Lukas 13
13
Pagsusunanun duk lebbahanun dusenun
1Sābu miyaꞌan, niyaꞌ meꞌ aꞌa tekka pī magaka-aka pu si Isa sabab meꞌ aꞌa Jalil, dinaꞌak koꞌ siye pinapatey weꞌ Gubnul Pilatus sasangde magsumbaliꞌ hayep pagkulubande si langgal mahadjehin. 2Sambungan si Isa siye, paꞌinne, “Kannalbi ke pasōng duseden amban kēmon meꞌ aꞌa matuꞌu si Jalilin peggeꞌ kuweꞌ miyaꞌan maꞌumantag si siyehin? 3Dumaꞌin! Saguwaꞌ akahante kaꞌam, bang gaꞌi du pagsusunanbi duk lebbahanbi dusebin, kēmon kaꞌam matey du isab. 4Duk meꞌ aꞌa sampūꞌ duk waluꞌ mamatey laꞌi si Siluwamin, peggeꞌ kahebbaꞌan siye weꞌ lumaꞌ malangkewin, kannalbi ke pasōng duseden amban kēmon meꞌ aꞌa sinduwe mapatennaꞌ si Awrusalamin? 5Dumaꞌin! Saguwaꞌ akahante kaꞌam, bang gaꞌi du pagsusunanbi duk lebbahanbi dusebin, kēmon kaꞌam matey du isab.”
Dalilan sabab kayu manggaꞌi mabuwaꞌin
6Manjari aka si Isa si siye dalilan inin. Paꞌinne, “Niyaꞌ dambuwaꞌ aꞌa taga likus ubas duk laꞌi dem likus miyaꞌan niyaꞌ dam poꞌon kayu igira. Dambuwaꞌ ellew pī iye laꞌi miha buwaꞌ igira saguwaꞌ gaꞌ niyaꞌ kasuwaꞌne. 7Hangkan paꞌinne si tungguꞌ likusin, ‘Payamanun, tellun tahun ne pagpitu-pituku si poꞌon igira inin miha buwaꞌne, saguwaꞌ gaꞌ niyaꞌ kasuwaꞌku. Tebbenganun ne. Iyuꞌ hadja makasimbel meꞌ jambangan sinduwehin.’ 8Saguwaꞌ nambung tatungguꞌ bulakin, paꞌinne, ‘Daꞌa kew dahuꞌ, Tuwan. Ambat tahun inin bungkalku bulakin duk papīhanku pagpalemmek bulak. 9Bang buwaꞌ iye tahun mapasōng inin, hāp. Saguwaꞌ bang gaꞌi du buwaꞌ, daꞌakun saꞌ tinebbengan.’ ”
Dende bongkok kawuliꞌan si ellew liꞌi
10Dambuwaꞌ ellew Sabtuꞌ, ellew liꞌi, laꞌi si Isa magusihat si langgal meꞌ Yahudihin. 11Niyaꞌ dende laꞌi saki weꞌ seyitan dem sampūꞌ duk walun tahun ne. Bongkok iye duk gaꞌi tapatiludne barannen. 12Pagkite si Isa iye, ilinganan iye weꞌ ne duk paꞌinne, “Dende, lumuwas ne kew amban sakinu iyan.” 13Duk binettad weꞌ si Isa tangannen si iye. Magtawus iye tumilud duk pinudji weꞌ ne Tuhanin.
14Saguwaꞌ astel manamal nakuraꞌ langgal miyaꞌan peggeꞌ magpakoleꞌ si Isa si ellew liꞌi. Duk paꞌinne si meꞌ aꞌahin, “Ennem ellew dem da simanahin subey kite bi maghinang. Pitu kaꞌam meꞌ ellew miyaꞌan magpakoleꞌ, daꞌa bang ellew liꞌi.” 15Sambungan si Isa iye, paꞌinne, “Magmā-mā hadja kaꞌam iyan. Weꞌ gaꞌi kaꞌam dangan-dangan lekkahanbi sapiꞌbin atawa kuraꞌbin amban pangingketanbi iyehin bu boꞌobi pinaꞌinum bisan si ellew liꞌi? 16Dende inin tubuꞌ Ibrahim du kuweꞌ kaꞌamin. Iningketan iye weꞌ nakuraꞌ seyitanin dem sampūꞌ duk walun tahun. Gaꞌi ke iye sukat ilekkahan si ellew liꞌi?” 17Pamissā si Isa miyaꞌan, kaꞌiyaꞌ-iyaꞌan teꞌed meꞌ kuntaranen. Saguwaꞌ kēmon meꞌ aꞌahin kēgan teꞌed sabab meꞌ hinangan makaꞌulaliꞌ hininangnen.
Dalilan sabab bigi madikiꞌ-dikiꞌin
(Mateo 13:31-32; Markus 4:30-32)
18Missā pe si Isa namba, paꞌinne, “Ine pamasaliꞌante bi pagbayaꞌ Tuhan si meꞌ aꞌanen? Ine pangandalilku iyehin? 19Pagbayaꞌ Tuhan si meꞌ aꞌanen,” paꞌin si Isa, “kuweꞌ dalil da bayuꞌ bigi dikiꞌ-dikiꞌ teꞌed tinanem weꞌ aꞌa dem likusne. Tomoꞌ inin duk manjari kayu. Duk meꞌ manuk-manukin ngahinang sabakande diyataꞌ meꞌ pangene.”
