌ iye moꞌo olom pamapateyan iyehin. Bang gaꞌi iye maglillaꞌ bu nuhut aku, gaꞌi iye makajari tindegku. 28Bang niyaꞌ kaꞌam mabayaꞌ matengge lumaꞌ hadje, ningkoloꞌ dahuꞌ kaꞌam ngalkulane bang piye gastubin, supaya kataꞌuhanbi bang araꞌ-araꞌ takoleꞌbi du ke ngagastuhan sampay ubus atawa gaꞌi. 29Peggeꞌ bang gaꞌi kalkulabi dahuꞌ, pagtumengge ne meꞌ olomnen bu gaꞌ niyaꞌ pangubusbi, ujudnen kēmon mangite miyaꞌan ngahinang kaꞌam hadja dagey. 30Paꞌinde, ‘Aꞌa inin takoleꞌne nagnaꞌan lumaꞌnen matengge saguwaꞌ gaꞌi taꞌubusne.’ 31Atawa bang saꞌupama niyaꞌ sultan sōng pī magbonoꞌ duk sultan seddili, ningkoloꞌ iye mikil-mikil dahuꞌ bang araꞌ-araꞌ makaꞌatu ke iye duk tindegne sampūꞌ ngibuhin magbonoꞌ duk sultan duwempūꞌ ngibu tindegnen. 32Bang araꞌ-araꞌ gaꞌi iye makaꞌatu, na, tala pe kuntaranen, ngandaꞌak ne iye meꞌ aꞌane pī pasampang moꞌo bissā weꞌ mabayaꞌ ne iye maghāp. 33Damikkiyan isab kaꞌam,” paꞌin si Isa, “pikil-pikilun bi dahuꞌ peggeꞌ bang gaꞌi du kaꞌam maglillaꞌ nayikutan kēmonbin, gaꞌi kaꞌam makajari tindegku.”
Asin gaꞌ niyaꞌ gunane
(Mateo 5:13; Markus 9:50)
34Magdalilan ne isab si Isa, paꞌinne, “Kataꞌuhanbi du weꞌ asinin asal hāp. Saguwaꞌ bang asinin gaꞌ ne niyaꞌ lessane, gaꞌi ne maꞌasin balik. 35Gaꞌ ne niyaꞌ kagunahanne. Gaꞌi bisan taguna pagpalemmek bulak. Saguwaꞌ ilakasan hadja weꞌ aꞌa. Na,” paꞌin si Isa, “amey-amey pakalehun bi bang niyaꞌ pinaꞌin si kaꞌam.”
Okuqokiwe okwamanje:
Lukas 14: yakV
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2019, Wycliffe Bible Translators, Inc. All rights reserved.