Dalilan sabab pagpasulig addunin
(Mateo 13:33)
20Duk paꞌin si Isa balik, “Ine pangandalilku pagbayaꞌ Tuhan si meꞌ aꞌanen? 21Pagbayaꞌ Tuhan si meꞌ aꞌanen kuweꞌ dalil pasulig ineddoꞌ weꞌ dende bu pinasaget weꞌ ne pī dem tirigu duwempuk-lime kilu. Ubus inaddun weꞌ ne. Ubus nulig ne kēmon addunin.”
Gawang makiputin
(Mateo 7:13-14, 21-23)
22Palanjal si Isa tudju Awrusalam duk pabutas iye amban meꞌ puweblo duk meꞌ kalumaꞌan magtoloꞌ si meꞌ aꞌahin. 23Niyaꞌ dangan nilew iye, paꞌinne, “Tuwan, kulang du ke meꞌ aꞌa matimbulin?” Nambung si Isa duk paꞌinne si siye, “Pagbayaꞌan Tuhanin kuweꞌ dalil lumaꞌ gawangnen kiput. 24Tuyuꞌanun bi teꞌed paꞌasek amban gawang makiputin. Peggeꞌ akahante kaꞌam, weꞌ ekka iyan nuley paꞌasek, saguwaꞌ gaꞌi siye umasek. 25Pagkumuwat ne dapuꞌ lumaꞌin duk tabagatne ne gawangin, manjari laꞌi ne hadja kaꞌam si bukut nuttuk si gawang duk ngalingan, ‘O Tuwan, lukahanun kami.’ Sambunganne kaꞌam, paꞌinne, ‘Gaꞌi kataꞌuhanku bang amban kaꞌam.’ 26Manjari paꞌinbi iyan, ‘Gaꞌi taꞌessebnu? Matuꞌuhin magtuhut du kite mangan duk magusihat kew laꞌi si puweblo kami.’ 27Saguwaꞌ paꞌinne iyan si kaꞌam, ‘Akahante kaꞌam, asal gaꞌi kataꞌuhanku bang amban kaꞌam. Tahalaꞌ kaꞌam amban aku, kēmon kaꞌam maghinangan malaꞌatin.’ 28Manjari magmatey kaꞌam iyan laꞌi duk magtageꞌot meꞌ impenbin bang kitebi laꞌi diyalem kapapuꞌanbin disi Ibrahim duk si Isahak duk si Yakub duk kēmon meꞌ kanabi-nabihanin, bu kaꞌam laꞌi hadja si bukut. 29Duk tekka du iyan pī meꞌ aꞌahin amban ampat pidjū alamin magtipun, duk ningkoloꞌ siye laꞌi magkakanan dem pagbayaꞌan Tuhanin. 30Duk payamanun bi, niyaꞌ meꞌ aꞌa dumambuli kuweꞌituhin, dumehellu du si pasōngan, duk niyaꞌ meꞌ aꞌa dumehellu kuweꞌituhin, dumambuli du si pasōngan.”
Lasa si Isa si meꞌ aꞌa Awrusalamin
(Mateo 23:37-39)
31Manjari niyaꞌ tekka pī meꞌ Pariseo duk paꞌinde pu si Isa, “Palanjal ne kew, peggeꞌ batang koꞌ kew papatey Sultan Herod.” 32Paꞌin si Isa si siye, “Pī kaꞌam, akahanun bi si Herod maꞌakkalan miyaꞌan weꞌ maꞌin duk sumu palanjalku hinangkun magpaluwas seyitan duk magpakawuliꞌ meꞌ masakihin, duk si katellu ellewnen ubus ne hinangkun. 33Saguwaꞌ subey ku palanjal si palumengngananku maꞌin, duk sumu, duk sampay sumudde. Gaꞌ du niyaꞌ umantag si aku tuꞌu. Peggeꞌ meꞌ nabi maꞌekkahin pinapatey laꞌi si Awrusalam.”
34Manjari dukka si Isa sabab hinangan meꞌ aꞌa si Awrusalamin duk paꞌinne, “O meꞌ aꞌa Awrusalam, suse ku sabab kaꞌam. Luwal papateybi meꞌ nabihin duk pagtibaganbi meꞌ dinaꞌak Tuhan mapiyu si kaꞌamin. Mimpiye ne kaꞌam batang pagtipunku duk ipatku kuweꞌ dalil bukaran magtipun meꞌ usuynen diyawaꞌ peppikne, saguwaꞌ gaꞌi kaꞌam ngatu. 35Payamanun bi, tinayikutan ne lahatbin weꞌ Tuhanin. Duk akahante kaꞌam weꞌ gaꞌi ne ku teꞌed kitebi samantaꞌan gaꞌi tekka ellew pagpaꞌinbin, ‘Pudjite bi pinapitu Tuhanin!’ ”
Okuqokiwe okwamanje:
Lukas 13: yakV
Qhakambisa
Dlulisela
Kopisha
Ufuna ukuthi okuvelele kwakho kugcinwe kuwo wonke amadivayisi akho? Bhalisa noma ngena ngemvume
© 2019, Wycliffe Bible Translators, Inc. All rights reserved.
